ཨ་རིའི་གྲོས་ཚོགས་ཀྱི་འཐུས་མི་དང་བོད་མི། ཧོང་ཀོང་བ་དང་རྒྱ་རིགས་མང་གཙོ་དོན་གཉེར་བ་སོགས་ཀྱིས་ཨ་རིའི་རྒྱལ་ས་ཝ་ཤིང་ཊོན་དུ་རྒྱ་ནག་གི་ཤོག་དཀར་གསར་བརྗེ་ལས་འགུལ་སྤེལ་ནས་ལོ་གཅིག་འཁོར་བའི་དུས་དྲན་སྲུང་གཙི་གནང་འདུག
ཁ་སང་ཕྱི་ཚེས་ ༢༩ ཉིན་ཨ་རིའི་གྲོས་ཚོགས་ཚོགས་ཁང་གི་མདུན་ཐང་དུ། རྒྱ་ནག་ནང་མི་མང་གིས་ཤོག་དཀར་གསར་བརྗེའི་ལས་འགུལ་སྤེལ་ནས་ལོ་གཅིག་འཁོར་བའི་དུས་དྲན་སྲུང་གཙི་གནང་ཡོད་ཅིང་། ལས་འགུལ་ཐོག་ཨ་རིའི་གྲོས་ཚོགས་འཐུས་མི་དང་གྲོས་ཚོགས་ཀྱི་རྒྱ་ནག་ཐབས་ཇུས་ལས་དོན་ཚོགས་ཆུང་གི་ཚོགས་གཙོ་མེ་ཁི་གྷ་ལཱ་གྷར་ (Mike Gallagher)མཆོག་གི་གཙོས། ཡུ་གུར་གྱི་རང་དབང་འཐབ་རྩོད་པ་དང་། བོད་རང་དབང་སློབ་ཕྲུག་ཚོགས་པ། ཧོང་ཀོང་དང་རྒྱ་ནག་གི་དམངས་གཙོ་དོན་གཉེར་བ་སོགས་མཉམ་ཞུགས་གནང་ཡོད་འདུག
སྐབས་དེར་ཨ་རིའི་གྲོས་ཚོགས་ཀྱི་རྒྱ་ནག་ཐབས་ཇུས་ལས་དོན་ཚོགས་ཆུང་གི་ཚོགས་གཙོ་མེ་ཁི་གྷ་ལཱ་གྷར་མཆོག་གིས། རྒྱ་ནག་གཞུང་གིས་མི་མང་ཁྲོད་དུ་འགྲོ་འདུག་སྤྱོད་གསུམ་ལ་དམ་དྲག་ཤུགས་ཆེན་བྱེད་བཞིན་ཡོད་པས། ཤོག་དཀར་གསར་བརྗེའི་ལས་འགུལ་ལ་བརྟེན་ནས། རྒྱ་ནག་མི་མང་རང་ཉིད་ཀྱི་བདག་པོ་བྱེད་འདོད་པ་ལས། སྒེར་གཅོད་རིང་ལུགས་ཀྱི་ཧམ་སེམས་སྒྲུབ་པའི་ལག་ཆ་ཞིག་མིན་པ་མ་ཟད། རང་དབང་དང་དམངས་གཙོ་ནི་བདེ་སྐྱིད་དམིགས་ཡུལ་ཉག་ཅིག་ཡིན་པ་དང་། ཟི་ཐོང་ཟམ་པའི་སྟེང་དུ་ཕིན་ལིས་ཧྥས་རྒྱ་གཞུང་ལ་ངོ་རྒོལ་བྱས་པའི་རྨང་གཞི་ཐོག་བྱུང་བའི་ལས་འགུལ་ཞིག་ཡིན་པས། རྒྱ་ནག་མི་མང་ལ་འཛམ་གླིང་མི་མང་གཅིག་མཚུངས་བཞིན་རང་དབང་དགོས་པ་དང་། མི་ཚང་མ་གཅིག་མཚུངས་བཞིན་རང་དབང་ལོངས་སྤྱོད་བྱེད་དགོས་ཞེས་གསུངས་འདུག
