བཞུགས་སྒར་དྷ་རམ་ས་ལར་བོད་ཀྱི་སྒྱུ་རྩལ་པའི་དུས་སྟོན་ཐེངས་དང་པོ་འཚོག་བཞིན་འདུག

རྩོམ་པ་པོ་ལྡུམ་ར་བུ་ཆུང་བསོད་ནམས་ལགས་ཀྱིས་ཁ་འཐོར་དུ་ཡོད་པའི་བོད་པའི་སྒྱུ་རྩལ་པ་རྣམས་འཛོམས་ཏེ་མང་ཚོགས་ལ་སྒྱུ་རྩལ་སྐོར་གོ་རྟོགས་སྤེལ་རྒྱུ་དང་སྒྱུ་རྩལ་པ་རྣམས་ཀྱིས་བོད་དོན་འཐབ་རྩོད་ལ་ཞབས་འདེགས་ཆེན་པོ་ཞུ་ཐུབ་པའི་ངེས་ཤེས་ཡོད་ཅེས་བརྗོད་བྱུང་།

དེ་རིང་ནས་ཕྱི་ཟླ་ ༡༢ ཚེས་ ༡ བར་ཉིན་གྲངས་གསུམ་རིང་བོད་སྨྱུག་དཔེ་སྐྲུན་ཁང་དང་བོད་ཀྱི་ཐེབས་རྩ་ཐུན་མོང་གི་གོ་སྒྲིག་འོག དྷ་ས་མེག་གྷན་དུ་ཡོད་པའི་བྷག་སུ་གསོལ་མགྲོན་ཁང་ (Hotel Bhagsu Lawn) དུ། བོད་ཀྱི་སྒྱུ་རྩལ་པའི་དུས་སྟོན་ཐེངས་དང་པོ་འཚོག་བཞིན་འདུག ད་ལན་གྱི་བོད་ཀྱི་སྒྱུ་རྩལ་པའི་དུས་སྟོན་དེའི་ནང་རོལ་དབྱངས་འདུ་འཛོམས་དང་། སྙན་ངག་གྱེར་འདོན། རྩོམ་རིག སྤྱི་ཚོགས། ཆབ་སྲིད། སྒྱུ་རྩལ་སོགས་བརྗོད་གཞི་འདྲ་མིན་ཐད་བགྲོ་གླེང་གནང་གི་ཡོད་འདུག

དེ་རིང་འདི་གའི་གསར་འགོད་པས་རྩོམ་པ་པོ་ལྡུམ་ར་བུ་ཆུང་བསོད་ནམས་ལགས་སུ་བོད་ཀྱི་སྒྱུ་རྩལ་པའི་དུས་སྟོན་གོ་སྒྲིག་བྱས་པའི་རྒྱུ་མཚན་གཙོ་བོ་གང་ཡིན་དྲིས་པར། བུ་ཆུང་བསོད་ནམས་ལགས་ཀྱིས། སྤྱིར་བཏང་ང་ཚོ་བོད་པའི་བཙན་བྱོལ་སྤྱི་ཚོགས་འདི་ཁ་འཐོར་གྱི་སྤྱི་ཚོགས་ཤིག་རེད། དེ་ཡང་བོད་མི་རྣམས་འཛམ་གླིང་རྒྱལ་ཁབ་ ༣༠ ལྷག་ནང་འཐོར་བཞིན་ཡོད་པ་ལྟར་སྒྱུ་རྩལ་པ་རྣམས་ཀྱང་ཁ་འཐོར་དུ་གནས་ཡོད་པ་རྣམས་འཛོམས་ནས་སྒྱུ་རྩལ་གྱི་ནུས་པ་གང་ཡིན་པ་དང་། སྒྱུ་རྩལ་པ་རྣམས་བོད་མི་རིགས་ཀྱི་ལ་རྒྱ་དང་རྒྱལ་ཁབ་ལ་དགའ་ཞེན། ལྷག་པར་དུ་འཐབ་རྩོད་ལ་ཞབས་འདེགས་ག་རེ་ཞུ་ཐུབ་ཀྱི་ཡོད་པ་སོགས་ཤེས་དགོས་པ་དེ་གལ་ཆེན་ཡིན་པར་བརྟེན། ད་ལན་གྱི་དུས་སྟོན་འདིའི་ནང་སྒྱུ་རྩལ་པ་རྣམས་འཛོམས་ཏེ་སྒྱུ་རྩལ་ཟེར་ན་གང་ཡིན་པ་དང་། སྲོལ་རྒྱུན་དང་དེང་དུས་ཀྱི་སྒྱུ་རྩལ་གཉིས་མཉམ་དུ་གོང་སྤེལ་གང་འདྲ་གཏོང་ཐུབ་ཀྱི་ཡོད་པ། དེ་བཞིན་མི་མང་ལ་སྒྱུ་རྩལ་སྐོར་ལ་གོ་རྟོགས་གང་འདྲ་སྤེལ་ཐུབ་ཀྱི་ཡོད་པ་སོགས་ཀྱི་ཐོག་ལ་བགྲོ་གླེང་དང་། གཞས་ཀྱི་འདུ་འཛོམས་སོགས་གོ་སྒྲིག་བྱས་ཡོད། ཅེས་འགྲེལ་བརྗོད་གནང་བྱུང་།

