རྒྱལ་སྤྱིའི་དམ་ཆོས་འདུལ་བའི་བགྲོ་གླེང་ཐེངས་ལྔ་བའི་ཐོག་རྒྱལ་ཁབ་འདྲ་མིན་བཅུ་གསུམ་གྱི་དགེ་འདུན་པ་རྣམས་མཉམ་ཞུགས་གནང་འདུག
ཟླ་འདིའི་ཕྱི་ཚེས་ ༡༦ ནས་ ༡༨ བར་ཉིན་གྲངས་གསུམ་རིང་གནས་མཆོག་རྡོ་རྗེ་གདན་དུ་རྟེན་གཞི་བྱས་པའི་ཐེ་ལན་ཌི་ཝཊ་པ་དགོན་པའི་ཚོགས་ཁང་དུ། སེར་བྱེས་མཁས་སྙན་གྲྭ་ཚང་དང་ཐེ་ལན་ཌི་ཝཊ་པ་དགོན་པ་གཉིས་ཀྱི་གོ་སྒྲིག་འོག རྒྱལ་སྤྱིའི་དམ་ཆོས་འདུལ་བའི་བགྲོ་གླེང་ཐེངས་ལྔ་པ་འཚོགས་ཡོད་ཅིང་། དབུ་འབྱེད་མཛད་སྒོའི་ཐོག་སྐུ་མགྲོན་གཙོ་བོ་སྐྱབས་རྗེ་སེར་བྱེས་མཁན་རིན་པོ་ཆེ་བཀྲ་ཤིས་ཚེ་ཐར་མཆོག་དང་། དམིགས་བསལ་སྐུ་མགྲོན་རྡོར་གདན་བྱང་ཆུབ་མཆོད་རྟེན་ཆེན་མོའི་འཛིན་སྐྱོང་ལྷན་ཚོགས་ཀྱི་དྲུང་ཆེ་མ་ཧཱ་ཤ་ཝ་ཏ་མ་ཧཱ་རཱ་ཏི་ (Dr.Mahashweta Maharati) མཆོག ཐེ་ཝན་དགོན་པའི་མཁན་རིན་པོ་ཆེ་ཀའོ་ཆིན་ཧྲི་ (Ven.Guo Qing Shi) མཆོག ཐའེ་དགོན་པའི་མཁན་རིན་པོ་ཆེ་འབུམ་རམས་པ་དགེ་སློང་བོ་དྷི་ནན་དྷ་མུ་ནི་ (Ven.Dr.Phra Bodhi Nandhamunee) མཆོག བོད་མིའི་སྒྲིག་འཛུགས་ཆོས་རིག་ལས་ཁུངས་ཀྱི་དྲུང་ཆེ་བདུད་འདུལ་རྡོ་རྗེ་མཆོག དེ་བཞིན་བོད་པ་དང་། རྒྱ་གར། བལ་ཡུལ། ཐེ་ལན་ཌི། སིངྒ་ལ། ཐེ་ཝན། ཝི་ཏི་ནམ། ཉི་ཧོང། འབར་མ་སོགས་རྒྱལ་ཁབ་བཅུ་གསུམ་ནས་ཕེབས་པའི་དགེ་འདུན་པ་དང་དད་ལྡན་པ་སོགས་ལྷན་འཛོམས་བྱུང་འདུག
སྐྱབས་རྗེ་སེར་བྱེས་མཁན་རིན་པོ་ཆེ་མཆོག་གིས། ༧གོང་ས་རྒྱལ་བ་རིན་པོ་ཆེ་མཆོག་ནས་ནང་པའི་རྒྱལ་ཁབ་མང་པོ་ཡོད་པའི་ཁྲོད་འདུལ་བ་འཛིན་པའི་སྡེ་བ་མི་འདྲ་བ་རྣམས་མཉམ་འཛོམས་བྱུང་སྟེ་དངོས་ཡོད་ཐོག་ཕན་ཚུན་རྒྱུས་ལོན་བྱེད་ཐུབ་ཚེ་ཡག་པོ་ཡོད་པའི་བཀའ་སློབ་ཡང་ཡང་ཕེབས་པ་ལྟར། སེར་བྱེས་མཁས་སྙན་གྲྭ་ཚང་གིས་ལོ་