ཁེ་ན་ཌས་རྒྱ་ནག་གི་ཆེས་མཐོའི་དཔོན་རིགས་བརྒྱད་ལ་ཉེས་ཆད་བཅད།

རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོ་དང་བསྟུན་ཁེ་ན་ཌ་གཞུང་གིས་རྒྱ་ནག་གི་དཔོན་རིགས་བརྒྱད་ཀྱིས་བོད་དང་ཤར་ཊུར་ཀི་སི་ཐན་ནང་འགྲོ་བ་མིའི་ཐོབ་ཐང་ལ་རྡོག་རོལ་ཚབས་ཆེན་བཏང་བར་དཔལ་འབྱོར་གྱི་ཉེས་ཆད་ཡོངས་ཁྱབ་གསལ་བསྒྲགས་གནང་འདུག

ཁ་སང་ཕྱི་ཚེས་ ༡༠ ཉིན་ཏེ་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོར་ཁེ་ན་ཌའི་ཕྱི་སྲིད་ལྷན་ཁང་གིས་གསར་འགོད་བསྒྲགས་གཏམ་ཞིག་སྤེལ་ཡོད་པའི་ནང་། ཁེ་ན་ཌས་རྒྱ་ནག་མི་དམངས་སྤྱི་མཐུན་རྒྱལ་ཁབ་དང་འབྲེལ་ནས་དམིགས་བསལ་དཔལ་འབྱོར་གྱི་ཐབས་ལམ་ཁག་ལ་སྟངས་འཛིན་བྱེད་པའི་སྒྲིག་གཞི་ (Regulations on Special Economic Measures) ཟེར་བ་ལག་བསྟར་འོག རྒྱ་ནག་གི་ཆེས་མཐོའི་དཔོན་རིགས་བརྒྱད་ཀྱིས་བོད་དང་ཤར་ཊུར་ཀི་སི་ཐན། རྒྱ་ནག་ནང་གི་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་ཚབས་ཆེན་བཏང་བར་བརྟེན། དཔོན་རིགས་དེ་དག་གི་རྒྱུ་དངོས་རྣམས་གཞུང་འབྲེལ་བཀག་སྡོམ་དང་། འབྱུང་འགྱུར་ཁེ་ན་ཌའི་མི་མང་གིས་ཉེས་ཆད་བཀལ་བའི་རྒྱའི་དཔོན་རིགས་དེ་དག་དང་མཉམ་དུ་རྒྱུ་དངོས་དང་ཚོང་ལས་སོགས་ཀྱི་ལས་དོན་གང་ཡང་སྤེལ་མི་ཆོག་པའི་བཀའ་ཁྱབ་བསྒྲགས་ཡོད་འདུག

