ཁ་སང་ཕྱི་ཚེས་ ༡༥ ཉིན་བོད་མིའི་སྒྲིག་འཛུགས་ཀྱི་བདེ་སྲུང་བཀའ་བློན་རྒྱ་རི་སྒྲོལ་མ་མཆོག་དང་། བོད་མིའི་སྒྲིག་འཛུགས་ཀྱི་མགྲིན་ཚབ་པ་བསྟན་འཛིན་ལེགས་བཤད་རྣམ་གཉིས་ཀྱིས་རྒྱ་ནག་གཞུང་གིས་བོད་ནང་གི་རྭ་རྒྱ་གངས་ལྗོངས་ཤེས་རིག་ནོར་བུའི་གླིང་བཙན་གྱིས་སྒོ་བརྒྱབ་པའི་ཡིད་སྐྱོའི་གནས་ཚུལ་བྱུང་བར་བོད་མིའི་སྒྲིག་འཛུགས་ནས་བློ་ཕམ་དང་ངོ་རྒོལ་ཡོད་སྐོར་བསྒྲགས་འདུག
སྲིད་ཚབ་བདེ་སྲུང་བཀའ་བློན་རྒྱ་རི་སྒྲོལ་མ་མཆོག་གིས། དེ་རིང་ཊོ་རོན་ཊོ་གངས་ལྗོངས་བོད་ཀྱི་སྐད་དང་རིག་གཞུང་སློབ་གྲྭའི་དཔེ་སྟོན་ལས་རིམ་ཐོག་མཉམ་ཞུགས་གནང་མཁན་སློབ་མ་རྣམས་འདིར་ཕེབས་པ་ཡོད་པ་རེད། ང་ཚོས་རང་དབང་ཡོད་ས་ནས་སོ་སོའི་ལུང་པ་དང་སྐད་ཡིག་གི་སྐོར། སོ་སོའི་སྐོར་སོགས་ལ་སློབ་སྦྱོང་བྱེད་པའི་གོ་སྐབས་རག་གི་ཡོད། དེར་བརྟེན། ཁྱེད་རང་ཚོའི་ཕ་མ་དང་ས་གནས་འབྲེལ་ཡོད་ཀྱི་རྒྱབ་སྐྱོར་ཐོག་ནས་འདིར་ཕེབས་ཐུབ་པ་དཔེ་ཡག་པོ་བྱུང་ཡོད།
ཟླ་འདིའི་ཕྱི་ཚེས་ ༡༢ ཉིན་ཨ་རིའི་སྲིད་འཛིན་མཆོག་ནས་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་ལ་མཚན་རྟགས་བསྐྱོན་ཏེ་ཁྲིམས་སུ་ཆགས་པའི་དོན་བཟང་ཞིག་བྱུང་ཡོད་ཀྱང་། བློ་ཕམ་པ་ཞིག་ལ་བོད་ནང་དུ་གངས་ལྗོངས་ཤེས་རིག་ནོར་བུའི་སློབ་གླིང་ངམ་རྭ་རྒྱ་སློབ་གྲྭ དེབ་བསྐྱལ་ཐོག་ཏུ་མིང་ལ་མི་རིགས་ལས་རིགས་སློབ་གྲྭ་ཞེས་པ་དེ། ཕྱི་ལོ་ ༡༩༩༤ ལོ་ནས་བཟུང་རྭ་རྒྱ་འཇིགས་མེད་རྒྱལ་མཚན་ལགས་ཀྱིས་ལོ་མང་པོའི་རིང་དཀའ་ལས་བརྒྱབ་སྟེ། བོད་ཀྱི་སྐད་ཡིག་རང་གཞུང་སྲུང་སྐྱོབ་བྱེད་པའི་ཆེད་དུ་བཙུགས་པའི་སློབ་གྲྭ་ཞིག་ཡིན་ཡང་། རྒྱ་ནག་གཞུང་གིས་སློབ་གྲྭ་དེར་གཏོར་བཤིག་གཏོང་བའི་ཐབས་ཤེས་འདྲ་མིན་སྤེལ་ཡོད་པ་མ་ཟད་། ཟླ་འདིའི་ཕྱི་ཚེས་ ༡༢ ཉིན་སློབ་གྲྭ་དངོས་སུ་སྒོ་བརྒྱབ་པའི་བཙན་བཀའ་འབྱོར་ཡོད་འདུག
