བོད་མི་འཇམ་དབྱངས་བསྟན་འཛིན་ལགས་ཀྱིས། ང་ཚོས་བོད་ནམ་ཡང་མ་བརྗེད་ཅེས་པའི་འབོད་ཚིག་འོག རྒྱ་གར་ལྷོ་ཕྱོགས་ནས་རྡེ་ར་ལྡུན་བར་བོད་དོན་རྐང་འཁོར་སྐོར་སྐྱོད་ཀྱི་ལས་འགུལ་གཉིས་པ་མགོ་བཙུགས་འདུག
དེ་རིང་ཕྱི་ཚེས་ ༡ ཉིན་ནས་བཟུང་བོད་དོན་ལས་འགུལ་བ་འཇམ་དབྱངས་བསྟན་འཛིན་ལགས་ཀྱིས་ང་ཚོས་བོད་ནམ་ཡང་མ་བརྗེད་ཅེས་པའི་འབོད་ཚིག་འོག རྒྱ་གར་ལྷོ་ཕྱོགས་སྦེལ་ཀོབ་ལུགས་བསམ་གཞིས་གྲོང་དང་པོ་ནས་ཨུ་ཏར་ཁན་ཌི་མངའ་སྡེའི་བདེ་སྐྱིད་གླིང་བོད་མིའི་གཞིས་ཆགས་བར་དུ་རྐང་འཁོར་སྐོར་སྐྱོད་ཀྱི་ཞི་བའི་ལས་འགུལ་སྤེལ་མགོ་བཙུགས་ཡོད་འདུག
བོད་དོན་ལས་འགུལ་བ་འཇམ་དབྱངས་བསྟན་འཛིན་ལགས་ཀྱིས་འདི་གའི་གསར་འགོད་པར། དེ་སྔ་ངས་རང་ལོ་ ༦༥ བར་དུ་ལུས་ལ་ན་ཚ་མ་འབྱུང་ཚེ། ངས་མུ་མཐུད་དུ་བོད་དོན་ལས་འགུལ་སྤེལ་རྒྱུའི་ཁས་ལེན་དམ་བཅའ་བཞག་པ་གཞིར་བཟུང་། དེ་རིང་ནས་བཟུང་སྦེལ་ཀོབ་ནས་བདེ་སྐྱིད་གླིང་གཞིས་ཆགས་བར་དུ་རྐང་འཁོར་སྐོར་སྐྱོད་ཀྱི་བོད་དོན་ལས་འགུལ་མགོ་འཛུགས་བྱེད་ཀྱི་ཡོད། ཅེས་བརྗོད་བྱུང་།
བོད་དོན་ལས་འགུལ་བ་འཇམ་དབྱངས་ལགས་ཀྱིས་དེ་རིང་ཞོགས་པའི་ཆུ་ཚོད་ ༨།༣༠ ཙམ་ནས་སྦེལ་ཀོབ་གཞིས་གྲོང་ ༡ པོ་ནས་བོད་དོན་རྐང་འཁོར་སྐོར་སྐྱོད་ཀྱི་ལས་འགུལ་སྤེལ་མགོ་བརྩམས་ཡོད་ཅིང་། ལས་འགུལ་གྱི་དམིགས་ཡུལ་གཙོ་བོ་ནི་རྒྱ་གར་ཡུལ་མིའི་ཁྲོད་བོད་དོན་དྲིལ་བསྒྲགས་དང་བོད་མིའི་སྤྱི་ཚོགས་ནང་བོད་སྤྱིའི་རྩ་དོན་འཐབ་རྩོད་གལ་ཆེན་ཡིན་པའི་དྲན་སྐུལ་ཞུ་རྒྱུ། དེ་བཞིན་འཆར་ལོའི་ནང་བོད་མིའི་སྒྲིག་འཛུགས་ཀྱི་ལས་དོན་དང་གྲོས་ཚོགས་སོགས་གང་སྤྱིའི་ཐད་ཚགས་ཚུད་ལེགས་འགྲུབ་ཡོང་བའི་སྨོན་འདུན་དང་བོད་རིགས་གཞོན་སྐྱེས་ཚོར་མ་འོངས་བོད་དོན་ལས་འགུལ་སྤེལ་རྒྱུའི་ཐད་སྐུལ་མ་དང་སེམས་ཤུགས་སྤེལ་རྒྱུ་བཅས་ལ་དམིགས་ཏེ་རྐང་འཁོར་སྐོར་སྐྱོད་ཀྱི་ཞི་བའི་ལས་འགུལ་སྤེལ་བཞིན་ཡོད་འདུག
རང་ལོ་ ༦༣ ཡིན་པའི་བོད་དོན་ལས་འགུལ་བ་འཇམ་དབྱངས་བསྟན་འཛིན་ལགས་ནི་རྡེ་ར་ལྡུན་ནས་ཡིན་པ་དང་། ཕ་དམ་པའི་རེ་བ་ལྟར་བོད་སྤྱི་པའི་རྩ་དོན་ཆེད་ལྷག་བསམ་འགྱུར་མེད་ཀྱིས་འཐབ་རྩོད་ཧུར་ཐག་གནང་མཁན་ཞིག་ཡིན་འདུག་ལ། འདི་ལོའི་ཕྱི་ཟླ་ ༡༠ ཚེས་ ༡༢ ཉིན་ནས་ཕྱི་ཟླ་ ༡༡ ཚེས་ ༡༡ བར་ཟླ་གཅིག་གི་རིང་འཇམ་དབྱངས་ལགས་ཀྱིས་ང་ཚོས་བོད་ནམ་ཡང་མ་བརྗེད་ཅེས་པའི་འབོད་ཚིག་འོག བཞུགས་སྒར་དྷ་རམ་ས་ལ་ནས་རྡོ་རྗེ་གདན་བར་དུ་རྐང་འཁོར་སྐོར་སྐྱོད་ཀྱི་ཞི་བའི་ལས་འགུལ་སྤེལ་ཡོད་པ་དང་། དེ་སྔོན་བོད་ཀྱི་གཞོན་ནུ་ལྷན་ཚོགས་ཀྱིས་གོ་སྒྲིག་གནང་བའི་བོད་ཀྱི་ས་མཚམས་བར་དུ་སྦག་སྦག་བཞོན་ནས་བོད་དོན་དྲིལ་བསྒྲགས་ཀྱི་ལས་འགུལ་ནང་དུའང་མཉམ་ཞུགས་བྱས་མྱོང་ཡོད་འདུག
གསར་འགོད་པ། བསྟན་འཛིན་ཕུར་བུ།
རྩོམ་སྒྲིག་པ། སྐལ་བཟང་སྦྱིན་པ།