རྒྱ་རིགས་ལས་འགུལ་བ་ལེ་སི་ལི་ (Leslie) ལགས་ཀྱིས། རྒྱ་ནག་གི་སྲིད་དབང་སྒེར་སྤྱོད་པས་རྒྱ་ནག་ནང་དུ་གཞོན་སྐྱེས་རྣམས་ལ་ཞིབ་བཤེར་དང་བཀག་ཉར་བྱེད་པའི་དམ་དྲག་ཆེ་རུ་འགྲོ་བཞིན་ཡོད་ཀྱང་། གཞི་རྒྱ་ཆེ་བའི་ལས་འགུལ་སྤེལ་ཡོང་སྐབས་རྒྱ་གཞུང་གིས་ནུས་པ་ཅི་ཡང་ཐོན་མེད་པ་རེད། ང་ཚོས་ལས་འགུལ་སྤེལ་བའི་རྐྱེན་གྱིས་རྒྱ་ནག་གཞུང་གིས་རྒྱ་ནག་ནང་དུ་འཚོ་གནས་བྱེད་བཞིན་པའི་ཕ་མ་རྣམས་ལ་འཇིགས་སྐུལ་བྱེད་བཞིན་ཡོད་འདུག དེང་སྐབས་གཞོན་སྐྱེས་རྣམས་ཀྱིས་རྒྱ་ནག་དམར་ཤོག་ཚོགས་པ་གཅིག་པོར་ངོ་རྒོལ་བྱས་པ་ཙམ་མིན་པར་དེ་འབྲེལ་གྱི་ཚོགས་པ་ཚང་མར་ངོ་རྒོལ་བྱེད་ཀྱི་ཡོད་ལ། དེ་བཞིན་རྒྱ་ནག་ནང་དུ་སྔོན་མ་ལས་དམངས་གཙོའི་ལས་འགུལ་མང་དུ་ཕྱིན་ཡོད་སྐོར་བརྗོད་འདུག
ཧོང་ཀོང་དམངས་གཙོ་དོན་གཉེར་བ་ཨན་ནཱ་ཀོ་ཁི་(Anna Kwok) ལགས་ཀྱིས། ཧོང་ཀོང་བ་ཞིག་ཡིན་པའི་ཆ་ནས་རྒྱ་ནག་ནང་དུ་མི་མང་གིས་བློ་སྤོབས་ཆེན་པོའི་ཐོག་ཏོག་དབྱིབས་གཉན་རིམས་ཀྱི་བཀག་རྒྱའི་སྲིད་ཇུས་ལ་ངོ་རྒོལ་བྱས་པར་ཧང་སངས་སོང་། དེའི་སྐབས་ཀྱི་ལས་འགུལ་བའི་བདེ་འཇགས་སུ་ལའང་གསལ་ཁ་ཡོད་པ་མ་རེད། འདས་ལོར་རྒྱ་ནག་ནང་ཤོག་དཀར་གསར་བརྗེ་ལས་འགུལ་བྱུང་བ་ཡང་། ཧོང་ཀོང་གི་དམངས་གཙོའི་ལས་འགུལ་རྒྱ་ནག་སྐམ་སར་ཁྱབ་སྤེལ་བྱུང་བ་ཞིག་ཡིན་སྐོར་བརྗོད་འདུག
