ཨ་རིའི་གྲོས་ཚོགས་ཀྱི་སྐུ་ཚབ་ཚོགས་ཆུང་ཞིག་བཞུགས་སྒར་དྷ་རམ་ས་ལར་ཕེབས་འབྱོར་གྱིས་སང་ཞོགས་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་བཅར་ཞུ་རྒྱུ་དང་དེ་རིང་བོད་མིའི་སྒྲིག་འཛུགས་ཀྱི་ལྟེ་གནས་གངས་ཅན་སྐྱིད་གཤོངས་སུ་ཕེབས་ཀྱི་འདུག
དེ་རིང་ཉིན་གུང་ཆུ་ཚོད་ ༡༢།༣༠ ཡོལ་ཙམ་དུ། བཞུགས་སྒར་དྷ་རམ་ས་ལའི་ཉེ་འདབས་སུ་ཡོད་པའི་གྷ་གྷལ་གནམ་ཐང་དུ། ཨ་རིའི་གྲོས་ཚོགས་འོག་མའི་ཕྱི་འབྲེལ་ཚོགས་ཆུང་གི་ཚོགས་གཙོ་སྐུ་ཞབས་མཱ་ཡེ་ཀལ་མེ་ཁོལ་ (Michael McCaul) མཆོག་དང་། ཨ་རིའི་གྲོས་ཚོགས་འོག་མའི་ཚོགས་གཙོ་ཟུར་པ་ལྕམ་སྐུ་ནན་སི་པེ་ལོ་སི་ (Nancy Pelosi) མཆོག་གི་དབུས་པའི་ཨ་རིའི་གྲོས་ཚོགས་འོག་མའི་སྐུ་ཚབ་ཚོགས་ཆུང་ཞིག་ཕེབས་འབྱོར་བྱུང་།
ཐེངས་འདིའི་སྐུ་ཚབ་ཚོགས་ཆུང་ནང་། ཨ་རིའི་གྲོས་ཚོགས་འོག་མའི་རྒྱ་ནག་སྐོར་གྱི་ཚོགས་ཆུང་གི་ཚོགས་གཙོ་ཟུར་པ་སྐུ་ཞབས་ཇེམ་མེག་གྷོ་ཝུན་མཆོག་དང་། གྲོས་ཚོགས་འོག་མའི་ཕྱི་འབྲེལ་ལས་དོན་ཚོགས་ཆུང་གི་རྒྱ་གར་ཞི་བདེ་རྒྱ་མཚོའི་ཁུལ་གྱི་ལས་དོན་ཚོགས་ཆུང་གི་ཚོགས་གཞོན་ཨེ་མི་བྷི་རཱ་(Ami Bera)མཆོག གྲོས་ཚོགས་འཐུས་མི་(Mariannette Miller-Meeks) མཆོག དེ་བཞིན་གྲོས་ཚོགས་འཐུས་མི་ནི་ཁོལ་མཱ་ལིའོ་ཊ་ཁི་སི་(Nicole Malliotakis) མཆོག་བཅས་ཕེབས་འདུག
གནམ་ཐང་དུ་སྐུ་ཞབས་མཱ་ཡེ་ཀལ་མེ་ཁོལ་མཆོག་གིས་གསར་འགོད་པར། ཨ་རིའི་གྲོས་ཚོགས་འཐུས་མི་རྣམ་པའི་ཚབ་གནང་ནས་དྷ་རམ་ས་ལའི་མི་མང་རྣམས་ལ་འཚམས་འདྲི་ཞུ་རྒྱུ་དང་། ང་ཚོ་སང་ཉིན་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་ཁ་ཞུ་འདོད་ཆེན་པོ་ཡོད་ལ། བོད་དོན་རྒྱབ་སྐྱོར་གྱི་ཁྲིམས་འཆར་གཏན་འབེབས་བྱུང་ཡོད་པ་སོགས་ཀྱི་སྐོར་ཞུ་རྒྱུ་ཡིན། ཨ་རིའི་གཞུང་གི་ངོས་ནས་བོད་མི་རྣམས་ལ་མུ་མཐུད་དུ་རྒྱབ་སྐྱོར་བྱེད་ཀྱི་ཡོད། ཅེས་གསུངས་བྱུང་།
དེ་རིང་ཉིན་རྒྱབ་ཏུ་ཨ་རིའི་གྲོས་ཚོགས་འཐུས་མི་རྣམས་བོད་མི་མང་སྤྱི་འཐུས་ལྷན་ཁང་དང་བོད་ཀྱི་འགྲེམས་སྟོན་ཁང་སོགས་སུ་ཕེབས་རྒྱུ་ཡིན་འདུག་ལ། སང་ཞོགས་བཞུགས་སྒར་རྒྱལ་བའི་ཕོ་བྲང་དུ་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་བཅར་ཞུ་རྒྱུ་ཡིན་འདུག
གསར་འགོད་པ། བསྟན་འཛིན་ཕུར་བུ།
རྩོམ་སྒྲིག་བྱེད་མཁན། པདྨ་མཚོ།
