ཨ་རིའི་གྲོས་ཚོགས་འོག་མའི་ཚོགས་གཙོ་ཟུར་པ་དང་བོད་དོན་རྒྱབ་སྐྱོར་བ་གྲགས་ཅན་ལྕམ་སྐུ་ནན་སི་པེ་ལོ་སི་མཆོག་གང་མགྱོགས་དྷ་རམ་ས་ལར་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་བཅར་ཞུ་རུ་ཕེབས་འཆར་ཡོད་འདུག
US House Democratic Leader Nancy Pelosi meets Tibetan spiritual leader the Dalai Lama, Dharamshala (Photo: SNS)
ཁ་སང་ཕྱི་ཚེས་ ༡༣ ཉིན་རྒྱ་གར་གྱི་གསར་ཁང་སི་ཨན་ཨན་ (CNN News 18) གྱིས་བདུན་ཕྲག་རྗེས་མའི་ནང་ལྕམ་སྐུ་མཆོག་བཞུགས་སྒར་དྷ་རམ་ས་ལར་ཕེབས་ཏེ་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་བཅར་ཞུ་རྒྱུ་ཡིན་སྐོར་གནས་ཚུལ་སྤེལ་འདུག་ལ། ཕྱི་ལོ་ ༢༠༡༧ ལོར་ལྕམ་སྐུ་མཆོག་གིས་དབུ་འཁྲིད་པའི་ཨ་རིའི་གྲོས་ཚོགས་ཀྱི་སྐུ་ཚབ་ཚོགས་ཆུང་ཞིག་བཞུགས་སྒར་དྷ་རམ་ས་ལར་ཆེད་དུ་ཕེབས་ཏེ་༧གོང་ས་རྒྱལ་བ་རིན་པོ་ཆེ་མཆོག་དང་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པར་མཇལ་འཕྲད་གནང་ཡོད་པ་དང་། ཟླ་འདིའི་ཟླ་མཇུག་ཏུ་༧གོང་ས་རྒྱལ་བ་རིན་པོ་ཆེ་མཆོག་ཨ་རིར་ཞབས་པུས་སྨན་བཅོས་སླད་ཕེབས་གཏན་འཁེལ་ཡོད་པ་རེད།
༧གོང་ས་རྒྱལ་བ་རིན་པོ་ཆེ་མཆོག་ནས་ནམ་རྒྱུན་ལྕམ་ནན་སི་པེ་ལོ་སི་མཆོག་ནི་བོད་དང་མཛའ་བརྩེ་ཟབ་པའི་གྲོགས་པོ་ཡག་ཤོས་ཤིག་དང་། འདས་པའི་ལོ་མང་པོའི་རིང་ལྷག་བསམ་རྣམ་དག་དང་བློ་སེམས་འགྱུར་མེད་ཀྱིས་བོད་ཀྱི་འཐབ་རྩོད་ཐོག་རྒྱབ་སྐྱོར་ཤུགས་ཆེན་པོ་བསྐྱོན་མཁན་ཞིག་ཡིན་ཞེས་གསུངས་ཡོད་པ་ལྟར། ལྕམ་སྐུ་མཆོག་ནི་ཨ་རིའི་གྲོས་ཚོགས་འཐུས་མིའི་ནང་ནས་བོད་དང་བོད་མིར་དམིགས་བསལ་གྱིས་འབྲེལ་ལམ་ཟབ་ཅིང་རྒྱུས་མངའ་ཆེ་བ། ཨ་རིའི་གྲོས་ཚོགས་ནང་བོད་དོན་ལ་རྒྱབ་སྐྱོར་གྱི་དབུ་འཁྲིད་ཤུགས་ཆེ་ཤོས་གནང་མཁན་ཞིག་བཅས་ཡིན་པ་མ་ཟད། ཕྱི་ལོ་ ༢༠༡༥ ལོར་ཁོང་མོས་ཨ་རིའི་གྲོས་ཚོགས་ཀྱི་སྐུ་ཚབ་ཚོགས་ཆུང་ཞིག་གི་དབུ་འཁྲིད་དེ་བོད་ནང་དངོས་སུ་ཕེབས་ཏེ་བོད་མིའི་གནས་སྟངས་ལ་གཟིགས་ཞིབ་གནང་ཡོད་པ་རེད། དེ་བཞིན་བོད་ནང་ས་བྱི་ཞི་རྒོལ་བྱུང་སྟེ་ཛ་དྲག་ཆགས་པའི་སྐབས་ཏེ་ཕྱི་ལོ་ ༢༠༠༨ ལོ་དང་། ཕྱི་ལོ་ ༢༠༡༧ ལོའི་ཟླ་ ༤ པའི་ནང་ཁོང་མོས་ཨ་རིའི་གྲོས་ཚོགས་ཀྱི་སྐུ་ཚབ་ཚོགས་ཆུང་གི་དབུ་འཁྲིད་དེ་བཞུགས་སྒར་དྷ་རམ་ས་ལ་རུ་༧གོང་ས་མཆོག་ལ་མཇལ་བཅར་ཞུས་པ་དང་། བཙན་བྱོལ་བོད་མིའི་སྒྲིག་འཛུགས་དང་སློབ་གྲྭ། ཚོགས་སྡེ་ཁག དེ་བཞིན་བལ་ཡུལ་བོད་མིའི་གནས་སྟངས་ཐོག་དངོས་སུ་གཟིགས་ཞིབ་གནང་ཡོད་པ་རེད། ཕྱི་ལོ་ ༢༠༠༧ ལོར་ལྕམ་སྐུ་མཆོག་གི་དབུ་འཁྲིད་འོག་སྙན་གྲགས་ཅན་གྱི་ཨ་རིའི་གྲོས་ཚོགས་ཀྱི་གསེར་གྱི་རྟགས་མ་༧གོང་ས་རྒྱལ་བ་རིན་པོ་ཆེ་མཆོག་ལ་ཕུལ་ཡོད་པ་སོགས་དུས་དང་རྣམ་པ་ཀུན་དུ་བོད་མི་དང་བོད་དོན་ཐོག་ཁ་ཡོད་ལག་ཡོད་ཀྱིས་རྒྱབ་སྐྱོར་གནང་མཁན་གྱི་རྒྱལ་སྤྱིའི་ཐོག་ཤུགས་རྐྱེན་ཆེ་བའི་ཆབ་སྲིད་པ་ཞིག་ཡིན་པ་རེད།
ཚེ་རིང་རྣམ་རྒྱལ་གྱིས་ཕྱོགས་བསྡུས་བྱས།
པདྨ་མཚོས་རྩོམ་སྒྲིག་བྱས།
