ཡུ་རོབ་མཐུན་ཚོགས་ཀྱི་སྐུ་ཚབ་ཚོགས་ཆུང་ཞིག་བོད་དུ་ཕེབས་འཆར་འདུག 

ཡུ་རོབ་མཐུན་ཚོགས་ཀྱི་ཨེ་ཤ་ཡ་དང་ཞི་བདེ་རྒྱ་མཚོའི་ཁུལ་གྱི་སྤྱི་ཁྱབ་བཀོད་འདོམས་པ་གཞོན་པ་པོའོ་ལ་ལགས་ཀྱིས་སྣེ་འཁྲིད་པའི་སྐུ་ཚབ་ཚོགས་ཆུང་ཞིག་བོད་དུ་ཕེབས་ཏེ་བོད་ནང་གི་འགྲོ་བ་མིའི་ཐོབ་ཐང་གི་གནས་བབ་ཐད་ལ་རྒྱུས་ལོན་གནང་རྒྱུ་ཡིན་འདུག

རྒྱལ་སྤྱིའི་འགྲོ་བ་མིའི་ཐོབ་ཐང་གི་གཞུང་སྒེར་གྱི་ཚོགས་པ་མང་པོ་ཞིག་རྒྱ་ནག་གཞུང་གིས་བཙན་འཛུལ་བྱས་པའི་བོད་དང་། ཤར་ཏུ་ཀི་སི་ཐན་སོགས་སུ་ཕྱིན་ཏེ། ཡུལ་ལུང་དེ་དག་ནང་གི་འགྲོ་བ་མིའི་ཐོབ་ཐང་གི་གནས་བབ་སོགས་ཀྱི་ཐད་ལ་རྒྱུས་ལོན་ཡོང་ཐབས་གནང་གི་ཡོད་པ་ལྟར། ཟླ་འདིའི་ཕྱི་ཚེས་ ༡༦ ནས་ཡུ་རོབ་མཐུན་ཚོགས་ཀྱི་ཨེ་ཤ་ཡ་དང་ཞི་བདེ་རྒྱ་མཚོའི་ཁུལ་གྱི་སྤྱི་ཁྱབ་བཀོད་འདོམས་པ་གཞོན་པ་པོའོ་ལ་( Paola Pampaloni) ལགས་ཀྱིས་སྣེ་འཁྲིད་པའི་སྐུ་ཚབ་ཚོགས་ཆུང་ཞིག་བོད་ནང་དུ་ཕེབས་ཏེ། བོད་དང་ཤར་ཏུར་ཀི་སི་ཐན། ཧོང་ཀོང་བཅས་ཀྱི་འགྲོ་བ་མིའི་ཐོབ་ཐང་གི་གནད་དོན་ཐད་ལ་གླེང་སློང་གནང་འཆར་ཡོད་འདུག

དེའི་ཐད་ཡུ་རོབ་མཐུན་ཚོགས་ཀྱི་ཕྱི་སྲིད་ལས་དོན་གྱི་མགྲིན་ཚབ་པ་ནཱ་བྷི་ལ་(Nabila Massrali) ལགས་ཀྱིས། ཡུ་རོབ་མཐུན་ཚོགས་ཀྱི་སྐུ་ཚབ་ཚོགས་ཆུང་དེ་རྒྱ་ནག་གིས་བཙན་བཟུང་བྱས་པའི་བོད་ཁུལ་དུ་བསྐྱོད་དེ། ཡུ་རོབ་མཐུན་ཚོགས་ཀྱི་ཕྱི་སྲིད་ལས་དོན་དང་འབྲེལ་ནས། བོད་ནང་སོགས་ཀྱི་འགྲོ་བ་མིའི་ཐོབ་ཐང་གི་གནས་བབ་ཐད་ནས་རྒྱུས་ལོན་བྱ་རྒྱུ་ཡིན་སྐོར་སོགས་བརྗོད་འདུག