དེ་བས། ༧གོང་ས་རྒྱལ་བ་རིན་པོ་ཆེ་མཆོག་གི་ཐུགས་རྗེ་བཀའ་དྲིན་དང་། བོད་རིགས་སྤྱི་མཐུན་ཚོགས་པ། ཕ་མ་རྣམས་ཀྱི་རྒྱབ་སྐྱོར་ལ་བརྟེན་ནས་ཁྱེད་ཚོས་བོད་ཀྱི་སྐད་ཡིག་རིག་གཞུང་དང་བཅས་པར་སློབ་སྦྱོང་བྱེད་བཞིན་ཡོད་པ་ཡག་པོ་རེད། བོད་ནང་དུ་མཚོན་ན་རྒྱ་གཞུང་གིས་བཙན་དབང་གིས་བོད་པའི་སློབ་གྲྭ་ཁག་སྒོ་བརྒྱབ་སྟེ། བོད་ཀྱི་ཕྲུ་གུ་རྣམས་ལ་བོད་པའི་རིག་གནས་ཀྱི་སློབ་སྦྱོང་བྱེད་པའི་གོ་སྐབས་མེད་པར་བཟོ་བཞིན་ཡོད། བོད་ནང་གི་གངས་ལྗོངས་ཤེས་རིག་ནོར་བུ་གླིང་སྒོ་རྒྱག་བཞིན་པའི་སྐབས་སློབ་ཕྲུག་གྲངས་ ༡༤༠༠ ཙམ་ཡོད་འདུག འདི་འདྲའི་ཤེས་ཡོན་གྱི་སྡེ་ཚན་ཆེན་པོ་ཞིག་སྒོ་བརྒྱབ་པར་བོད་མིའི་སྒྲིག་འཛུགས་ལ་བློ་ཕམ་ཆེན་པོ་ཡོད། རང་དབང་ལུང་པའི་ནང་ཡོད་པའི་བོད་མི་རྣམས་ཀྱིས་རང་ཉིད་ཀྱི་སྐད་ཡིག་རིག་གནས་དང་བཅས་པར་སློབ་སྦྱོང་བྱས་ཏེ་རྒྱུན་འཛིན་བྱ་རྒྱུ་གལ་ཆེན་པོ་རེད། ཅེས་གསུངས་སོང་།
དེ་བཞིན་བོད་མིའི་སྒྲིག་འཛུགས་ཀྱི་མགྲིན་ཚབ་པ་བསྟན་འཛིན་ལེགས་བཤད་ལགས་ཀྱིས། ཉེ་ཆར་བོད་མགོ་ལོག་ཁུལ་རྭ་རྒྱ་འཇིགས་མེད་རྒྱལ་མཚན་ལགས་ཀྱིས་བཙུགས་པའི་གངས་ལྗོངས་ཤེས་རིག་ནོར་བུའི་གླིང་སྒོ་བརྒྱབ་པའི་བློ་ཕམ་གྱི་གནས་ཚུལ་ཞིག་བྱུང་ཡོད་པ་དེས། རྒྱ་ནག་གཞུང་གིས་བོད་ཀྱི་ཆོས་དང་། རིག་གཞུང་། སྐད་ཡིག་སོགས་ལ་མཐའ་གཅིག་ཏུ་དྲག་གནོན་བྱེད་ཀྱི་ཡོད་པ་གསལ་བོར་སྟོན་གྱི་ཡོད། རྒྱ་གཞུང་གིས་འཁྱོག་བཤད་ཐོག་ནས་བོད་ནང་དུ་རང་དབང་ཡོད་པ་དང་། སྐད་ཡིག་སོགས་སྲུང་སྐྱོབ་བྱེད་ཀྱི་ཡོད་ཟེར་བ་བདེན་པ་མིན་པ་ར་འཕྲོད་ཐུབ་པ་ཞིག་རེད། བོད་མིའི་སྒྲིག་འཛུགས་ཀྱིས་རྒྱ་ནག་གཞུང་གིས་གངས་ལྗོངས་ཤེས་རིག་ནོར་གླིང་སྒོ་བརྒྱབ་པའི་བློ་ཕམ་གྱི་གནས་ཚུལ་བྱུང་བར་མཐའ་གཅིག་ཏུ་ངོ་རྒོལ་བྱ་རྒྱུ་ཡིན། ཞེས་བརྗོད་འདུག