ཡང་ཁོང་གིས། བོད་ཀྱི་རིག་གཞུང་ལ་ནུས་པ་ཆེན་པོ་ཡོད་ལ། ད་བར་ནང་པ་སངས་རྒྱས་པའི་ཆོས་དང་བོན་གྱི་ཆོས་འཛིན་སྐྱོང་སྤེལ་གསུམ་གྱི་ནུས་པ་ལ་བརྟེན་ནས་གོང་མཐོར་དང་རྒྱུན་གནས་ཐུབ་ཡོད། འོན་ཀྱང་། ངའི་བསམ་ཚུལ་ལ་བོད་ཀྱི་རིག་གཞུང་རྒྱུན་གནས་དང་སྲ་བརྟན་དུ་གནས་ཐུབ་པ། དེ་བཞིན་གཏིང་ཟབ་ཏུ་གཏོང་བར་སྒྱུ་རྩལ་པ་ཚོས་ཞབས་འདེགས་ཆེན་པོ་ཞུ་ཐུབ་ཀྱི་རེད་བསམ་པའི་ངེས་ཤེས་ཆེན་པོ་ཡོད། དེར་བརྟེན། མ་འོངས་པར་འདི་དང་འདི་འདྲ་བའི་སྡིངས་ཆ་རིམ་པ་བྱུང་ཚེ། འདི་བརྒྱུད་ནས་སྒྱུ་རྩལ་གོང་མཐོར་གཏོང་བ་དང་། བོད་པ་ཙམ་མིན་པར་རྒྱལ་སྤྱིའི་ཁྲོད་བོད་ཀྱི་རིག་གཞུང་གོང་འཕེལ་དང་། དེའི་ནུས་པ་བརྒྱུད་ནས་བོད་པའི་འཐབ་རྩོད་དང་བོད་དོན་གོ་རྟོགས་སྤེལ་རྒྱུར་ཕན་ཐོགས་ཡོང་བའི་རེ་བ་ཡོད། ཅེས་འགྲེལ་བརྗོད་གནང་བྱུང་།

གསར་འགོད་པས་བུ་ཆུང་ལྡུམ་ར་བསོད་ནམས་ལགས་སུ་དུས་སྟོན་འདིའི་ཐོག་ནས་མང་ཚོགས་ལ་བརྡ་ལན་ག་རེ་སྤྲོད་འཆར་ཡོད་སྐོར་དྲིས་པར། ཁོང་གིས། སྒྱུ་རྩལ་པ་རྣམས་མཉམ་དུ་འཛོམས་ཏེ་སྒྱུ་རྩལ་ངོས་འཛིན་ཐུབ་པ་དང་། བོད་མི་རིགས་ཀྱི་ལ་རྒྱ་དང་རིག་གཞུང་གོང་འཕེལ་གཏང་རྒྱུ། དེ་བཞིན་བོད་པའི་འཐབ་རྩོད་ལ་ཞབས་འདེགས་གང་འདྲ་ཞུ་ཐུབ་ཀྱི་ཡོད་མེད་དེ་གལ་ཆེན་པོ་ཡིན་པ་མ་ཟད། མང་ཚོགས་ལ་རིག་གནས་དང་རྩོམ་རིག་སྒྱུ་རྩལ་སོགས་སྒྱུ་རྩལ་གྱི་ངོ་བོ་དེ་དག་གོ་རྟོགས་སྤེལ་རྒྱུའི་ཆེད་དུ་རེད། རྒྱུ་མཚན་ནི་རྩོམ་རིག་སྒྱུ་རྩལ་ལ་ནུས་པ་ཆེན་པོ་ཡོད་པ་དེ་མངོན་འགྱུར་ཡོང་བར་མི་མང་ལ་གོ་རྟོགས་དགོས་པ་དེ་གལ་ཆེན་པོ་ཞེ་དྲགས་རེད། ཅེས་བརྗོད་བྱུང་།

