༧གོང་ས་རྒྱལ་བ་རིན་པོ་ཆེ་མཆོག་ནས་རྒྱ་གར་གྱི་སྲིད་བློན་ཟུར་བ་སྐུ་ཞབས་མན་མོ་ཧན་སིང་མཆོག་ནི་མགོན་པོ་གང་གི་གཅེན་པོ་ཞིག་ཏུ་ངོས་འཛིན་གནང་གི་ཡོད་སྐོར་སོགས་གསུངས་འདུག
His Holiness the Dalai Lama and Former Prime Minister Manmohan Singh in New Delhi, India on November 10, 2018. Photo by Tenzin Choejor
ཁ་སང་ཕྱི་ཚེས་ ༢༦ ཉིན་རྒྱ་གར་གྱི་སྲིད་བློན་ཟུར་བ་སྐུ་ཞབས་མན་མོ་ཧན་སིང་མཆོག་དགུང་ལོ་ ༩༢ སྟེང་རྒྱ་གར་རྒྱལ་ས་ལྡི་ལི་རུ་འདས་གྲོངས་སུ་གྱུར་ཡོད་པ་ལྟར། དེ་རིང་༧གོང་ས་རྒྱལ་བ་རིན་པོ་ཆེ་མཆོག་ནས་ཞིང་གཤེགས་དམ་པ་ཁོང་གི་སྐུ་ཟླ་གྷི་ཤ་རན་(Gursharan Kaur) ལགས་ཀྱི་མཚན་ཐོག་ཏུ་ཐུགས་གསོའི་གསུང་འཕྲིན་ཞིག་སྩལ་ཏེ། དམ་པ་ཁོང་ལ་ཐུགས་སྨོན་སྐྱབས་འཇུག་དང་ཤུལ་ལུས་ནང་མི་རྣམས་ལ་ཐུགས་གསོ་མཛད་འདུག
༧གོང་ས་རྒྱལ་བ་རིན་པ་ཆེ་མཆོག་གི་གསུང་འཕྲིན་ནང་། ངོས་རང་གིས་ཁྱེད་ཉིད་ལ་སྐྱབས་འཇུག་ཞུ་མུས་ཡིན་ལ། ཁོང་དང་ཁོང་གི་ཤུལ་ལུས་ནང་མི་རྣམས་ཆེས་ཡིད་སེམས་སྨྲེང་བའི་དུས་སྐབས་འདིར་ཐུགས་གསོ་ཞུ་ཡི་ཡོད། ངོས་རང་ཁོང་དང་ནམ་མཇལ་ལ། ངོས་ནས་ཁོང་གི་འགན་ཁུར་དང་ཆེས་བཟང་པའི་སློབ་སྟོན་ལ་ཡིད་སྨོན་སྐྱེས་ཏེ། ཁོང་ཉིད་ནི་ངོས་རང་གི་གཅེན་པོར་ངོས་འཛིན་གནང་གི་ཡོད། ཁྱེད་ཀྱི་སྐུ་ཟླར་གཞན་ལ་ཕན་འདོགས་པའི་སེམས་འདུན་ཤུགས་ཆེན་མཆིས་ཤིང་། ཁོང་གིས་རྒྱ་གར་གྱི་དཔལ་འབྱོར་འཕེལ་རྒྱས་གཙོ་བོར་གྱུར་བའི་རྒྱལ་ཁབ་དར་རྒྱས་སུ་གཏོང་བ་དང་། རྒྱ་གར་མི་དམངས་ཀྱི་འཚོ་བའི་གནས་སྟངས་ཡར་རྒྱས་གཏོང་བར་མཛད་རྗེས་རླབས་ཆེན་བཞག་ཡོད་ལ། ཁོང་ནི་བོད་མི་རྣམས་ལ་ཐུགས་བརྩེ་ཟབ། ཁོང་གིས་ལོ་ངོ་ ༩༢ རིང་ལ་ང་ཚོས་ཡིད་སྨོན་སྐྱེས་དགོས་པའི་དོན་སྙིང་ལྡན་པའི་ལས་དོན་གཉེར་བ་ནི་ཡིད་སྨོན་སྐྱེས་འོས་པ་ཞིག་རེད། ཅེས་གསུངས་འདུག
