ཕྱི་རྒྱལ་གྱི་ས་གནས་གྲོང་སྡེ་ལས་ཁུངས་ཁག་ཅིག་གིས་གཞུང་འབྲེལ་ཐོག་ནས་བོད་ཀྱི་རྒྱལ་དར་སྒྲེང་འཛུགས་བྱས་དང་བྱེད་བཞིན་ཡོད་འདུག
ཁ་སང་ཕྱི་ཚེས་ ༦ ཉིན་ཨ་རིའི་ཁཱ་ལི་ཧྥོར་ནི་ཡ་མངའ་སྡེའི་ཨེལ་སེར་རི་ཌོ་(El Cerrito)་གྲོང་སྡེ་ལྷན་ཚོགས་ཀྱི་མདུན་དུ། ས་གནས་བོད་རིགས་ཚོགས་པའི་གོ་སྒྲིག་འོག བོད་ཀྱི་རྒྱལ་དར་སྒྲེང་འཛུགས་ཀྱི་མཛད་སྒོ་ཞིག་འཚོགས་ཤིང་། མཛད་སྒོའི་ཐོག་ཨེལ་སེར་རི་ཌོ་གྲོང་ཁྱེར་གྱི་སྤྱི་ཁྱབ་ཏེ་སཱ་རུ་ཏ་ནི་ཀ་(Tessa Rudnik) ལགས་གཙོས་ས་གནས་བོད་རིགས་མི་མང་པོ་འདུ་འཛོམས་བྱུང་ཡོད་ཅིང་། སྐབས་དེར་ཨེལ་སེར་རི་ཌོ་གྲོང་ཁྱེར་སྤྱི་ཁྱབ་ཏེ་སཱ་རུ་ཏ་ནི་ཀ་ལགས་ཀྱིས། ལོ་ངོ་མང་པོའི་སྔོན་དུ་ཁོང་གི་ཨ་ཕ་དང་ཁོང་གཉིས་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་བཅར་ཞུ་བའི་གོ་སྐབས་ཐོབ་ཡོད་པ་མ་ཟད། བོད་དོན་ནི་ཁོང་མོའི་ཁྱིམ་ཚང་དང་བློ་ཐག་ཉེ་བའི་གནད་དོན་ཞིག་ཏུ་ཆགས་ཡོད་པ་དང་། བོད་ཀྱི་རིག་གཞུང་གཅེས་སྐྱོང་བྱེད་རྒྱུ་གལ་ཆེན་ཡིན་སྐོར་གསུངས་འདུག
དེ་བཞིན་ཨེལ་སེར་རི་ཌོ་གྲོང་ཁྱེར་སྤྱི་ཁྱབ་མཚན་ཐོག་ནས་ཐེངས་ ༦༥ བའི་གསུམ་བཅུ་དུས་དྲན་ཉིན་མོར་གསལ་བསྒྲགས་ཞིག་སྤེལ་ཡོད་པའི་ནང་། གསུམ་བཅུའི་དུས་དྲན་ཉིན་འཛམ་གླིང་ཡུལ་གྲུ་གང་སར་ཡོད་པའི་བོད་མི་རྣམས་མཉམ་འཛོམས་ཐོག རྒྱ་གཞུང་གིས་བོད་ས་བཙན་བཟུང་བྱས་ནས་ལོ་ངོ་ ༦༥ འཁོར་བ་དང་། བོད་ཀྱི་བདེན་དོན་ཆེད་ཚེ་སྲོག་ཤོར་བའི་བོད་མི་ས་ཡ་གཅིག་ལྷག་ལ་མྱ་ངན་ཞུ་ཡི་ཡོད། རྒྱ་གཞུང་གིས་བོད་ནང་འགྲོ་བ་མིའི་ཐོབ་ཐང་རྡོག་རོལ་བཏང་སྟེ་མུ་མཐུད་དྲག་གནོན་ཤུགས་ཆེན་བྱེད་བཞིན་ཡོད་པ་མ་ཟད། བོད་ཀྱི་སྐད་ཡིག་དང་། རིག་གཞུང་། ངོ་བོ་བཅས་རྩ་བརླག་ཏུ་གཏོང་བཞིན་ཡོད་པར་རང་དབང་ལ་དགའ་བའི་མི་མང་ཡོངས་ཀྱིས་སེམས་འཁུར་བྱེད་དགོས་པའི་གནད་དོན་ཞིག་ཆགས་ཡོད། ཅེས་འཁོད་འདུག