ད་ལྟའི་ཆར་ཚོགས་ཆུང་དེ་བོད་ནང་དུ་འགྲོ་འཆར་ཡོད་པའི་གནས་ཚུལ་ཐོན་པ་ཙམ་ལས། བོད་ནང་གི་ས་གནས་གང་དུ་འགྲོ་འཆར་ཡོད་མེད་དང་། སྐོར་སྐྱོད་ཀྱི་ལས་རིམ་སོགས་གསལ་ཁ་མེད་ཀྱང་། བོད་དང་། ཤར་ཏུ་ཀི་སི་ཐན་སོགས་ཀྱི་འགྲོ་བ་མིའི་ཐོབ་ཐང་གི་གནས་བབ་དང་། རྒྱ་ནག་དང་ཨུ་རུ་སུའི་འབྲེལ་ལམ་དང་ཨུ་རུ་སུས་ཡུ་ཁེ་རིན་ལ་བཙན་འཛུལ་བྱེད་མུས་ཡིན་པའི་ཐད་ལ་གླེང་སློང་གནང་འཆར་སྐོར་སོགས་བསྒྲགས་འདུག

འདས་ལོའི་ཕྱི་ཟླ་ ༩ ནང་ཡུ་རོབ་མཐུན་ཚོགས་ཀྱི་ཚོང་དོན་འགན་འཛིན་སྐུ་ཞབས་ཝལ་ཌི་སི་ལགས་ (Valdis dombrovskis) ཀྱིས་རྒྱ་ནག་གི་གྲོང་ཁྱེར་ཧྲང་ཧེ་དང་སུའུ་ཀྲུའུ་སོགས་སུ་སྐོར་སྐྱོད་བྱས་ཏེ། རྒྱ་ནག་གཞུང་གིས་འགྲོ་བ་མིའི་ཐོབ་ཐང་གི་གནས་བབ་ལ་རྡོག་རོལ་དང་། མུ་མཐུད་དུ་ཨུ་རུ་སུར་རྒྱབ་སྐྱོར་གྱིས་ཡུ་ཁེ་རིན་ལ་བཙན་འཛུལ་བྱས་ཚེ། འཛམ་གླིང་གི་ཚོང་ཤག་ཆེ་ཤོས་གྱུར་བའི་ཡུ་རོབ་མཐུན་ཚོགས་དང་་རྒྱ་ནག་གི་འབྲེལ་ལམ་ཇེ་སྡུག་ཏུ་འགྲོ་སྲིད་པའི་ཉེན་བརྡ་བཏང་ཡོད།

དེ་བཞིན་འདས་ལོའི་ཕྱི་ཟླ་ ༡༢ ཚེས་ ༡༤ ཉིན་ཡུ་རོབ་གྲོས་ཚོགས་སུ་གྲོས་ཚོགས་འཐུས་མི་ཁག་ཅིག་གིས། རྒྱ་ནག་གཞུང་གིས་བོད་ནང་གི་བྱིས་པ་ས་ཡ་ ༡ ཙམ་བཅའ་སྡོད་སློབ་གྲྭར་བཅུག་སྟེ་རྒྱ་སྒྱུར་སློབ་གསོ་སྤྲོད་བཞིན་པར་སྐྱོན་འཛུགས་དང་། རྒྱ་ནག་གཞུང་གིས་སྲིད་ཇུས་དེ་འཕྲལ་དུ་མཚམས་འཇོག་དགོས་པའི་དོན་ཚན་གསུམ་ཅན་གྱི་གྲོས་འཆར་ཞིག་བཏོན་ནས། གྲོས་ཚོགས་འཐུས་མི་ ༤༧༧ གྱིས་རྒྱབ་སྐྱོར་དང་། འཐུས་མི་ ༡༤ ཡི་དགག་བྱ། གཞན་འཐུས་མི་ ༤༥ ཡིས་བར་གནས་བྱས་ཏེ། མང་མོས་ཀྱིས་གཏན་འབེབས་བྱུང་ཡོད་པ་རེད།

སྤྱིར་འདས་པའི་ལོ་ཤས་ནང་རྒྱ་ནག་གཞུང་གིས་མཐུན་ཕྱོགས་རྒྱལ་ཁབ་ཁག་གི་སྐུ་ཚབ་ཚོགས་པ་དང་འཐུས་མི་སོགས་བོད་དུ་ཡུལ་སྐོར་དང་། རྒྱ་ནག་གཞུང་གིས་སྲུང་གཙི་བྱེད་མུས་ཡིན་པའི་དུས་ཆེན་ཁག་ལ་ཆེད་དུ་སྐད་བཏང་ནས། བོད་ནང་གི་འཛུགས་སྐྲུན་དང་བོད་མི་རྣམས་ཀྱིས་བདེ་སྐྱིད་ཀྱི་འཚོ་བ་རོལ་གྱི་ཡོད་ལུགས་ཀྱི་དྲིལ་བསྒྲགས་ཤུགས་ཆེན་བྱེད་ཀྱི་ཡོད་པ་རེད། འདས་ལོའི་ཕྱི་ཟླ་ ༨ ཚེས་ ༢༨ ནས་ཉིན་གསུམ་རིང་། རྒྱ་ནག་གཞུང་གིས་མཉམ་འབྲེལ་རྒྱལ་ཚོགས་ཀྱི་ཚོགས་ཁོངས་རྒྱལ་ཁབ་ལྔ་སྟེ། རྒྱ་ནག་དང་མཐུན་ཕྱོགས་ཝེ་ནེ་ཛུ་ལཱ་(Venezuela)དང་། བྷའི་ལཱ་རུ་སུ་(Belarus)ནི་ཁཱ་རཱ་གྷུ་(Nicaragua) ཁུའུ་བྷ་(Cuba) པཱ་ཀི་སི་ཐན་(Pakistan) བཅས་ཀྱི་སྐུ་ཚབ་ཁག་ཅིག་བོད་ནང་ལྟ་སྐོར་དུ་འཁྲིད་དེ། བོད་ཀྱི་རྒྱལ་ས་ལྷ་སའི་ཕོ་བྲང་པོ་ཏ་ལ་དང་། གཙུག་ལག་ཁང་། སེ་ར་དགོན་སོགས་སུ་ལྟ་སྐོར་དུ་ཕྱིན་ཡོད་པ་དང་། ཕྱིས་སུ་ཁུའུ་བྷ་རྒྱལ་ཁབ་ནས་ཡིན་པ་ཇོན་ཨེན་ཐོ་ནོའོ་(Juan Antonio Quintanilla Roman)ཞེས་པ་ཞིག་གིས་སྒེར་གྱི་སྤྱི་ཚོགས་དྲ་ལམ་དུ། དེ་རིང་ལྷ་སའི་ཇོ་ཁང་དུ་ཕྱིན་པ་ཡིན། ཆོས་པ་ཚོས་རང་གི་ཆོས་དད་ཉམས་ལེན་བྱེད་བཞིན་པ་ནི་ཧ་ལས་དགོས་པ་ཞིག་འདུག་ཅེས་དང་། བོད་ནང་ཡར་རྒྱས་ཆེན་པོ་ཕྱིན་ཡོད་སྐོར་སོགས་ཀྱི་མཐོང་ཚུལ་བརྗོད་ཡོད་ཀྱང་། རྒྱ་ནག་གཞུང་གིས་ས་གནས་གང་དང་མི་སུ་ལ་ཐུག་དགོས་མིན་སོགས་ལས་རིམ་ཆ་ཚང་ལ་སྟངས་འཛིན་བྱས་དང་བྱེད་བཞིན་ཡོད་སྟབས། ཕྱིའི་འཛུགས་སྐྲུན་ཙམ་མ་གཏོགས་མི་མང་གི་བདེ་སྡུག་ངོ་མ་ཞིག་ཤེས་རྟོགས་བྱུང་ཁག་པོ་ཆགས་ཡོད་པ་རེད།

གསར་འགོད་པ། དཔལ་ལྡན།

རྩོམ་སྒྲིག་བྱེད་མཁན། པདྨ་མཚོ།