བོད་མི་དང་ཐའེ་ཝན། ཧོང་ཀོང་དང་འབར་མ་སོགས་ཚུད་པའི་རྒྱ་ནག་གི་དྲག་གནོན་འོག་གནས་པའི་མི་རྣམས་ལྷན་འཛོམས་ཀྱིས་རྒྱ་ནག་གཞུང་ལ་ཁ་གཏད་གཅོག་ཐབས་ཀྱི་ཐུན་མོང་གཞི་རྟེན་འཚོལ་བའི་ཚོགས་འདུ་འཚོགས་སོང་།
དེ་རིང་སྔ་དྲོའི་ཆུ་ཚོད་ ༡༠ པའི་སྟེང་བོད་མིའི་སྒྲིག་འཛུགས་ཀྱི་ཕྱི་དྲིལ་ཁྱབ་ཁོངས་བོད་ཀྱི་སྲིད་བྱུས་ཉམས་ཞིབ་ཁང་གི་གོ་སྒྲིག་འོག བོད་ཀྱི་དཔེ་མཛོད་ཁང་གི་ཚོགས་ཁང་དུ་ཐུན་མོང་གི་གཞི་རྟེན་འཚོལ་བ། རྒྱལ་སྤྱིའི་ཆབ་སྲིད་ཀྱི་འགྱུར་ལྡོག་ཁྲོད་ཀྱི་ཐབས་ཇུས་གསར་པ་ཞེས་པའི་བརྗོད་གཞིའི་ཐོག་ཚོགས་འདུ་ཞིག་འཚོགས་སོང་བ་དང་། སྐབས་དེར་ཐའེ་ཝན་དང་ཧོང་ཀོང་མཐུན་ཚོགས་ཀྱི་ཚོགས་གཙོ་སང་པུ་(Sang Pu) ལགས་ཀྱིས། རྒྱ་ནག་གི་བཙན་འོག་ཏུ་ཡོད་པའི་རྒྱལ་ཁབ་ཚང་མ་མཉམ་རུབ་ཀྱིས་རྒྱ་ནག་ལ་གདོང་ལེན་བྱ་དགོས་པ་དང་། ཧོང་ཀོང་དང་ཐའེ་ཝན། གྲངས་ཉུང་མི་རིགས་སོགས་མཉམ་རུབ་ཀྱིས་གནས་སྟངས་རྒྱུས་ལོན་དང་། གོ་བསྡུར་བྱ་དགོས་ཀྱི་ཡོད། ཚང་མས་མཉམ་རུབ་བྱས་ན་རྒྱ་ནག་ལ་གདོང་ལེན་བྱེད་ཐུབ་ལ། ཕྱིའི་རྒྱལ་ཁབ་ཁག་དང་དམིགས་བསལ་གྱིས་སྟོབས་ཆེན་རྒྱལ་ཁབ་གཞན་ལ་རྒྱ་ནག་གིས་དྲག་གནོན་བྱས་དང་བྱེད་བཞིན་པའི་སྐོར་ལ་གླེང་སློང་བྱས་ཏེ་རྒྱལ་སྤྱིའི་སྟེང་ཁྱབ་སྤེལ་གང་མང་བྱེད་དགོས་པ་གཙོ་བོ་ཡིན་སྐོར་སོགས་བརྗོད་སོང་།
ཐའེ་ཝན་དང་ཧོང་ཀོང་མཐུན་ཚོགས་ཀྱི་ཚོགས་གཙོ་སང་པུ་ལགས་ཀྱིས་འདི་གའི་གསར་འགོད་པར། གསར་ཁང་ཞིག་གི་ངོ་བོའི་ཐོག་ནས་གསར་འགོད་པ་མང་པོ་ཞིག་ལ་དམིགས་བསལ་གྱི་ལེ་ཚན་དང་། དངོས་སུ་བཅའ་འདྲི་བྱེད་པའི་ལས་འགན་གཙོ་བོ་ཡོད་པ་རེད། དེའི་ཐོག་ལ་གསར་ཁང་འདྲ་མིན་ཡོད་པ་ཚང་མས་རྒྱ་ནག་གིས་རྫུན་བཟོ་བྱས་པའི་གནས་ཚུལ་ལྟར་མིན་པར་གནས་ཚུལ་དྲང་བདེན་འགོད་དགོས་པ། དེ་བས་ས་གནས་ལ་དངོས་སུ་ཕྱིན་ནས་གནས་ཚུལ་འགོད་ཐབས་ལ་འབད་དགོས་པ། དམིགས་བསལ་གྱིས་ཆེད་ལས་རང་བཞིན་ལྡན་པའི་གསར་ཁང་བཟོ་དགོས་གལ་ཆེ་བ་རེད། དེ་ཡང་རྒྱ་ནག་གི་དྲག་གནོན་དང་སོ་ལྟ་སོགས་ལ་བརྟེན་ནས་གནས་ཚུལ་རག་ཐབས་སུ་འགོག་རྐྱེན་མང་པོ་འབྱུང་གི་ཡོད་ཀྱང་། བོད་ནང་ནས་དངོས་ཡོད་གནས་ཚུལ་རག་ཐུབ་པ་བྱས་ཏེ། བཙན་བྱོལ་དུ་ཡོད་པའི་བོད་པའི་གསར་ཁང་ཁག་གིས་གནས་ཚུལ་བརྒྱུད་སྤེལ་བྱེད་བཞིན་པ་དེས་རྒྱལ་སྤྱིའི་སྟེང་བོད་དོན་ཁྱབ་སྤེལ་ཤུགས་ཆེན་ཡོང་བར་ཕན་ཐོགས་ཡོང་གི་རེད། གནས་ཚུལ་ཁག་ཅིག་བཙན་བྱོལ་གཞུང་ལ་ཡག་པོ་ཡོད་ཀྱང་། ཁག་ཅིག་ཡག་པོ་མེད་པ་རེད། འོན་ཀྱང་རང་དབང་ཅན་གྱི་གསར་ཁང་ཞིག་ཡིན་པའི་ཐོག་གསར་འགོད་པས་དངོས་ཡོད་གནས་ཚུལ་འབྲི་དགོས་ཀྱི་ཡོད། གནས་ཚུལ་མཁོ་སྒྲུབ་བྱེད་པའི་སྐབས་སུ་མཐུན་རྐྱེན་ཆ་ཚང་བ་རག་ཐབས་ལ་འབད་དགོས་པ་དང་། དམིགས་བསལ་བོད་མི་ཁོ་ན་ནས་གནས་ཚུལ་མཁོ་སྒྲུབ་བྱེད་པར་ཤུགས་སྣོན་རྒྱག་དགོས་པ་ལས་ཕྱི་མི་ནས་ལེན་རྒྱུ་མེད། ཕྱིའི་རྒྱལ་ཁབ་ལ་འབྲེལ་ལམ་འཛུགས་རྒྱུ་ནི་གལ་ཆེན་རེད། ཅེས་སོགས་བརྗོད་བྱུང་།
ཚོགས་འདུའི་དམིགས་ཡུལ་དང་འབྲེལ་ནས་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་ལགས་ཀྱིས། ཨེ་ཤ་ཡ་དང་ལྷག་པར་དུ་རྒྱ་ནག་གཞུང་ལ་རང་དབང་རྩོད་ལེན་བྱ་རྒྱུ་དང་། ང་ཚོའི་གནས་སྟངས་གཅིག་པ་ཆགས་ཡོད་པའི་རྒྱལ་ཁབ་དེ་དག་ལ་འབྲེལ་བ་བཙུགས་ཏེ་བོད་དོན་སྐོར་གོ་རྟོགས་སྤེལ་རྒྱུ་དང་། རྒྱལ་ཁབ་དེ་དག་གི་ཐབས་ཇུས་དང་བསམ་ཚུལ། མ་འོངས་པར་ལས་དོན་ག་རེ་བྱ་འཆར་ཡོད་པའི་བསམ་ཚུལ་སོགས་རྒྱུས་ལོན་བྱས་ཏེ། ད་ཡོད་བོད་དོན་འཐབ་རྩོད་ཀྱི་སྲིད་བྱུས་ཐོག་མཉམ་རུབ་དང་བསམ་ཚུལ་སོགས་ལེན་རྒྱུ་ཡོད་མེད་ལྟ་རྒྱུ་གལ་ཆེན་ཡིན་སྐོར་དང་། ཐེངས་འདིའི་ཚོགས་འདུར་ཐའེ་ཝན་དང་ཧོང་ཀོང་། འབར་མ་བཅས་ཀྱི་རང་དབང་ལས་འགུལ་བ་དང་དམངས་གཙོའི་དོན་གཉེར་བ། ཉམས་ཞིབ་པ། བོད་དོན་རྒྱབ་སྐྱོར་བ་སོགས་གདན་འདྲེན་ཞུས་ཡོད་སྐོར་སོགས་བརྗོད་སོང་།
ཐེངས་འདིའི་ཚོགས་འདུའི་སྐོར་ལ་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་ལགས་དང་། ཐའེ་ཝན་དང་ཧོང་ཀོང་མཐུན་ཚོགས་ཀྱི་ཚོགས་གཙོ་སང་པུ་ (Sang Pu)། སྲིད་བྱུས་ཉམས་ཞིབ་ཁང་གི་ཉམས་ཞིབ་པ་ཚེ་དབང་རྡོ་རྗེ་ལགས། འབར་མའི་རང་དབང་འཐབ་རྩོད་པ་ཡཱང་ཝང་ལི་ (Yang Wang Li)། ཐའེ་ཝན་དང་འབར་མའི་མི་མང་མཐུན་ཚོགས་ཀྱི་ཚོགས་གཙོ་དྷུ་ཁ་ཁ་ (Du Keke)། སྲིད་བྱུས་ཉམས་ཞིབ་ཁང་གི་ཉམས་ཞིབ་པ་ཚེ་དབང་རྡོ་རྗེ་ལགས་སོགས་གཏམ་བཤད་པ་བརྒྱད་དང་། ཉམས་ཞིབ་ཁང་གི་ལས་བྱེད། མི་མང་ཁག་ཅིག་ལྷན་འཛོམས་བྱུང་ཡོད་འདུག
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་པ། སྐལ་བཟང་སྦྱིན་པ།
