ཤེས་རིག་བཀའ་བློན་མཆོག་ནས་ཤེས་རིག་ལས་ཁུངས་ཀྱིས་བོད་ཕྲུག་རྣམས་ལ་ཚད་ལྡན་གྱི་སློབ་གསོ་སྤྲོད་བཞིན་ཡོད་པས་ཕ་མ་རྣམས་ཀྱིས་ཀྱང་བོད་ཀྱི་ཤེས་ཡོན་སློབ་གསོར་ཤུགས་བརྒྱག་རྒྱུ་གལ་ཆེན་ཡིན་སྐོར་གསུངས།
དེ་རིང་ཕ་མའི་ཉིན་མོར་བོད་མིའི་སྒྲིག་འཛུགས་ཀྱི་ཤེས་རིག་བཀའ་བློན་ཐར་ལམ་སྒྲོལ་མ་མཆོག་གིས་བོད་ཀྱི་ཕ་མ་ཡོངས་ལ་འཚམས་འདྲིའི་བཀྲ་ཤིས་བདེ་ལེགས་ཞུས་པ་དང་བསྟུན། དེ་རིང་ཞུ་འདོད་ཡོད་པའི་གལ་གནད་གཙོ་བོ་གཅིག་ནི་བོད་ཀྱི་སྐད་ཡིག་ཡིན། ༧གོང་ས་རྒྱལ་བ་རིན་པོ་ཆེ་མཆོག་དང་༧པཎ་ཆེན་སྐུ་ཕྲེང་བཅུ་པ་མཆོག་གཙོས་པའི་བླ་ཆེན་དང་མཁས་དབང་མང་པོས་སྐད་ཡིག་ནི་མི་རིགས་ཀྱི་སྲོག་རྩ་ཡིན་གསུངས་པ་དེ་ལ་དགོངས་པ་ཟབ་པོ་བཞེས་དགོས་པ་དང་། ང་ཚོ་བོད་གངས་ཅན་པ་ཡོངས་ནས་བོད་ཀྱི་སྐད་ཡིག་སྦྱོང་རྒྱུ་དང་། བེད་སྤྱོད་བྱེད་རྒྱུ། གོང་སྤེལ་གཏོང་རྒྱུ་བཅས་ཀྱི་ཐོག་དམིགས་བསལ་ཐུགས་སྣང་དང་འགན་ཁུར་བཞེས་རྒྱུ་གལ་ཆེན་པོ་ཡིན། བོད་ནང་ལ་བོད་ཕྲུག་ས་ཡ་གཅིག་ལྷག་ཙམ་བཅའ་སྡོད་སློབ་གྲྭར་བཙན་དབང་ཐོག་ནས་བཅུག་སྟེ། བོད་ཀྱི་སྐད་ཡིག་སྦྱོང་རྒྱུ་ལྟ་ཅི། བོད་སྐད་ཤོད་རྒྱུ་དང་ཐོས་རྒྱུ་ཙམ་ཡང་མེད་པ་བཟོ་ཡི་ཡོད། སྲིད་ཇུས་ངན་པ་འདིས་བོད་ཀྱི་སྐད་ཡིག་རྩ་བརླག་གཏོང་རྒྱུར་དམིགས་པ་མངོན་གསལ་ཡིན། དེ་ལ་གདོང་ལེན་བྱེད་རྒྱུའི་ཆེད་དུ་བཙན་བྱོལ་དུ་རང་དབང་ལུང་པར་ཡོད་པའི་བོད་རིགས་ཕ་མ་ཡོངས་ནས་སྔར་ལས་ལྷག་པའི་འགན་བཞེས་དགོས་པ་མ་ཟད། ང་ཚོ་ཚང་མས་བོད་ཡིག་སྦྱོང་རྒྱུ་དང་བོད་སྐད་བསྲེས་ལྷད་མེད་པ་རྒྱག་རྒྱུར་མུ་མཐུད་འབད་བརྩོན་གནང་དགོས་ཀྱི་འདུག