དྲུག་བཞིའི་དོན་རྐྱེན་ནང་གི་ལས་འགུལ་བ་ཀྲུའུ་ཧྥན་སའོ་(周锋锁) ལགས་ཀྱིས། ཕྱི་ལོ་ ༡༩༨༩ ནས་བཟུང་རྒྱ་ནག་ནང་དཔལ་འབྱོར་ཡར་རྒྱས་བྱུང་ཡོད་པ་བཤད་ཀྱང་། རྒྱ་ནག་མི་མང་ལ་རང་དབང་ཅི་ཡང་མེད་པ་རེད། འདས་ལོ་ནས་རྒྱ་ནག་གི་ཧྲང་ཧའེ་མཚོན་པའི་གྲོང་ཁྱེར་ཆེ་ཁག་ནང་མི་མང་གིས་ཐོག་མར་རང་ཉིད་ལ་རང་དབང་མེད་པ་ཤེས་རྟོགས་བྱུང་བ་རེད། ཤོག་དཀར་གསར་བརྗེའི་ལས་འགུལ་རྒྱ་ནག་ནང་དུ་མུ་མཐུད་དུ་སྤེལ་ཐུབ་མེད་ཀྱང་། ཕྱི་རྒྱལ་ཁག་ཏུ་ལས་འགུལ་མུ་མཐུད་དུ་སྤེལ་རྒྱུ་གལ་ཆེན་པོ་ཡིན་སྐོར་བརྗོད་འདུག
འདས་ལོར་རྒྱ་ནག་གི་རྒྱལ་ས་པེ་ཅིན་ཚུད་པའི་ཡུ་གུར་རང་སྐྱོང་ཁུལ་ཟེར་བ་དང་ཧྲང་ཧའེ། ནན་ཅིན་དང་ཀོང་ཀྲོའུ་སོགས་གཙོ་བྱས་པའི་ཏོག་དབྱིབས་གཙང་སེལ་གྱི་སྲིད་ཇུས་འོག་སྒོ་རྒྱ་བསྡམས་པའི་གྲོང་ཁྱེར་དང་ས་ཁུལ་མི་འདྲ་བ་ ༢༠ ལྷག་གི་མི་མང་དང་སློབ་མ་སོགས་རྒྱ་རིགས་སྟོང་ཕྲག་མང་པོས། གཙོ་བོ་ཏོག་དབྱིབས་གཙང་སེལ་ཟེར་བའི་སྲིད་ཇུས་མཚམས་འཇོག་དགོས་ཞེས་ལག་ཏུ་ཤོག་བུ་དཀར་པོ་འཛིན་བཞིན་དམར་ཤོག་ཚོགས་པའི་གཞུང་ལ་ངོ་རྒོལ་ལས་འགུལ་སྤེལ་ཡོད་འདུག རྒྱ་ནག་མི་མང་གི་རྒྱལ་ཡོངས་རང་བཞིན་གྱི་ངོ་རྒོལ་ལས་འགུལ་དེའི་སྐབས་རྒྱ་ནག་དམར་ཤོག་ཚོགས་པར་གདོང་ལེན་གྱི་འབོད་ཚིག་སྣ་ཚོགས་བསྒྲགས་ཡོད་པ་ལས། ས་ཁུལ་ཁག་ཅིག་ཏུ་ཞི་ཅིན་ཕིན་སྲིད་སྟེགས་ལས་མར་འབབ་དགོས། རྒྱ་ནག་དམར་ཤོག་ཚོགས་པའི་དབང་སྒྱུར་མཚམས་འཇོག་དགོས། ང་ཚོར་མི་གཅིག་དབང་སྒྱུར་དང་རྒྱལ་པོ་ཞིག་མི་དགོས། རང་དབང་དགོས། གསར་འགོད་རང་དབང་དགོས། ཤིན་ཅང་སྒོ་འབྱེད་བྱེད་དགོས། རྒྱ་ནག་སྒོ་འབྱེད་བྱེད་དགོས་ཞེས་ངོ་རྒོལ་བྱས་འདུག
གསར་འགོད་པ། བྱམས་པ་ཚེ་རིང་།
རྩོམ་སྒྲིག་པ། སྐལ་བཟང་སྦྱིན་པ།
