༧གོང་ས་མཆོག་ནས་བཅོམ་ལྡན་འདས་ཀྱི་དགོངས་པ་དང་མཐུན་པའི་ཐབས་ལམ་ཞིག་བསླབ་ན། ང་ཚོའི་རྒྱུད་ན་ཡོད་པའི་སྐྱོན་རྣམས་དྲི་མ་གློ་བུར་བ་རེད། དེ་རིམ་བཞིན་སྦྱངས་ཏེ་སྤངས་རྟོགས་མཐར་ཕྱིན་པའི་སངས་རྒྱས་ཀྱི་ཐུགས་བཞིན་བསྒྲུབ་ཐུབ་པའི་ཚོད་དཔག་བྱ་ཐུབ་ཅེས་བཀའ་སློབ་བསྩལ།
དེ་རིང་སྔ་དྲོའི་ཆུ་ཚོད་ ༨།༠༠ ནས་ཉིན་གྲངས་གསུམ་རིང་གནས་མཆོག་རྡོ་རྗེ་གདན་གྱི་དུས་དབང་གསུང་ཆོས་ར་བ་རུ། ༸གོང་ས་རྒྱལ་བ་རིན་པོ་ཆེན་པོ་མཆོག་ནས་མགོན་པོ་ཀླུ་སྒྲུབ་ཀྱིས་མཛད་པའི་ཆོས་དབྱིངས་བསྟོད་པའི་བཀའ་ཆོས་དབུ་འཛུགས་མཛད་ཡོད་པ་དང་། ཉིན་དང་པོའི་བཀའ་ཆོས་སྐབས་༧གོང་ས་རྒྱལ་བ་རིན་པོ་ཆེ་མཆོག་ནས། ཆོས་ནི་འཆད་པ་པོའི་ངོས་ནས་ཀུན་སློང་རྣམ་པར་དག་པའི་སྒོ་ནས་བཤད་དགོས་པ་དང་། ཉན་པ་པོས་ཀྱང་ཀུན་སློང་རྣམ་པར་དག་པའི་ཐོག་ནས་ཉན་དགོས་པ་གལ་ཆེན་པོ་རེད། ཆོས་ཀྱི་འཆད་ཉན་ཞེས་པ་དེ་འཇིག་རྟེན་ཆོས་བརྒྱད་ཀྱི་གཞན་དབང་དུ་ཕྱིན་ཚེ་དགོས་དོན་མ་ཚང་བ་རེད། ཆོས་ཆོས་སུ་འགྲོ་བ་ཞིག་དགོས་ཀྱི་ཡོད་པ་རེད། དེ་བས་ང་ཚོ་ཚང་མས་ཀུན་སློང་རྣམ་པར་དག་པའི་སྒོ་ནས་འཆད་ཉན་བྱེད་དགོས། འཆད་པ་པོའི་ངོས་ནས་རང་དོན་གྱི་བསམ་པ་དང་། ཞི་བདེ་དོན་གཉེར་གྱི་བསམ་པ་དང་མ་འབྲེལ་པར་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་འཛིན་པའི་ཐོག་ནས་བཤད་དགོས། ཉན་པ་པོའི་ངོས་ནས་ཀྱང་ཚེ་འདིའི་ལྟོ་གོས་གཏམ་གསུམ་དང་། མངོན་མཐོ་ཙམ་མ་ཡིན་པར་ཐམས་ཅད་མཁྱེན་པའི་གོ་འཕངས་ཐོབ་པར་བསམ་དགོས། དེ་ཡང་སེམས་ཅན་ཐམས་ཅད་ཀྱི་བསམ་པའི་བློ་དང་ལྡན་པའི་ཐོག་ནས་འཆད་པ་པོས་བཤད་པ་དང་ཉན་པ་པོས་ཉན་དགོས་ཀྱི་ཡོད། ཅེས་དང་། ང་ཚོས་བཅོམ་ལྡན་འདས་ཀྱི་གསུང་རྣམས་སེམས་སུ་ཉར་དགོས་པ་མ་ཟད། སངས་རྒྱས་ཀྱིས་སྒྲིབ་གཉིས་སྤངས་པ་མངོན་དུ་མཛད་པ་ལྟར། ང་ཚོས་ཀྱང་སྒྲིབ་གཉིས་སྤངས་ཏེ་རྣམ་མཁྱེན་རྒྱལ་བའི་གོ་འཕངས་ཐོབ་པའི་ཆེད་དུ་དམིགས་པ་དགོས། དེར་བརྟེན་སངས་རྒྱས་ཆོས་ཚོགས་མའི་ཚིག་དེ་ཧ་ཅང་ནུས་པ་ཆེན་པོ་རེད། ཅེས་གསུངས་སོང་།
