རྒྱ་གཞུང་གིས་བལ་ཡུལ་དང་ནེའུ་ཡོག་ཏུ་སྐོང་ཚོགས་བྱས་པའི་བོད་ཀྱི་ལོ་སར་གྱི་དུས་སྟོན་ཐོག་སྐྱབས་བཅོལ་བོད་མི་མང་པོས་མཉམ་ཞུགས་བྱས་ཡོད་འདུག
ཕྱི་ཟླ་ ༡ ཚེས་ ༢༨ ཉིན་བལ་ཡུལ་དུ་ཡོད་པའི་རྒྱ་ནག་གཞུང་ཚབ་ཀྱི་གོ་སྒྲིག་འོག བལ་ཡུལ་ནང་བོད་ཤིང་འབྲུག་ལོའི་ལོ་སར་སྲུང་གཙི་ཞུས་ཡོད་ཅིང་། ལོ་སར་སྲུང་གཙིའི་ལས་རིམ་དེའི་ནང་བོད་ནང་ནས་ཀན་སུའུ་ཀན་ལྷོ་བོད་རིགས་རང་སྐྱོང་ཁུལ་གྱི་ཟློས་གར་ཚོགས་པ་སྐད་བཏང་ནས་གཞས་སྣ་འཁྲབ་སྟོན་བྱས་ཡོད་པ་མ་ཟད། བལ་ཡུལ་དུ་གནས་སྡོད་བོད་མི་སོགས་མི་གྲངས་ ༡༠༠༠ མ་ཟིན་ཙམ་ལོ་སར་གྱི་དགོངས་ཚོགས་ནང་མཉམ་ཞུགས་བྱས་ཡོད་པ་རྒྱ་ནག་གཞུང་འབྲེལ་གྱི་བརྒྱུད་ལམ་ཁག་ཏུ་བསྒྲགས་འདུག
བལ་ཡུལ་ནང་བསྡུས་པའི་ལོ་སར་གྱི་དགོངས་ཚོགས་དེ་བལ་ཡུལ་གྱི་རྒྱལ་ས་ཀ་ཐི་མན་ཌིར་ཟ་ཁང་ཞིག་ཏུ་འཚོགས་ཡོད་ཅིང་། སྐབས་དེར་བལ་ཡུལ་རྒྱ་ནག་གཞུང་ཚབ་པ་ཁྲན་སོན་ (Chen Song) ཟེར་བས། རྒྱ་ནག་གིས་དུས་རྒྱུན་དུ་བལ་ཡུལ་ནང་བོད་རང་སྐྱོང་ལྗོངས་ཟློས་གར་ཚོགས་པ་སྐད་བཏང་ནས་ལོ་གསར་སྲུང་གཙི་ཞུས་པའི་རྒྱབ་ལྗོངས་དང་། རྒྱ་ནག་དམར་ཤོག་པས་བོད་རང་སྐྱོང་ལྗོངས་ཟེར་བར་ཕྱོགས་གང་ཅིའི་ཐད་ནས་འཛུགས་སྐྲུན་དང་ཡར་རྒྱས་བཏང་ཡོད་ལུགས་སོགས་བསྒྲགས་ཡོད་པ་མ་ཟད། བོད་རང་སྐྱོང་ལྗོངས་ཟེར་བའི་ནང་གི་བོད་མི་བརྒྱ་ཆ་ ༩༩ ལྷག་ཙམ་རྒྱ་ནག་གུང་ཁྲན་ཏང་གི་གསོ་སྐྱོང་འོག་བདེ་ཞིང་སྐྱིད་པར་གནས་ཡོད་པ་དང་། ད་ལྟ་རྒྱ་གཞུང་གིས་སི་ཁྲོན་དང་ཡུ་ནན། ཀན་སུའུ་དང་མཚོ་སྔོན་སོགས་བོད་རིགས་རང་སྐྱོང་ས་ཁུལ་དུ་མ་དངུལ་བཏང་ནས་འཛུགས་སྐྲུན་དང་འཚོ་བ་སོགས་ཡར་རྒྱས་བཏང་དང་གཏོང་མུས་ཡིན་ལུགས་སོགས་བརྗོད་འདུག
