༧གོང་ས་རྒྱལ་བ་རིན་པོ་ཆེ་མཆོག་ལ་ནིའུ་ཡོག་དང་ནིའུ་འཇར་སི་ཁུལ་གྱི་བོད་པ་གཙོས་སོག་པོ་དང་། ཧི་མ་ལ་ཡའི་རི་རྒྱུད་པ། ཕྱི་རྒྱལ་བ་སོགས་དད་ལྡན་དོན་གཉེར་བ་ཁྲི་ཚོ་བརྒལ་བས་ཕེབས་བསུ་ཟབ་རྒྱས་ཞུས་འདུག
ཟླ་འདིའི་ཕྱི་ཚེས་ ༢༣ ཉིན་༧གོང་ས་རྒྱལ་བ་རིན་པོ་ཆེ་མཆོག་ཡུ་རོབ་རྒྱལ་ཁབ་སུད་སི་ནས་ཨ་རིའི་ནིའུ་འཇར་སི་ཡི་ཊེ་ཊར་བྷོ་རོ་ (Teterboro) གནམ་ཐང་དུ་ཞབས་སོར་བདེ་བར་འཁོད་དེ། གནམ་ཐང་ནས་བཞུགས་གནས་པཱར་ཀི་ཧ་ཡེ་ཊ་ (Park Hyatt) གསོལ་མགྲོན་ཁང་དུ་ཆིབས་འཁོར་ནང་ཆིབས་བསྒྱུར་མཛད་ཡོད་པ་དང་། སྐབས་དེར་བྱང་ཨ་རིའི་སྐུ་ཚབ་དོན་གཅོད་རྣམ་རྒྱལ་ཆོས་སྒྲུབ་ལགས་དང་། ནིའུ་ཡོག་ཏུ་རྟེན་གཞི་བྱས་ཡོད་པའི་རྒྱ་གར་གཞུང་ཚབ་ཁང་གི་གཞུང་ཚབ་པ་གཞོན་པ་ཝ་རུན་ཇེ་ཧྥི་ (Dr. Varun Jeph) ལགས་སོགས་གནད་ཡོད་མི་སྣ། དེ་བཞིན་ཨ་རིའི་ནང་གནས་བཞུགས་བླ་ཆེན་དགེ་བཤེས་རྣམ་པ་དང་། ཁེ་ན་ཌ་སོགས་ནས་ཆེད་དུ་བཅར་བའི་བོད་མི་གཙོ་བོར་གྱུར་བའི་སོག་ཡུལ་དང་། ཧི་མ་ལ་ཡའི་རི་རྒྱུད། འབྲུག་སོགས་ཀྱི་སེར་སྐྱ་མི་མང་བཅས་ཁྱོན་དད་ལྡན་དོན་གཉེར་བ་ཁྲི་ཚོ་བརྒལ་བས་ཕེབས་བསུ་ཟབ་རྒྱས་ཞུས་ཡོད་འདུག
དགའ་ལྡན་ཕོ་བྲང་ཡིག་ཚང་གི་དྲུང་ཆེ་དང་༧སྐུའི་བླ་སྨན་པ་རྣམ་གཉིས་ནས། ད་ལྟའི་ཆར་ཉིན་ཤས་རིང་སྐུའི་འཕྲོད་བཞེས་ཀྱི་བྱེད་སྒོ་ཁོ་ན་ལས་དེ་མིན་པའི་མཛད་འཆར་རིགས་གང་ཡང་མེད་ཅིང་། གནས་ཚུལ་གསར་པའི་རིགས་ཡོད་ཚེ། སྐབས་མཚམས་སོ་སོར་གསལ་བསྒྲགས་ཞུ་རྒྱུ་ཡིན། ཞེས་འགྲེལ་བརྗོད་གནང་འདུག་ལ། ༧གོང་ས་རྒྱལ་བ་རིན་པོ་ཆེ་མཆོག་ལོ་བདུན་གྱི་རྗེས་སུ་ཐོག་མར་ཨ་རིའི་ནང་ཆིབས་བསྒྱུར་བཀའ་དྲིན་བསྐྱངས་ཡོད་པ་དང་། འདི་ལོའི་༧སྐུའི་འཁྲུངས་སྐར་ཡང་ཨ་རིའི་ནང་སྲུང་གཙི་ཞུ་རྒྱུ་ཡིན་འདུག
ཟླ་འདིའི་ཕྱི་ཚེས་ ༢༢ ཉིན་༧གོང་ས་མཆོག་རྒྱལ་བ་རིན་པོ་ཆེ་མཆོག་ལྡི་ལི་ནས་སུད་སི་ཛུ་རིག་ཏུ་ཕེབས་ཏེ་ཉིན་གཅིག་རིང་སྐུ་ངལ་གསོས་ཡོད་པ་དང་། སྐབས་དེར་སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་ཀྱིས་གཙོས་ས་གནས་བོད་རིགས་ཚོགས་པ་དང་། ཕྱི་ནང་གི་དད་ལྡན་དོན་གཉེར་བ་སེར་སྐྱ་མི་མང་སྟོང་ཕྲག་མང་པོས་ཕེབས་བསུ་ཟབ་རྒྱས་ཞུས་ཡོད་འདུག
གསར་འགོད་པ། བྱམས་པ་ཚེ་རིང་།
རྩོམ་སྒྲིག་པ། པདྨ་མཚོ།
