འདི་ལོར་དགེ་བཤེས་མ་ ༧ དང་སྔགས་རམས་དགེ་བཤེས་མ་ ༡༠ བཅས་ཁྱོན་མདོ་སྔགས་གཉིས་ལ་བསླབ་པ་མཐར་སོན་པའི་བཙུན་མ་ ༡༧ བྱུང་འདུག
འདི་གའི་གསར་འགོད་པས་སྔགས་རམས་དགེ་བཤེས་མ་ཐུབ་བསྟན་ཆོས་སྒྲོན་ལགས་སུ་དེ་འབྲེལ་སྐོར་བཀའ་འདྲི་ཞུས་པར་ཁོང་གིས། འདི་ལོར་སྔགས་རམས་དགེ་བཤེས་མའི་ཁྲོད་དུ་ལྷོ་ཕྱོགས་མོན་གྷོ་བྱང་ཆུབ་ཆོས་ལྡན་གླིང་གི་བཙུན་མ་ ༤ དང་། བལ་ཡུལ་ཀོ་པན་བཙུན་དགོན་གྱི་བཙུན་མ་ ༤། དེ་བཞིན་བཞུགས་སྒར་གྱི་དགའ་ལྡན་ཆོས་གླིང་བཙུན་དགོན་གྱི་བཙུན་མ་ ༢ བཅས་ཁྱོན་སྔགས་རམས་དགེ་བཤེས་མ་བཅུ་ཐོན་ཡོད་སྐོར་གསུངས་བྱུང་ལ། སྔགས་རམས་དགེ་བཤེས་མའི་མཐར་ཕྱིན་མཛད་སྒོ་དེ་ཟླ་འདིའི་ཕྱི་ཚེས་ ༣༠ ཉིན་རྒྱུད་སྟོད་གྲྭ་ཚང་གི་བླ་མ་དབུ་མཛད་དབུ་བཞུགས་འཚོགས་ཡོད་འདུག
ཡང་འདི་ལོར་དགེ་བཤེས་མ་ཐོན་མཁན་ཁྱོན་མི་གྲངས་ ༧ ཡོད་ཅིང་། དེ་དག་ལས་བཙུན་མ་ ༢ ལྷོ་ཕྱོགས་མོན་གྷོ་བྱང་ཆུབ་ཆོས་ལྡན་གླིང་དང་། བཙུན་མ་ ༥ ནོར་གླིང་དུ་ཡོད་པའི་སྒྲོལ་མ་གླིང་བཙུན་དགོན་གྱི་ཡིན་འདུག་ལ། དགེ་བཤེས་མའི་མཐར་ཕྱིན་མཛད་སྒོ་དེ་འདས་ལོའི་ཕྱི་ཟླ་ ༡༡ ནང་རྡོ་རྗེ་གདན་དུ་འཚོགས་པའི་བཙུན་མའི་འཇང་དགུན་ཆོས་སྐབས་འཚོགས་ཡོད་འདུག
སྤྱིར་བཏང་ ༡༩༩༥ ནས་༧སྐྱབས་མགོན་རིན་པོ་ཆེ་མཆོག་གིས་དགེ་བཤེས་མ་གཏོང་དགོས་ཀྱི་འདུག དེ་གལ་ཆེན་པོ་ཞེ་དྲགས་འདུག་ཅེས་བཀའ་སློབ་རབ་དང་རིམ་པར་བསྩལ་བ་ལ་བརྟེན་ནས། ཕྱི་ལོ་ ༢༠༡༢ ལོའི་ཕྱི་ཟླ་ ༥ བའི་ནང་དགེ་བཤེས་མ་གཏོང་ཕྱོགས་ཀྱི་ལམ་སྲོལ་གཏན་འབེབས་བྱས་ཏེ་ལག་བསྟར་བྱས་ཡོད་ཅིང་། ཕྱི་ལོ་ ༢༠༡༦ ཟླ་ ༡༢ ཚེས་ ༢༢ ཉིན་རྒྱ་གར་ལྷོ་ཕྱོགས་འབྲས་སྤུངས་ཚོགས་ཆེན་གྱི་འདུ་ཁང་དུ་ལོ་རྒྱུས་ནང་ཐོག་མར་བཙུན་མ་ ༢༠ ལས་བྱུང་བའི་དགེ་བཤེས་མའི་བསླབ་པ་མཐར་སོན་གྱི་མཛད་སྒོ་འཚོགས་པ་དང་། ཕྱི་ལོ་ ༢༠༡༩ ལོར་༧དཔལ་ལྡན་རྒྱུད་སྟོད་གྲྭ་ཚང་དུ་ཆེས་ཐོག་མར་སྔགས་རམས་དགེ་བཤེས་མའི་བསླབ་པ་མཐར་སོན་གྱི་མཛད་སྒོ་འཚོགས་ཡོད། ད་ལྟའི་བར་དགེ་བཤེས་མ་ཁྱོན་ ༦༠ དང་སྔགས་རམས་དགེ་བཤེས་མ་ཁྱོན་ ༤༨ བཅས་བྱུང་ཡོད་འདུག
གསར་འགོད་པ། སྐལ་བཟང་སྦྱིན་པ།
དང་ཐོག་བཙུན་མ་དགེ་བཤེས་དང་། སྔགས་རམས་པའི་བསླབ་པ་མཐར་སོན་པ་རྣམས་ལ་འཚམས་འདྲིའི་བཀྲ་ཤིས་བདེ་ལེགས་ཞུ། བཙུན་མ་བསླབ་པ་མཐར་སོན་པ་ཚོར་དགེ་བཤེས་མ་དང་། སྔགས་རམས་མ་ཟེར་དགོས་པ་འདི་ལོ་རྒྱུས་ནང་། སྔ་དུས་ཀྱི་ཕོ་མཆོག་མོ་དམན་དང་། ཕོ་མོ་དབྱེ་འབྱེད་ཀྱི་སྲོལ་ངན་ཆག་སྒོ་ཆེན་པོ་ཞིག་ཡིན་པས། སྦེད་དེ་མ་འགྲིགས་པ་རེད། ཤེས་ཡོན་གྱི་སྒྲོམ་གཞི་སྡེ་ཚན་་ཞིག་གི་ནང་ལའང་ཐེག་པ་རིམ་འཛེགས་ཀྱིས་བསླབ་པ་མཐར་སོན་ནས། གོ་ས་ཕྱག་འཁྱེར་བཞེས་ཡོད་ན། གོ་ས་དེ་དག་ལ་ཕོ་མོའི་མིང་བརྡ་ཁྱད་མེད་ཡིན་དགོས། དཔེར་ན། སྨན་རམས་པ་ཟེར་བ་ལས་སྨན་རམས་མ་དང་། སྨན་རམས་ཕ་སོགས་ནམ་ཡང་མི་ཟེར་རོ། དེ་བཞིན་ Ph.D Male དང་ Ph.D Female ཟེར་སྲོལ་མེད། འོན་ཀྱང་། ཁས་བླངས་པའི་བསླབ་སྡོམ་བཞེས་སྐབས། དགེ་ཚུལ་ཕ་མ་དང་། དགེ་སློང་ཕ་མ་ཟེར་སྲོལ་ཡོད་པས། གནད་དོན་འདི་ལ་བསམ་ཞིབ་ངེས་པར་གནང་དགོས་འདུག་སྙམ། ད་ཆ་མ་འོངས་པར། བཙུན་མ་སྔགས་རམས་པ་རྣམས་དགའ་ལྡན་ཁྲི་པར་ཕེབས་ཆོག་པའི་ལམ་པོ་ཆེའི་སྲོལ་བཟང་ལོ་རྒྱུས་རང་བཞིན་ཅན་རང་ཤུགས་ཀྱིས་ཆགས་སོང་རེད། དགའ་བསུ་ཚད་མེད་ཡོད། ༧རྒྱལ་བའི་དགོངས་པ་དང་མཛད་བཟང་བླ་ན་མེད་པ་ལོས་ཡིན།།