སྲིད་སྐྱོང་སྤེན་པ་ཚེ་རིང་མཆོག་གིས་རྒྱ་ནག་གཞུང་གི་བསྐྱར་གསོའི་ལས་གཞིའི་ཁྲོད་བོད་མིའི་སྲོལ་རྒྱུན་གྱི་དགོས་མཁོ་དང་། གཞི་རྩའི་འགྲོ་བ་མིའི་ཐོབ་ཐང་ལ་བསམ་ཞིབ་དགོས་པའི་འབོད་སྐུལ་གནང་འདུག
ཁ་སང་ཕྱི་ཚེས་ ༡༢ ཉིན་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་བོད་དིང་རིར་ས་ཡོམ་གྱི་གོད་ཆག་ཆེན་པོ་བྱུང་བ་དང་འབྲེལ་བའི་གསར་འགོད་གསལ་བསྒྲགས་ཤིག་གནང་སྟེ། དུས་སྐབས་འདིར་བོད་ཕྱི་ནང་གཉིས་ཀྱི་བོད་མིའི་མཐུན་སྒྲིལ་གྱི་ནུས་པ་མངོན་ཐུབ་པ་དང་། ས་མཚམས་ལས་བརྒལ་བའི་ལས་འགུལ་མང་པོ་ཞིག་སྤེལ་ཐུབ་ཡོད། བཙན་བྱོལ་བོད་མིའི་སྤྱི་ཚོགས་ནང་སྨོན་ལམ་གསོག་སྒྲུབ་བྱས་པ་མ་ཟད། བོད་ནང་གི་བོད་རིགས་སྤུན་ཟླ་ཚོས་གནོད་སྐྱོན་ཐེབས་པའི་ཁྱིམ་ཚང་རྣམས་ལ་མྱུར་སྐྱོབ་རོགས་དངུལ་དང་། མཁོ་ཆས་བགོ་འགྲེམས་ཀྱི་ལས་གཞི་སྤེལ་བཞིན་ཡོད། འགྲོ་བ་མིའི་དོན་སྙིང་དང་ལྡན་པའི་རོགས་རག་བྱེད་པ་འདིས་བོད་མི་རིགས་ཀྱི་སྙིང་སྟོབས་དང་། བོད་མིའི་མཐུན་སྒྲིལ། དེ་བཞིན་དཀའ་ཚེགས་ཆེ་བའི་དུས་སྐབས་སུ་སྡུག་བསྔལ་སེལ་ཐབས་བྱ་རྒྱུའི་ཆོད་སེམས་བརྟན་པོ་ཡོད་པ་མཚོན་ཐུབ་ཀྱི་ཡོད།
རྒྱ་གར་ལྷོ་ཕྱོགས་སུ་རྟེན་གཞི་བྱས་པའི་བྱེས་ཀྱི་གདན་ས་ཆེན་མོ་བཀྲ་ཤིས་ལྷུན་པོ་དགོན་དུ་༧གོང་ས་རྒྱལ་བ་རིན་པོ་ཆེ་མཆོག་དབུ་བཞུགས་ཐོག བོད་ནང་ས་ཡོམ་བརྒྱབ་སྟེ་མི་རྒྱུ་གཉིས་ལ་གོད་ཆག་ཆེན་པོ་བྱུང་བར་མཆོད་འབུལ་སྨོན་ལམ་འཚོགས་གནང་ཡོད་ཅིང་། སྐབས་དེར་བོད་མི་སྟོང་ཕྲག་མང་པོས་མཉམ་ཞུགས་བྱས་ཡོད། བཀྲ་ཤིས་ལྷུན་པོ་དགོན་པ་ནི་བོད་གཞིས་ཀ་རྩེ་དང་། ༧པཎ་ཆེན་རིན་པོ་ཆེའི་གདན་ས་དང་འབྲེལ་བ་ཡོད་པས་གལ་འགངས་ཆེན་པོ་ཆགས་ཀྱི་ཡོད། ཕྱི་ལོ་ ༡༩༩༥ ལོར་རྒྱ་ནག་གཞུང་གིས་༧པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་འཛིན་བཟུང་བཙན་ཁྲིད་བྱས་པ་ནས་བཟུང་ད་བར་གར་སོང་ཆ་མེད་དུ་གྱུར་ཡོད་པ་དང་། དཀའ་ཚེགས་ཆེ་བའི་དུས་སྐབས་འདིར་བོད་མི་རྣམས་ལ་ཁོང་གི་ཞལ་མཇལ་ཐུབ་ཚེ་སེམས་གསོ་དང་རེ་བ་ཆེན་པོ་སྦྱིན་ཐུབ་རྒྱུ་རེད། དེ་མཚུངས་བོད་མིའི་སྒྲིག་འཛུགས་ཀྱི་ངོས་ནས་དྷ་རམ་ས་ལར་མཆོད་འབུལ་སྨོན་ལམ་གོ་སྒྲིག་བྱེད་ཡོད་པ་དེས། ས་ཡོམ་གྱི་གོད་ཆག་ལ་ང་ཚོས་གཅིག་གྱུར་གྱི་ཡ་ལན་ཞིག་ཀྱང་སྤྲོད་ཀྱི་ཡོད་པ་མཚོན་ཐུབ་ཅེས་གསུངས་འདུག
རྒྱ་གཞུང་གིས་གནོད་ཐེབས་ས་ཁུལ་དུ་འགྲོ་བར་དམ་དྲག་ཤུགས་ཆེན་བྱེད་བཞིན་པ་དང་འབྲེལ་ནས་གསལ་བསྒྲགས་ནང་། རྒྱ་ནག་གཞུང་གིས་ས་ཡོམ་གྱིས་གནོད་སྐྱོན་ཐེབས་པའི་ས་ཁུལ་དེ་དག་ཏུ་དམ་དྲག་ནན་པོ་བྱས་དང་བྱེད་མུས་ཡིན་པ་དེས་རྐྱེན་འདས་སུ་ཕྱིན་པའི་མིའི་གྲངས་འབོར་དང་། མྱུར་སྐྱོབ་ཀྱི་ལས་གཞི་འདང་ངེས་ཡོད་མེད་ཞིབ་འཇུག་བྱ་རྒྱུར་དཀའ་ངལ་ཆེན་པོ་འཕྲད་བཞིན་ཡོད། དེར་བརྟེན། རྒྱ་ནག་གིས་རྒྱལ་སྤྱིའི་རོགས་སྐྱོར་ཚན་པའི་ཚོགས་པ་ཁག་དང་། གསར་འགོད་པ་རྣམས་ལ་དམ་དྲག་མེད་པར་འགྲོ་སྐྱོད་ཆོག་པའི་ཆོག་མཆན་སྤྲད་དེ་ཕྱི་གསལ་ནང་གསལ་ཡོད་པ་ངེས་པར་དུ་བཟོ་དགོས་ལ། དེས་མྱུར་སྐྱོབ་ཀྱི་ལས་འགུལ་སྤེལ་རྒྱུ་དང་གནས་སྟངས་ལ་ལྟ་རྟོག་བྱ་རྒྱུར་གལ་ཆེན་པོ་ཆགས་ཀྱི་ཡོད། ང་ཚོས་རྒྱ་གཞུང་ལ་བསྐྱར་གསོའི་ལས་གཞིའི་ནང་བོད་མིའི་སྲོལ་རྒྱུན་གྱི་དགོས་མཁོ་དང་། གཞི་རྩའི་འགྲོ་བ་མིའི་ཐོབ་ཐང་ལ་བསམ་ཞིབ་བྱེད་དེ་འོས་ཤིང་འཚམ་པའི་རོགས་རམ་དང་མཐུན་རྐྱེན་སྦྱོར་དགོས་པའི་འབོད་སྐུལ་ཞུ་རྒྱུ་ཡིན། འབྱུང་འགྱུར་རང་བྱུང་རྐྱེན་ངན་འགོག་ཐབས་སུ་གྲ་སྒྲིག་བྱ་དགོས་པའི་ནན་སྐུལ་ཞུ་རྒྱུ་ཡིན།
བོད་མིའི་སྒྲིག་འཛུགས་ནས་རྒྱལ་སྤྱིའི་ཚོགས་སྡེ་ཁག་དང་། གཞུང་། གྲོས་ཚོགས། དེ་བཞིན་དཔོན་རིགས་ཁག་དང་། མི་སྒེར་སོགས་ཀྱིས་བོད་ནང་ས་ཡོམ་གྱི་གོད་ཆག་བྱུང་བར་སེམས་འཚབ་དང་། ངལ་སེལ་རོགས་སྐྱོར་གནང་བར་ཐུགས་རྗེ་ཆེ་ཞུ་རྒྱུ་དང་། རྒྱལ་སྤྱིའི་གསར་འགྱུར་བརྒྱུད་ལམ་ཁག་གིས་བོད་ནང་གི་ས་ཡོམ་དང་འབྲེལ་བའི་གནས་ཚུལ་བཀོད་པར་དམ་དྲག་ཤུགས་ཆེན་ཡོད་ཀྱང་། དེ་འབྲེལ་གནས་ཚུལ་ཕྱིར་བསྒྲགས་བྱས་པར་ཡི་རངས་བསྔགས་བརྗོད་བྱ་རྒྱུ་ཡིན། གོ་ལ་ཡོངས་ཀྱི་གདུང་སེམས་མཉམ་སྐྱེད་དང་། གསར་འགྱུར་བརྒྱུད་ལམ་ཁག་གིས་གནས་ཚུལ་ཁྱབ་སྤེལ་བྱས་པར་བརྟེན། བོད་ནང་གི་ད་ལྟའི་ཛ་དྲག་གི་གནས་སྟངས་ཐེར་འདོན་དང་གདོང་ལེན་བྱ་རྒྱུར་ཕན་ནུས་ཆེན་པོ་ཡོད་པ་རེད། ཅེས་གསུངས་བ་དང་འབྲེལ། རྒྱལ་སྤྱིའི་གསར་འགྱུར་བརྒྱུད་ལམ་དང་གཞུང་འབྲེལ་གསལ་བསྒྲགས་ཁག་ཅིག་གི་ནང་རྒྱ་ནག་གིས་དྲིལ་བསྒྲགས་བྱེད་བཞིན་པའི་ཐ་སྙད་བེད་སྤྱོད་བྱེད་པར་སེམས་འཚབ་ཡོད། དེ་ཡང་། བོད་ཅེས་པའི་ཚབ་ཏུ་ཞིས་ཙང་ཟེར་བའི་ཐ་སྙད་བཀོལ་སྤྱོད་བྱས་པ་ནི་བོད་ཀྱི་རིག་གཞུང་དང་ངོ་བོ་རྩ་མེད་བཟོ་ཐབས་དང་། རྒྱ་ནག་གི་དྲིལ་བསྒྲགས་ལ་གནས་ཚུལ་རྫུན་གཏམ་ཁྱབ་སྤེལ་བྱེད་པའི་ལག་ཆ་ཞིག་ཀྱང་རེད། དེར་བརྟེན། རྒྱལ་སྤྱིའི་གསར་འགྱུར་བརྒྱུད་ལམ་ཁག་དང་། གཞུང་གིས་གནས་ཚུལ་ཁྱབ་སྤེལ་བྱེད་སྐབས། བོད་ཀྱི་ལོ་རྒྱུས་ཀྱི་གནས་བབ་དང་། རིག་གཞུང་ལ་བརྩི་བཀུར་གནང་བའི་ཐོག་ནས་བོད་ཀྱི་ས་གནས་ཀྱི་མིང་རྣམས་ཚད་ལྡན་བེད་སྤྱོད་གནང་རྒྱུའི་འབོད་སྐུལ་ཞུ་ཡི་ཡོད། ཅེས་གསུངས་འདུག
