༧གོང་ས་མཆོག་གིས་འབྲས་ལྗོངས་དང་ཨ་རུ་ན་ཅལ་གྱི་སྤྱི་ཁྱབ་བློན་ཆེན་གཉིས་ལ་འཚམས་འདྲི་མཛད།

༧གོང་ས་མཆོག་གིས་ཨ་རུ་ན་ཅལ་དང་འབྲས་ལྗོངས་ཀྱི་སྤྱི་ཁྱབ་བློན་ཆེན་གཉིས་ཀྱི་ཆབ་སྲིད་ཚོགས་པར་འོས་བསྡུའི་ཁྲོད་རྒྱལ་ཁ་ཐོབ་པར་འཚམས་འདྲི་མཛད་པ་དང་བསྟུན་མུ་མཐུད་མི་མང་གི་དཀའ་སྡུག་སེལ་ནས་བདེ་སྐྱིད་བསྐྲུན་ཐབས་གནང་དགོས་པའི་ལམ་སྟོན་སྩལ།

དེ་རིང་ཕྱི་ཚེས་ ༣ ཉིན་༧གོང་ས་རྒྱལ་བ་རིན་པོ་ཆེ་མཆོག་གིས། ཨ་རུ་ན་ཅལ་དང་འབྲས་ལྗོངས་མངའ་སྡེ་སྤྱི་ཁྱབ་བློན་ཆེན་རྣམ་གཉིས་ཀྱི་མཚན་ཐོག་ཏུ་ཕྱག་ཡིག་ཅིག་བྲིས་ཏེ། སྐུ་ཞབས་པདྨ་མཁའ་འགྲོ་དང་པེ་རེམ་སིན་ཏ་མཱང་གཉིས་ཀྱི་ཆབ་སྲིད་ཚོགས་པར་འདི་ལོའི་རྒྱ་གར་གྱི་མངའ་སྡེ་འོས་བསྡུའི་ཁྲོད་རྒྱལ་ཁ་ཐོབ་པར་འཚམས་འདྲི་མཛད་འདུག

དེ་འབྲེལ་དགའ་ལྡན་ཕོ་བྲང་གི་དྲ་ཐོག་ཏུ་༧མགོན་པོ་གང་ཉིད་མཆོག་གིས།  ཨ་རུ་ན་ཅལ་མངའ་སྡེའི་སྤྱི་ཁྱབ་བློན་ཆེན་པདྨ་མཁའ་འགྲོ་མཆོག་དང་།  འབྲས་ལྗོངས་ཀྱི་སྤྱི་ཁྱབ་བློན་ཆེན་པེ་རེམ་སིན་ཏཱ་མང་གཉིས་ཀྱི་ཆབ་སྲིད་ཚོགས་པར་མངའ་སྡེའི་འོས་བསྡུའི་ཁྲོད་རྒྱལ་ཁ་ཐོབ་པར་འཚམས་འདྲི་ཞུ་བཞིན་ཡོད། ཅེས་གསུངས།

འདས་པའི་ལོ་ངོ་འདི་དག་གི་རིང་ལ་ཨ་རུ་ན་ཅལ་མངའ་སྡེ་དང་འབྲས་ལྗོངས་གཉིས་ཡར་རྒྱས་གོང་འཕེལ་ཕྱིན་པ་༧གོང་ས་མཆོག་ལ་ཐུགས་ཚོར་བྱུང་བ་དང་། བློན་ཆེན་རྣམ་པ་གཉིས་ནས་མུ་མཐུད་དབུལ་ཕོངས་ཀྱི་གནས་སྟངས་ཡར་རྒྱས་གཏོང་ཐབས་ལ་བརྩོན་འགྲུས་ལྷོད་མེད་གནང་རྒྱུའི་ཐུགས་རེ་གནང་གི་ཡོད་འདུག

༸གོང་ས་མཆོག་གིས་སྲིད་བློན་པདྨ་མཁའ་འགྲོ་མཆོག་དང་། བློན་ཆེན་པེ་རེམ་སིན་ཏཱ་མང་ནས་མངའ་སྡེ་སོ་སོའི་མི་མང་གི་རེ་འདོད་སྐོང་རྒྱུར་དཀའ་ངལ་འཕྲད་རིགས་ལ་གདོང་ལེན་ལེགས་འགྲུབ་ཡོང་བར་ཐུགས་སྨོན་བཅས་སྩལ་འདུག

