རྒྱ་ནག་གཞུང་གིས་རྒྱ་ནག་གི་རྩེད་རིགས་ཐད་གཏོང་བྱེད་ས་དུ་ཡུ་ཡི་སྤྱི་ཁྱབ་འགན་འཛིན་ཁྲན་ཧྲོ་ཇི་ཁྲི་འདུ་གྲོང་ཁྱེར་ནས་འཛིན་བཟུང་བཙན་ཁྲིད་བྱས་ཡོད་འདུག
DouYu CEO Chen Shaojie seen in New York in 2019.Stringer/Imagine China/Reuters/File
རྒྱ་ནག་གཞུང་གིས་སྟག་དང་སྦྲང་མ་ལེབ་རྡུང་གི་སྲིད་ཇུས་ཟེར་བ་ཞིག་གི་འོག་ནས། རྒྱ་ནག་གི་མགོ་ཁྲིད་དང་། ཤེས་ཡོན་པ། བསམ་བློ་བ་སོགས་ལ་མངོན་གསལ་དོད་པོ་མེད་པའི་ཐོག་ནས་འབུར་འཇོམས་གཏོང་གི་ཡོད་པ་ལྟར། དེ་རིང་སི་ཨེན་ཨེན་གསར་ཁང་གིས་གནས་ཚུལ་སྤེལ་བ་ལྟར་ན། ཟླ་འདིའི་ཕྱི་ཚེས་ ༡༦ ཉིན་རྒྱ་ནག་གཞུང་གིས་རྒྱ་ནག་གི་དྲ་ལམ་དུ་བྲིན་རྒྱུག་ཆེ་བའི་རྩེད་རིགས་ཐད་གཏོང་བྱེད་ས་དུ་ཡུ་ (DouYu) ཡི་སྤྱི་ཁྱབ་འགན་འཛིན་ཁྲན་ཧྲོ་ཇི་ (Chen Shaojie) ཟེར་བ་ཁྲི་འདུ་གྲོང་ཁྱེར་ནས་འཛིན་བཟུང་བཙན་ཁྲིད་བྱས་ཡོད་ཀྱང་། ཁོ་འཛིན་བཟུང་བཙན་ཁྲིད་བྱེད་དོན་གསལ་ཁ་གང་ཡང་མེད་པ་རེད་འདུག
དེའི་ཐད་ཁ་སང་ཕྱི་ཚེས་ ༢༡ ཉིན་དུ་ཡུ་དྲ་ལམ་རྩེད་རིགས་ཐད་གཏོང་ལས་ཁུངས་ཀྱིས། ཁྲན་ཧྲོ་ཇི་ཟླ་འདིའི་ཕྱི་ཚེས་ ༡༦ ཙམ་ལ་རྒྱ་ནག་གི་ཁྲི་འདུ་གྲོང་ཁྱེར་གྱི་ལྷོ་ནུབ་ཉེན་རྟོག་པས་འཛིན་བཟུང་བཙན་ཁྲིད་བྱས་ཡོད་ཀྱང་། ཁོང་འཛིན་བཟུང་བྱས་པའི་གནད་དོན་དེ་ཕྱི་ཚེས་ ༢༠ ལ་མ་གཏོགས་བཤད་མེད་སྐོར་དང་། གཞུང་འབྲེལ་གྱི་ཐོག་ནས་ཁོང་ལ་ཞིབ་འཇུག་དང་འཛིན་བཟུང་བྱས་པའི་གནད་དོན་ཐད་ཀྱི་ཡིག་ཆ་གང་ཡང་འབྱོར་མེད་པས། གློ་བུར་དུ་ཁ་གསལ་གང་ཡང་མེད་པའི་ཐོག་ནས་འཛིན་བཟུང་བྱས་པ་དེས། ལས་ཁུངས་ཀྱི་ལས་དོན་ལ་གནོད་འཚེ་ཐེབས་སྲིད་སྐོར་སོགས་བསྒྲགས་འདུག་ཀྱང་། དེ་རིང་ཕྱི་ཚེས་ ༢༢ ཉིན་རྒྱ་ནག་གཞུང་གི་ཉེན་རྟོག་པས། དུ་ཡུའི་ཁྲན་ཧྲོ་ཇི་ཡིས་སྒེར་གྱི་རྒྱན་འཇོག་ཁང་ཞིག་གསར་འཛུགས་བྱས་པའི་དོགས་གཞིའི་འོག་ནས་འཛིན་བཟུང་བྱས་པ་ཡིན་ལུགས་བསྒྲགས་འདུག