ཡང་དམིགས་བསལ་བལ་ཡུལ་ནང་ལོ་གསར་སྲུང་གཙི་བྱས་པ་དང་འབྲེལ་ནས་ཁྲན་སོན་ཟེར་བ་ཞིག་གིས་བལ་ཡུལ་དང་རྒྱ་ནག་གཉིས་བར་འཕེལ་རྒྱས་དང་མདུན་སྐྱོད་ཀྱི་མཉམ་འབྲེལ་དམ་ཟབ་ཡོད་པ་དང་ཕྱོགས་གཉིས་ཀྱི་མཉམ་ལས་འབྲེལ་ལམ་མུ་མཐུད་མདུན་སྐྱོད་བྱ་རྒྱུ་ཡིན་པས། བལ་ཡུལ་ནང་གནས་སྡོད་བོད་མི་ཚོས་དུས་རབས་གསར་བའི་རྒྱ་ནག་གི་སྤྱི་ཚོགས་རིང་ལུགས་དང་། མི་རིགས་མཐུན་སྒྲིལ། རྒྱལ་ཁབ་སྲུང་སྐྱོབ་སོགས་ཀྱི་ལས་གཞིའི་ནང་མཉམ་ཞུགས་བྱས་ཏེ། བལ་ཡུལ་དང་རྒྱ་ནག་གཉིས་ཀྱི་འབྲེལ་ལམ་གོང་མཐོར་གཞོགས་འདེགས་དང་ལེགས་སྐྱེས་འབུལ་དགོས་ལུགས་སོགས་བརྗོད་འདུག་པ་མ་ཟད། བལ་ཡུལ་དུ་ཡོད་པའི་རྒྱ་ནག་གཞུང་ཚབ་ཁང་གིས་བལ་ཡུལ་གནས་སྡོད་བོད་མི་རྣམས་ལ་སྔར་ལྷག་གིས་རོགས་འདེགས་དང་ཞབས་ཞུ་བསྒྲུབ་རྒྱུ་ཡིན་སྐོར་ཡང་བསྒྲགས་འདུག
གནས་ཚུལ་འདི་དང་འབྲེལ་ནས་རྒྱ་རིགས་ཉམས་ཞིབ་པ་ཀུན་དགའ་བཀྲ་ཤིས་ལགས་ཀྱིས། ལོ་སར་གྱི་ལས་རིམ་དེའི་ནང་བལ་ཡུལ་དུ་གནས་སྡོད་བོད་མི་ཆིག་སྟོང་ལྷག་ཙམ་གྱིས་མཉམ་ཞུགས་བྱས་ཡོད་ཟེར་གྱི་ཡོད་མོད། ཚང་མ་བོད་པ་ཡིན་མིན་དང་གྲངས་ཀ་དེ་ཙམ་འབྱོར་ཡོད་མེད་ཞུ་ཚོད་ཐིག་པ་ཞིག་མ་རེད། བོད་ནང་ཡར་རྒྱས་བཏང་ཡོད་ལུགས་དང་། བལ་ཡུལ་དང་རྒྱ་ནག་བར་གྱི་འབྲེལ་ལམ་ཡག་པོ་ཡོད་ཚུལ། བོད་རང་སྐྱོང་ལྗོངས་ལ་ཡར་རྒྱས་བྱུང་བ་མ་ཟད། ཞིང་ཆེན་བཞིའི་ནང་ཡོད་པའི་བོད་རིགས་སྤྱི་ལ་ལྟ་རྟོག་བྱེད་ཀྱི་ཡོད་ཟེར་བཞིན་ཡོད་པ་དང་། དེའི་ཐོག་ནས་དཔེར་ན་བལ་ཡུལ་དུ་ཡོད་པའི་མདོ་སྟོད་སྨད་གཉིས་ཀྱི་བོད་མི་ཚོར། ཁྱེད་ཚོའང་ང་ཚོ་སེམས་ནང་དུ་ཡོད་ཟེར་གྱི་ཡོད། ནམ་རྒྱུན་ཟློས་གར་འཁྲབ་མཁན་མང་ཆེ་བ་བོད་རང་སྐྱོང་ལྗོངས་ཁོངས་ནས་སྐད་གཏོང་གི་ཡོད། ད་རེས་ཀན་ལྷོ་ཁུལ་ནས་ཟློས་གར་འཁྲབ་སྟོན་པ་སྐད་བཏང་ནས་མི་ལ་ཚོར་བ་མ་འདྲ་བ་བསྐྲུན་ཐབས་བྱེད་ཀྱི་ཡོད་སྐོར་སོགས་བརྗོད་སོང་།
