སང་ཉིན་ནས་གྲོས་ཚོགས་འཚོག་རྒྱུ་རེད་འདུག

དེ་རིང་བོད་མི་མང་སྤྱི་འཐུས་ཚོགས་གཙོ་སྦྲེལ་པོ་དང་བཀའ་ཤག དེ་བཞིན། སྤྱི་འཐུས་རྣམ་པའི་བར་གྲོས་བསྡུར་གནང་བ་བརྒྱུད་སང་ཉིན་ནས་གྲོས་ཚོགས་ཀྱི་ལས་རིམ་མུ་མཐུད་འཕྲོ་སྐྱོང་གནང་རྒྱུ་རེད་འདུག

དེ་རིང་ཞོགས་པར་ཉི་མ་དྲོ་ཞིང་འཇམ་ལ། གསར་འགོད་པ་གྲོས་ཚོགས་ཀྱི་མདུན་དུ་སོང་ནས་ཉིན་གང་གྲོས་ཚོགས་འཚོགས་པར་ངང་སྒུག་བྱས་ཀྱང་། དེ་རིང་གི་གྲོས་ཚོགས་འཚོགས་ཐུབ་མ་སོང་ལ། གསར་འགོད་པ་མང་པོ་ཞིག་ཡར་རྒྱུག་མར་རྒྱུག་གིས་གྲོས་ཚོགས་འཚོག་ཐུབ་མིན་སྐོར་ལ་ཚོགས་གཙོ་སྦྲེལ་པོ་གཉིས་ཀྱི་དབུས་པའི་འཛིན་སྐྱོང་བཀའ་ཤག་དང་སྤྱི་འཐུས་རེ་རེ་བཞིན་བཀའ་འདྲི་ཞུ་ཐབས་གནང་སོང་། དེ་རིང་གྲོས་ཚོགས་འཚོགས་མ་ཐུབ་པའི་གནས་བབ་དང་འབྲེལ་ནས་སྤྱི་འཐུས་ཟླ་བ་ཚེ་རིང་ལགས་ཀྱིས་འདི་གའི་གསར་འགོད་པར། ཁ་ཉིན་ཆུ་ཚོད་ལྔ་བ་ཙམ་ལ་ཚོགས་དྲུང་ལས་ཁུངས་ཀྱིས་མེག་ལོར་གྱི་གཡས་གཡོན་དུ་སྡོད་མཁན་སྤྱི་འཐུས་རྣམ་པར་གཞུང་གི་རླངས་འཁོར་མེད། དེ་རིང་སོ་སོས་གླ་གཏོང་རླངས་འཁོར་ལ་བསྡད་དེ་ཤོག་ཞེས་ལབ་སོང་པས། ང་ཚོས་དེ་རིང་གྲོས་ཚོགས་འཚོགས་ཡོད་ཤག་བྱས་ཏེ་བཅར་བ་ཡིན། འདིར་བསླེབས་དུས་གྲོས་ཚོགས་འཚོགས་ཐུབ་མི་འདུག ཚོགས་གཙོ་སྦྲེལ་བོ་རྣམ་གཉིས་ཀྱིས་བདེ་འཇགས་ཐོག་འགན་ལེན་བྱེད་ཐུབ་ཀྱི་མི་འདུག་ཟེར་གྱི་ཡོད་པར། བདེ་སྲུང་ལས་ཁུངས་ཀྱི་ལན་གསལ་བོ་ཞིག་རག་མེད་པས། གྲོས་ཚོགས་འཚོགས་པར་གྲུབ་ཆ་ཚང་གི་མི་འདུག་གསུངས་སོང་། དེ་རིང་འདིར་མདོ་སྨད་ཀྱི་སྤྱི་འཐུས་གྲངས་བརྒྱད་དང་དབུས་གཙང་གི་སྤྱི་འཐུས་གྲངས་བརྒྱད་ཁྱོན་སྤྱི་འཐུས་གྲངས་ ༡༦ འཛོམས་ཡོད། ཅེས་འགྲེལ་བརྗོད་གནང་བྱུང་།

