བོད་ཀྱི་གངས་དཀར་བུམ་པ་རྟགས་མའི་རྐང་སྤོལ་འགྲན་བསྡུར་ཁྲོད། ཀན་ལྷོའི་རྐང་སྤོལ་རུ་ཁག་ལ་ཕམ་ཁ་གཅིག་ཀྱང་མ་བྱུང་བར་འགྲན་སྐོར་དྲུག་ལས་རྣམ་པར་རྒྱལ་ཏེ་ཨང་དང་པོ་བླངས།
ཟླ་འདིའི་ཕྱི་ཚེས་ ༨ ནས་ ༡༤ བར་དཀར་མཛེས་ཁུལ་དར་མདོ་གྲོང་ཁྱེར་དུ་འཚོགས་པའི་༼གངས་དཀར་བུམ་པ་རྟགས་མའི་༽བོད་ཁམས་ཡོངས་ཀྱི་སྐབས་དང་པོའི་ན་གཞོན་རྐང་རྩེད་སྤོ་ལོའི་འགྲན་བསྡུར་དེ། ཁ་སང་ཕྱི་ཚེས་ ༡༤ ཉིན་མཇུག་སྒྲིལ་ཡོད་ཅིང་། མཐའ་མཇུག་གི་རྟིང་རྩོད་དེ་ཆབ་མདོ་དང་ཀན་ལྷོའི་རྐང་སྤོལ་རུ་ཁག་གཉིས་བར་རྩེད་འགྲན་བྱས་ཏེ། སྐབས་དང་པོའི་བོད་ཀྱི་ན་གཞོན་རྐང་རྩེད་སྤོ་ལོའི་འགྲན་སྡུར་དེ་ཀན་ལྷོའི་རུ་ཁག་ལ་རྒྱལ་ཁ་ཐོབ་ཡོད་པ་རེད།
རྒྱ་ནག་མི་དམངས་དྲ་བའི་སྟེང་གི་གནས་ཚུལ་ལྟར་ན། ཐེངས་འདིའི་སྐབས་དང་པོ་བོད་ཀྱི་རྐང་རྩེད་སྤོ་ལོའི་འགྲན་བསྡུར་ནང་། བོད་ལྗོངས་སམ་དབུས་གཙང་དང་མཚོ་སྔོན། ཡུན་ནན། ཀན་ལྷོ། སི་ཁྲོན་བཅས་བོད་ཆོལ་ཁ་གསུམ་གྱི་རྐང་སྤོལ་རུ་ཁག་ཆེད་དུ་གདན་ཞུ་གནང་ཡོད་པ་དང་། ཉིན་གྲངས་དྲུག་རིང་གི་རྩེད་འགྲན་ནང་རྐང་སྤོལ་རུ་ཁག་ཁྱོན་དགུ་མཉམ་ཞུགས་བྱས་ཡོད་འདུག
གངས་དཀར་བུམ་པ་རྟགས་མའི་རྐང་སྤོལ་འགྲན་བསྡུར་དེའི་ཁྲོད། ཀན་ལྷོའི་རྐང་སྤོལ་རུ་ཁག་ལ་ཕམ་ཁ་གཅིག་ཀྱང་མ་བྱུང་བར་འགྲན་སྐོར་དྲུག་ལས་རྣམ་པར་རྒྱལ་བར་མ་ཟད། རུ་ཁག་གི་སྤྱིའི་བཀོད་སྒྲིག་དང་ལུས་རྩལ་བའི་འགྲོས་སོགས་ཡག་པོ་ཡོད་པའི་ཁར། རྩེད་འགྲན་པ་དག་གིས་རྩེད་མོའི་མགོ་མཇུག་བར་གསུམ་དུ་བོད་ཡིག་གིས་བརྒྱན་ཞིང་བོད་ལྭ་གྱོན་ནས་བྱ་དགའ་བླངས་པས། རྒྱ་ཆེ་བའི་ལྟད་མོ་བ་མང་པོས་འཕྲིན་ལམ་ཁག་ཏུ་དགའ་བསུ་དང་ཡི་རངས་ཞུ་བཞིན་འདུག
ཀན་ལྷོ་འམ་མདོ་ལྷོའི་རྐང་སྤོལ་རུ་ཁག་གི་ལུས་རྩལ་བ་ཕལ་ཆེ་བ་ཀན་ལྷོ་ཁུལ་གྱི་བསང་ཆུ་དང་ཀླུ་ཆུ། རྨ་ཆུ་དང་གཙོས། ཅོ་ནེ་སོགས་ནས་ཡིན་ཞིང་། ལས་རིགས་མི་གཅིག་པའི་ཁོ་ཚོ་ནི་དགའ་ཕྱོགས་ཁོ་ནས་འཛོམས་པ་ཤ་སྟག་ཡིན་པ་ལས་ཆེད་ལས་ཀྱི་ཐོག་ནས་ལྷན་འཛོམས་བྱུང་བ་ཞིག་མིན་པ་རེད།
གསར་འགོད་པ། སྐལ་བཟང་སྦྱིན་པ།
