འདི་ལོའི་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེའི་སྙིང་སྟོབས་གཟེངས་རྟགས་དེ་བོད་ཀྱི་ཆབ་སྲིད་བཙོན་པ་དང་ཚོང་པ་གྲགས་ཅན། སྤྱི་ཚོགས་ཞབས་ཞུ་པ་རྡོ་རྗེ་བཀྲ་ཤིས་ལགས་དང་། ཁོང་གི་གཅེན་མོ་མགོན་པོ་སྐྱིད་ལགས་གཉིས་ལ་ཕུལ་སོང་།
དེ་རིང་ཕྱི་དྲོ་ཆུ་ཚོད་༥།༠༠ ཐོག་དྷ་ས་མེག་གྷན་ནོར་བུ་བོད་ཀྱི་གསོལ་མགྲོན་ཁང་དུ། བོད་ཀྱི་བུད་མེད་ལྷན་ཚོགས་དང་བོད་རྒྱལ་ཡོངས་མང་གཙོ་ཚོགས་པ། བོད་རང་བཙན་སློབ་ཕྲུག་ཚོགས་པ། རྒྱལ་སྤྱིའི་བོད་དོན་འབྲེལ་མཐུད་ལས་ཁང་བཅས་ཀྱི་གོ་སྒྲིག་འོག སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེའི་སྙིང་སྟོབས་གཟེངས་རྟགས་ཕུལ་བའི་མཛད་སྒོ་ཞིག་འཚོགས་ཅིང་། ཐེངས་འདིའི་ཚོགས་ཐོག་ཏུ་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་། ཆབ་སྲིད་བཙོན་ཟུར་དོན་འགྲུབ་དབང་ཆེན་ལགས། ཆབ་སྲིད་བཙོན་ཟུར་དགེ་བཤེས་ཚེ་རིང་རྡོ་རྗེ་ལགས། བོད་གནས་ལྟ་ཞིབ་ཁང་གི་འགན་འཛིན་བན་ཏེ་སྐྱབས་ལགས་བཅས་ཀྱི་གཙོས་དྷ་སའི་སེར་སྐྱ་མི་མང་བཅས་མཉམ་ཞུགས་གནང་འདུག
སྤྲུལ་སྐུ་བསྟན་འཛིན་དགེ་ལེགས་རིན་པོ་ཆེ་བཙོན་འཇུག་བྱས་པའི་སྐོར་ལ་ཁོང་གི་དགེ་ཕྲུག་དགེ་བཤེས་ཚེ་རིང་རྡོ་རྗེ་ལགས་ཀྱིས། རིན་པོ་ཆེས་ལོ་གཅིག་རིང་བཙོན་ཁང་ནང་དུ་སྡུག་མྱངས་བའི་གནས་ཚུལ་ཧ་མ་གོ་བ་ཞིག་ཆགས་སོང་། ཉིན་གཅིག་དཀར་མཛེས་ཁུལ་ནང་གི་རྫོང་བཅོ་བརྒྱད་ཀྱི་དཔོན་རིགས་ཆེ་ཁག་དང་། བླ་མ་ཆེ་ཁག་བཅས་མི་གྲངས་ཁྱོན་ ༢༠༠ ལྷག་ཁྲིམས་རྭར་སྐད་བཏང་ནས་ཁྲིམས་ཐག་གཅོད་རྒྱུ་བྱས་པ་རེད། སྐབས་དེར་རིན་པོ་ཆེས། ངས་ལོ་གཅིག་གི་རིང་ཁྲིམས་དྲང་པོ་བྱ་རྒྱུ་རེད་བསམ་ནས་སྒུག་ཀྱང་དྲང་པོ་བྱས་མ་སོང་། དེ་རིང་འདིར་བོད་རིགས་མགོ་ཁྲིད་མང་པོ་ཞིག་ཕེབས་འདུག་པར་ཧ་ཅང་དགའ་བོ་བྱུང་སོང་། ཁྱེད་ཚོས་ཤེས་དགོས་པ་ཞིག་ལ་ང་རང་ལ་མི་རིགས་ཀྱི་ལ་རྒྱ་ཡོད་པར་བསྙད་དེ་ཁྲིམས་ཐག་གཅོད་ཀྱི་ཡོད་པ་རེད། དེ་ཁྱེད་ཚོས་ཤེས་དགོས་པ་རེད། ༧གོང་ས་རྒྱལ་བ་རིན་པོ་ཆེ་མཆོག་གི་སྐུ་ཚེ་ཁྲི་ལོ་བརྟན་པར་ཤོག