བོད་རང་སྐྱོང་ལྗོངས་མཐོ་རིམ་མི་དམངས་ཁྲིམས་ཁང་གི་འགན་འཛིན་གཞོན་པར་ཞིབ་བཤེར།

བོད་རང་སྐྱོང་ལྗོངས་ཟེར་བའི་མཐོ་རིམ་མི་དམངས་ཁྲིམས་ཁང་གི་འགན་འཛིན་གཞོན་པ་ཧྲི་ཁུ་པིར་སྒྲིག་འགལ་ཚབས་ཆེན་བྱས་དོགས་གཞིའི་འོག་ཞིབ་བཤེར་བྱེད་ཀྱིན་ཡོད་འདུག

She Kebing was investigated. Photo Courtesy: Shanghai Observer

དེ་རིང་བོད་རང་སྐྱོང་ལྗོངས་སྒྲིག་ཁྲིམས་ཞིབ་དཔྱོད་ལས་ཁུངས་ཀྱིས། བོད་རང་སྐྱོང་ལྗོངས་དམར་ཤོག་ཚོགས་པའི་རྒྱུན་ལས་ཟུར་པ་དང་བོད་རང་སྐྱོང་ལྗོགས་མཐོ་རིམ་མི་དམངས་ཁྲིམས་ཁང་གི་འགན་འཛིན་གཞོན་ཧྲི་ཁུ་པེ་ཡིས། སྒྲིག་འགལ་ཚབས་ཆེན་བྱས་པའི་དོགས་གཞིའི་འོག་ཞིབ་བཤེར་བྱེད་བཞིན་ཡོད་པ་བསྒྲགས་འདུག

དེ་ཡང་། འདི་ལོའི་ཕྱི་ཟླ་ ༣ ཚེས་ ༢༩ ཉིན་བོད་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་སྐབས་ ༡༢ པའི་རྒྱུན་ལས་ཚང་འཛོམས་ཐེངས་དགུ་པའི་སྟེང་ཧྲི་ཁུ་པེའི་བོད་རང་སྐྱོང་ལྗོངས་མཐོ་རིམ་མི་དམངས་ཁྲིམས་ཁང་གི་འགན་འཛིན་གཞོན་པ་དང་ཁྲིམས་ཞིབ་འཐུས་མིའི་གོ་གནས་ཕྱིར་འཐེན་བྱ་རྒྱུའི་ཐད་གྲོས་འཆམ་བྱུང་ཡོད་པ་ལྟར། འདས་པའི་ཟླ་བརྒྱད་ལྷག་རིང་ཧྲི་ཁུ་པེ་ལས་གནས་ནས་ཕྱིར་ཕུད་བཏང་སྟེ། ད་ལྟ་དངོས་སུ་ཞིབ་བཤེར་བྱེད་མགོ་བརྩམས་ཡོད་འདུག་ལ། ཕྱི་ལོ་ ༢༠༡༣ ཟླ་ ༡ པོའི་ནང་ཧྲི་ཁུ་པེ་བོད་རང་སྐྱོང་ལྗོངས་མཐོ་རིམ་མི་དམངས་ཁྲིམས་ཁང་གི་ཁྲིམས་ཞིབ་འཐུས་མི་དང་འགན་འཛིན་གཞོན་པར་གནས་སྤར་བྱས་ཏེ། འདས་པའི་ལོ་ ༡༡ རིང་བོད་རང་སྐྱོང་ལྗོངས་མཐོ་རིམ་མི་དམངས་ཁྲིམས་ཁང་གི་འགན་གཞོན་གྱི་གོ་གནས་བཟུང་འདུག

ཧྲི་ཁུ་པེ་ནི་རྒྱ་རིགས་ཡིན་ཞིང་ཕྱི་ལོ་ ༡༩༦༣ ལོའི་ཟླ་ ༡༢ པར་ཧུའུ་པེ་ཞིང་ཆེན་གྱི་སུང་ཀྲི་གྲོང་ཁྱེར་དུ་སྐྱེས། ཕྱི་ལོ་ ༡༩༩༦ ཟླ་༧ པར་གུང་ཁྲན་ཏང་ངམ་རྒྱ་ནག་དམར་ཤོག་ཚོགས་ཁོངས་སུ་ཞུགས། ཕྱི་ལོ་ ༡༩༨༣ ཟླ་༩ པ་ནས་ལས་ཀ་བྱེད་འགོ་ཚུགས། ནུབ་བྱང་ཆབ་སྲིད་དང་ཁྲིམས་ལུགས་སློབ་གྲྭ་ཆེན་མོའི་ཁྲིམས་ལུགས་ཚན་ཁག་ནས་མཐར་ཕྱིན། ཁོས་ཧྲན་ནཱན་དམར་ཤོག་ཚོགས་པའི་འཐུས་མི་དང་རྩ་འཛུགས་ཀྱི་འགན་འཛིན། བོད་རང་སྐྱོང་ལྗོངས་དམར་ཤོག་ཚོགས་པ་རྩ་འཛུགས་ཀྱི་འགན་འཛིན་གཞོན་པ་སོགས་ཀྱི་འགན་འཁུར་མྱོང་བ་མ་ཟད། ཁོས་བོད་དུ་འདས་པའི་ལོ་ངོ་ ༣༠ ཙམ་རིང་དམར་ཤོག་ཚོགས་པའི་ལས་དོན་སྒྲུབ་མྱོང་ཡོད་འདུག

གསར་འགོད་པ། སྐལ་བཟང་སྦྱིན་པ།