ད་ལན་ས་ཡོམ་གོད་ཆག་ཁྲོད་དིང་རིའི་གྲོང་ཚོ་རེ་ཟུང་ནང་ཁང་པ་ཞིག་རལ་དུ་ཕྱིན་མེད་པ་གཅིག་ཀྱང་ལྷག་མེད་ལ། ཡུལ་དངོས་ཀྱི་པར་རིས་ཁག་ཏུ་ཁང་པ་ཐོག་རྩེག་ཅན་མང་པོར་ལྕགས་ཀ་མེད་པ་སོགས་འཛུགས་སྐྲུན་རྒྱུ་སྤུས་ཞན་ལ། ཉེན་ཁ་ཆེན་པོ་ཡིན་པ་གསལ་པོ་མཐོང་ཐུབ་པར་བརྟེན། སྲིད་སྐྱོང་མཆོག་གིས་གསལ་བསྒྲགས་ནང་དུ། ཉེ་བའི་ཆར་བོད་ནང་ས་ཡོམ་གྱི་གོད་ཆག་བྱུང་བའི་རྐྱེན་གྱིས། རྒྱ་ནག་གིས་བོད་ནང་ཡུན་རིང་ལག་བསྟར་བྱེད་བཞིན་པའི་འཛུགས་སྐྲུན་གྱི་ལས་གཞི་ཁག་གིས་བོད་ཙམ་མིན་པར་ཁྱིམ་མཚེས་རྒྱལ་ཁབ་ཁག་ཏུའང་ཤུགས་རྐྱེན་ངན་པ་སྤྲོད་ཀྱི་ཡོད་པ་གསལ་སྟོན་བྱས་ཡོད་ལ། རྒྱ་ནག་གིས་བོད་ནང་འཛུགས་སྐྲུན་ཡར་རྒྱས་གཏོང་གི་ཡོད་པར་ཁ་གཡར་ཏེ་ཚད་ལས་འདས་པའི་ཆུ་མཛོད་གསར་རྒྱག་དང་། གཏེར་ཁ་སྔོག་འདོན། དེ་བཞིན་ཁོར་ཡུག་ལ་གནོད་པའི་ལས་གཞི་མང་དག་ཅིག་སྤེལ་བ་དེས་ཁུལ་དེར་ས་ཡོམ་འབྱུང་རྒྱུའི་ཉེན་ཁ་ཆེ་རུ་འགྲོ་མུས་ཡིན་པར་བརྟེན། རྒྱ་ནག་གཞུང་གིས་བོད་ནང་གི་འཛུགས་སྐྲུན་གྱི་སྲིད་ཇུས་དང་ལག་བསྟར་བྱེད་ཕྱོགས་ལ་ངེས་པར་དུ་བསྐྱར་ཞིབ་བྱ་དགོས།
ང་ཚོས་བོད་ནང་གི་བོད་རིགས་སྤུན་ཟླ་ཡོངས་དང་། ལྷག་པར་དུ་གནོད་འཚེ་ཕོག་པའི་ནང་མི་རྣམས་ལ་གདུང་སེམས་མཉམ་སྐྱེད་དང་སྨོན་ལམ་འདེབས་བཞིན་ཡོད་ལ། ང་ཚོས་མུ་མཐུད་དུ་བོད་ནང་གི་གནས་སྟངས་ལ་དོ་སྣང་བྱེད་ཀྱི་ཡིན། ང་ཚོས་བོད་ནང་གི་བོད་མི་ཚོའི་ཐོབ་ཐང་དང་། རང་དབང་། བདེ་འཇགས་ལ་བརྩི་བཀུར་དང་། ཕྱི་གསལ་ནང་གསལ་དང་ཆེ་མཐོང་། འགན་ཁུར་ལྡན་པའི་ཐོག་ནས་ཞུ་གཏུག་བྱ་རྒྱུའི་ཆོད་སེམས་བརྟན་པོ་ཡོད། ཅེས་གསུངས་འདུག
གསར་འགོད་པ། བསྟན་འཛིན་ཕུར་བུ།
རྩོམ་སྒྲིག་བྱེད་མཁན། པདྨ་མཚོ།
