སྲིད་སྐྱོང་སྤེན་པ་ཚེ་རིང་མཆོག་གིས་ནེའུ་ཛི་ལན་ཌིས་བོད་དོན་གླེང་སློང་གནང་བའི་འབོད་སྐུལ་དང་སྦྲགས་རྒྱ་ནག་ཐོག་སྲིད་ཇུས་བརྟན་པོ་འཛིན་དགོས་སྐོར་གསུངས་འདུག
ད་ལྟའི་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ནེའུ་ཛི་ལན་དང་ཨོ་གླིང་ནང་གཞུང་འབྲེལ་ཕྱོགས་སྐྱོད་དུ་ཕེབས་བཞིན་ཡོད་པ་ལྟར། ནེའུ་ཛི་ལན་ཌིའི་གཞུང་འབྲེལ་གསར་ཁང་ནེའུ་ཛི་ལན་ཌི་(nzherald) གསར་ཁང་གིས་སྲིད་སྐྱོང་མཆོག་ལ་བཅར་འདྲི་ཞུས་པའི་གནས་ཚུལ་ལྟར་ན། སྲིད་སྐྱོང་སྤེན་པ་ཚེ་རིང་མཆོག་གིས། བོད་ནང་གི་གནས་སྟངས་ནི་ཧ་ཅང་ཛ་དྲག་རེད། བོད་ཀྱི་རིག་གཞུང་དང་ངོ་བོ་རྩ་མེད་དུ་བཏང་བ་ཡིན་ཚེ། ཆབ་སྲིད་དང་ཆོས་ལུགས་ཀྱི་རང་དབང་གླེང་ས་ཅི་ཡང་མེད། ང་ཚོས་༧གོང་ས་རྒྱལ་བ་རིན་པོ་ཆེ་མཆོག་གི་དགོངས་པ་བཞིན་དབུ་མའི་ལམ་དུ་འགྲོ་བཞིན་ཡོད་ཅིང་། རང་སྲིད་རང་སྐྱོང་ལས་རང་བཙན་བརྩོན་ལེན་བྱེད་ཀྱི་མེད། དབུ་མའི་ལམ་ནི་རྒྱ་ནག་ཙམ་མ་ཟད་རྒྱལ་སྤྱིའི་སྤྱི་ཚོགས་ལ་དགེ་ཕན་ཆེན་པོ་ཡོད། ད་ལྟའི་ཆར་རྒྱ་གཞུང་གིས་མ་རྩ་རིང་ལུགས་ཀྱི་བཅའ་སྡོད་སློབ་གྲྭའི་སྲིད་ཇུས་ལག་བསྟར་གྱིས་བོད་ཀྱི་སྐད་ཡིག་དང་། རིག་གཞུང་། ཆོས་ལུགས་བཅས་གཏོར་བཤིག་གཏོང་བཞིན་ཡོད་པས། ངས་རྒྱུན་དུ་ང་ཚོ་ག་ལེར་ཉམས་རྒུད་དུ་འགྱུར་བཞིན་ཡོད་ཟེར་གྱི་ཡོད། ནེའུ་ཛི་ལན་ཌི་གཞུང་གིས་འཛམ་གླིང་གི་དཀའ་ངལ་འཕྲད་བཞིན་པའི་མི་མང་ལ་གདེང་འཇོག་གནང་ཡོད་པ་ཤེས་ཀྱི་འདུག ད་ལྟའི་ཆར་རྒྱ་ནག་ནི་འཛམ་གླིང་སྟེང་དུ་སྟོབས་ཤུགས་ཆེན་པོ་ཡོད་ཀྱང་། ནུབ་ཕྱོགས་རྒྱལ་ཁབ་ཁག་དང་ནུབ་ཆིངས་སྒྲིག་འཛུགས་ཀྱི་མཚོན་པའི་ས་ཁུལ་དུ་རྒྱ་ནག་གིས་རང་གི་ཆབ་སྲིད་བེད་སྤྱོད་བྱེད་ཐུབ་ཀྱི་མེད། ནེའུ་ཛི་ལན་ཌིས་རྒྱ་ནག་ཐོག་སྲིད་ཇུས་བརྟན་པོ་འཛིན་དགོས་ཞེས་གསུངས་པ་དང་སྦྲགས། ནེའུ་ཛི་ལན་ཌིའི་སྲིད་བློན་ཁུ་རེ་སི་ཧི་ཕུ་ཀིན་སི་ (Chris Hipkins) ལགས་ནས་རྒྱ་ནག་གཞུང་དང་ལྷན་དུ་བོད་ལ་ཚད་མཐོའི་རང་སྲིད་རང་སྐྱོང་སྤྲོད་དགོས་པའི་གནད་དོན་གླེང་སློང་གནང་བའི་འབོད་སྐུལ་ཡང་ཞུས་ཡོད་འདུག