ཁེ་ན་ཌའི་ཕྱི་སྲིད་ལྷན་ཁང་གི་བསྒྲགས་གཏམ་ནང་། ཁེ་ན་ཌའི་ངོས་ནས་འཛམ་གླིང་ཡོངས་སུ་འགྲོ་བ་མིའི་ཐོབ་ཐང་རྡོག་རོལ་གཏོང་བའི་བྱ་སྤྱོད་ལ་མུ་མཐུད་དུ་སྐྱོན་བརྗོད་བྱ་རྒྱུ་ཡིན་ཞིང་། ཕྱི་ལོ་ ༢༠༡༧ ནས་བཟུང་རྒྱ་ནག་གིས་ཤར་ཊུར་ཀི་སི་ཐན་ནང་གི་མི་གྲངས་ས་ཡ་གཅིག་ལྷག་བཙན་གྱིས་འཛིན་བཟུང་དང་། དེའི་ཁྲོད་ཀྱི་མི་མང་པོ་ཞིག་སེམས་ཁམས་ཀྱི་དཀའ་ངལ་དང་། བཙན་གཡེམ། དེ་བཞིན་ལུས་པོར་རྡུང་རྡེག་གཏོང་བ་སོགས་དྲག་གནོན་ཤུགས་ཆེན་བྱས་ཡོད་པའི་གནས་སྟངས་མང་པོ་ཐོན་ཡོད་པ་ནན་བརྗོད་དང་། རྒྱ་ནག་གིས་བོད་ནང་གི་བོད་མི་རྣམས་བཙན་གྱིས་ངལ་རྩོལ་ལས་ལ་བཅུག་པ་དང་། ཁྲིམས་འགལ་གྱིས་གང་བྱུང་འཛིན་བཟུང་བཀག་ཉར། དེ་བཞིན་འགྲོ་བ་མིའི་ཐོབ་ཐང་དང་། ཆོས་དད་རང་དབང་། འགྲོ་སྐྱོད་རང་དབང་སོགས་ལ་དམ་དྲག་ཤུགས་ཆེན་བྱས་དང་བྱེད་མུས་ཡིན་པ་ཐེར་འདོན་བྱས་འདུག་ལ། ཕྱི་ལོ་ ༡༩༩༩ ནས་བཟུང་རྒྱ་ནག་གིས་ཆོས་འཁོར་རྩ་རླུང་སྒོམ་སྒྲུབ་པ་རྣམས་རྩ་མེད་གཏོང་སླད། ཆོས་འཁོར་རྩ་རླུང་སྒོམ་སྒྲུབ་ཉམས་ལེན་བྱེད་མཁན་རྣམས་བཙན་གྱིས་འཛིན་བཟུང་དང་། ངལ་རྩོལ་ལས་ལ་བཀོལ་བ། དེ་བཞིན་སྡུག་སྦྱོང་མནར་གཅོད་བཏང་ཡོད་སྐོར་སོགས་གསལ་འདུག

ཁེ་ན་ཌས་ཉེས་ཆད་བཅད་པའི་རྒྱ་ནག་གི་ཆེས་མཐོའི་དཔོན་རིགས་ཟུར་པ་དང་ལས་ཐོག་ཁག་བརྒྱད་ནི། དེ་སྔའི་ཤར་ཊུར་ཀི་སི་ཐན་ནམ་ཤིན་ཅང་རང་སྐྱོང་ཁུལ་ཟེར་བ་དང་བོད་རང་སྐྱོང་ལྗོངས་ཟེར་བའི་དམར་ཤོག་ཚོགས་པའི་དྲུང་ཆེ་ཁྲིན་ཆོན་གོ་ (Chen Quanguo) དང་། ཤིན་ཅང་རང་སྐྱོང་ཁུལ་ཟེར་བའི་དམར་ཤོག་དྲུང་ཆེ་གཞོན་པ་ཨར་ཀིན་ (Erkin Tuniyaz)། རྒྱལ་ཡོངས་མི་དམངས་འཐུས་མི་ཚོགས་ཆེན་གྱི་རྒྱུན་ལས་ཀྱི་མགོ་ཁྲིད་གཞོན་པ་ཛཱ་ཀེར་ (Shohrat Zakir)། ཡུ་གུར་རང་སྐྱོང་ཁུལ་ཟེར་བའི་མི་དམངས་སྲིད་གྲོས་ཀྱི་འགན་འཛིན་གཞོན་པ་ཧྥང་ཅ་རུ་ཡི་ (Peng Jiarui)། བོད་རང་སྐྱོང་ལྗོངས་དམར་ཤོག་ཚོགས་པའི་དྲུང་ཆེ་ཟུར་པ་ཝུ་ཡེན་ཅེ་ (Wu Yingjie)།  ཤིན་ཅང་རང་སྐྱོང་ཁུལ་ཟེར་བའི་སྤྱི་བདེ་ལས་ཁུངས་ཀྱི་དྲུང་ཆེ་ཟུར་པ་ཧོ་ལིའུ་ཅུན་ (Ho Liujun)། བོད་རང་སྐྱོང་ལྗོངས་མི་དམངས་སྲིད་གཞུང་ཟེར་བའི་མགོ་ཁྲིད་གཞོན་པ་དང་སྤྱི་བདེ་ལས་ཁུངས་ཀྱི་འགན་འཛིན་ཀྲང་ཧོང་པའོ་ (Zhang Hongbo)། རྒྱ་ནག་ལྷོ་ཤར་ཧྥུ་ཅན་ (Fujian) ཞིང་ཆེན་གྱི་དམར་ཤོག་དྲུང་ཆེ་ཟུར་པ་དང་འཐབ་ཕྱོགས་གཅིག་གྱུར་ཁང་གི་འགན་འཛིན་ཟུར་པ་ཡུ་ཆན་ (You Quan) བཅས་ཡིན་འདུག

