ཡུ་རོབ་གྲོས་ཚོགས་ཀྱི་འགྲོ་བ་མིའི་ཐོབ་ཐང་ཚོགས་ཆུང་གི་ཚོགས་གཙོ་མོ་ནིར་ལགས་ཀྱིས་བོད་ནང་ས་ཡོམ་བྱུང་བར་གདུང་སེམས་མཉམ་སྐྱེད་ཡོད་སྐོར་སོགས་གསུངས།
ཁ་སང་ཕྱི་ཚེས་ ༣༡ ཉིན་ཡུ་རོབ་གྲོས་ཚོགས་ཀྱི་འགྲོ་བ་མིའི་ཐོབ་ཐང་ཚོགས་ཆུང་གི་ཚོགས་གཙོ་སྐུ་ཞབས་མོ་ནིར་ས་ཏོ་རི་ (Mounir Satouri) ལགས་ཀྱིས་སྦར་སིལ་སྐུ་ཚབ་དོན་གཅོད་རིག་འཛིན་ཆོས་སྒྲོན་ལགས་ཀྱི་མཚན་ཐོག་ཏུ་གདུང་སེམས་མཉམ་སྐྱེད་ཀྱི་འཕྲིན་ཡིག་ཅིག་བསྐུར་བའི་ནང་། བོད་ནང་དུ་ས་ཡོམ་བྱུང་སྟེ་རྐྱེན་འདས་དང་གནོད་སྐྱོན་ཚབས་ཆེན་ཕོག་པར་ཐུགས་གསོ་ཞུ་བ་དང་། ཡུ་རོབ་གྲོས་ཚོགས་ནས་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཐོག་མུ་མཐུད་དུ་ལྟ་ཞིབ་ནན་པོ་བྱ་རྒྱུ་དང་། བོད་ནང་གི་འགྲོ་བ་མིའི་ཐོབ་ཐང་སྲུང་སྐྱོབ། དེ་བཞིན་བོད་དོན་ཐོག་རྒྱབ་སྐྱོར་གནང་རྒྱུའི་ཆོད་སེམས་བརྟན་པོ་ཡོད། ད་དུང་ཡུ་རོབ་ནས་བོད་དང་བོད་མི་རྣམས་ལ་རྒྱབ་སྐྱོར་གནང་རྒྱུའི་ཆོད་སེམས་བརྟན་པོ་ཡོད། ཅེས་གསུངས་འདུག
ཡང་འཕྲིན་ཡིག་ནང་། བོད་མི་རྣམས་ཀྱིས་དཀའ་ངལ་དེ་ལ་གདོང་ལེན་བྱས་ཏེ་སོ་སོའི་མི་ཚེ་དང་ཁྱིམ་ཚང་སོགས་བསྐྱར་གསོ་བྱེད་དགོས་པའི་འབོད་སྐུལ་ཞུ་ཡི་ཡོད། ཛ་དྲག་གི་གནས་སྟངས་དེ་འདྲའི་སྐབས་སུ་རྒྱ་ནག་གཞུང་གིས་རྒྱལ་སྤྱིའི་ཚོགས་སྡེ་ཁག་གི་རོགས་རམ་དང་མཐུན་འགྱུར་གནང་བར་དང་ལེན་བྱས་ཏེ་བོད་མི་རྣམས་ལ་རོགས་རམ་ངེས་པར་དུ་གནང་རོགས། ཡུ་རོབ་གྲོས་ཚོགས་ནས་བོད་དོན་གླེང་སློང་བྱེད་ཀྱི་ཡོད་ལ། འདས་ལོའི་ཕྱི་ཟླ་ ༡༢ པའི་གྲོས་ཆོད་ནང་དུ་རྒྱ་ནག་གཞུང་གིས་བོད་ནང་གི་བོད་ཕྲུག་རྣམས་བཙན་གྱིས་གཏན་འཇགས་སློབ་གྲྭར་བཅུག་སྟེ་རྒྱ་སྒྱུར་སློབ་གསོ་སྤྲོད་དེ་མི་རིགས་རྩ་མེད་གཏོང་ཐབས་ཀྱི་སྲིད་ཇུས་ལག་བསྟར་བྱེད་བཞིན་པར་བློ་འཚབ་ཀྱི་རྣམ་པ་ཤུགས་ཆེན་གསལ་སྟོན་བྱས་ཡོད་ལ། ང་ཚོས་ཡང་ནས་བསྐྱར་དུ་རྒྱ་ནག་གཞུང་གིས་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཡར་རྒྱས་གཏོང་དགོས་པའི་འབོད་སྐུལ་ནན་པོ་ཞུས་ཡོད། ཅེས་འཁོད་འདུག
དེ་འབྲེལ་སྦར་སིལ་སྐུ་ཚབ་དོན་གཅོད་རིག་འཛིན་ཆོས་སྒྲོན་ལགས་ཀྱིས། སྐུ་ཞབས་མོ་ནིར་ལགས་ཀྱིས་བོད་དོན་ཐོག་རྒྱབ་སྐྱོར་དང་། གདུང་སེམས་མཉམ་སྐྱེད་གནང་བར་ཐུགས་རྗེ་ཆེ་ཞུས་ཡོད་པ་མ་ཟད། གཉན་འཕྲང་ཅན་གྱི་དུས་སྐབས་འདིར་བོད་དང་བོད་མིར་རྒྱབ་སྐྱོར་དང་། བོད་མིའི་བདེ་དོན་ཐད་ཐུགས་འཚབ་གནང་བར་སེམས་འགུལ་ཐེབས་པ་མ་ཟད། ང་ཚོར་སྙིང་སྟོབས་དང་རེ་བ་ཆེན་པོ་ཐོབ་བྱུང་། ཞེས་ཞུས་ཡོད་འདུག
འདི་ལོའི་ཕྱི་ཟླ་ ༡ ཚེས་ ༧ ཉིན་ཧྥ་རན་སིའི་སྲིད་འཛིན་སྐུ་ཞབས་མེག་ཁོ་རོན་མཆོག་དང་། ནི་ཐར་ལན་ཌིའི་ཕྱི་སྲིད་ལྷན་ཁང་། ཡུ་རོབ་མཐུན་ཚོགས་ཀྱི་སྐུ་ཚབ་ཧེན་ཇ་ལབ་བྷིན་ (Hadja Lahbib) ལགས། དེ་བཞིན་ཧྥ་རན་སིའི་གྲོས་ཚོགས་གོང་མའི་འཐུས་མི་དང་། ནང་པའི་མཐུན་ཚོགས་ཁང་གིས་བོད་ནང་ས་ཡོམ་བྱུང་བར་གདུང་སེམས་མཉམ་སྐྱེད་དང་། བོད་དོན་རྒྱབ་སྐྱོར་གནང་རྒྱུའི་ཆོད་སེམས་བརྟན་པོ་ཡོད་སྐོར་སོགས་གསུངས་འདུག
གསར་འགོད་པ། བསྟན་འཛིན་ཕུར་བུ།
རྩོམ་སྒྲིག་བྱེད་མཁན། པདྨ་མཚོ།
