༧གོང་ས་མཆོག་ནས་ཉི་ཧོང་ནང་ས་ཡོམ་བརྒྱབ་སྟེ་མི་རྒྱུ་གཉིས་ལ་གནོད་འཚེ་ཕོག་པར་གདུང་སེམས་མཉམ་སྐྱེད་ཀྱི་ཐུགས་སྨོན་མཛད་འདུག
ཁ་སང་༧གོང་ས་རྒྱལ་བ་རིན་པོ་ཆེ་མཆོག་ནས་གནས་མཆོག་རྡོ་རྗེ་གདན་ནས། ཉི་ཧོང་གི་སྲིད་བློན་ཧྥོ་མའུ་ཀུ་ཤི་དྷ་ (Fumio Kishida) ལགས་ཀྱི་མཚན་ཐོག་ཏུ། ཉི་ཧོང་ནང་རང་བྱུང་གོད་ཆག་གི་རྐྱེན་ངན་དོན་རྐྱེན་ཁྲོད་མི་རྒྱུ་ལ་གནོད་སྐྱོན་ཐེབས་པར་གདུང་སེམས་མཉམ་སྐྱེད་ཀྱི་ཐུགས་གསོ་སྩལ་གནང་མཛད།
༧གོང་ས་མཆོག་གི་ཐུགས་གསོའི་གསུང་འཕྲིན་ནང་། ངོས་ནས་གོད་ཆག་འདིའི་ཁྲོད་རྐྱེན་འདས་སུ་ཕྱིན་པ་དང་གནོད་སྐྱོན་ཐེབས་པའི་མི་ཚང་མར་བསྔོ་སྨོན་དང་གདུང་སེམས་མཉམ་སྐྱེད་ཞུ་བཞིན་ཡོད། ཉི་ཧོང་གཞུང་གིས་དཀའ་ངལ་འཕྲད་བཞིན་པའི་མི་རྣམས་ལ་ངལ་སེལ་དང་མྱུར་སྐྱོབ་སོགས་ཀྱི་རྒྱབ་སྐྱོར་གནང་བཞིན་པར་ཡི་རངས་ཞུ། ངོས་ནང་པའི་དགེ་སློང་ཞིག་ཡིན་པའི་ངོས་ནས་ཉིན་རྟག་པར་ཤེས་རབ་སྙིང་པོ་འདོན་གྱི་ཡོད་ལ། ད་ལྟའི་སྐབས་འདིར་ཉི་ཧོང་གི་ནང་པའི་དགེ་འདུན་པ་ཚོས་ཤེས་རབ་སྙིང་པོ་བཏོན་པ་ཡིན་ན་ཡག་པོ་ཡོད། ཤེས་རབ་སྙིང་པོ་བཏོན་པ་ཡིན་ན་ཚེ་འདས་རྣམས་ལ་ཕན་པ་མ་ཟད། འབྱུང་འགྱུར་རང་བྱུང་གོད་ཆག་གི་རིགས་མི་ཡོང་བར་ཕན་ཐོགས་སྲིད་པ་རེད།
ད་ལྟ་ངོས་སངས་རྒྱས་བཅོམ་ལྡན་འདས་མངོན་པར་རྫོགས་པར་སངས་རྒྱས་སུ་གནས་མཆོག་རྡོ་རྗེ་གདན་དུ་ཡོད། ནང་པའི་དགེ་འདུན་པ་དང་གནས་འདིར་ཕེབས་པའི་ཆོས་ཞུ་བ་ཡོངས་དང་ལྷན། ང་ཚོ་ཚང་མས་ཉི་ཧོང་གི་རང་བྱུང་གོད་ཆག་ཁྲོད་གནོད་འཚེ་ཕོག་པ་རྣམས་ཀྱི་ཆེད་དུ་ཤེས་རབ་སྙིང་པོ་འདོན་གྱི་ཡིན། ཞེས་གསུངས།
ཟླ་འདིའི་ཕྱི་ཚེས་ ༡ ཉིན་ཉི་ཧོང་གི་ཕྱི་དྲོའི་ཆུ་ཚོད་ ༤ དང་སྐར་མ་བཅུ་ཡས་མས་སུ། ཡུལ་དེའི་ནུབ་ཁུལ་གྱི་མཚོ་ཁ་རུ་ཡོད་པའི་ཧོན་ཤུ་ (Honshu) གླིང་ཕྲན་གྱི་ས་གནས་ཨི་ཤི་ཀ་ཝ་ (Ishikawa) ས་ཁུལ་དུ། ཚད་རིམ་ ༧།༦ ཅན་གྱི་ས་ཡོམ་བྱུང་སྟེ། དེ་རིང་བར་མི་གྲངས་ ༤༨ རྐྱེན་འདས་དང་། ཁང་པ་དང་གཞུང་ལམ་སོགས་གཏོར་བཤིག་ཚབས་ཆེན་བྱུང་བ་སོགས་ཀྱིས་མི་རྒྱུ་གཉིས་ཀར་གནོད་འཚེ་ཕོག་ཡོད་འདུག
གསར་འགོད་པ། སྐལ་བཟང་སྦྱིན་པ།