གནད་དོན་དེའི་ཐད་ཁེ་ན་ཌའི་ཕྱི་སྲིད་བློན་ཆེན་མེ་ལི་ནི་ཇའོ་ལི་ (Mélanie Joly) ལགས་ཀྱིས། ཁེ་ན་ཌ་གཞུང་ནས་རྒྱ་ནག་གིས་བོད་དང་ཤར་ཊུར་ཀི་སི་ཐན་ནང་དུ་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་བཞིན་པའི་བྱ་སྤྱོད་དང་། ཆོས་འཁོར་རྩ་རླུང་སྒོམ་སྒྲུབ་ (Falun Gong) ཉམས་ལེན་པ་རྣམས་ལ་ལག་བསྟར་བྱས་པའི་རྡུང་རྡེག་གི་ལས་འགུལ་ལ་སེམས་འཚབ་ཆེན་པོ་བྱེད་ཀྱི་ཡོད། རྒྱ་གཞུང་གིས་གཞི་རྒྱ་ཆེ་བའི་དྲག་གནོན་གྱི་ལས་འགུལ་དེ་དག་མཚམས་འཇོག་དང་། རྒྱལ་སྤྱིའི་འགྲོ་བ་མིའི་ཐོབ་ཐང་གི་གནས་བབ་ལ་བརྩི་འཇོག་བྱེད་དགོས་པའི་འབོད་སྐུལ་ཞུ་ཡི་ཡོད། ཅེས་བརྗོད་འདུག

འདི་ལོའི་ཕྱི་ཟླ་ ༧ པའི་ནང་ཁེ་ན་ཌའི་ཕྱི་སྲིད་བློན་ཆེན་མི་ལི་ནི་ཇའོ་ལི་ལགས་རྒྱ་ནག་ཏུ་གཞུང་འབྲེལ་སྐོར་སྐྱོད་དུ་ཕྱིན་ཏེ། རྒྱ་ནག་གི་ཕྱི་སྲིད་བློན་ཆེན་ཝང་ཡི་དང་ཐུག་འཕྲད་ཀྱིས། ཁེ་ན་ཌ་དང་རྒྱ་ནག་གི་འབྲེལ་ལམ་ཡར་རྒྱས་གཏོང་ཕྱོགས་དང་། འགྲོ་བ་མིའི་ཐོབ་ཐང་གི་གནས་སྟངས། དེ་བཞིན་དཀའ་རྙོག་ཆེ་བའི་འཛམ་གླིང་གི་ས་ཁུལ་འདྲ་མིན་གྱི་བདེ་འཇགས་གནད་དོན་ཐོག་གླེང་སློང་བྱས་ཡོད་འདུག ཕྱི་ལོ་ ༢༠༢༡ ཟླ་ ༣ པའི་ནང་ཁེ་ན་ཌའི་གཞུང་གིས་རྒྱ་ནག་མི་དམངས་སྤྱི་མཐུན་རྒྱལ་ཁབ་དང་འབྲེལ་ནས་དམིགས་བསལ་དཔལ་འབྱོར་གྱི་ཐབས་ལམ་ཁག་ལ་སྟངས་འཛིན་བྱེད་པའི་སྒྲིག་གཞི་ (Special Economic Measures (People’s Republic of China) Regulations) ཞེས་པ་ཞིག་ཁྲིམས་སུ་གཏན་འབེབས་གནང་སྟེ། རྒྱ་ནག་གཞུང་གི་དཔོན་རིགས་ཚོ་དང་གཞུང་འབྲེལ་ཚོགས་སྡེ་ཁག་གིས། ཡུལ་དེའི་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་བཏང་དང་གཏོང་བཞིན་པ་མཚམས་འཇོག་ཡོང་སླད་ཉེས་ཆད་གཅོད་ཀྱི་ཡོད་འདུག་ལ། སྒྲིག་གཞི་དེ་ལག་བསྟར་འོག ཕྱི་ལོ་ ༢༠༢༡ ལོར་ཁེ་ན་ཌའི་གཞུང་གིས་རྒྱ་ནག་གི་དཔོན་རིགས་བཞིས་ཤིན་ཅང་རང་སྐྱོང་ཁུལ་ཟེར་བའི་ནང་འགྲོ་བ་མིའི་ཐོབ་ཐང་རྩིས་མེད་རྡོག་རོལ་བཏང་བའི་ཉེས་ཆད་འོག དཔོན་རིགས་དེ་དག་ཁེ་ན་ཌའི་ནང་ཡོང་བར་བཀག་སྡོམ་དང་། དེ་དག་གི་རྒྱུ་དངོས་ཆ་ཚང་གཞུང་བཞེས་དང་ཁེ་ན་ཌའི་གཞུང་མང་དང་ཚོགས་པ་སུ་རུང་གིས་རྒྱ་ནག་གི་དཔོན་རིགས་དེ་དག་དང་དཔལ་འབྱོར་གྱི་འབྲེལ་ལམ་བྱས་མི་ཆོག་པའི་གསལ་བསྒྲགས་སྤེལ་ཡོད་འདུག