ཕྱི་རྒྱལ་ཡུལ་གྲུ་ཁག་ཏུ་ཡོད་པའི་བོད་མི་ཕལ་ཆེ་བས་སོ་སོའི་ས་ཁུལ་ཁག་ཏུ་དང་བླངས་ཀྱིས་བོད་ཀྱི་སྐད་ཡིག་དང་རིག་གཞུང་སློབ་གྲྭ་བཙུགས་ཡོད་པ་དང་། མང་པོ་ཞིག་གིས་ལྷག་བསམ་རྣམ་དག་གི་ཐོག་ནས་དང་བླངས་དགེ་རྒན་གནང་གི་ཡོད། དེ་བཞིན་ཕ་མ་མང་པོས་སོ་སོའི་ཕྲུ་གུ་རྣམས་ལ་བོད་སྐད་དང་བོད་ཡིག་ཤེས་སུ་འཇུག་རྒྱུ་དང་། བོད་མིའི་ངོ་བོ་འཛིན་རྒྱུའི་ཆེད་དུ་གཟའ་མཇུག་སློབ་གྲྭར་གཏོང་གི་ཡོད་པ་མ་ཟད། སོ་སོའི་སློབ་གྲྭར་རྒྱབ་སྐྱོར་མཐུན་འགྱུར་གནང་གི་ཡོད་པ་ཚང་མ་ལ་རྗེས་སུ་ཡི་རངས་བསྔགས་བརྗོད་དང་ཐུགས་རྗེ་ཆེ་ཞུ་རྒྱུ་ཡིན། ཞེས་གསུངས་འདུག
ཡང་བཀའ་བློན་མཆོག་གིས། ཕྲུ་གུ་ཚོ་ལ་ཁྱོན་ཡོངས་ནས་ཚད་དང་ལྡན་པའི་ཤེས་ཡོན་སྤྲོད་རྒྱུ་གལ་ཆེན་པོ་ཡིན། བོད་པའི་སློབ་གྲྭའི་ནང་ཕྲུ་གུའི་གྲངས་འབོར་ཇེ་ཉུང་དུ་འགྲོ་ཡི་ཡོད་སྟབས། ཕྲུ་གུ་གཅིག་ཀྱང་འཕྲོ་བརླག་ཏུ་མ་འགྲོ་བ་བྱེད་རྒྱུ་དེ་ང་ཚོ་ཚང་མའི་ལས་འགན་རེད། ཤེས་རིག་ལས་ཁུངས་ཀྱི་ངོས་ནས་ཚད་དང་ལྡན་པའི་ཤེས་ཡོན་སྤྲོད་རྒྱུའི་འབད་བརྩོན་ཞུས་དང་ཞུ་བཞིན་ཡོད་ལ། དེར་ཕ་མ་དང་སྤྱི་ཚོགས་ཁྱོན་ཡོངས་ནས་མཐུན་འགྱུར་དང་རྒྱབ་སྐྱོར་གནང་རྒྱུ་མེད་དུ་མི་རུང་བ་ཆགས་ཀྱི་ཡོད། ཕ་མ་ཚོའི་ངོས་ནས་ཕྲུ་གུ་ཆུང་དུས་སྐབས་ནས་ཕྲུ་གུའི་ནུས་པ་དང་དོ་དབྱིངས་གང་དུ་ཡོད་པ་ངོས་འཛིན་གྱིས་དེ་དང་འབྲེལ་བའི་མ་འོངས་མདུན་ལམ་འཚོལ་རྒྱུ་དང་གསོ་སྐྱོང་གནང་རྒྱུ་ཧ་ཅང་གལ་ཆེན་པོ་རེད། དེ་བཞིན་ཤེས་རིག་ལས་ཁུངས་ནས་སློབ་ཡོན་གྱི་མཐུན་འགྱུར་གང་ལེགས་སྦྱར་དང་སྦྱོར་བཞིན་ཡོད་པས། ཕ་མ་དང་ཕྲུ་གུ་ཚོས་སློབ་ཡོན་ཞུ་སའི་ཁུངས་གཅིག་ནས་མ་གཏོགས་བཞེས་ཆོག་གི་མེད་པ་ཤེས་རིག་ལས་ཁུངས་ཀྱི་སྒྲིག་གཞིའི་ནང་ཁ་གསལ་པོ་ཡོད་པ་དེ་དག་ལག་བསྟར་དུ་འཁེལ་དགོས་ལ། དེ་ནི་ཕ་མས་ཕྲུ་གུར་བཟང་སྤྱོད་ཀྱི་མིག་དཔེ་བཟང་པོ་སྟོན་རྒྱུའི་གོ་སྐབས་ཤིག་ཀྱང་ཆགས་ཀྱི་ཡོད། དེང་སང་གཞིས་ཆགས་འགའ་ཤས་ནང་མི་མང་དཔེ་མཛོད་དེ་འདྲ་གསར་འཛུགས་གནང་འདུག་པ་འབྲེལ་ཡོད་སྤྱི་སྒེར་རྣམས་ལ་རྗེས་སུ་ཡི་རངས་བསྔགས་བརྗོད་དང་ཐུགས་རྗེ་ཆེ་ཞུ་རྒྱུ་དང་། ཤེས་རིག་ལས་ཁུངས་ཀྱི་ངོས་ནས་པར་སྐྲུན་ཞུས་པའི་དཔེ་དེབ་མཐུན་འགྱུར་མུ་མཐུད་ཞུ་རྒྱུ་དང་། བོད་རིགས་ཕ་མ་རྒན་གཞོན་ཚང་མས་དཔེ་མཛོད་དེ་དག་བེད་སྤྱོད་ཡག་པོ་བཏང་སྟེ། དཔེ་ཀློག་ལ་དགའ་བའི་སྤྱི་ཚོགས་དང་མི་རབས་སྐྲུན་རྒྱུ་ང་ཚོ་ཚང་མའི་ལས་འགན་རེད། ཅེས་གསུངས་འདུག
དེ་བཞིན་བཀའ་བློན་མཆོག་ནས། ཕ་མའི་ཉིན་མོར་ཤེས་རིག་ལས་ཁུངས་ཀྱི་ངོས་ནས་ཁྱིམ་ཚང་སློབ་གསོའི་གླེང་སྟེགས་ཤིག་དབུ་འཛུགས་ཞུ་ཡི་ཡོད། རྣམ་པ་ཚོས་བོད་ཡིག་སློབ་སྦྱོང་དྲྭ་ཚིགས་ནས་གསན་གཟིགས་གནང་ཐུབ། ལས་གཞི་དེའི་ཕུགས་ཀྱི་དམིགས་ཡུལ་ནི། སྐྱེ་འགྲོ་ཀུན་ལ་ཕན་པའི་བོད་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་སྐད་ཡིག་བཅས་ཉམས་པ་སླར་གསོ་དང་མི་ཉམས་རྒྱུན་འཛིན་བྱེད་རྒྱུ་དང་། ༧གོང་ས་རྒྱལ་བ་རིན་པོ་ཆེ་མཆོག་ནས་ཐུགས་རེ་མཛད་པ་བཞིན་བོད་མི་རྣམས་ནས་འཇིག་རྟེན་སྤྱི་ཡོངས་ལ་ཞབས་འདེགས་ཞུ་ཐུབ་པ་བྱེད་རྒྱུ་དེ་ཡིན། དེ་བཞིན་འཕྲལ་གྱི་དམིགས་ཡུལ་ནི། བོད་རིགས་ཕ་མ་རྣམས་ལ་ཕྲུ་གུ་གསོ་སྐྱོང་སྐོར་གོ་རྟོགས་སྤེལ་རྒྱུ་དང་། བོད་ཕྲུག་ཚོར་བོད་པའི་བསམ་བློ་དང་བོད་པའི་སྐད་བཤད་ཐུབ་པ། ཕྲུ་གུའི་ལུས་ངག་ཡིད་གསུམ་གྱི་འཚར་ལོངས་ལ་དོ་སྣང་སྤྲོད་ཐུབ་པ། ཕྲུ་གུའི་འཚར་ལོངས་ནང་མ་སྐད་ཧ་ཅང་གལ་ཆེན་པོ་ཡིན་པ་ཚོར་ཐུབ་པ། ཕྲུ་གུ་ཚོའི་མི་ཚེ་དོན་དང་ལྡན་པ་ཡོང་ཐབས། ལྷག་པར་དུ་བོད་ཕྲུག་རྣམས་མ་འོངས་པར་བོད་བསྟན་པ་ཆབ་སྲིད་ལ་ཞབས་འདེགས་ཞུ་ཐུབ་མཁན་ཆགས་ཐུབ་པའི་ཆེད་དུ་ཡིན། ཞེས་སོགས་གསུངས་འདུག
གསར་འགོད་པ། བྱམས་པ་ཚེ་རིང་།
རྩོམ་སྒྲིག་པ། པདྨ་མཚོ།