ཁྲན་ཧྲོ་ཇི་ནི་རྒྱ་ནག་གཞུང་གིས་བཟོ་རིགས་དང་། འཕྲུལ་རིག ཚོང་དོན་སོགས་ལ་ཁ་གཡར་ནས་འཛིན་བཟུང་བཀག་ཉར་དང་། གར་སོང་ཆ་མེད་དུ་གྱུར་བའི་མི་གྲངས་བཅུ་གཉིས་ཁྲོད་ཀྱི་གཅིག་ཡིན་ཞིང་། ཁོང་ནི་རྒྱ་ནག་ནང་དུས་ཡུན་ཐུང་ཐུང་ནང་ཚོང་དོན་གྱི་ནུས་པ་ཤུགས་ཆེན་འདོན་ཐུབ་མཁན་གྱི་ཚོང་བདག་ཞིག་ཡིན་ཡང་། ཁོང་འཛིན་བཟུང་བྱས་རྗེས་དུ་ཡུ་ལས་ཁུངས་ཀྱིས་ནེའུ་ཡོག་ནས་མ་ཤེར་ (shares) བརྒྱ་ཆ་དྲུག་ཙམ་སྒོ་བརྒྱབ་ཡོད་འདུག དེ་བཞིན་རྒྱ་ནག་གཞུང་གིས་ཉེས་འཛུགས་སྣ་ཚོགས་ཞིག་གི་འོག་ནས་རྒྱ་ནག་ཏུ་ཚོང་དོན་གཉེར་མཁན་གྱི་ཚོང་རྟགས་ཁང་མང་དག་ཅིག་ལ་དཀའ་ངལ་ཕྲད་དང་འཕྲད་མུས་ཡིན་འདུག
DouYu ཞེས་པའི་དྲ་ལམ་རྩེད་རིགས་ཐད་གཏོང་དེ་མི་སྒེར་སོགས་ཀྱི་ཁ་པར་དང་གློག་ཀླད་གཉིས་ཀར་བཀོལ་ཐུབ་པའི་མཉེན་ཆས་ཤིག་ཡིན་ཞིང་། དེ་ནི་ཕྱི་ལོ་ ༢༠༡༤ ལོར་དུ་ཡུ་ཡི་ད་ལྟའི་སྤྱི་ཁྱབ་འགན་འཛིན་སྐུ་ཞབས་ཁྲན་ཧྲོ་ཇི་དང་ཁོང་གི་རོགས་པ་ཝན་མིང་ཀྲང་ (Wenming Zhang) གཉིས་ཀྱིས་རྒྱ་ནག་གི་ཝུའུ་ཧན་གྲོང་ཁྱེར་ནས་གསར་བཟོ་བྱས་པ་ཞིག་ཡིན་འདུག དུ་ཡུ་ཞེས་པ་ནི་རྒྱ་སྐད་དུ་ཉའི་དམག་འཛིང་ཟེར་ཞིང་། དེ་ནི་རྒྱལ་སྤྱི་དང་ལྷག་པར་རྒྱ་ནག་ནང་གི་དྲ་ལམ་རྩེད་རིགས་ཐད་གཏོང་བྱེད་ས་བྲིན་རྒྱུག་ཆེ་ཤོས་ཀྱི་གྲས་ཤིག་ཡིན་འདུག དཔེར་ན། ཕྱི་ལོ་ ༢༠༡༩ ལོའི་ཟླ་བ་རེ་རེའི་ནང་རྒྱ་ནག་གཅིག་པོའི་ནང་མི་གྲངས་ས་ཡ་ ༡༦༣ ལྷག་གིས་བེད་སྤྱོད་བྱས་ཡོད་ཅིང་། དེ་ནི་ཟླ་བ་རེ་རེའི་ནང་ཨ་རིའི་རྩེད་རིགས་ཐད་གཏོང་བྱེད་ས་ཊུ་ཝི་ཇི་ (Twitch) ལས་མི་གྲངས་ས་ཡ་ ༡༤༠ ལས་མང་བ་ཡོད་འདུག