མ་འོངས་པར་འཆར་གཞི་གང་ཡོད་མེད་ཐད་བུ་ཆུང་ལྡུམ་ར་བསོད་ནམས་ལགས་ཀྱིས། ད་ལན་གྱི་བོད་ཀྱི་སྒྱུ་རྩལ་གྱི་དུས་སྟོན་ཐེངས་དང་པོ་དེ་གཞས་དང་རྩོམ་རིག་སྐོར་ལ་རེད། ངའི་རེ་བ་ལ་ལོ་རྗེས་མར་རྩོམ་རིག་དང་གློག་བརྙན། རྩོམ་རིག་དང་རི་མོ་སོགས་རིམ་པ་རིམ་པ་འཚོགས་ཏེ། བཙན་བྱོལ་ནང་གི་སྒྱུ་རྩལ་པ་ཡོད་དོ་ཅོག་འཛོམས་ཏེ་ནུས་པ་གོང་འཕེལ་གཏོང་ཐུབ་རྒྱུའི་རེ་བ་བྱེད་ཀྱི་ཡོད།

འདི་གའི་གསར་འགོད་པར་བོད་དོན་འཐབ་རྩོད་པ་བསྟན་འཛིན་བརྩོན་འགྲུས་ལགས་ཀྱིས། ད་ལན་གྱི་དུས་སྟོན་འདིའི་ནང་ཕྱི་རྒྱལ་དང་བཙན་བྱོལ་དུ་ཡོད་པའི་གཞས་པ་ཁག་ཅིག་ཡོད་པའི་ཁྲོད་ནས་སྲོལ་རྒྱུན་གྱི་གཞས་པ་དང་། དེང་དུས་ཀྱི་གཞས་པ། རྩོམ་པ་པོ་ཁག་ཅིག་ཡོད་པའི་ཁྲོད་ནས་བོད་ཡིག་གི་རྩོམ་པ་པོ་དང་། དབྱིན་ཡིག་གི་རྩོམ་པ་པོ། དེ་བཞིན་རྩོམ་བསྒྱུར་བྱེད་མཁན་ཁག་ཅིག་ཡོད་བོད་པའི་སྒྱུ་རྩལ་པ་སྣ་ཁ་འཛོམས་པོ་ཞིག་མཉམ་ཞུགས་བྱས་ཡོད། ཅེས་བརྗོད་བྱུང་།

སྒྱུ་རྩལ་དུས་སྟོན་གོ་སྒྲིག་བྱས་པའི་དགོས་དམིགས་གཙོ་བོ་གང་ཡིན་པའི་ཐད་བསྟན་འཛིན་བརྩོན་འགྲུས་ལགས་ཀྱིས། ང་ཚོ་སྒྱུ་རྩལ་པ་ནང་ཁུལ་བགྲོ་གླེང་བྱ་རྒྱུ་གལ་ཆེན་ཡིན་པས་སྒྱུ་རྩལ་པ་ནང་ཁུལ་བགྲོ་གླེང་བྱས་ཏེ། མ་འོངས་པར་རྒྱལ་སྤྱིའི་རང་བཞིན་གྱི་ཐོག་ནས་མཉམ་མཐུན་བྱ་རྒྱུ་དང་། རྩོམ་པ་པོ་དང་སྒྱུ་རྩལ་པ་ནང་ཁུལ་འབྲེལ་བ་བྱས་ཏེ་རྒྱལ་སྤྱིའི་སྟེང་འགྲེམས་སྟོན་དང་། གཏམ་བཤད། འཁྲབ་སྟོན་སོགས་བྱ་ཐུབ་རྒྱུའི་ལས་རིམ་གྲ་སྒྲིག་དང་། དེས་བོད་པའི་སྤྱི་ཚོགས་ནང་ལོགས་ལ་བརྡ་ལན་ག་རེ་སྤྲོད་དགོས་པ་དང་། ལྷག་པར་དུ་སྒྱུ་རྩལ་པ་དང་ཤེས་ཡོན་པ་བརྒྱུད་ནས་འཐབ་རྩོད་ལ་ཞབས་ཕྱི་གང་འདྲ་སྒྲུབ་་དགོས་མིན་ཐད་ལ་གཏིང་ཟབ་པོའི་ཐོག་ནས་གྲོས་བསྡུར་ཡོང་གི་རེད་བསམ་གྱི་འདུག ཅེས་བརྗོད་བྱུང་།