ཡང་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས། ཨེག་སི་གམ་ཊུ་ཝེ་ཊར་དྲ་ཐོག་ཏུ་ཨ་རུ་ན་ཅལ་མངའ་སྡེ་སྤྱི་ཁྱབ་བློན་ཆེན་པདྨ་མཁའ་འགྲོ་མཆོག་ལ་འཚམས་འདྲི་ཞུ་ཡིག་ཅིག་སྤེལ་བའི་ནང་། ཁྱེད་ལ་འོས་བསྡུའི་ཁྲོད་རྒྱལ་ཁ་ཐོབ་པ་དེས། ཨ་རུ་ན་ཅལ་མངའ་སྡེ་མི་མང་གིས་ཁྱེད་ཀྱི་མགོ་ཁྲིད་ཀྱི་ནུས་པར་ཡིད་ཆེས་བྱེད་བཞིན་པ་མཚོན་པས། ཁྱེད་ཀྱི་དབུ་ཁྲིད་འོག་ཨ་རུ་ན་ཅལ་མི་མང་ལ་བདེ་སྐྱིད་དང་འཕེལ་རྒྱས་མུ་མཐུད་ཡོང་བའི་སྨོན་འདུན་ཞུ་བཞིན་ཡོད། ཁྱེད་ཀྱིས་བཅིངས་པའི་བོད་མིར་རྒྱབ་སྐྱོར་དང་གྲོགས་པོའི་མཛའ་འབྲེལ་ལ་བཀའ་དྲིན་ཆེ་ཞུ་རྒྱུ་ཡིན། དེ་བཞིན། འབྲས་ལྗོངས་མངའ་སྡེ་སྤྱི་ཁྱབ་བློན་ཆེན་པེ་རེམ་སིན་ཏཱ་མང་མཆོག་ལ། ངས་བོད་མིའི་སྒྲིག་འཛུགས་དང་བོད་མི་ཡོངས་ཀྱི་ཚབ་ཞུས་ནས་ཁྱེད་ལ་རྟེན་འབྲེལ་ཞུ། ཁྱེད་ཀྱིས་ལྷག་བསམ་རྣམ་དག་གིས་འབྲས་ལྗོངས་མི་མང་ལ་ཞབས་འདེགས་ཞུས་པ་དེས་ད་ལན་ཁྱེད་ལ་རྒྱལ་ཁ་འདི་ཐོབ་པ་རེད། ངས་འབྲས་ལྗོངས་མདུན་སྐྱོད་ཀྱི་བྱ་གཞག་མཐའ་དག་ལམ་ལྷོང་ཡོང་བའི་སྨོན་འདུན་ཞུ་བཞིན་ཡོད། ཅེས་གསུངས་འདུག

ཉེ་ལམ་བསྡུས་པའི་རྒྱ་གར་གྱི་འོས་བསྡུ་ལས། ཨ་རུ་ན་ཅལ་མངའ་སྡེའི་འོས་བསྡུ་ནང་པདྨ་མཁའ་འགྲོ་ལགས་ཀྱི་ཆབ་སྲིད་ཚོགས་པར་སྲིད་སྟེགས་ཁྱོན་ ༦༠ ནས་ ༤༦ ཐོབ་སྟེ་རྒྱལ་ཁ་ཐོབ་པ་དང་། འབྲས་ལྗོངས་ཀྱི་འོས་བསྡུའི་ཁྲོད་པེ་རེམ་སིན་ཏཱ་མང་ལགས་ཀྱི་ཆབ་སྲིད་ཚོགས་པར་སྲིད་སྟེགས་ཁྱོན་ ༣༢ ལས་སྲིད་སྟེགས་ ༣༡ ཐོབ་སྟེ་རྒྱལ་ཁ་ཐོབ་ཡོད་འདུག

གསར་འགོད་པ། སྐལ་བཟང་སྦྱིན་པ།