གཞན་ཡང་། ཉེ་ལམ་རྒྱ་གཞུང་གིས་ད་ལྟ་འཛམ་གླིང་ཁྱོན་ཡོངས་སུ་མི་གྲངས་ས་ཡ་ ༦༠༠ ལྷག་གི་བཀོལ་སྤྱོད་བྱེད་མུས་ཡིན་པའི་དུ་ཡིན་ (Douyin) དུ་མི་རྣམས་ཀྱི་སྤེལ་མུས་ཡིན་པའི་བརྙན་ཐུང་དག་གི་ནང་དོན་སོགས་ལ་ཞིབ་འཇུག་བྱ་རྒྱུ་ཡིན་ལུགས་སོགས་བསྒྲགས་ཡོད་པ་མ་ཟད། དྲ་ལམ་འཕེལ་རྒྱས་ཀྱི་ལམ་བུ་ཟེར་བ་ཞིག་གི་འོག་ནས། དྲ་ལམ་གྱི་སློབ་གསོ་བ་ཟེར་བ་སོགས་ལ་ཚད་ལྡན་གྱི་ལག་ཁྱེར་ཡོད་མེད་ཞིབ་འཇུག་དང་། དུས་ཡུན་དང་རན་པའི་བརྙན་སྤེལ་གྱི་ཡོད་མེད་སོགས་ཞིབ་འཇུག་བྱ་རྒྱུ་ཡིན་ལུགས་བསྒྲགས་འདུག་ཀྱང་། རྒྱ་ནག་གཞུང་གིས་དྲ་ལམ་སློབ་གསོ་བ་ཞེས་མིང་བཏགས་པ་དེ་དག་ནི། རྒྱ་ནག་གཞུང་གིས་ཆེད་དུ་གཉེར་བའི་རྒྱ་ནག་གི་བསམ་བློ་དང་། ལྟ་བ་སོགས་དྲ་ལམ་དུ་སྤེལ་མཁན་དང་། རྒྱ་ནག་གཞུང་ལ་སྐྱོན་བརྗོད་བྱེད་མཁན་ཚོར་དྲ་ལམ་ནས་རུབ་རྡུང་གཏོང་མཁན་གྱི་སྐར་ལྔའི་དྲ་དམག་ཟེར་བ་ཡིན་སྐོར་གསལ་འདུག
གནད་དོན་དབྱེ་ཞིབ་པ་ཚོས། རྒྱ་ནག་གཞུང་གིས་དམར་ཤོག་སྲིད་གཞུང་གི་ལྟ་བ་དང་མི་མཐུན་པའི་ཚོང་འབྲེལ་སོགས་སྒོ་བརྒྱབ་པ་དང་། ཚོང་གཉེར་ཁང་ཁག་གི་མགོ་འཁྲིད་འཛིན་བཟུང་བྱས་པ་དེས། རྒྱ་ནག་གི་དཔལ་འབྱོར་འཕེལ་རྒྱས་ཀྱི་གནས་བབ་ལ་དོ་ཕོག་འགྲོ་ཉེན་ཡོད་པའི་ཁར། ཕྱི་རྒྱལ་གྱི་རྒྱལ་སྤྱིའི་རང་བཞིན་ཅན་གྱི་ཚོང་རྟགས་མང་པོ་རྒྱ་ནག་ཏུ་སྲ་བརྟན་ཚུགས་མི་ཐུབ་པར། རྒྱ་ནག་གི་ཚོང་འབྲེལ་ལས་དོན་ལའང་གཡོ་སྐྱོམ་ཐེབས་ཉེན་ཡོད་སྐོར་སོགས་བརྗོད་འདུག
གསར་འགོད་པ། དཔལ་ལྡན།
རྩོམ་སྒྲིག་པ། སྐལ་བཟང་སྦྱིན་པ།