ཡང་དབྱིན་ཡུལ་གྱི་རྒྱལ་ས་ལོན་ཌོན་ཝོལ་ཝི་ཆི་གྲོང་སྡེ་ཚོགས་ཁང་(Woolwich Town Hall)མདུན་དུ། གྷི་རན་ཝི་ཆི་(Royal Borough of Greenwich)གྲོང་སྡེ་ལས་ཁུངས་དང་ས་གནས་བོད་རིགས་ཚོགས་པའི་གོ་སྒྲིག་འོག བོད་ཀྱི་རྒྱལ་དར་སྒྲེང་འཛུགས་ཀྱི་མཛད་སྒོ་ཞིག་འཚོགས་ཡོད་ཅིང་། མཛད་སྒོའི་ཐོག་གྷི་རན་ཝི་ཆི་གྲོང་སྡེའི་སྤྱི་ཁྱབ་ཌོ་མི་ནི་ཁི་མ་བྷན་(Dominic Mbang) ལགས་དང་། གྲོང་སྡེ་ལྷན་ཚོགས་ཀྱི་འཐུས་མི་ཁག་ཅིག དབྱིན་ཡུལ་བོད་ཀྱི་སྐུ་ཚབ་དོན་གཅོད་ཕར་སི་བསོད་ནམས་ཚེ་རིང་ལགས། དབྱིན་ཡུལ་བོད་རིགས་སྤྱི་མཐུན་པའི་ཚོགས་གཙོ་བསྟན་འཛིན་ཀུན་དགའ་ལགས། གྷི་རན་ཝི་ཆི་བཀྲ་ཤིས་གླིང་བོད་རིགས་ཚོགས་པའི་ཚོགས་གཙོ་གཡུ་སྒྲོན་ལྷ་མོ་ལགས། ས་གནས་བོད་མི་དང་བོད་དོན་རྒྱབ་སྐྱོར་བ་བཅས་འདུ་འཛོམས་གནང་ཡོད་ཅིང་། སྐབས་དེར་གྲོང་སྡེའི་སྤྱི་ཁྱབ་ཌོ་མི་ནི་ཁི་མ་བྷན་ལགས་ཀྱིས། ལོ་འདི་ནི་༧གོང་ས་རྒྱལ་བ་རིན་པོ་ཆེ་མཆོག་གི་དབུས་བོད་མི་རྣམས་བཙན་བྱོལ་དུ་འབྱོར་ནས་ལོ་ངོ་༦༥ འཁོར་བའི་ལོ་རྒྱུས་རྗེས་དྲན་གྱི་དུས་ཚིགས་གལ་གནད་ཅིག་ཡིན་སྟབས། བོད་མི་རྣམས་ཀྱི་དཀའ་ངལ་ལ་གདུང་སེམས་མཉམ་སྐྱེད་ཞུ་བཞིན་ཡོད་པ་དང་སྦྲགས། བོད་མི་རྣམས་ལ་རང་དབང་གི་ཉིན་མོ་ཞིག་ཤར་ཐུབ་པའི་སྨོན་འདུན་ཡོད་ཅེས་གསུངས་འདུག
ཕྱི་ལོ་ ༢༠༡༥ ལོར་༧གོང་ས་རྒྱལ་བ་རིན་པོ་ཆེ་མཆོག་དབྱིན་ཡུལ་གྱི་གྷི་རན་ཝི་ཆི་ས་གནས་ནང་ཆིབས་བསྒྱུར་བསྐྱངས་ཏེ། གསུམ་བཅུ་དུས་དྲན་དང་བསྟུན་ས་གནས་དེ་གར་བོད་ཀྱི་རྒྱལ་དར་སྒྲེང་འཛུགས་གནང་ཡོད་འདུག དེ་བཞིན་ཨ་རིའི་མངའ་སྡེ་ནེའུ་ཇེར་སི་གྲོང་ཁྱེར་གྱི་ཨི་སི་ཊི་རུ་ཐེར་ཧྥོར་ཌི་(East Rutherford )ས་གནས་གྲོང་སྡེ་ལས་ཁུངས་ནས་གསལ་བསྒྲགས་སྤེལ་བ་ལྟར་ན། ཟླ་འདིའི་ ཚེས་ ༩ ཉིན་གྲོང་སྡེ་ལས་ཁུངས་ཀྱི་མདུན་ཐང་དུ་བོད་ཀྱི་རྒྱལ་དར་སྒྲེང་འཛུགས་ཐེངས་དང་པོ་དེ་བྱ་རྒྱུ་ཡིན་འདུག
གསར་འགོད་པ། བྱམས་པ་ཚེ་རིང་།
རྩོམ་སྒྲིག་པ། སྐལ་བཟང་སྦྱིན་པ།