ཡང་༧གོང་ས་མཆོག་ནས། ངོས་རང་གིས་ཉིན་ལྟར་སྟོང་ཉིད་ཀྱི་ལྟ་བ་སྒོམ་པར་བསམ་བློ་བཏང་དུས། སེམས་ཀྱི་རང་བཞིན་འོད་གསལ་བ་ག་ལེར་གསལ་བོ་ཆགས་ཀྱི་འདུག སེམས་ཀྱི་དྲི་མ་གློ་བུར་བ་དེ་ཅུང་ཙམ་ཤེས་ཡོང་དུས། དྲི་མ་དེར་གཉེན་པོ་བསྟེན་ཚེ་སྤངས་ཐུབ་པའི་ངེས་པ་རྙེད་ཐུབ་ཀྱི་འདུག བློ་རིམ་གྱིས་སྦྱངས་ནས་དྲི་མ་མཐའ་དག་སྤངས་ཏེ་སངས་རྒྱས་ཀྱི་གོ་འཕངས་ཐོབ་ཐུབ་པའི་གདེང་ཚོད་རྙེད་ཀྱི་འདུག དྲི་མ་ཞེས་པ་སེམས་ཀྱི་ཉོན་མོངས་ཀྱིས་བཞག་པའི་བག་ཆགས་གློ་བུར་བ་དེ་ཆགས་ཡོད། ག་ལེར་གཉེན་པོ་བསྟེན་ཚེ་དེ་མེད་པ་གཏོང་ཐུབ་པ་མ་ཟད། མཐར་སེམས་རང་བཞིན་གྱིས་འོད་གསལ་བ་དེ་རྣམ་མཁྱེན་རྒྱལ་བའི་ངོ་བོར་འགྲོ་ཐུབ་པའི་རེ་བ་དང་སྤོབས་པ་སླེབས་ཀྱི་འདུག ད་ལྟ་ང་ཚོ་ལས་ཉོན་གྱི་གཞན་དབང་ཅན་ཡིན་ཡང་དྲི་མ་གློ་བུར་བ་རེད། དྲི་མ་གློ་བུར་བ་དེ་གཞི་རྩ་མེད་ལ་གཉེན་པོ་ཡོད་པ་ཞིག་ཡིན། ཆོས་རྣམས་ཀྱི་གནས་ལུགས་དང་སེམས་ཀྱི་རང་བཞིན་འོད་གསལ་བ་ལ་བསམ་བློ་ཡག་པོ་གཏོང་ཐུབ་ཚེ། སེམས་སུ་གདེང་ཚོད་ཡོད་པ་ཞིག་ཡོང་གི་འདུག སེམས་ཀྱི་རང་བཞིན་འོད་གསལ་བ་དང་དྲི་མ་གློ་བུར་བ་ཡིན་པ་དེ་ང་ཚོ་ཚང་མས་སེམས་སུ་འཇོག་དགོས། ངོས་རང་གིས་བཅོམ་ལྡན་འདས་ཀྱི་དགོངས་པ་དང་མཐུན་པའི་ཐབས་ལམ་ཞིག་བསླབ་ན། ངོས་རང་གི་རྒྱུད་ན་ཡོད་པའི་སྐྱོན་རྣམས་དྲི་མ་གློ་བུར་བ་རེད། དེ་རིམ་བཞིན་སྦྱངས་ནས་སྤངས་རྟོགས་མཐར་ཕྱིན་པའི་སངས་རྒྱས་ཀྱི་ཐུགས་བཞིན་བསྒྲུབ་ཐུབ་པའི་ཚོད་དཔག་བྱ་ཐུབ་ཀྱི་འདུག ང་ཚོས་སངས་རྒྱས་ཆོས་ཚོགས་མ་འདོན་པའི་སྐབས་སུ་དེ་དག་ལ་བསམ་བློ་གཏོང་དགོས། ད་ལྟ་ང་ཚོའི་སེམས་རྒྱུད་ཉོན་མོངས་བ་དང་དེས་བཞག་པའི་བག་ཆགས་ཀྱིས་གཞན་དབང་དུ་གྱུར་ཡོད་ཀྱང་། དྲི་མ་གློ་བུར་བ་དང་སེམས་རང་བཞིན་གྱི་འོད་གསལ་བ་ཡིན་པས། ང་ཚོས་འབད་བརྩོན་ཡག་པོ་བྱས་ན་རྨོངས་པའི་གཞན་དབང་དུ་གྱུར་བ་དེ་རྣམ་མཁྱེན་གྱི་ཤེས་པར་འགྱུར་ཐུབ་པའི་ཚོད་དཔག་བྱ་ཐུབ་ཀྱི་འདུག ད་ལྟ་ང་ཚོའི་རྒྱུད་དུ་ཡོད་པའི་ཤེས་པ་མི་གསལ་བ་དེ་གློ་བུར་བ་རེད་ལ། གཉེན་པོ་བསྟེན་ཚེ་ག་ལེར་དག་ཐུབ་པ་ཞིག་རེད། སེམས་རང་བཞིན་གྱིས་འོད་གསལ་བ་དང་། དྲི་མ་གློ་བུར་བ་ལ་བསམ་བློ་ཡག་པོ་གཏོང་དགོས། སེམས་རང་བཞིན་གྱིས་འོད་གསལ་བའི་བློ་སྦྱངས་ཏེ་ངེས་པ་རྙེད་དགོས་པ་དང་། བློ་གསལ་བའི་ཆ་རྣམས་གོང་ནས་གོང་དུ་སྤེལ་དགོས། དྲི་མ་གློ་བུར་བ་དེར་གཉེན་པོ་བསྐྱེད་པའི་ཐོག་ནས་ག་ལེར་ཆུང་ཆུང་ནས་ཉུང་ཉུང་དུ་གཏོང་དགོས། ཞེས་གསུངས་སོང་།
༧མགོན་པོ་གང་ཉིད་མཆོག་གིས། ངོས་རང་གི་ཉམས་མྱོང་གི་ཐོག་ནས་ཀྱང་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་བསམ་བློ་གཏོང་དུས། དྲི་མ་གློ་བུར་བ་ཡིན་པ་ཕལ་ཆེར་ཚོད་དཔག་བྱེད་ཐུབ་ཀྱི་འདུག ངོས་རང་གིས་སྦྱོར་ལམ་ཐོབ་པའི་ཚོད་ཐུབ་ཀྱི་འདུག ང་ཚོ་ཚང་མས་སེམས་རང་བཞིན་གྱི་འོད་གསལ་བ་དང་། དྲི་མ་གློ་བུར་བ་ཡིན་པ་ཡག་པོ་ཤེས་པ་བྱས་ཏེ། དྲི་མ་གློ་བུར་བ་དེ་ལ་གཉེན་པོ་བསྟེན་རྒྱུ་གལ་ཆེན་པོ་རེད། སྐབས་སུ་བབས་པའི་གཉེན་པོའི་མཆོག་ནི་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་རེད། སྟོང་ཉིད་ཀྱི་ལྟ་བས་ཉོན་སྒྲིབས་ཀྱི་གཉེན་པོ་བྱེད་པ་དང་། བྱང་ཆུབ་ཀྱི་སེམས་ཀྱིས་ཤེས་སྒྲིབས་ཀྱི་གཉེན་པོ་ཆགས་ཡོད། ང་ཚོས་སྟོང་ཉིད་ཀྱི་ལྟ་བ་དང་འབྲེལ་ནས་བྱང་ཆུབ་ཀྱི་སེམས་ལ་བསམ་བློ་ཡག་པོ་གཏང་། ཉིན་རེ་བཞིན་སེམས་ལ་གོམས་འདྲིས་བསྟེན་ཚེ། བཅོམ་ལྡན་འདས་ཀྱི་དགོངས་པ་དང་མཐུན་པ་མ་ཟད། ཁོང་གི་མངོན་དུ་མཛད་པའི་གོ་འཕངས་ཐོབ་ཐུབ་པའི་གདེང་ཚོད་རྙེད་ཀྱི་འདུག