གྷི་རི་སི་ཡུལ་མི་གནས་སྤོ་བློན་ཆེན་གྱིས་ཡོ་རོབ་མཐུན་ཚོགས་ཀྱིས་ཡུལ་མི་གནས་སྤོ་སྲིད་ཇུས་བསྐྱར་ཞིབ་བྱ་གལ་ཆེ་སྐོར་བརྗོད་འདུག
ཁ་སང་ཕྱི་ཚེས་ ༡༤ ཉིན་གྷི་རི་སི་ནས་ཨི་ཊ་ལིར་འགྲོ་བཞིན་པའི་མཚོ་གྲུ་ཞིག་མཚོ་ནང་དུ་འཐིམས་ནས་ཉུང་མཐར་མི་༧༩ རྐྱེན་འདས་ཕྱིན་ཡོད་ཅིང་། མི་བརྒྱ་སྐོར་ཞིག་གར་སོང་ཆ་མེད་དུ་གྱུར་ཡོད་པ་དང་། སྲོག་ཉེན་ལས་ཐར་བའི་མི་མང་ ༢༥ ལ་ཀཱ་ལཱ་མཱ་ཏཱ་(kalamata) ས་ཁུལ་གྱི་གྲོང་གསེབ་སྨན་ཁང་དུ་སྨན་བཅོས་བྱེད་བཞིན་ཡོད་འདུག
གྷི་རེ་སི་སྲིད་འཛིན་ཀཱ་ཌར་རི་ནཱ་( Katerina Sakellaropoulou)་མཆོག་མྱུར་སྐྱོབ་བྱེད་ཡུལ་དུ་བསྐྱོད་ནས་རྐྱེན་འདས་སུ་ཕྱིན་པར་མྱ་ངན་ཞུས་ཡོད་ཅིང་། གྷི་རི་སི་རྒྱལ་ཁབ་ཀྱི་འཕྲོད་བསྟེན་བློན་ཆེན་ལཱོན་ནི་སི་སཱར་མཱ་སི་(Ioannis Sarmas)་ལགས་ཀྱིས། སྙིང་རྗེ་མེད་པའི་ནག་ཚོང་གིས་ང་ཚོ་མིའི་རིགས་ཀྱི་བདེ་སྐྱིད་གཏོར་བཤིག་བཏང་བ་ཡིད་ལ་བཅིངས་ནས། ཉིན་གསུམ་རིང་གྷི་རི་སི་རྒྱལ་ཡོངས་ཀྱི་མྱ་ངན་ཞུ་རྒྱུ་ཡིན་སྐོར་བསྒྲགས་འདུག
གྷི་རི་སི་མཚོ་འགྲམ་ལྟ་སྲུང་མགྲིན་ཚབ་པ་ནི་ཀོ་སི་ཨ་ལེ་ཞུའུ་(Nikos Alexiou)་ལགས་ཀྱིས། མཚོ་གྲུ་ནང་དུ་མི་ག་ཚོད་ཡོད་མེད་ཀྱི་གྲངས་ཀ་གསལ་བོ་མི་འདུག་ཅིང་། མཚོ་གྲུའི་ནང་གི་མི་རྣམས་གློ་བུར་དུ་ཕྱོགས་གཅིག་ལ་གནས་སྤོ་བྱས་པས་མགོ་རྟིང་སློག་ཡོད་འདུག ཕལ་ཆེར་མཚོ་གྲུའི་ཕྱི་ནང་གཉིས་ཀྱི་ནང་དུ་མི་མང་པོ་ཁེངས་འདུག་ཅེས་བརྗོད་འདུག
ཀཱ་ལཱ་མཱ་ཐཱ་ལྷོ་ཕྱོགས་གྲུ་ཁའི་གྲོང་སྡེ་སྤྱི་ཁྱབ་ལཱོན་ནི་སི་ཛཱ་ཧྥི་རོ་པུ་ལོ་སི་(Ioannis Zafiropoulos)་ལགས་ཀྱིས། མཚོ་གྲུའི་ནང་དུ་མི་༥༠༠ ལྷག་ཡོད་ཅིང་། གྷི་རི་སི་ལྷོ་ནུབ་ཕྱོགས་ཀྱི་སྤྱི་ལེ་ ༧༥ མཚམས་ཀྱི་རྒྱ་མཚོ་གཏིང་ཟབ་སར་ཐག་ཉེ་བར་གྱུར་སྐབས་གནོད་འཚེ་ཐེབས་ཡོད་པ་དང་། ཐེངས་འདིར་མི་གྲངས་༡༠༤ སྐྱོབ་ཐབས་བྱུང་ཡོད་པ་ལས། མི་གྲངས་ ༢༥ ལ་སྨན་བཅོས་བྱེད་མུས་འདུག དེའི་ཁྲོད་ནས་ལོ་ཆུང་ཤོས་ ༡༦ དང་། ལོ་ཆེ་ཤོས་ ༤༩ བཅས་ཡིན་འདུག ཀཱ་ལཱ་མཱ་ཐའི་རྒྱ་གྲམ་དམར་པོ་ཚོགས་པའི་ཚོགས་གཙོ་ཀཱ་ཌི་རི་ནཱ་ལགས་ཀྱིས་ད་ལྟ་ཆར་སྲོག་ཉེན་ལས་ཐར་ཡོད་པའི་མི་མང་པོ་ཞིག་ལ་འཕྲོད་བསྟེན་གྱི་དཀའ་ངལ་འཕྲད་བཞིན་ཡོད་སྐོར་དང་གྷི་རི་སི་ལྟ་སྲུང་བས་སྲོག་ཉེན་ལས་ཐར་བའི་ཁྲོད་ཨེ་ཇེབ་ཀྱི་མི་གྲངས་ ༣༠ དང་། པཱ་ཀི་སི་ཐན་གྱི་མི་གྲངས་ ༡༠ པ་དང་། སི་རི་ཡའི་མི་གྲངས་ ༣༥ ། དེ་བཞིན་པཱ་ལེ་སི་ཊན་གྱི་མི་གྲངས་ ༢ ་བཅས་ཡོད་འདུག
གྷི་རི་སི་ཡུལ་མི་གནས་སྤོའི་བློན་ཆེན་(Yiorgos Michaelidis) ལགས་ཀྱིས། འདི་ནི་ཁྲིམས་འགལ་གྱི་དངུལ་སྤྲད་ནས་མི་མང་ལྐོག་འདྲེན་བྱེད་པ་ཙམ་མ་རེད། གནད་དོན་འདི་ནི་གྷི་རི་སི་དང་། ཨི་ཊ་ལ་སོགས་ཀྱི་སྐྱབས་བཅོལ་བ་དང་མི་མང་གནས་སྤོའི་དཀའ་ངལ་ཙམ་མ་ཟད། ཡོ་རོབ་མཐུན་ཚོགས་ཀྱི་བདེ་འཇགས་དང་འབྲེལ་བ་དམ་ཟབ་ཡོད་པས། ཡུལ་མི་གནས་སྤོ་སྲིད་ཇུས་བསྐྱར་ཞིབ་བྱ་གལ་ཆེ་སྐོར་བརྗོད་འདུག ལོ་རེ་བཞིན་ཡུལ་མི་གནས་སྤོ་བའི་གནད་དོན་གྱིས་མི་བརྒྱ་སྐོར་རེ་རྐྱེན་འདས་སུ་གྱུར་བཞིན་ཡོད་ཅིང་། འདི་ལོའི་ཕྱི་ཟླ་གཉིས་པའི་ནང་དུའང་ཨི་ཊ་ལི་ལྷོ་ཕྱོགས་ཀྱི་ཁཱ་ལཱ བྷི་རི་ཡ་(Calabria )ས་ཁུལ་ཡུལ་མི་གནས་སྤོ་བ་༩༤ རྐྱེན་འདས་སུ་ཕྱིན་ཡོད་འདུག མཉམ་འབྲེལ་རྒྱལ་ཚོགས་ཀྱི་སྙན་ཐོའི་ནང་དུ་ད་ལོ་གཅིག་པོ་ཡུ་རོབ་རྒྱལ་མཚམས་བརྒལ་ནས་ཡུལ་མི་གནས་སྤོ་བ་དང་སྐྱབས་བཅོལ་བ་ཁྲི་བདུན་ལྷག་འབྱོར་ཡོད་པ་དང་། དེའི་ཁྲོད་ཀྱི་མང་ཤོས་ནི་ཨི་ཊ་ལི་རྒྱལ་ཁབ་བརྒྱུད་ནས་ཡོང་བ་ཡིན་འདུག
གསར་འགོད་པ། བྱམས་པ་ཚེ་རིང་།