ཡང་དེ་རིང་ཉིན་རྒྱབ་ཕྱི་དྲོ་ཆུ་ཚོད་ ༣།༢༤ སྟེང་ཕྱོགས་བཞུགས་ཕྱི་རྒྱལ་སྤྱི་འཐུས་ལྔས་སྤྱི་འཐུས་ཚོགས་གཙོ་སྤྲེལ་པོ་གཉིས་ཀྱི་སར་བཅར་ཏེ་གྲོས་ཚོགས་འཚོགས་ཐུབ་ཐབས་ཡོང་བའི་ཞུ་སྐུལ་ཞུས་སོང་ལ། སྐབས་དེར་ཡུ་རོབ་སྤྱི་འཐུས་ཐུབ་བསྟན་དབང་ཆེན་ལགས་ཀྱིས། ད་ལྟ་གྲོས་ཚོགས་ཀྱི་གནས་སྟངས་ག་འདྲ་ཆགས་ཡོད་མེད་ཚང་མས་མཁྱེན་གསལ་རེད། གྲོས་ཚོགས་འཚོགས་ཐུབ་ཀྱི་མེད་པ་འདི་ལྟར་བཞག་ན་འགྲིག་གི་མེད་པས། ཕྱི་རྒྱལ་གྱི་སྤྱི་འཐུས་ལྔས་འགན་འཁུར་ནས་ཚོགས་གཙོ་སྦྲེལ་བོ་རྣམ་གཉིས་ཀྱི་མདུན་དུ་བཅར་ཏེ། གྲོས་ཚོགས་འཚོགས་ཐུབ་ཀྱི་མེད་པའི་གནས་སྟངས་ཐད་ཐབས་ལམ་ཡོད་མེད་དང་། གྲོས་ཚོགས་མུ་མཐུད་འཚོགས་ཐུབ་ཐབས་སུ་ལམ་སྟོན་ཞུས་པ་ཡིན། ཚོགས་གཙོ་སྦྲེལ་པོ་ནས་སྤྱི་འཐུས་ཚང་མའི་བསམ་ཚུལ་གང་ཡོད་པར་གཟིགས་ཏེ་ཐག་གཅོད་བྱ་རྒྱུ་ཡིན་འདུག ང་ཚོའི་ངོས་ནས་གྲོས་ཚོགས་མུ་མཐུད་དུ་འཚོགས་ཐུབ་པའི་རེ་བ་ཆེན་པོ་བྱེད་བཞིན་ཡོད། ཅེས་འགྲེལ་བརྗོད་གནང་སོང་།

