རྒྱ་ནག་ཧུའུ་པེ་ཞིང་ཆེན་གྱི་མགོ་འཁྲིད་གཞོན་པ་ཚའོ་ཀོང་ཅིན་ཟེར་བ་ཞིག་གིས་རྒྱ་སྒོར་དུང་ཕྱུར་ ༢ ལྷག་གི་ལྐོག་རྔན་བླངས་བའི་ནག་ཉེས་འོག་ཁྲིམས་བཤེར་བྱས་ཡོད་ཀྱང་ནག་ཉེས་ངོས་ལེན་བྱས་ལུགས་ཙམ་ལས་ཁྲིམས་ཐག་ཅི་བཅད་ཀྱི་གནས་ཚུལ་ཕྱིར་བསྒྲགས་བྱས་མེད་པ་རེད།
ཉེ་ཤས་སྔོན་རྒྱ་ནག་ཅང་སུའུ་ཞིང་ཆེན་ཞུས་ཀྲོའུ་གྲོང་ཁྱེར་འབྲིང་རིམ་མི་མང་ཁྲིམས་ཁང་གིས། ཧུའུ་པེ་ཞིང་ཆེན་གྱི་མགོ་འཁྲིད་གཞོན་པ་དང་། རྒྱ་ནག་འབྲི་ཆུ་འགག་གསུམ་འཛུགས་སྐྲུན་ལས་གཞི་ཚོགས་པའི་སྤྱི་ཁྱབ་འགན་འཛིན་གཞོན་པ། རྒྱ་ནག་འབྲི་ཆུ་འགག་གསུམ་མཐུན་ཚོགས་ཀྱི་སྤྱི་ཁྱབ་འགན་འཛིན་གཞོན་པ། སྤྱི་ཁྱབ་ལས་འཛིན་པ་ཚའོ་ཀོང་ཅིན་གྱིས་རྒྱ་སྒོར་དུང་ཕྱུར་ ༢།༡༦ གི་ལྐོག་རྔན་བླངས་བ་དང་། སྲིད་གཞུང་གི་གསང་བ་ཕྱིར་གྱར་བའི་ཉེས་མིང་འོག་ཁྲིམས་ར་འཚོགས་ཡོད་འདུག
དེའི་སྐོར་ལ་རྒྱ་ནག་ཅིང་སུའུ་ཞིང་ཆེན་ཞུས་ཀྲོའུ་གྲོང་ཁྱེར་མི་མང་ཞིབ་དཔྱོད་ཁང་གིས། ཚའོ་ཀོང་ཅིན་གྱིས་ཕྱི་ལོ་༢༠༠༤ ནས་ཕྱི་ལོ་ ༢༠༢༢ ལོའི་བར་དུ་རྒྱ་ནག་འབྲི་ཆུ་འགག་གསུམ་འཛུགས་སྐྲུན་ལས་གཞི་ཚོགས་པའི་སྤྱི་ཁྱབ་འགན་འཛིན་གཞོན་པ་དང་། འབྲི་ཆུ་འགག་གསུམ་གྱི་ལས་འཛིན་མཐུན་ཚོགས་ཀྱི་སྤྱི་ཁྱབ་པ། ཧུའུ་པེ་ཞིང་ཆེན་མི་མང་སྲིད་གཞུང་གི་མགོ་འཁྲིད་གཞོན་པ་སོགས་གཞུང་འབྲེལ་གྱི་གོ་གནས་བེད་སྤྱོད་ལོག་པར་བཏང་སྟེ། ལས་གནས་དང་། མི་སྒེར་གྱི་ཁེ་ལས། བཟོ་གྲྭ་འགན་ལེན། འཛུགས་སྐྲུན་གྱི་ལས་གཞི། གོ་གནས་སྤར་བ་སོགས་བྱས་ཡོད་སྐོར་དང་། ཧུའུ་པེ་ཞིང་ཆེན་གྱི་ཁྲོམ་འགྲེམས་བཟོ་གྲྭ་ཞིག་གི་མ་རྐང་ཁྲོམ་བསྒྲགས་མ་བྱས་གོང་ཕྱི་ལ་གནས་ཚུལ་ཤོར་བ་སོགས་ཀྱི་ནག་ཉེས་བཙུགས་འདུག
ཚའོ་ཀོང་ཅིན་ནི་ཐིན་ཅིན་འཛུགས་སྐྲུན་ལས་རིགས་མཐོ་སློབ་ཏུ་ཚན་རིག་དང་བཟོ་སྐྲུན་ཐོག་འབུམ་རམས་པའི་སློབ་སྦྱོང་བྱས་ཡོད་འདུག་ལ། ཕྱི་ལོ་ ༡༩༨༥ ནས་ ༢༠༠༢ བར་འབྲི་ཆུ་འགག་གསུམ་གྱི་བཟོ་སྐྲུན་ལས་གཞིའི་འགན་འཛིན་གཞོན་པའི་ལས་འགན་འཁུར་ཡོད་པ་དང་། ཕྱི་ལོ་ ༢༠༡༠ ནས་རྒྱ་ནག་འབྲི་ཆུའི་འགག་གསུམ་མཐུན་ཚོགས་ཀྱི་འགན་འཛིན་གྱི་ལས་འགན་འཁུར་ཡོད་འདུག ཕྱི་ལོ་ ༢༠༡༤ ནས་ཧུའུ་པེ་ཞིང་ཆེན་གྱི་མགོ་འཁྲིད་གཞོན་པར་བསྐོས། ཕྱི་ལོ་༢༠༢༢ ཟླ་ ༢ ཚེས་ ༢༤ ཉིན་རྒྱ་ནག་དབུས་ཁྲིམས་ཞིབ་ཁང་གིས་ཁྲིམས་བཤེར་མགོ་བཙུགས་ཏེ། རྒྱ་ནག་དམར་ཤོག་ཚོགས་པའི་ཚོགས་མི་དང་། ལས་གནས་ནས་ཕྱིར་ཕུད་བཏང་ནས་བཀག་ཉར་འོག་བཞག་ཡོད་འདུག
གསར་འགོད་པ། བྱམས་པ་ཚེ་རིང་།
རྩོམ་སྒྲིག་པ། པདྨ་མཚོ།
