རྒྱ་ནག་གི་རྒྱལ་སྲུང་བློན་ཆེན་ཏུང་ཅིན་ལ་ཞིབ་བཤེར་བྱེད་བཞིན་འདུག

རྒྱ་ནག་གི་རྒྱལ་སྲུང་བློན་ཆེན་ཏུང་ཅིན་ལ་ལྐོག་ཟ་རུལ་སུངས་ཀྱི་ཉེས་མིང་འོག་ཞིབ་བཤེར་བྱེད་བཞིན་ཡོད་ཅིང་། ཁོ་ནི་རྒྱ་ནག་གི་རྒྱལ་སྲུང་བློན་ཆེན་ཞིག་ལ་ཞིབ་བཤེར་བྱས་པ་ཐེངས་གསུམ་པ་དེ་ཡིན་འདུག

དེ་རིང་ཕྱི་ཚེས་ ༢༧ ཉིན་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་པའི་ནང་། རྒྱ་ནག་གི་རྒྱལ་སྲུང་བློན་ཆེན་ཏུང་ཅིན་ (Dong Jun) གྱིས་ལྐོག་ཟ་རུལ་སུངས་ཀྱི་ཉེས་མིང་འོག་ཞིབ་བཤེར་བྱེད་བཞིན་ཡོད་པ་དང་། ཁོ་ནི་རྒྱ་ནག་གི་རྒྱལ་སྲུང་བློན་ཆེན་ཞིག་ལ་ལྐོག་ཟ་རུལ་སུངས་ཀྱི་ཉེས་མིང་འོག་ཞིབ་བཤེར་བྱས་པ་ཐེངས་གསུམ་པ་དེ་ཡིན་ཞིང་།  ད་ལྟའི་ཆར་ཏུང་ཅིན་ལ་ལྐོག་ཟ་རུལ་སུངས་ཀྱི་ཉེས་མིང་འོག་ཞིབ་བཤེར་བྱེད་བཞིན་ཡོད་ཟེར་བ་ཙམ་ལས་རྒྱུ་རྐྱེན་གཞན་གསལ་ཁ་མི་འདུག

དེ་འབྲེལ་དབྱིན་ཇིའི་དཔལ་འབྱོར་དུས་བབ་གསར་ཁང་ (Financial Times) གི་གནས་ཚུལ་ནང་། ད་ལན་རྒྱ་ནག་གི་རྒྱལ་སྲུང་བློན་ཆེན་ཏོན་ཅོན་ཞིབ་བཤེར་འོག་ཡོད་པའི་གནས་ཚུལ་དེ་ཨ་རིའི་གཞུང་འབྲེལ་མི་སྣས་ཤེས་རྟོགས་བྱུང་ཡོད་ཅིང་། ད་དུང་བདུན་ཕྲག་སྔོན་མར་ཨེ་ཤ་ཡའི་བདེ་སྲུང་ཚོགས་འདུའི་སྐབས། ཏུང་ཅིན་གྱིས་ཨ་རིའི་རྒྱལ་སྲུང་དྲུང་ཆེ་ཨོ་སི་ཊིན་ (Llyod Austin) དང་ཐུག་འཕྲད་བྱས་མེད་པ་རེད་ལ། ཉེ་ལམ་ཕྱི་ཚེས་ ༡༧ ཉིན་ལྷོ་ཨ་མི་རི་ཁའི་རྒྱལ་ཁབ་པེ་རུ་ (Peru) རུ་ཚོགས་པའི་ཨེ་ཤ་ཡ་ཞི་བདེ་རྒྱ་མཚོའི་དཔལ་འབྱོར་མཉམ་ལས་ཀྱི་ཚོགས་ཆེན་ (Asia Pacific Economic Cooperation Forum) སྐབས། ཞི་ཅིན་ཕིན་གྱིས་སྲིད་འཛིན་བྷའེ་ཌན་ལ་ཐུག་འཕྲད་ཀྱིས། ཨ་རྒྱ་གཉིས་ཀྱི་འབྲེལ་ལམ་ལ་བཟང་ཕྱོགས་ཀྱི་འགྱུར་བ་ཡོང་ཡོད་སྐོར་བརྗོད་ཡོད་འདུག

ཨ་རིའི་རྒྱལ་ས་ཝ་ཤིང་ཊོན་དུ་རྟེན་གཞི་བྱས་པའི་རྒྱ་ནག་གཞུང་ཚབ་ཁང་གིས་ཏུང་ཅིན་སྐོར་ནས་ལན་འདེབས་གསལ་བཤད་གང་ཡང་སྤྲད་མེད་ཅིང་། གནད་དོན་དབྱེ་ཞིབ་པ་ཁག་ཅིག་གིས་ཏུང་ཅིན་ལ་ཞིབ་བཤེར་བྱེད་བཞིན་པའི་གནད་དོན་འདི་ནི། ཞི་ཅིན་ཕིན་གྱིས་ཉེ་ལམ་ནས་རྒྱ་ནག་མི་དམངས་བཅིངས་གྲོལ་དམག་གི་མགོ་ཁྲིད་རྣམས་ལ་ལྐོག་ཟ་རུལ་སུངས་ཀྱི་ཞིབ་དཔྱོད་བྱེད་བཞིན་པའི་གཞི་རྒྱ་ཆེ་བའི་འགུལ་སྐྱོད་ཅིག་ཡིན་སྐོར་བརྗོད་འདུག