སྤྱིར་ཁེ་ན་ཌ་དང་རྒྱ་ནག་བར་ཕྱི་སྲིད་འབྲེལ་ལམ་གྱི་ཐོག་ནས་གདོང་ཐུག་མང་དག་ཅིག་བྱུང་བ་དང་། ཕྱི་ལོ་ ༢༠༡༨ ལོར་ཁེ་ན་ཌས་རྒྱ་ནག་གི་འཕྲུལ་རིགས་ཚན་རྩལ་བཟོ་ཚོང་ཁང་ཆེ་ཤོས་ཧྭ་ཝེ་ (Huawei) ཡི་ནོར་དོན་སྤྱི་གཉེར་བ་མིན་ཝན་ཀྲུའུ་ (Meng Wanzhou) འཛིན་བཟུང་བྱས་པ་དང་། རྒྱ་ནག་གིས་ཁེ་ན་ཌའི་གཞུང་འབྲེལ་མི་སྣ་མའེ་ཁེལ་ (Michael Kovrig) དང་མའེ་ཁེལ་སི་པཱ་ཝོར་ (Michael Spavor) གཉིས་འཛིན་བཟུང་གིས་ཁེ་ན་ཌར་རྒོལ་ལན་བསློགས་ཡོད་ལ། ཕྱི་ལོ་ ༢༠༢༢ ལོར་ཁེ་ན་ཌས་རྒྱ་ནག་ཏུ་འཚོགས་པའི་དགུན་ཁའི་ཨོ་རྩལ་འགྲན་ཚོགས་སྟེང་གཞུང་འབྲེལ་སྐུ་ཚབ་གཅིག་ཀྱང་བཏང་མེད་པ་སོགས་རྒྱལ་ཁབ་གཉིས་བར་ཕྱི་སྲིད་དང་ཚོང་འབྲེལ། འགྲོ་བ་མིའི་ཐོབ་ཐང་གི་མཚོན་པའི་རྒྱལ་སྤྱིའི་ཁྲིམས་སྒྲིག་སོགས་ཀྱི་ཐད་ནས་འགལ་ཟླ་མང་དག་ཅིག་བྱུང་ཡོད་པ་རེད།

གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། སྐལ་བཟང་སྦྱིན་པ།