བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག་རྣམ་གཉིས་ཀྱིས་ཐའེ་ཝན་གྱི་འདེམས་ཐོན་སྲིད་འཛིན་གསར་པ་སྐུ་ཞབས་ལེ་ཆིན་ཏི་མཆོག་ལ་འཚམས་འདྲི་གནང་།
བཀའ་སྤྱི་གཉིས་ཀྱིས་ཐའེ་ཝན་གྱི་སྲིད་འཛིན་གསར་པར་འཚམས་འདྲི་གནང་བའི་མཚོན་དོན་པར་རིས། དུས་བབ་ཀྱིས་སྒྲིག་བཟོ་བྱས།
ཟླ་འདིའི་ཕྱི་ཚེས་ ༡༣ ཉིན་གྱི་དགོང་མོར་ཐའེ་ཝན་སྲིད་འཛིན་གྱི་འོས་བསྡུའི་ཁྲོད་སྐུ་ཞབས་ལེ་ཆིན་ཏི་མཆོག་སྲིད་འཛིན་གསར་པར་འོས་འདེམས་བྱུང་ཡོད་པ་ལྟར། བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཞོན་སྒྲོལ་མ་ཚེ་རིང་མཆོག་རྣམ་གཉིས་ཀྱིས། སྐུ་ཞབས་ལེ་ཆིན་ཏི་མཆོག་ལ་འདི་ལོའི་ཐའེ་ཝན་སྲིད་འཛིན་གྱི་འོས་བསྡུ་ཆེན་མོའི་ཁྲོད་རྒྱལ་ཁ་ཐོབ་པར་འཚམས་འདྲི་གནང་བ་དང་སྦྲགས། ཁོང་གིས་སྣེ་ཁྲིད་པའི་ཆབ་སྲིད་ཚོགས་པའི་ལས་དོན་རྣམས་ལམ་ལྷོང་ཡོང་བའི་སྨོན་འདུན་ཞུས་འདུག
དེ་ཡང་སྲིད་སྐྱོང་གི་འཚམས་འདྲིའི་འཕྲིན་ཡིག་ནང་། ངས་བོད་མིའི་སྒྲིག་འཛུགས་དང་བོད་མི་རྣམས་ཀྱིས་ཚབ་བྱས་ནས། ཁྱེད་དང་དམངས་གཙོ་ཡར་སྐྱེད་ཚོགས་པ་( Democratic Progressive Party ) ལ་འོས་བསྡུའི་རྒྱལ་ཁ་ཐོབ་པར་འཚམས་འདྲི་ཞུ་ཡི་ཡོད། འོས་བསྡུ་འདི་བརྒྱུད་ནས་ཐའེ་ཝན་མི་མང་གིས་དམངས་གཙོ་དང་རང་དབང་ལ་འགྱུར་མེད་ཀྱི་ཆོད་སེམས་བརྟན་པོ་ཡོད་པ་བདེན་དཔང་བྱས་ཡོད། ཉིད་ཀྱི་ཉེ་ཆར་གྱི་བསྒྲགས་གཏམ་གྱི་ཁྲོད། ཐའེ་ཝན་གྱི་མ་འོངས་པ་ནི་ཐའེ་ཝན་མི་མང་གི་ཐག་གཅོད་བྱ་རྒྱུ་རེད། ཅེས་གསུངས་པ་དེ་བོད་མི་དང་འབྲེལ་བ་ཆེན་པོ་ཡོད་ཅིང་། བོད་མི་རྣམས་ནི་ཁྱད་འཕགས་ཀྱི་རིག་གཞུང་དང་། ངོ་བོ་ལྡན་པའི་ཐོག་བཙན་བྱོལ་དུ་དམངས་གཙོ་ལོངས་སྤྱོད་བྱེད་མཁན་ཞིག་ཡིན་པའི་ཆ་ནས། རང་ཐག་རང་གཅོད་ལ་རིན་ཐང་དང་རྒྱལ་སྤྱིའི་སྤྱི་ཚོགས་ཀྱི་ཆ་ཤས་ཤིག་ཡིན་པའི་ཆ་ནས་རང་དབང་ལ་ལོངས་སྤྱོད་བྱེད་ཀྱིན་ཡོད། ཅེས་གསུངས་འདུག
