བུད་མེད་ནུས་སྟོབས་གོང་སྤེལ་ཚན་པས་བོད་མིའི་སྒྲིག་འཛུགས་ཀྱི་ལས་བྱེད་ཁག་ཅིག་ལ་ཕོ་མོ་འདྲ་མཉམ་གྱི་འདུ་ཤེས་སྤེལ་ཐབས་ཀྱི་གོ་རྟོགས་ཟབ་སྦྱོང་སྤྲོད་བཞིན་འདུག
དེ་རིང་དང་སང་ཉིན་ཉིན་གྲངས་གཉིས་རིང་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་གི་ལྟག་རྒྱབ་ཏུ་ཡོད་པའི་དྷིབ་དྷར་གསོལ་མགྲོན་ཁང་ (Hotel Devdar) དུ་བོད་མིའི་སྒྲིག་འཛུགས་ཀྱི་བུད་མེད་ནུས་སྟོབས་གོང་སྤེལ་ཚན་པས་ཕོ་མོ་འདྲ་མཉམ་གྱི་འདུ་ཤེས་སྤེལ་ཐབས་ཀྱི་གོ་རྟོགས་ཟབ་སྦྱོང་ཞིག་འཚོག་བཞིན་འདུག
དེ་རིང་འདི་གའི་གསར་འགོད་པས་ཁ་པར་བརྒྱུད་བུད་མེད་ནུས་སྟོབས་གོང་སྤེལ་ཚན་པའི་འགན་འཛིན་ཚེ་རིང་སྐྱིད་ལགས་སུ་ཟབ་སྦྱོང་དེའི་དགོས་དམིགས་གཙོ་བོ་ག་རེ་ཡིན་སྐོར་དྲིས་པར། ཁོང་མོས། ཟབ་སྦྱོང་འདི་ལོ་ལྟར་བོད་མིའི་སྒྲིག་འཛུགས་ཀྱི་ལས་བྱེད་ལ་སྤྲོད་བཞིན་ཡོད་པ་དང་། ཟབ་སྦྱོང་འདི་འཚོགས་པའི་དམིགས་ཡུལ་གཙོ་བོ་ནི་ལས་བྱེད་ནང་ལོགས་སུ་རྟགས་ཀྱི་དབྱེ་བའི་ཐོག་ལ་གོ་རྟོགས་སྤེལ་རྒྱུ་དང་། ཕོ་མོ་འདྲ་མཉམ་གྱི་འདུ་ཤེས་སྤེལ་ཐབས་གང་འདྲ་ཡིན་མིན་ངོས་འཛིན་བྱ་ཐུབ་རྒྱུ། སོ་སོའི་ལས་ཀ་བྱེད་སའི་ཁོར་ཡུག་ནང་དེ་འདྲའི་བསམ་བློ་གཏོང་ཕྱོགས་ཐད་འགྱུར་བ་གཏོང་རྒྱུ། དེ་བཞིན་སོ་སོའི་མི་ཚེའི་ནང་ཡར་རྒྱས་གཏོང་དགོས་པ་ག་རེ་ཡོད་མེད་སོགས་གོ་རྟོགས་ཀྱི་ཟབ་སྦྱོང་ཞིག་རེད། ཅེས་བརྗོད་བྱུང་།
ཚེ་རིང་སྐྱིད་ལགས་ཀྱིས་གསུངས་པ་ལྟར་ན། ཐེངས་འདིའི་ཟབ་སྦྱོང་ནང་མཉམ་ཞུགས་བྱེད་མཁན་བོད་མིའི་སྒྲིག་འཛུགས་ཀྱི་ལྷན་ཁང་རེ་ནས་ལས་བྱེད་གཉིས་རེ་དང་ཁྱོན་ཟབ་ཞུགས་པ་ལས་བྱེད་གྲངས་ ༢༤ ཡོད་ཅིང་། ཟབ་སྦྱོང་གནང་མཁན་རྒྱ་གར་གྱི་ཆེད་མཁས་མི་སྣ་རྐྱང་ཡིན་པ་རེད།
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་པ། སྐལ་བཟང་སྦྱིན་པ།