ཡང་ཁོང་གིས། རྒྱ་ནག་གིས་ལོ་སར་གཏོང་གི་ཡོད་ཟེར་བ་ཙམ་ལས་དོན་དངོས་ཐོག་རྒྱ་ནག་གི་བྱེད་སྟངས་ནི་ཆབ་སྲིད་ཀྱི་དྲིལ་བསྒྲགས་ཁོ་ནའི་ཆེད་ཡིན་པ་དང་། ལོ་སར་བཏང་ནས་དྲིལ་བསྒྲགས་བྱེད་པ་ནི་རྒྱ་ནག་གི་གཏན་འབེབ་སྒྲིག་གཞི་རེད། རྒྱ་ནག་གི་ལོ་སར་སྲུང་གཙི་ནི་ཆབ་སྲིད་ཀྱི་དྲིལ་བསྒྲགས་ཁོ་ནའི་ཆེད་དུ་རེད། དུས་རབས་གསར་བའི་རྒྱ་ནག་འོག་བོད་ལ་ཡར་རྒྱས་ཞེ་དྲགས་བཏང་ཡོད་ཟེར་གྱི་ཡོད་པ་དང་། དུས་རབས་གསར་པ་ཟེར་དུས་དེང་སྐབས་ཀྱི་ཚིག་གསར་པ་ཞིག་རེད། དུས་རབས་གསར་པ་ཟེར་དུས་ཞི་ཅིན་ཕིན་བསླེབས་པ་ནས་ཟེར་གྱི་ཡོད། ཞི་ཅིན་ཕིན་བསླེབས་པ་ནས་རྒྱ་ནག་གི་དུས་རབས་གསར་པ་ཞིག་ཆགས་ཡོད་ཟེར་གྱི་ཡོད། བྱས་རྗེས་ཏག་ཏག་བཤད་འདུག དུས་རབས་གསར་པའི་དེང་རབས་ཅན་གྱི་རྒྱ་ནག་འོག་བོད་ལ་ཡར་རྒྱས་ཞེ་དྲགས་ཕྱིན་ཡོད་ཟེར་གྱི་ཡོད། སྔོན་མ་མའོ་ཙེ་ཏུང་གི་སྐབས་སུ་ཀྲུང་གོ་གསར་པ་ཟེར་གྱི་ཡོད། ད་ལྟ་ཞི་ཅིན་ཕིན་གྱི་དུས་རབས་གསར་པ་ཟེར་ནས་མའོ་ཙེ་ཏུང་དང་འགྲན་སྡུར་བྱེད་བཞིན་པའི་རྣམ་པ་ཞིག་དེའི་ནང་དུ་ཡོད། མདོར་བསྡུས་ན། མི་གཞན་ལ་རྒྱ་ནག་གིས་བོད་ཡར་རྒྱས་བཏང་ཡོད་ལུགས་ཀྱི་མགོ་སྐོར་དང་དྲིལ་བསྒྲགས་རྫུན་མ་རྐྱང་རྐྱང་བསྒྲགས་ཡོད་སྐོར་བརྗོད་སོང་།
འདི་གའི་གསར་འགོད་པར་བོད་མི་ཞིག་གིས་གནས་ཚུལ་མཁོ་སྤྲོད་གནང་བ་ལྟར་ན། ཉེ་ལམ་ཨ་རིའི་གྲོང་ཁྱེར་ནེའུ་ཡོག་ཏུ་རྒྱ་ནག་གཞུང་ཚབ་ཀྱི་གོ་སྒྲིག་འོག་བོད་མི་བཅུ་གྲངས་ཤིག་འབོད་འགུག་གིས་ལོ་སར་སྲུང་གཙི་ཞུས་ཡོད་པ་དང་སྐབས་དེའི་གནས་ཚུལ་རྣམས་རྒྱ་ནག་གིས་གཞུང་འབྲེལ་དྲ་ལམ་ཁག་ཏུ་བསྟན་མེད་ཀྱང་། ལོ་སར་སྲུང་གཙི་བྱས་པ་དང་བོད་མིས་མཉམ་ཞུགས་བྱས་ཡོད་པ་ནི་དོན་དངོས་ཡིན་འདུག་ལ། རྒྱ་ནག་གཞུང་ཚབ་པས་གཏམ་བཤད་ཀྱང་སྤེལ་ཡོད་འདུག ད་དུང་ཡུ་རོབ་རྒྱལ་ཁབ་སུད་སི་དང་ཨི་ཊ་ལི་སོགས་སུ་རྒྱའི་གོ་སྒྲིག་འོག་བོད་ཀྱི་ལོ་སར་སྲུང་གཙིའི་ལས་རིམ་འཚོགས་ཡོད་ཀྱང་བོད་མིས་མཉམ་ཞུགས་བྱས་ཡོད་མེད་ཤེས་རྟོགས་གསལ་བོ་ཐུབ་ཀྱི་མི་འདུག
གསར་འགོད་པ། སྐལ་བཟང་སྦྱིན་པ།