གཉིས་རེའི་མཚམས་སུ་འདུལ་བ་བགྲོ་གླེང་མགོ་བཙུགས་པ་ཞིག་ཆགས་ཡོད། འདུལ་བའི་ཐོག་བགྲོ་གླེང་གནང་སྟེ་ཤར་ལྷོ་ཨེ་ཤ་ཡའི་ནང་པའི་དགེ་འདུན་པ་རྣམས་ཀྱིས་འདུལ་བའི་ཐོག་དངོས་ཡོད་ཉམས་བཞེས་གནང་བར་རྒྱུས་ལོན་བྱུང་བའི་ཕན་ཐོགས་བྱུང་ཡོད། འདུལ་བའི་ཐོག་གྲངས་མང་ཉུང་མ་གཏོགས་རྩ་བ་གཅིག་གྱུར་ཡིན་པའི་ངེས་པ་རྙེད་དུས་ཕན་ཚུན་གུས་བརྩི་ཡོང་གི་འདུག་ལ། ནང་པའི་དགེ་འདུན་པ་ཡོངས་གཅིག་གྱུར་གྱི་ཐོག་ནས་འཛམ་གླིང་ཐོག་ཞི་བདེ་བསྐྲུན་པ་དང་བཟང་སྤྱོད་སྤེལ་ཐུབ་ཀྱི་ཡོད། སྟོན་པ་བཅོམ་ལྡན་འདས་ཀྱི་རྗེས་འབྲངས་པ་རྣམས་ལ་དམིགས་བསལ་གྱི་ནུས་པ་ཞིག་ཡོད། ཅེས་གསུངས་སོང་།
ཡང་རིན་པོ་ཆེ་མཆོག་གིས། སྔོན་མ་རྒྱལ་ཁབ་སོ་སོའི་ནང་སངས་རྒྱས་བཅོམ་ལྡན་འདས་ཀྱི་གསུང་བའི་སྡེ་སྣོད་གསུམ་ལ་ཐོས་བསམ་སྒོམ་གསུམ་གྱིས་ཉམས་ལེན་བྱེད་བཞིན་ཡོད་ཀྱང་། སྟོན་པའི་བསླབ་བྱ་དང་ལྟ་གྲུབ། ཚུལ་ཁྲིམས་སོགས་སྤུས་དག་ཡོད་པ་དེར། སྡེ་བ་སོ་སོ་དང་། དགོན་པ་སོ་སོ་གཅིག་པོའི་ཉམས་ལེན་བྱ་རྒྱུ་མ་ཡིན་པར་འགྲོ་བ་མི་སྤྱི་ཡོངས་སུ་དངོས་ཡོད་ཀྱི་ཐོག་ནས་ཕན་བདེ་བསྐྲུན་ཐུབ་པའི་ནུས་པ་ཡོད་པ་ཞིག་ཡིན་པས། ང་ཚོ་ཚང་མས་དེའི་ཐོག་ཏུ་ཤུགས་དགོས་ཀྱི་འདུག ཅེས་དང་། བཅོམ་ལྡན་འདས་ཀྱིས་འདུལ་བའི་ཉམས་ལེན་རྣམ་པར་དག་པ་ཡོད་ཚེ་སྟོན་པ་དངོས་ཞལ་བཞུགས་པ་དང་ཁྱད་པར་མེད་པ་ཞིག་ཡིན་གསུངས་བ་བཞིན། ད་ལྟའི་ཆར་བཅོམ་ལྡན་འདས་ཀྱི་ལྟ་གྲུབ་དེ་ཨེ་ཤ་ཡ་ནང་མ་ཟད། ནུབ་ཕྱོགས་རྒྱལ་ཁབ་མང་པོའི་ནང་དོ་སྣང་བྱེད་པ་ཞིག་ཆགས་ཡོད། འཛམ་གླིང་དུ་སངས་རྒྱས་ཀྱི་བསྟན་པ་གནས་མིན་དགེ་འདུན་གྱི་སྡེ་ཚགས་ཚུད་ཡག་པོ་ཡོད་མེད་ལ་རག་ལས་ཡོད་པས། རྒྱལ་ཁབ་སོ་སོས་ཆོས་སྡེ་བཙུགས་ཏེ་དགེ་འདུན་གྱི་སྡེ་སྐྱོང་བཞིན་ཡོད་ཅིང་། ད་དུང་ཡང་མུ་མཐུད་དུ་དགེ་འདུན་གྱི་སྡེ་སྐྱོང་རྒྱུ་གལ་ཆེན་དོན་ཆེན་ཞིག་ཆགས་ཡོད། ཅེས་གསུངས་སོང་།