རྒྱ་གར་གྱི་སྲིད་བློན་མུ་དྷི་མཆོག་གི་སྐུ་སྒེར་གྱི་ཨེག་དྲ་ལམ་སྟེང་། རྒྱ་གར་གྱི་དབུ་ཁྲིད་གཟེངས་སུ་ཐོན་པ་མན་མོ་ཧན་སིང་མཆོག་དགོངས་པ་རྫོགས་པར་མྱ་ངན་ཞུ་རྒྱུ་ཡིན། ཁོང་ནི་འཚོ་བ་ཧ་ཅང་སྐྱོ་བོའི་ཁྱིམ་ཚང་ནས་ཡིན་པ་དང་། རྗེས་སུ་དཔལ་འབྱོར་རིག་པ་བ་སྙན་གྲགས་ཅན་ཞིག་ཏུ་གྱུར་ཡོད། ཁོང་གིས་དཔལ་འབྱོར་བློན་ཆེན་སོགས་གཞུང་གི་གོ་གནས་འདྲ་མིན་ཐོག་ཕྱག་ལས་གནང་ཡོད་པ་དང་། ལོ་མང་རིང་ང་ཚོའི་དཔལ་འབྱོར་སྲིད་ཇུས་ཐོག་ཤུགས་རྐྱེན་ཆེན་པོ་བཞག་ཡོད། ཁོང་གིས་གྲོས་ཚོགས་ནང་གཏམ་བཤད་གནང་བ་དེ་ཡང་གནད་དུ་འཁེལ་བ་ཞིག་ཡིན་ལ། ང་ཚོའི་སྲིད་བློན་གྱི་ཐུགས་འགན་བཞེས་པའི་སྐབས་སུའང་མི་མང་གི་འཚོ་བའི་གནས་སྟངས་ཡར་རྒྱས་གཏོང་ཆེད་འབད་བརྩོན་ཆེན་པོ་གནང་ཡོད། ཅེས་གསུངས་འདུག་ལ། དེ་བཞིན་རྒྱ་གར་ཧི་མ་ཅལ་མངའ་སྡེ་གཞུང་གིས་ལས་ཁུངས་དང་སློབ་གྲྭ་སོགས་ཉིན་གྲངས་གཉིས་རིང་གུང་སེང་བཞག་ནས། ཁོང་ལ་མྱ་ངན་དང་ཤུལ་ལུས་ནང་མི་རྣམས་ལ་གདུང་སེམས་མཉམ་སྐྱེད་ཞུ་མུས་ཡིན་འདུག
རྒྱ་གར་གྱི་སྲིད་བློན་ཟུར་བ་སྐུ་ཞབས་མོ་ཧན་སིང་མཆོག་ནི་ཕྱི་ལོ་ ༡༩༣༢ ལོའི་ཟླ་ ༡༢ ཚེས་ ༢༤ ཉིན་རྒྱ་གར་པན་ཇབ་མངའ་སྡེའི་ཁོངས་སུ་སྐྱེས། ཁོང་གིས་རྒྱ་གར་པན་ཇབ་གཙུག་ལག་སློབ་གཉེར་ཁང་ནས་ཚོང་རིག་ཐོག་རིག་གནས་རབ་འབྱམས་པ་དང་གཙུག་ལག་རབ་འབྱམས་པའི་སློབ་གཉེར་གནང་རྗེས། དབྱིན་ཡུལ་གྱི་ཁེམ་བྷི་རེ་ཇུ་(University of Cambridge) གཙུག་ལག་སློབ་གཉེར་ཁང་དུ་ཚོང་རིག་ཐོག་སློབ་སྦྱོང་གནང་། དེ་ནས་རྒྱ་གར་ལ་ཕྱིར་ལོག་ཕེབས་ནས་ཕྱི་ལོ་ ༡༩༦༣ ནས་ ༡༩༦༥ བར་པན་ཇབ་གཙུག་ལག་སློབ་གཉེར་ཁང་གི་ཚོང་རིག་སློབ་དཔོན་གནང་། ཕྱི་ལོ་ ༡༩༦༦ ནས་ ༡༩༩༩ བར་མཉམ་འབྲེལ་རྒྱལ་ཚོགས་ཀྱི་ཚོང་དོན་ཡར་སྐྱེད་ཚན་པར་ཕྱག་ལས་གནང་རྗེས། རྒྱ་གར་གྱི་ཕྱི་སྲིད་ཚོང་དོན་བློན་ཆེན་ལས་ཁུངས་ཀྱི་སློབ་སྟོན་པ་དང་། རྒྱ་གར་གྱི་ཕྱི་སྲིད་བློན་ཆེན་སོགས་གནང་། ཕྱི་ལོ་ ༢༠༠༤ ལོར་འོས་བསྡུའི་ལམ་ནས་རྒྱ་གར་གྱི་སྲིད་བློན་ཐེངས་བཅུ་གསུམ་པར་འདེམས་ཏེ་ཐེངས་གཉིས་ལ་རྒྱ་གར་གྱི་སྲིད་བློན་གནང་།
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