ཡང་སྲིད་སྐྱོང་མཆོག་གིས། ལོ་རྒྱུས་ཀྱི་ཐོག་ནས་བོད་དང་ཐའེ་ཝན་གཉིས་བར་འབྲེལ་བ་ཡོད་པ་མ་ཟད། ཐའེ་ཝན་མི་མང་འབོར་ཆེན་གྱིས་༧གོང་ས་རྒྱལ་བ་རིན་པོ་ཆེ་མཆོག་ལ་གཡོ་མེད་ཀྱི་དད་གུས་བྱེད་ཀྱི་ཡོད་ལ། ང་ཚོས་དམངས་གཙོ་མཉམ་སྤྱོད་ཀྱི་ཆོད་སེམས་དེའི་ཐོག་ནས། ལོ་རེ་བཞིན་བོད་མི་དང་ཐའེ་ཝན་མི་མང་གི་འབྲེལ་ལམ་གོང་མཐོར་འགྲོ་དང་འགྲོ་མུས་ཡིན། ཞེས་གསུངས་འདུག
ཚོགས་གཞོན་སྒྲོལ་མ་ཚེ་རིང་མཆོག་གིས། ཐའེ་ཝན་ནི་འགྱུར་བ་མེད་པའི་ཐོག་ནས་དམངས་གཙོའི་རིན་ཐང་གོང་མཐོར་གཏང་བར་བརྟན་པོ་འགྲེང་ནས་ཡོད་ཅིང་། ད་ལན་གྱི་འོས་བསྡུ་བརྒྱུད་ཐའེ་ཝན་མི་མང་གིས་བསྐྱར་དུ་དམངས་གཙོའི་ལམ་བུ་ལ་ཆོད་སེམས་བརྟན་པོ་ཡོད་པ་གསལ་སྟོན་བྱས་ཡོད། ཅེས་དང་། བཙན་བྱོལ་བོད་པའི་སྤྱི་ཚོགས་ལ་མཚོན་ན། དམངས་གཙོ་ནི་༧གོང་ས་རྒྱལ་བ་རིན་པོ་ཆེ་མཆོག་ནས་གསོལ་རས་སུ་བསྩལ་བ་ཡིན་ཞིང་། དབུས་བོད་མིའི་སྒྲིག་འཛུགས་དང་བོད་མི་མང་སྤྱི་འཐུས་ལྷན་ཚོགས་ནི་ཁྲིམས་མཐུན་གྱི་འཐུས་མི་དང་བོད་ཀྱི་འབོད་སྒྲ་ཡིན། ང་ཚོས་ཐའེ་ཝན་གྱི་དམངས་གཙོ་ཐེབས་རྩ་(Taiwan Democratic Foundation) ལྷན་མཉམ་ལས་བྱས་ཏེ་ཕྱོགས་གཉིས་ཀྱི་ཁེ་ཕན་མཉམ་སྤྱོད་བྱས་ཡོད་ཅིང་། ང་ཚོས་མ་འོངས་པར་མི་དང་མིའི་བར་གྱི་འབྲེལ་ལམ་སྲ་བརྟན་དུ་བཙུགས་ནས། ཕྱོགས་གཉིས་ཀྱི་སྟོབས་ཤུགས་གོང་མཐོར་གཏང་ཐུབ་པའི་རེ་བ་བྱེད་ཀྱིན་ཡོད། ཅེས་གསུངས་འདུག
གསར་འགོད་པ། དཔལ་ལྡན།
རྩོམ་སྒྲིག་པ། པདྨ་མཚོ།