དེ་བཞིན། དེ་རིང་ཉིན་རྒྱབ་ཏུ་གཞི་རིམ་མི་མང་རེ་འབོད་ཚོགས་པས་གསར་འགོད་གསལ་བསྒྲགས་ཤིག་སྤེལ་བའི་ནང་། བདུན་སྔོན་མའི་རེས་གཟའ་སྤེན་པའི་ཉིན་གུང་འདི་གའི་ལས་འགུལ་དུ་བཅར་བའི་མི་མང་ཚོས་གངས་སྐྱིད་མདུན་ཐང་གི་ལམ་ཟུར་དུ་སྐད་འབོད་བརྒྱབ་པར་བརྟེན་བོད་མི་མང་སྤྱི་འཐུས་ཁག་ཅིག་གིས་ཁོང་རྣམ་པའི་བདེ་འཇགས་ལ་ཉེན་ཁ་ཆེ་ཚུལ་བཤད་དེ་ཉིན་རྒྱབ་གྲོས་ཚོགས་ལ་མ་བཅར་བ་དང་། དེ་རིང་རེས་གཟའ་ཟླ་བའི་ཉིན་ལའང་ཚོགས་བཅར་གནང་མི་འདུག གཞི་རིམ་མི་མང་ལས་འགུལ་འདིའི་མགོ་ཁྲིད་ཚོས་ཚིག་ཐག་ཆོད་པོས་ཤོད་རྒྱུར། སྤྱི་འཐུས་རྣམ་པ་སུ་ལ་ཡང་བདེ་འཇགས་ལ་གནོད་སྐྱོན་ཡོང་གཞི་ལས་གཞི་སྣེ་གཅིག་སྤེལ་མེད་ལ་སྤེལ་རྩིས་ཀྱང་མེད། ཁ་སང་ཕྱི་ཚེས་ ༡༥ ཉིན་བདེ་སྲུང་ལས་ཁུངས་སུའང་ཡིག་ཐོག་ཕུལ་ཟིན་ཡོད་པ་མ་ཟད། དེ་རིང་ཡང་ནན་པོ་བྱས་ནས་ཞུ་བཞིན་ཡོད། ཅེས་དང་། སྤྱི་འཐུས་སྨོན་ལམ་མཐར་ཕྱིན་ནས་གྲོས་ཚོགས་སུ་མ་བཅར་བའི་སྤྱི་འཐུས་ཚོའི་སྐུ་ཚབ་བྱས་ཏེ་ (བཙན་བྱོལ་བོད་མིའི་བཅའ་ཁྲིམས་ཀྱི་གནད་དོན་ལ་འགྱུར་བ་བཏང་དགོས་ཀྱི་ཡོད་པ་དང་། ཁྲིམས་ཞིབ་པ་བསྐོ་དགོས་ཀྱི་ཡོད་པ་དེ་ང་ཚོའི་ལས་འགན་རེད་ལ་ཧ་གོ་ཡི་ཡོད།) ཅེས་གསུངས་པ་ཁ་ཞེ་གཉིས་མེད་ཡིན་ན་བཅའ་ཁྲིམས་བསྐྱར་བཅོས་ཀྱི་ལས་རིམ་དེ་འཕྲལ་དུ་གྲོས་ཚོགས་ནང་གཏན་འབེབས་གནང་རོགས་ཞེས་ནན་པོ་ཞུ་བཞིན་ཡོད། སྤྱི་འཐུས་ཚོགས་གཙོ་སྦྲེལ་པོ་རྣམ་གཉིས་ཀྱིས་ཀྱང་བསམ་བཞིན་ལས་རིམ་ཕྱིར་བསྣར་གྱིས་གྲོས་ཚོགས་ཉིན་མཐའ་མ་བར་མི་འཇོག་རོགས། ཞེས་སོགས་འཁོད་འདུག

དེ་ནས་ཉིན་རྒྱབ་ཆུ་ཚོད་ ༤ དང་ཕྱེད་ཀ་ཡོལ་ཙམ་ལ་མདོ་སྟོད་དང་ཆོས་བརྒྱུད་སྤྱི་འཐུས་ཀྱི་སྐུ་ཚབ་བཞིའི་ཁྲོད་ནས་ཆོས་བརྒྱུད་སྤྱི་འཐུས་ཨ་ཀྲུག་ཚེ་བརྟན་ལགས་ཀྱིས། ཁ་སང་ཆོས་བརྒྱུད་སྤྱི་འཐུས་དང་མདོ་སྟོད་སྤྱི་འཐུས་ཚོས་ཚོགས་གཙོ་སྦྲེལ་པོ་གཉིས་ལ་བཅར་ནས་བཀའ་ཤག་དང་བདེ་སྲུང་གིས་འགན་ལེན་ཐུབ་ཟེར་ནས་ཞལ་བཞེས་གནང་མ་ཐུབ་ན་ང་ཚོ་བཅར་གྱི་མེད་ཟེར་ནས་ཞུས་པ་རེད། ད་ལྟ་ཚོགས་གཙོ་སྦྲེལ་པོ་གཉིས་ཀྱིས་ང་ཚོ་སྐད་བཏང་ནས། བདེ་སྲུང་གིས་བཀའ་ཤག་ལ་སྙན་གསེང་ཞུས་རྗེས། བཀའ་ཤག་གིས་བདེ་སྲུང་ནས་སང་ཉིན་འགན་འཁྱེར་ཐུབ་ཀྱི་ཡོད་ཅེས་ཡིག་ཐོག་ནས་ལན་གནང་འདུག དེར་བརྟེན་སང་ཉིན་ང་ཚོ་མུ་མཐུད་ནས་ཚོགས་འདུ་འཚོག་རྒྱུ་ཆགས་ཡོད། ཅེས་བརྗོད་བྱུང་།

གསར་འགོད་པ། བྱམས་པ་ཚེ་རིང་། བསྟན་འཛིན་ཕུར་བུ། རྩོམ་སྒྲིག་པ། སྐལ་བཟང་སྦྱིན་པ།