ཞི་ཅིན་ཕིན་གྱི་སྟག་དང་སྦྲང་མ་ལེབ་རྡུང་གི་སྲིད་ཇུས་འོག་འདས་ལོ་གཅིག་པུར་རྒྱ་ནག་བཅིངས་གྲོལ་དམག་མིའི་དམག་སྤྱི་དགུ་ཏང་དང་གཞུང་གི་གོ་གནས་ནས་ཕྱིར་ཕུད་བྱས་ཡོད་ལ། འདས་ལོའི་ཕྱི་ཟླ་ ༦ ནང་རྒྱལ་སྲུང་བློན་ཆེན་ཟུར་པ་ལི་ཧྲན་ཧྥོའུ་ (Li Shangfu) དང་། དེ་སྔའི་རྒྱལ་སྲུང་བློན་ཆེན་ཝའེ་ཧྥང་ཧཱ་ (Wei Fenghe) ཟེར་བ་གཉིས་ནས་ལྐོག་ཟ་རུལ་སུངས་ཀྱི་ཉེས་མིང་འོག་ནས་སྒྲིག་འགལ་ཚབས་ཆེན་བྱས་ཡོད་ཟེར་ནས་ཕྱིར་ཕུད་བཏང་སྟེ། ད་ལྟའང་གར་སོང་ཆ་མེད་དུ་གྱུར་ཡོད་འདུག

ཏོན་ཅོན་ནི་ཕྱི་ལོ་ ༡༩༦༡ ལོར་རྒྱ་ནག་ཧྲན་ཏུང་ (Shandong) ཞིང་ཆེན་གྱི་ཡན་ཐའེ་ (Yantai) ས་ཁུལ་དུ་སྐྱེས། ཕྱི་ལོ་ ༡༩༧༨ ལོར་རྒྱ་ནག་གི་གྲོང་ཁྱེར་ཏཱ་ལིན་ (Dalian) གྲོང་ཁྱེར་དུ་མཚོ་དམག་དང་འབྲེལ་བའི་ཆེད་སྦྱོང་ཐོག་སློབ་མཐར་ཕྱིན་རྗེས། རྒྱ་ནག་བཅིངས་གྲོལ་དམག་གི་མཚོ་དམག་སྦྱོང་བརྡར་ལྟེ་གནས་ཁང་གི་འགན་འཛིན་དང་། རྒྱ་ནག་ཤར་ཁུལ་གྱི་མཚོའི་དམག་དཔོན་གཞོན་པ། རྒྱ་ནག་བཅིངས་གྲོལ་དམག་གི་མཚོ་དམག་གི་དམག་དཔོན་གཞོན་པ་སོགས་བྱས་ཡོད་པ་མ་ཟད། ཕྱི་ལོ་ ༢༠༢༡ ལོར་རྒྱ་ནག་བཅིངས་གྲོལ་དམག་མཚོ་དམག་གི་དམག་སྤྱི་ཆེན་མོ་བྱས་ཡོད་འདུག འདས་ལོའི་ཕྱི་ཟླ་ ༡༢ ཚེས་ ༢༩ ཉིན་ཏུང་ཅིན་རྒྱ་ནག་གི་རྒྱལ་སྲུང་བློན་ཆེན་དུ་བསྐོས་འདུག་ལ། ཏོན་ནི་རྒྱ་ནག་བཅིངས་གྲོལ་དམག་ཟེར་བའི་མཚོ་དམག་སྤྱི་ཁྱབ་ཀྱི་རྒྱབ་ལྗོངས་ཡོད་པའི་རྒྱལ་སྲུང་བློན་ཆེན་ཐོག་མ་དེ་ཆགས་ཀྱི་ཡོད་པ་རེད།

ད་ལྟའི་ཆར་རྒྱ་ནག་མི་དམངས་བཅིངས་གྲོལ་དམག་ཁོངས་ཀྱི་མཐོ་རིམ་དཔོན་རིགས་མང་པོ་ཞིག་ལྐོག་ཟ་རུལ་སུངས་ཀྱི་གནད་དོན་དང་འབྲེལ་ནས་གོ་གནས་ནས་ཕྱིར་ཕུད་གཏོང་གི་ཡོད་ཀྱང་། རྒྱ་ནག་དབུས་གཞུང་གིས་གནད་དོན་དེ་དག་ཡོངས་བསྒྲགས་བྱེད་ཀྱི་མེད་པ་དང་། ཕྱོགས་གཅིག་ནས་བཅིངས་གྲོལ་དམག་གི་གཙོ་འཛིན་ཞི་ཅིན་ཕིན་ཡིན་པར་བརྟེན། ནང་ཁུལ་གྱི་རྙོག་ཟིང་རིགས་ཕྱི་ལ་བསྒྲགས་ནས་གནད་དོན་མི་ལྷག་ཐབས་དང་། མཐོ་རིམ་མགོ་ཁྲིད་མང་པོ་ཞིག་གོ་གནས་ནས་ཕྱིར་ཕུད་བཏང་བ་ལས་འཛིན་བཟུང་འདྲི་རྩད་རིགས་དང་བཙོན་ཁང་སོགས་སུ་བཅུག་མེད་པ་དེས་དམག་ཁོངས་ལ་བརྡབ་གསིག་མི་བཟོ་བའི་ཆེད་དུ་ཡིན་ཚུལ་བརྗོད་འདུག

གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། སྐལ་བཟང་སྦྱིན་པ།