སངས་རྒྱས་བཅོམ་ལྡན་འདས་ཀྱིས་སྒྲིབ་གཉིས་སྤངས་བའི་མངོན་དུ་མཛད་པ་ལྟར། ང་ཚོས་ཀྱང་ག་ལེར་སྒྲིབ་གཉིས་སྤངས་བའི་སེམས་ཤུགས་བསྐྱེད་དགོས། བཅོམ་ལྡན་འདས་ཀྱི་ཐུགས་རྒྱུད་རང་བཞིན་འོད་གསལ་བ་རེད། དྲི་མ་གློ་བུར་བ་ཡིན་པ་དབྱེ་བ་ཁྱོན་ནས་མེད། ཆོས་ལུགས་ཚང་མ་ཧ་ཅང་ཡག་པོ་རེད། ངོས་རང་གིས་ཆོས་ལུགས་ཚང་མར་གུས་བརྩི་བྱེད་བཞིན་ཡོད། སངས་རྒྱས་བཅོམ་ལྡན་འདས་ཀྱི་ཆོས་ཀྱིས་ད་ལྟའི་ང་ཚོའི་ཤེས་པས་རྣམ་མཁྱེན་གྱི་གོ་འཕངས་ཐོབ་ཐུབ་པ་དང་སེམས་རང་བཞིན་གྱི་འོད་གསལ་བར་གསུངས་ཡོད་པ་དེ་ནུས་པ་ཆེན་པོ་དང་རླབས་ཆེན་རེད། ང་ཚོས་དེ་སེམས་སུ་འཇོག་དགོས། ཞེས་གསུངས་པ་དང་། མཇུག་ཏུ་༧གོང་ས་རྒྱལ་བ་རིན་པོ་ཆེ་མཆོག་ནས། དེ་རིང་གནས་མཆོག་རྡོ་རྗེ་གདན་དུ་ངོས་རང་ལ་བཤད་ལུང་ཐོབ་པ་རྣམས་རོབ་ཙམ་ཞུས་ཡོད། ངོས་རང་གིས་ཉིན་མཚན་དུས་དྲུག་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བར་ཧ་ཅང་བསམ་བློ་གཏོང་བཞིན་ཡོད། ཆོས་གྲོགས་རྣམས་ཀྱིས་ཀྱང་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བར་གང་ཐུབ་ཀྱིས་དགོངས་པ་བཞེས་ཏེ་ཉམས་ལེན་བྱེད་རོགས། ཚེ་འདི་ཙམ་མ་རེད། ཇི་སྲིད་ནམ་མཁའ་གནས་པ་དང་།། འགྲོ་བ་ཇི་སྲིད་གནས་གྱུར་བ།། དེ་སྲིད་བདག་ནི་གནས་གྱུར་ནས།། འགྲོ་བའི་སྡུག་བསྔལ་སེལ་བར་ཤོག ། ཅེས་ནམ་མཁའ་མ་གསལ་བར་དུ་ཚང་མས་སེམས་ཤུགས་བསྐྱེད་དེ་ཧུར་ཐག་བྱེད་ཤོག ཅེས་གསུངས་སོང་།
གསར་འགོད་པ། བྱམས་པ་ཚེ་རིང་།
རྩོམ་སྒྲིག་པ། པདྨ་མཚོ།