བོད་ལ་རང་དབང་དགོས་ཞེས་སྐད་བརྒྱབ་པས། ཁོང་གི་ཁ་ལ་རས་དཀྲིས་ཏེ་བཙོན་ཁང་དུ་ཁྲིད་དུ་སོང་། དེ་དུས་རྒྱ་མི་ཞིག་གིས་ཁྲིམས་གཅོད་འདི་རྫོགས་ཚར་རེད། ཁྱེད་ཚོ་སོ་སོའི་རྫོང་ལ་འགྲོ་དུས་མི་སུ་ལའང་བཤད་མི་ཆོག གལ་སྲིད་གནས་ཚུལ་འདི་གཞན་ལ་བཤད་ཚེ། ཁྱེད་ཚོ་བཙོན་ཁང་དུ་འཇུག་རྒྱུ་ཡིན་པ་མ་ཟད། གོ་གནས་ཀྱང་ཕབ་རྒྱུ་ཡིན་པའི་འཇིགས་སྐུལ་བྱས་སོང་ཞེས་འགྲེལ་བརྗོད་གནང་སོང་།
ཚོང་བ་རྡོ་རྗེ་བཀྲ་ཤིས་དང་གཅེན་མོ་མགོན་པོ་སྐྱིད་ཀྱི་སྐོར་ལ་བོད་གནས་ལྟ་ཞིབ་ཁང་གི་འགན་འཛིན་བན་ཏེ་སྐྱབས་ལགས་ཀྱིས། ཕྱི་ལོ་ ༢༠༠༨ ལོར་བོད་ནང་གི་ས་བྱི་ལོའི་ཞི་རྒོལ་ཆེན་མོའི་སྐབས་སུ་རྡོ་རྗེ་བཀྲ་ཤིས་ལགས་མཉམ་ཞུགས་དང་སྐུལ་སློང་བྱས་པའི་མ་ཉེས་ཁ་གཡོགས་ཀྱིས་ཟླ་མང་པོའི་རིང་འཛིན་བཟུང་བྱས་ཏེ་མནར་གཅོད་བཏང་ཡོད་ཀྱང་། ཁོང་ལ་ཉེས་འཛུགས་བྱས་པ་ཅི་ཡང་ཁས་ལེན་བྱས་མེད་པས། རྒྱ་གཞུང་ནས་ཡང་བསྐྱར་ཁོང་ལ་ཁ་བྲལ་རིང་ལུགས་པར་དཔལ་འབྱོར་གྱི་རོགས་རམ་བྱས་པའི་ནག་ཉེས་ཞིག་བཙུགས་ཀྱང་། ནག་ཉེས་ཀྱི་དཔང་རྟགས་ཅི་ཡང་སྟོན་ཐུབ་མེད་པ་རེད། མཐའ་མར་ཁོང་ལ་བུ་ལོན་གཡོ་ལེན་བྱས་པའི་ནག་ཉེས་བཙུགས་ནས་ཚེ་བཙོན་གྱི་ཁྲིམས་ཐག་བཅད་པ་རེད། རྡོ་རྗེ་བཀྲ་ཤིས་ལགས་ཀྱི་ནང་མིས་རྒྱ་ནག་པེ་ཅིན་སོགས་སུ་ཁྲིམས་རྩོད་པ་ལ་བགླས་ནས་ཁྲིམས་གཏུགས་རབ་དང་རིམ་པ་མང་པོ་བྱས་ཀྱང་། ཁྲིམས་གཏུགས་ལ་དྲང་བདེན་ཅི་ཡང་མ་བྱུང་པས། མཐའ་མ་ཐབས་ཟད་འུ་ཐུག་གིས་ཨ་ཅག་མགོན་པོ་སྐྱིད་ལགས་ཀྱིས་ལྷ་སའི་ཁྲིམས་ཁང་གི་སྒོ་མདུན་དང་། བཙོན་ཁང་གི་མདུན་དུ་ཉིན་རེ་བཞིན་ལས་འགུལ་སྤེལ་དགོས་བྱུང་ཡོད་ཅིང་། རྒྱ་ནག་གི་རྩ་ཁྲིམས་ཐོག་ནས་དྲང་བདེན་ཅི་ཡང་བྱུང་མེད་པའི་ནག་ཉེས་ལ་བསྐྱར་ཞིབ་བྱ་དགོས་སྐད་འབོད་བརྒྱབ་པས། ཁོང་མོ་གཅར་རྡུང་དང་བཙོན་འཇུག་བྱས་ཡོད་པ་རེད་ཅེས་འགྲེལ་བརྗོད་གནང་སོང་། ཆབ་སྲིད་བཙོན་ཟུར་དོན་འགྲུབ་དབང་ཆེན་ལགས་ཀྱིས། དེ་རིང་གི་ཉིན་མོ་འདི་སྤྲུལ་སྐུ་བསྟན་འཛིན་དགེ་ལེགས་མཆོག་གི་མཚོན་པའི་སྐྱེས་ཆེན་དམ་པ་རྣམས་ཀྱི་རླབས་ཆེ་བའི་ཉིན་མོ་ཞིག་ཡིན་པས། ཁོང་རྣམས་ཀྱི་མཛད་རྗེས་རྗེས་དྲན་ཞུ་དགོས་པ་མ་ཟད། བོད་མི་རིགས་ཡོངས་ཀྱི་མཐུན་སྒྲིལ་རྡོག་རྩ་གཅིག་སྒྲིལ་བྱ་དགོས་པར་དམ་བཅའ་འཇོག་དགོས་པའི་ཉིན་མོ་ཞིག་རེད་ཅེས་བརྗོད་སོང་།
སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས། ད་ལྟའི་ཆར་ང་ཚོ་ཚང་མ་མཉམ་རུབ་ཀྱི་ཐོག་ནས་གོ་སྐབས་དམ་འཛིན་བྱས་ཏེ་རྒྱལ་སྤྱིའི་སྟེང་སྙོབ་ཐུབ་པ་དང་བོད་དོན་དྲིལ་བསྒྲགས་སོགས་བྱ་རྒྱུ་གལ་ཆེན་ཡིན་པ་དང་། དེ་ལ་བརྟེན་བོད་དོན་ལ་དོ་སྣང་དང་རྒྱབ་སྐྱོར་ཡོང་གི་ཡོད་པས། ང་ཚོའི་ནུས་པ་ཚང་མ་བོད་དོན་ཐོག་སྤུངས་པ་ཡིན་ན་ནུས་པ་སྤུངས་ས་ནོར་མེད་པ་དང་། ད་ལྟ་བཙན་བྱོལ་ནང་བོད་མི་འབུམ་གཅིག་དང་ཁྲི་གསུམ་ཙམ་ལས་མེད་པས། ད་ལྟའི་བར་༧སྐྱབས་མགོན་རིན་པོ་ཆེའི་བཀའ་དྲིན་ཉག་ཅིག་ལ་བརྟེན་ནས་བྱུང་བ་དང་། ང་ཚོས་༧རྒྱལ་བ་རིན་པོ་ཆེས་གསོལ་རས་སྩལ་བའི་མང་གཙོ་དེ་བདག་ཉར་ཡག་པོ་ཞིག་བྱེད་མ་ཐུབ་པ་ཡིན་ན། ང་ཚོ་ད་ལྟའི་བར་དུ་༧རྒྱལ་བ་རིན་པོ་ཆེས་མཛད་བཞག་པ་དག་གཏོར་མཁན་གྱི་མི་རབས་ཆགས་ཀྱི་ཡོད། དེ་འདྲ་ཞིག་ཆགས་པ་ཡིན་ན་ང་ཚོ་ལས་ལྷག་གི་ནག་ཉེས་ཅན་གྱི་མི་རབས་ཤིག་ཡོང་སྲིད་ཀྱི་མ་རེད། དེར་བརྟེན། རྒྱ་ཆེ་ས་ནས་བོད་སྤྱི་པའི་ཁེ་ཕན་ལ་བསམ་བློ་བཏང་ནས་ལས་ཀ་བྱས་པ་ཡིན་ན་ང་ཚོ་ནང་ཁུལ་གྱི་བཤད་རྒྱུ་གཏམ་རྒྱུ་ཇེ་ཉུང་དུ་འགྲོ་ཡི་རེད། ཅེས་གསུངས་སོང་།
ཡང་བོད་མི་རྣམས་ནས་མཐུན་ལམ་རྡོག་རྩ་གཅིག་ཏུ་སྒྲིལ་ནས་བོད་ཀྱི་རྩ་དོན་ཐོག་འགན་འཁུར་དགོས་སྐོར་ལ་སྲིད་སྐྱོང་མཆོག་གིས། ༧རྒྱལ་བ་རིན་པོ་ཆེས་མཛད་པ་བསྐྱངས་པ་དང་སྐྱོང་བཞིན་པ་དག་ལ་བརྟེན་ནས། འཛམ་གླིང་ནང་ང་ཚོར་ཆ་འཇོག་ཅིག་ཡོང་གི་ཡོད་རེད། ཉེ་ལམ་༧རྒྱལ་བ་རིན་པོ་ཆེས་རང་ངོས་རང་བློ་ཞུམ་མེད་དཱ་ཞེས་བཀའ་སློབ་ཡང་དང་བསྐྱར་དུ་གནང་གི་ཡོད་པ་དང་། དེ་བཞིན་༧རྒྱལ་བ་རིན་པོ་ཆེས་བཀའ་སློབ་རེ་གནང་ཡོང་དུས་ང་ཚོར་སེམས་ཤུགས་འཕར་བའི་རྒྱུ་ཞིག་ཆགས་ཀྱི་ཡོད་སྟབས། སྲིད་སྐྱོང་མཆོག་གིས་ཀྱང་སེམས་ཤུགས་ལྷོད་མེད་ཀྱི་ཐོག་ནས་རྒྱལ་སྤྱིའི་ཡུལ་ལུང་གང་དུ་ཕྱིན་ཡང་བོད་དོན་གླེང་སློང་གི་ཡོད་པ་མ་ཟད། བོད་དོན་བདེན་མཐའ་གསལ་བ་དང་གསོན་པོ་གནས་པའི་འགན་གཙོ་བོ་བོད་མི་རང་ལ་ཡོད་པས། རང་དབང་ལུང་པའི་ཡོད་པའི་བོད་མི་ཚོས་རང་ཉིད་བོད་པ་ཞིག་ཡིན་བསམས་པའི་འགན་འཕར་མ་ཞིག་འཁུར་དགོས་པ་གལ་ཆེན་ཡིན་པ་ལས། རང་ཉིད་བོད་པ་ཞིག་ཡིན་པའི་འདུ་ཤེས་མེད་པ་ཡིན་ན་སྒེར་གྱི་འཚོ་བ་ཁོ་ནར་མགོ་འཁོར་བ་ལས་གཞན་ཡོང་གི་མེད་སྐོར་སོགས་གསུངས་སོང་།
སྙིང་སྟོབས་གཟེངས་རྟགས་འདི་ནི་ཕྱི་ལོ་ ༢༠༡༦ ནས་བཟུང་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེའི་རྗེས་དྲན་བྱེད་ཆེད་དུ། ལོ་རེའི་ཕྱི་ཟླ་ ༧ ཚེས་ ༡༢ ཉིན་དམ་པ་ཁོང་ཉིད་རྒྱ་གཞུང་གི་བཙོན་ཁང་དུ་རྐྱེན་འདས་སུ་ཕྱིན་པའི་དུས་ཚོད་བསྟུན་ནས་སྲུང་གཙི་གནང་བཞིན་ཡོད་པ་དང་། བོད་ཀྱི་འགྲོ་བ་མིའི་ཐོབ་ཐང་སྲུང་སྐྱོབ་གནང་མཁན་གྱི་མི་སྣ་རྣམས་ལ་གནང་བཞིན་ཡོད་ལ། གཙོ་བོ་ཁོང་རྣམ་པའི་མཛད་རྗེས་ལ་ཆེ་བསྟོད་དང་འབྲེལ། ལས་དོན་འདི་བརྒྱུད་ནས་བོད་ནང་གི་བོད་མིའི་རང་དབང་དང་འགྲོ་བ་མིའི་ཐོབ་ཐང་སྲུང་སྐྱོབ་བྱ་རྒྱུའི་དམིགས་ཡུལ་གཙོ་བོ་བཟུང་ཡོད་འདུག གཟེངས་རྟགས་འདི་བཞེས་མཁན་གྱི་གྲས་སུ་བོད་ནང་གི་ཆབ་སྲིད་བཙོན་པ་པཎ་ཆེན་དགེ་འདུན་ཆོས་ཀྱི་ཉི་མ་མཆོག་དང་། ཡེ་ཤེས་ཆོས་སྒྲོན་ལགས། བཀྲ་ཤིས་དབང་ཕྱུག་ལགས། ཨ་ཉག་སེང་སྒྲ་ལགས། ཆབ་སྲིད་བཙོན་ཟུར་དོན་གྲུབ་དབང་ཆེན་ལགས་དང་མགོ་ལོག་འཇིགས་མེད་ལགས་བཅས་ཀྱི་མཛད་རྗེས་ལ་གཟེངས་བསྟོད་དུ་ཕུལ་ཡོད་འདུག
གསར་འགོད་པ། བྱམས་པ་ཚེ་རིང་། སྐལ་བཟང་སྦྱིན་པ།
