འཛམ་གླིང་འཕྲོད་བསྟེན་ཚོགས་ཆེན་སྐབས་ནད་ཡམས་གདོང་ལེན་བྱེད་ཕྱོགས་སྐོར་ལ་བགྲོ་གླེང་ཤུགས་ཆེན་གནང་བ་དང་འབྲེལ་མ་འོངས་ནད་ཡམས་སྔོན་འགོག་གི་གྲོས་གཞི་བཏོན་ཡོད་འདུག
ཟླ་འདིའི་ཕྱི་ཚེས་ ༢༡ ཉིན་ནས་ཉིན་གྲངས་བཅུའི་རིང་སུད་སི་རྒྱལ་ས་ཇེ་ནེ་ཝ་རུ་འཛམ་གླིང་འཕྲོད་བསྟེན་སྒྲིག་འཛུགས་ཀྱི་གོ་སྒྲིག་འོག འཛམ་གླིང་འཕྲོད་བསྟེན་ཚོགས་ཆེན་ཐེངས་ ༧༦ པ་འཚོགས་ཡོད་པ་དང་། ཐེངས་འདིར་རྒྱལ་ཚོགས་ཀྱི་རྒྱལ་ཁབ་ ༡༩༤ ཡི་འཕྲོད་བསྟེན་ཚོགས་པའི་མི་སྣ་མཉམ་ཞུགས་གནང་ཡོད་ཅིང་། ཚོགས་ཐོག་ཏུ་མ་འོངས་བའི་འཛམ་གླིང་གི་ནད་ཡམས་སྔོན་འགོག་ཆེད་དུ་བསྐྱར་བཅོས་དགོས་པའི་སྒྲིག་གཞིའི་སྐོར་ལ་གྲོས་མོལ་བྱས་ཡོད་པ་མ་ཟད། ཚོགས་འདུའི་དམིགས་ཡུལ་ལྟར་ན་ཕྱི་ལོ ༢༠༢༥ ཟླ་ ༥ ནང་འཚོག་གཏན་ཁེལ་བའི་འཕྲོད་བསྟེན་ཆོགས་ཆེན་སྐབས་ ༧༧ པའི་སྟེང་ཁྲིམས་མཐུན་གྲོས་ཆོད་དུ་ངེས་གཏན་བྱ་རྒྱུ་ཡིན་འདུག
ཚོགས་ཆེན་སྟེང་འཕྲོད་བསྟེན་སྒྲིག་འཛུགས་ཀྱི་ཚོགས་མིའི་བསྡུ་དངུལ་བརྒྱ་ཆ་ ༢༠ ཡར་སྤར་ཏེ་རྩིས་ལོ་ ༢༠༢༤།༢༠༢༥ ལོའི་སྔོན་རྩིས་ཨ་སྒོར་ཐེར་འབུམ་ ༦།༨༣ གཏན་འབེབས་བྱས་ཡོད་ཅིང་། སྐབས་དེར་འཛམ་གླིང་འཕྲོད་བསྟེན་སྒྲིག་འཛུགས་ཀྱི་འགན་འཛིན་སྐུ་ཞབས་ཌེ་སྒྲོ་སི་ཨཱ་ཊཱ་ནོམ་གྷེ་བི་རེ་ཡེ་སུ་སི་(Tedros Adhanom Ghebreyesus)ལགས་ཀྱིས། ང་ཚོས་འཛམ་གླིང་འཕྲོད་བསྟེན་སྒྲིག་འཛུགས་དབུ་བརྙེས་ཏེ་ལོ་ངོ་ ༧༥ འཁོར་བའི་དུས་དྲན་གཙི་སྲུང་བྱས་ནས་འདས་བའི་ལས་དོན་ཐམས་ཅད་ལ་གྲུབ་འབྲས་བྱུང་ཡོད་ཀྱང་། ཏོག་དབྱིབས་གཉན་རིམས་ཀྱི་ཛ་དྲག་ཆེ་བའི་གནས་སྟངས་ཀྱིས་ང་ཚོར་དཀའ་ངལ་འཕྲད་ཡོད་པ་བཞིན་དུ། འདས་དོན་གྱི་བསླབ་བྱ་དག་བླངས་ནས་མ་འོངས་བར་ས་ཕྱོགས་གང་སར་ཡོད་པའི་མི་མང་ཚང་མར་འཕྲོད་བསྟེན་གྱི་ཞབས་འདེགས་སྒྲུབ་དགོས། ལས་དོན་དེ་དག་སྒྲུབ་པར་འཛམ་གླིང་གི་རྒྱལ་ཁབ་ཚང་མས་འཕྲོད་བསྟེན་གྱི་སྒྲིག་གཞི་བསྐྱར་གསོ་བྱེད་པར་རྒྱབ་སྐྱོར་བྱ་དགོས་པ་མ་ཟད། འཕྲོད་བསྟེན་གྱི་ལས་དོན་བྱེད་ཕྱོགས་ཐམས་ཅད་ཚགས་ཚུད་ཡོང་བར་འབད་བརྩོན་བྱེད་དགོས་སྐོར་གསུངས་འདུག
ཡང་མཇུག་སྡོམ་མཛད་སྒོའི་སྐབས་སུ་ཁོང་གིས། ཚོགས་ཞུགས་པ་རྣམས་ཀྱིས་ཚོགས་འདུའི་ནང་དུ་བཞག་པའི་གྲོས་གཞི་དེ་དག་ལོ་གཅིག་གི་ནང་དུ་མངོན་འགྱུར་ཡོང་བར་ཤུགས་རྒྱག་དགོས་ཤིང་། དེ་ནི་མ་འོངས་བའི་མི་རབས་ཀྱི་བདེ་སྡུག་དང་འབྲེལ་བའི་གནད་དོན་གལ་ཆེན་ཞིག་ཡིན་པས། ཏོག་དབྱིབས་གཉན་རིམས་ཀྱི་གནས་སྟངས་འོག་དཀའ་སྡུག་མྱངས་ཟིན་པའི་བསླབ་བྱ་བླངས་ཏེ། མ་འོངས་བའི་མི་རབས་ཚོར་བདེ་འཇགས་ཀྱི་ཁོར་ཡུག་བསྐྲུན་པའི་འགན་ད་ལྟའི་མི་རབས་ཚོར་ཡོད་སྐོར་སོགས་བརྗོད་ཡོད་འདུག
ད་ལྟའི་ཆར་འཛམ་གླིང་འཕྲོད་བསྟེན་སྒྲིག་འཛུགས་ལ་ཚོགས་མི་རྒྱལ་ཁབ་ཁྱོན་ ༡༩༤ ཡོད་ཅིང་། ཕྱི་ལོ་ ༡༩༤༨ ཟླ་ ༤ ཚེས་ ༧ ཉིན་གསར་འཛུགས་བྱས། འཕྲོད་བསྟེན་སྒྲིག་འཛུགས་འདི་ནི་མཉམ་འབྲེལ་རྒྱལ་ཚོགས་ཀྱིས་ཆེད་དུ་འཛམ་གླིང་མི་མང་གི་འཕྲོད་བསྟེན་བདེ་ཐང་སླད་བཙུགས་པའི་རྒྱལ་སྤྱིའི་འཕྲོད་བསྟེན་སྒྲིག་འཛུགས་ཆེ་ཤོས་དེ་ཡིན་པ་རེད་ལ། ད་ལྟའི་ཆར་སྒྲིག་འཛུགས་འདིའི་དབུས་ལས་ཁུངས་སུད་སིའི་རྒྱལ་ས་ཇེ་ནེ་ཝར་ཡོད་ཅིང་། འཛམ་གླིང་ཁྱོན་ཡོངས་སུ་ཡན་ལག་ལས་ཁུངས་ ༡༥༠ དང་གླིང་ཕྲན་རིམ་པའི་ལས་ཁུངས་ ༦ བཅས་འདུག
གསར་འགོད་པ། བྱམས་པ་ཚེ་རིང་།