སྲིད་སྐྱོང་སྤེན་པ་ཚེ་རིང་མཆོག་གི་ངོ་དེབ་ཀྱི་གནས་ཚུལ་ལྟར་ན། དེ་རིང་ཕྱི་ཚེས་ ༡༦ ཉིན་རྒྱབ་ནེའུ་ཛི་ལན་ཌི་རྒྱལ་ས་ཝེ་ལིན་ཌོན་གྱི་གྲོས་ཚོགས་ཚོགས་ཁང་དུ། ནེའུ་ཛི་ལན་ཌི་རྒྱལ་ཡོངས་སྲིད་དོན་ཚོགས་པའི་ཕྱི་སྲིད་ལྷན་ཁང་གི་མགྲིན་ཚབ་པ་དང་གྲོས་ཚོགས་འཐུས་མིའི་རྒྱ་ནག་ལས་དོན་ཚོགས་ཆུང་གི་འགན་འཛིན་ (National Party Spokesperson for Foreign Affairs and Co-Chair of Inter-Parliamentary Alliance on China )སྐུ་ཞབས་སི་མོན་ཨོ་ཁོན་ནོར་ལགས་ཀྱི་གོ་སྒྲིག་འོག སྲིད་སྐྱོང་སྤེན་པ་ཚེ་རིང་མཆོག་གིས་ནེའུ་ཛི་ལན་ཌིའི་གཡས་ལྷུང་( ACT Party) སྲིད་དོན་ཚོགས་པའི་གྲོས་ཚོགས་འཐུས་མི་ཇཱ་མེ་སི་མེ་ཌོ་ཝེལ་(James Mcdowall) ལགས་བཅས་གྲོས་ཚོགས་འཐུས་མི་ཁག་ཅིག་ལ་མཇལ་འཕྲད་གནང་ཡོད་ཅིང་། ལྗང་ཁུ་སྲིད་དོན་ཚོགས་པའི་གྲོས་ཚོགས་འཐུས་མི་གྷོལ་རི་ཛི་གྷ་རཱ་མེན་((Golriz Gharaman )་ལགས་དང་། ངལ་རྩོལ་སྲིད་དོན་ཚོགས་པའི་གྲོས་ཚོགས་འཐུས་མི་ཧེ་ལེན་ཝི་ཌི་(Helen White)་ལགས་གཉིས་ནས་དྲ་ལམ་བརྒྱུད་མཇལ་མོལ་གནང་འདུག
ཁ་སང་ཕྱི་ཚེས་ ༡༥ ཉིན་ནེའུ་ཛི་ལན་ཌིའི་གྲོང་ཁྱེར་ཨོ་ཁི་ལན་ཌི་ཡའི་ཨེ་ལེར་སི་ལེ་དམག་འཁྲུག་དྲན་གསོ་ཚོགས་ཁང་(Ellerslie War Memorial Hall )་དུ། སྲིད་སྐྱོང་མཆོག་གསོལ་སྟོན་མཛད་སྒོར་གདན་ཞུས་ཀྱིས་བོད་དོན་གསུང་བཤད་གནང་ཡོད་པ་དང་། སྐབས་དེར་ནེའུ་ཛི་ལན་ཌི་གྲོས་ཚོགས་ཀྱི་ཚོགས་གཞོན་ཟུར་བ་དང་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོག་གཙོ་ཨེ་ཡན་རཱ་ཝེལ་མཆོག་དང་། བོད་དོན་རྒྱབ་སྐྱོར་ཚོགས་པ། བོད་ཕྲུག་རོགས་སྐྱོར་ཚོགས་པ། རྒྱ་བོད་མཛའ་འབྲེལ་ཚོགས་པ་བཅས་ཀྱི་ཚོགས་མི་རྣམས་དང་མཇལ་འཕྲད་གནང་འདུག ཡང་དེ་རིང་སྔ་དྲོ་ནེའུ་ཛི་ལན་ཌིའི་རྒྱལ་ས་ཝི་ལན་ཌོན་དུ་རྟེན་གཞི་བྱས་ཡོད་པའི་རྒྱལ་ཡོངས་དཔེ་མཛོད་ཁང་དུ། སྲིད་སྐྱོང་མཆོག་གིས་བོད་ཀྱི་གྲོགས་པོ་ཚོགས་པ་དང་། སྙིང་རྗེ་སྤྱི་ཚོགས་ཞབས་ཞུ་ཚོགས་པ། ཆོས་ཚོགས་ཁག་གི་སློབ་ཕྲུག་བཅས་མཇལ་འཕྲད་གནང་སྟེ། ད་ལྟ་སྲིད་སྐྱོང་མཆོག་གི་ནེའུ་ཛི་ལན་ཌིའི་མཛད་རིམ་ཡོངས་མཇུག་སྒྲིལ་ཡོད་པ་རེད།
གསར་འགོད་པ། བྱམས་པ་ཚེ་རིང་།