ཐེ་ཝན་དགོན་པའི་མཁན་རིན་པོ་ཆེ་ཀའོ་ཆིན་ཧྲི་མཆོག་གིས། ཐེངས་འདིའི་བགྲོ་གླེང་ཚོགས་འདུའི་ནང་དམ་ཆོས་འདུལ་བའི་སྐོར་ཆགས་ཡོད་ཅིང་། སངས་རྒྱས་བཅོམ་ལྡན་འདས་ཀྱང་མདོ་སྡེ་དང་འདུལ་བ་གཉིས་ལས་འདུལ་བ་གཙོ་བོ་བཟུང་ཡོད། རབ་བྱུང་བར་དགེ་ཚུལ་དང་། དགེ་སློང་། བྱང་ཆུབ་སེམས་ཀྱི་སྡོམ་པ་གསུངས་ཡོད་ལ། དེའི་དགོས་དམིགས་ནི་སངས་རྒྱས་ཀྱི་བསླབ་པ་ཚུལ་བཞིན་སྲུང་བའི་ཉམས་ལེན་ཆེད་རེད། ད་ལན་ང་ཚོ་སྡེ་བ་མི་འདྲ་བ་རྣམས་འཛོམས་ཏེ་ཕན་ཚུན་ལ་བློ་བསྐྱེད་ལེན་པའི་གོ་སྐབས་རྩ་ཆེན་ཞིག་ལ་བརྩི་བཞིན་ཡོད། ཐེངས་འདིའི་འདུལ་བའི་བགྲོ་གླེང་བརྒྱུད་ནས་འཛམ་གླིང་དུ་ཞི་བདེ་འབྱུང་བ་མ་ཟད། འདུལ་བའི་བསྟན་པ་སྔར་ལས་དར་ཞིང་རྒྱས་པའི་སྨོན་འདུན་ཞུ། ཞེས་གསུངས་སོང་།
ཆོས་རིག་དྲུང་ཆེ་བདུད་འདུལ་རྡོ་རྗེ་ལགས་ཀྱིས། འདས་པའི་བྱུང་རབས་ཀྱི་ལོ་རྒྱུས་དང་ད་ལྟའི་གནས་སྟངས་སོགས་གང་ཅིའི་ཐད་ནས་བོད་ལ་མཚོན་ན་འདུལ་བ་འཛིན་པའི་དགེ་འདུན་པའི་སྡེ་ནི་མེད་དུ་མི་རུང་བའི་གནད་ཆེན་པོ་ཞིག་ཏུ་གྱུར་ཡོད། ཅེས་དང་། ལོ་རྒྱུས་ཐོག་དུས་ཡུན་ཐུང་ངུའི་ནང་བོད་ལ་བཤད་སྒྲུབ་གཉིས་ཐད་ཀྱི་བསྟན་པ་འཕེལ་རྒྱས་ཆེན་པོ་བྱུང་ཡོད། ད་ལྟ་བར་དུ་བོད་ཀྱི་ཆོས་དང་རིག་གནས་ཡོངས་རྫོགས་དགོན་པའི་སྒྲིག་འཛུགས་ལ་བརྟེན་ནས་བྱུང་བ་ཞིག་ཡིན་པ་མ་ཟད། མ་འོངས་བའང་མདོ་སྔགས་ཀྱི་གནས་འཚང་ལ་མ་ནོར་བའི་བོད་བརྒྱུད་བཤད་སྒྲུབ་ཟུང་དུ་འབྲེལ་བའི་བསྟན་པ་རིན་པོ་ཆེ་འདི་ཉིད་དང་། བསྟན་པ་འདི་ཉིད་བརྒྱུད་ལམ་གཙོ་བོ་གྱུར་བའི་བོད་ཀྱི་སྐད་ཡིག་དང་། རིག་གནས་མ་ལག་དང་བཅས་པ་སྤུས་གཙང་ཚད་ལྡན་ཞིག་རྒྱུད་འཛིན་དར་སྤེལ་ཐུབ་མིན་ཡང་བོད་ཀྱི་དགེ་འདུན་པའི་སྡེ་ལ་རག་ལས་ཡོད་པར་བརྟེན། བོད་ཀྱི་འདུལ་བ་འཛིན་པའི་དགེ་འདུན་པ་རྣམས་ཀྱིས་ནང་པའི་ཆོས་ལུགས་ཀྱི་གནད་དོན་ཙམ་མ་ཟད། བོད་མི་རིགས་དང་སྐད་ཡིག རིག་གཞུང་བཅས་པའི་སྲོག་རྩ་ལྟ་བུ་གྱུར་ཡོད། ཅེས་བརྗོད་སོང་།
ཐེངས་འདིའི་རྒྱལ་སྤྱིའི་དམ་ཆོས་འདུལ་བའི་བགྲོ་གླེང་ཐོག་རྒྱ་གར་དང་། ཤྲཱི་ལངྒ། འབྲུག བལ་ཡུལ། ཐེ་ལན་ཌི། འབར་མ། ཝི་ཏི་ནམ། ལའོ་སི། ཉི་ཧོང་། ཀོ་རི་ཡ། ཐའེ་ཝན་བཅས་ཀྱི་འདུལ་བ་འཛིན་པའི་དགེ་འདུན་པ། དེ་བཞིན་བོད་ཀྱི་ཆོས་བརྒྱུད་རིས་མེད་ཀྱི་འདུལ་བ་འཛིན་པའི་དགེ་འདུན་པ་རྣམས་ཀྱིས་སྤང་ལྷུང་སུམ་ཅུ་དང་། དེ་དང་འབྲེལ་བའི་དགོན་སྡེ་རང་རང་གི་ཕྱག་བཞེས་ཇི་ཡོད་ཀྱི་བརྗོད་གཞིའི་ཐོག་བགྲོ་གླེང་གནང་ཡོད་ཅིང་། བགྲོ་གླེང་གི་སྐབས་སུ་བོད་རྒྱ་དབྱིན་གསུམ་གྱི་ཐོག་སྐད་བསྒྱུར་གནང་ཡོད་འདུག
རྒྱལ་སྤྱིའི་དམ་ཆོས་འདུལ་བའི་བགྲོ་གླེང་ནི་༧གོང་ས་རྒྱལ་བ་རིན་པོ་ཆེ་མཆོག་གི་བཀའ་དགོངས་བཞིན། ཕྱི་ལོ་ ༢༠༡༤ ཟླ་ ༡༢ ཚེས་ ༩ ནས་ཉིན་གྲངས་གཉིས་རིང་སེར་བྱེས་གྲྭ་ཚང་དུ་རྒྱལ་སྤྱིའི་འདུལ་བའི་བགྲོ་གླེང་དང་པོ་དབུ་འཛུགས་གནང་ཡོད་ཅིང་། ཕྱི་ལོ་ ༢༠༡༧ ཟླ་ ༧ ནང་རྒྱལ་སྤྱིའི་བགྲོ་གླེང་ཐེངས་གཉིས་པ་འཚོགས། ཕྱི་ལོ་ ༢༠༡༧ ཟླ་ ༡༢ ཚེས་ ༡༦ ནས་ཉིན་གསུམ་རིང་སེར་བྱེས་བཀྲ་ཤིས་ཆོས་གླིང་ཚོགས་ཁང་དུ་རྒྱལ་སྤྱིའི་འདུལ་བའི་བགྲོ་གླེང་ཐེངས་གསུམ་པ་འཚོགས། དེ་བཞིན་ཕྱི་ལོ་ ༢༠༢༢ ཟླ་ ༡༢ ཚེས་ ༡ ནས་ཉིན་གྲངས་གསུམ་རིང་སེར་བྱེས་མཁས་སྙན་གྲྭ་ཚང་དུ་རྒྱལ་སྤྱིའི་འདུལ་བའི་བགྲོ་གླེང་ཐེངས་བཞི་པ་འཚོགས་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