སང་ཉིན་ཕྱི་ཚེས་ ༣༠ ཉིན་གྱི་ཞོགས་པར་རྩོམ་པ་པོ་ཚེ་རིང་དབྱངས་འཛོམས་ལགས་དང་། ཚེ་རིང་རྣམ་རྒྱལ་ལགས། བསྟན་འཛིན་ཉི་མ་ལགས་བཅས་ཀྱིས་རྩོམ་ཁ་ནང་ལ་བལྟ་བ་ (Language of Homecoming: Tibetan Novels) ཞེས་པའི་བརྗོད་གཞིའི་ཐོག་གྲོས་མོལ་བྱ་རྒྱུ་ཡིན་འདུག་ལ། ཉིན་དེའི་ཉིན་རྒྱབ་ཏུ་ཉི་མ་མཚོ་ལགས་དང་། བསྟན་འཛིན་བརྩོན་འགྲུས་ལགས། བསྟན་ཕུན་ལགས། དཀོན་མཆོག་རབ་བརྟན་ལགས་བཅས་ཀྱིས་རྩམ་དྲི་དྲོ་བའི་རྩོམ་རིག་ (Literature and Identity) ཅེས་པའི་ཐད་གླེང་སློང་བྱ་རྒྱུ། དགོང་མོར་བསོད་ནམས་སྒྲོལ་མ་ལགས་དང་། བསྟན་འཛིན་ཆོས་རྒྱལ་ལགས། དེ་བཞིན་བཀྲིས་རྒྱ་མཚོ་ལགས་དང་། ཉི་མ་དོན་གྲུབ་ལགས། དཔལ་འབྱོར་ལགས་སོགས་ཚུད་པའི་གཞས་པ་དང་གཞས་མ་ ༡༨ ཙམ་ནས་རོལ་དབྱངས་འདུ་འཛོམས་འཚོག་འཆར་འདུག

ཕྱི་ཟླ་ ༡༢ ཚེས་ ༡ ཉིན་ཁ་རག་སྤེན་པ་ལགས་དང་། སེར་ཤུལ་རབ་གསལ་ལགས། དབུ་རྒྱན་ནོར་བུ་ལགས། བསྟན་འཛིན་ཆོས་དབྱིངས་ལགས་བཅས་ཀྱིས་རང་མགོ་རང་ཐོན་ (Wearing Many Hats: Music-Lyric-Record-Publish) ཐད་གྲོས་མོལ་བྱ་རྒྱུ་དང་། ཉིན་རྒྱབ་ཏུ་སྐལ་བཟང་ཆོས་སྐྱིད་ལགས་དང་། བཀྲིས་རྒྱ་མཚོ་ལགས། ཚེ་རིང་དཔལ་འབྱོར་ལགས། ཕུན་ཚོགས་ལགས་བཅས་ཀྱིས་དབྱངས་ཀྱི་འཕོ་འགྱུར་ (From Nangma to Rap) སྐོར་བགྲོ་གླེང་བྱ་རྒྱུ་དང་། ད་དུང་བསྟན་འཛིན་ཆོས་རྒྱལ་ལགས་དང་། སྡེ་དགེ་སྐལ་བཟང་ལགས། ཡེ་ཤེས་ལགས། འཇམ་དབྱངས་ལགས་བཅས་ཀྱིས་སྐད་ཡིག གཞས། མཉམ་ལས་ (Language, Music, Collaboration) ཐད་གླེང་སློང་བྱ་རྒྱུ། ཕྱི་དྲོར་ལྡུམ་ར་བུ་ཅུང་བསོད་ནམས་ལགས་དང་། བཀྲས་ཆུང་ལགས། སེར་ཤུལ་རབ་གསལ་ལགས། ཚེ་རི་དབྱངས་འཛོམས་ལགས་བཅས་ཀྱིས་སྤྱི་ཚོགས། ཆབ་སྲིད། སྒྱུ་རྩལ་སྐོར་གླེང་སློང་བྱ་རྒྱུ་ཡིན་འདུག དེ་བཞིན་ཉིན་དེའི་དགོང་མོར་སྒྱུ་རྩལ་པ་རྣམས་ཀྱིས་གཞས་དང་སྙན་ངག་གྱེར་འདོན་སོགས་བྱ་འཆར་འདུག

གསར་འགོད་པ། དོན་གྲུབ་བཀྲ་ཤིས། བསྟན་འཛིན་ཕུར་བུ། རྩོམ་སྒྲིག་བྱེད་མཁན། པདྨ་མཚོ།