རྒྱ་ནག་དམར་གཞུང་གིས་བོད་ནང་གི་སྒེར་གཉེར་སློབ་གྲྭ་དང་དགོན་སྡེ་སོགས་བོད་པའི་ཆོས་དང་རིག་གཞུང་། སྐད་ཡིག་བཅས་སྲུང་སྐྱོབ་བྱེད་སའི་ལྟེ་གནས་མང་པོ་གཅིག་རྗེས་གཉིས་མཐུད་དུ་བཙན་གྱིས་སྒོ་རྒྱག་གི་ཡོད་པ་ལྟར། ཟླ་འདིའི་ཕྱི་ཚེས་ ༡༢ ཉིན་སློབ་གྲྭ་འདི་འཕྲལ་དུ་སྒོ་རྒྱག་དགོས་པའི་བཙན་བཀའ་འབྱོར་ཡོད་འདུག་ལ། ལོ་མང་རིང་ནས་མགོ་ལོག་ཁུལ་གྱི་དམར་ཤོག་དྲུང་ཆེ་ལས་ཐོག་སོགས་ཀྱིས་སློབ་གྲྭ་འདི་སྒོ་རྒྱག་ཐབས་སུ་ངན་ཇུས་ཡོད་རྒུ་བཏོན་ཏེ་ཁྲིམས་གཏུགས་རབ་དང་རིམ་པར་རྒྱབ་གནོན་དང་སྐུལ་འདེད་བཏང་མཐར་ལག་བསྟར་བྱུང་བ་ཞིག་ཡིན་འདུག
རྭ་རྒྱ་གངས་ལྗོངས་ཤེས་རིག་ནོར་བུའི་སློབ་གླིང་ནི་ཕྱི་ལོ་ ༡༩༩༤ ཟླ་ ༨ པར་མགོ་ལོག་ཁུལ་མི་དམངས་སྲིད་གཞུང་ཟེར་བས་ཆོག་མཆན་སྤྲད་དེ་དངོས་སུ་བཙུགས་ཤིང་། མཚོ་སྔོན་ཞིང་ཆེན་ཡོངས་ཀྱི་ཆེས་ཐོག་མའི་སྒེར་བཙུགས་སློབ་གྲྭ་དེ་ཡིན་འདུག ཕྱི་ལོ་ ༢༠༠༡ ལོའི་ཟླ་ ༤ ཚེས་ ༡༤ ཉིན་ཁུལ་མི་དམངས་སྲིད་གཞུང་གིས་ཆོག་མཆན་སྤྲད་དེ་ཆེད་ལས་མཐོ་འབྲིང་དུ་བསྒྱུར། ཕྱི་ལོ་ ༢༠༠༢ ལོར་འཇིགས་མེད་རྒྱལ་མཚན་སྒེར་བཙུགས་སློབ་གྲྭ་ཞེས་པའི་མིང་ཡང་འཇིགས་མེད་རྒྱལ་མཚན་ཕན་བདེ་སློབ་གྲྭ་ཞེས་པར་བཅོས། ཕྱི་ལོ་ ༢༠༠༣ ལོར་མཚོ་སྔོན་ཞིང་ཆེན་དམངས་སྲིད་ཐིང་ཟེར་བས་དམངས་ཁྲོད་དོ་དམ་རྩ་འཛུགས་ཀྱི་དམངས་ཕན་ལས་ཁུངས་སུ་བདམས། ཕྱི་ལོ་ ༢༠༠༦ ལོའི་ཟླ་ ༣ ཚེས་ ༧ ཉིན་ཀྲུང་ཧྭ་ཆེད་ལས་སློབ་གསོ་སྡེ་ཁག་གིས་ཀྲུང་ཧྭ་ཆེད་ལས་སློབ་གསོའི་མཚོ་སྔོན་ཚོད་ལྟའི་སློབ་གྲྭ་རུ་བསྒྱུར། སློབ་གླིང་དེ་ནི་བོད་ཡུལ་ན་ཆེས་མིང་དུ་གྲགས་པའི་བོད་ཡིག་ཆེད་སྦྱོང་གི་སློབ་གྲྭ་ཡག་ཤོས་ཤིག་ཏུ་ངོས་འཛིན་བྱེད་ཀྱི་ཡོད་པ་རེད།
གསར་འགོད་པ། བྱམས་པ་ཚེ་རིང་།
རྩོམ་སྒྲིག་པ། སྐལ་བཟང་སྦྱིན་པ།
