བོད་རང་བཙན་ཡོངས་ཁྱབ་གསལ་བསྒྲགས་དུས་དྲན་གྱི་ཉིན་མོ་དང་བསྟུན་རྒྱ་གཞུང་གིས་བོད་ཀྱི་མིང་དང་རིག་གཞུང་ནག་གསུབ་གཏོང་མཚམས་འཇོག་དགོས་སྐོར་བགྲོ་གླེང་གནང་སོང་།
དེ་རིང་བོད་རང་བཙན་ཡོངས་ཁྱབ་གསལ་བསྒྲགས་བྱས་ཏེ་ལོ་ངོ་ ༡༡༢ འཁོར་བའི་དུས་དྲན་བསྟུན། དྷ་ས་ས་གནས་མགོ་འཛིན་གྱི་ཚོགས་ཁང་ཕུན་ཚོགས་ཁང་གསར་དུ། བོད་རང་བཙན་སློབ་ཕྲུག་ཚོགས་པའི་གོ་སྒྲིག་འོག བོད་ཡུན་གནས་ཐུབ་དགོས། གོ་ལའི་གླེང་མོལ་ནང་གི་བོད། ནག་བསུབ་དང་འགོག་རྒོལ། ཞེས་པའི་བཞུགས་མོལ་བགྲོ་གླེང་འཚོགས་ཡོད་ཅིང་།བགྲོ་གླེང་ཐོག་ཏུ་བོད་མི་མང་སྤྱི་འཐུས་རྡོ་རྗེ་ཚེ་བརྟན་ལགས་དང་། བོད་ཀྱིི་སྲིད་བྱུས་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་ལགས། བོད་རང་བཙན་སློབ་ཕྲུག་ཚོགས་པའི་འགན་འཛིན་བསྟན་འཛིན་པ་སངས་ལགས། བོད་ཀྱི་གཞོན་ནུ་ལྷན་ཚོགས་ཀྱི་དྲུང་ཆེ་བསོད་ནམས་ཚེ་རིང་ལགས། དྷ་ས་ཁུལ་གྱི་ཚོགས་སྡེ་ཁག་གི་མི་སྣ་དང་ཉམས་ཞིབ་པ་བཅས་མཉམ་ཞུགས་གནང་སོང་།
ཐེངས་འདིའི་བགྲོ་གླེང་སྐོར་ལ་བོད་རང་བཙན་སློབ་ཕྲུག་ཚོགས་པའི་འགན་འཛིན་བསྟན་འཛིན་པ་སངས་ལགས་ཀྱིས། དེ་རིང་བོད་རང་བཙན་ཡོངས་ཁྱབ་གསལ་བསྒྲགས་ཉིན་མོར་བོད་ཡུན་གནས་ཐུབ་དགོས་ཞེས་པའི་བགྲོ་གླེང་གནང་བ་ཧ་ཅང་གལ་ཆེན་པོ་མཐོང་གི་འདུག རྒྱ་གཞུང་གིས་ཐབས་ཇུས་མང་པོ་ཐོག་བོད་ནང་འགྱུར་བ་གཏོང་བཞིན་ཡོད་པ་ལྟར། བོད་ཀྱི་མིང་དེ་མི་མང་གི་ཀླད་པའི་ནང་མེད་པོ་བཟོ་བའི་ཐབས་ཇུས་ངན་པ་འཐེན་བཞིན་ཡོད། དེ་ནི་རྒྱ་གཞུང་གིས་ཐབས་ཇུས་འཐེན་པ་ཙམ་མིན་པར་ད་ལྟ་བེད་སྤྱོད་གཏོང་བཞིན་པ་གསལ་བོ་ཡིན་དུས། ངས་གཏམ་བཤད་ནང་དུ་རྒྱ་གཞུང་བཀག་པ་ག་འདྲ་བྱེད་དགོས་པ་ཆགས་ཡོད། རྒྱ་གཞུང་གིས་ཧྥ་རན་སི་དང་དབྱིན་ཡུལ་གྱི་འགྲེམས་སྟོན་ཁང་དུ་བོད་ཀྱི་མིང་བསྒྱུར་བྱས་ཏེ་བེད་སྤྱོད་བྱས་ཡོད། དེ་བཞིན་པ་ཁི་སི་ཐན་དང་བལ་ཡུལ་གཞུང་ལ་འབྲེལ་བ་བྱེད་སྐབས་བོད་ཀྱི་མིང་བསྒྱུར་ཡོད། བརྒྱུད་ལམ་དེ་དག་ངོ་ཤེས་པའི་ཐོག་ནས་བོད་ཀྱི་མིང་བསྒྱུར་བྱེད་པར་འགོག་དགོས་རྒྱུ་གལ་ཆེན་པོ་རེད། བགྲོ་གླེང་འདི་བརྒྱུད་ནས་ང་ཚོས་རྒྱ་ནག་གིས་ China Xizang སོགས་མིང་བེད་སྤྱོད་བཀག་པ་བྱེད་བཞིན་ཡོད། ཅེས་འགྲེལ་བརྗོད་གནང་བྱུང་།
འདི་གའི་གསར་འགོད་པས་བོད་ཀྱི་སྲིད་བྱུང་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་ལགས་ཀྱི་གཏམ་བཤད་ཀྱི་བརྗོད་གཞི་སྐོར་ལ་དྲིས་པར་ཁོང་གིས། རྒྱ་གཞུང་གིས་དབྱིན་ཡིག་གི་མིང་ Tibet ཚབ་ཏུ་xizang ཟེར་བ་བེད་སྤྱོད་བཏང་སྟེ་བོད་ཀྱི་མིང་དང་རིག་གཞུང་བཅས་པ་ནག་གསུབ་ཏུ་གཏོང་བཞིན་པར་གདོང་ལེན་བྱེད་ཕྱོགས་ཐོག་བགྲོ་གླེང་བྱས་པ་རེད། ངས་རྒྱ་ཡིག་ནང་xizang ཟེར་བའི་མིང་གི་བྱུང་རིམ་དང་གོ་དོན་སོགས་བཤད་པ་ཡིན། ཐེངས་འདིའི་བརྗོད་གཞི་འདི་གལ་ཆེན་པོ་རེད། རྒྱ་གཞུང་གིས་འཛམ་གླིང་ཐོག་བོད་ཀྱི་ཆེད་དུ་ལོ་མང་པོ་རིང་ Tibet དང་ Xizang ཟེར་བའི་ཐ་སྙད་བེད་སྤྱོད་བྱེད་བཞིན་ཡོད་པའི་ཐོག་ནས་ཀྱང་གལ་ཆེན་པོ་ཡིན་པ་གསལ་བོ་རེད། རྒྱ་གཞུང་གིས་ལོ་བཅུ་ཕྲག་མང་པོའི་སྔོན་ནས་དམིགས་ཡུལ་ཡོད་པའི་ཐོག་དཔྱད་རྩོམ་སོགས་ཀྱི་ཐོག་ Xizang བེད་སྤྱོད་བཏང་སྟེ་ད་ལྟ་དངོས་སུ་ལག་བསྟར་བྱེད་བཞིན་ཡོད་པ་རེད། མིང་བསྒྱུར་བའི་རྒྱབ་ལྗོངས་སུ་བོད་མི་རིགས་ཀྱི་ལོ་རྒྱུས་དང་། རིག་གཞུང་སོགས་མཉམ་དུ་ནག་གསུབ་དུ་འགྲོ་བཞིན་ཡོད། རྒྱ་གཞུང་གི་དམིགས་ཡུལ་དེ་ཧ་ཅང་ངན་པ་རེད། དམིགས་ཡུལ་ངན་པ་དེར་ང་ཚོས་གདོང་ལེན་བྱ་རྒྱུ་ཧ་ཅང་གལ་ཆེན་པོ་ཆགས་ཡོད། དེར་མཁས་པ་རྣམས་ཀྱི་ངོས་ནས་བགྲོ་གླེང་དང་། དབྱེ་ཞིབ། དངོས་ཡོད་ཀྱི་ལོ་རྒྱུས་གནས་སྟངས་གང་ཡིན་པ་ཐེར་འདོན་སོགས་བོད་མི་རྣམས་ཀྱིས་ཐབས་ལམ་འདྲ་མིན་ཐོག་རང་ཉིད་ཁེ་ཕན་སྲུང་སྐྱོབ་བྱེད་དགོས། ཞེས་འགྲེལ་བརྗོད་གནང་བྱུང་།
འདི་གའི་གསར་འགོད་པས་བོད་མི་མང་སྤྱི་འཐུས་རྡོ་རྗེ་ཚེ་བརྟན་ལགས་ཀྱི་གཏམ་བཤད་བརྗོད་གཞི་སྐོར་ལ་དྲིས་པར་ཁོང་གིས། ཉེ་ལམ་རྒྱ་ནག་གཞུང་གིས་གཞུང་འབྲེལ་ཐོག་འཁྱོག་བཤད་ཀྱི་དྲིལ་བསྒྲགས་བྱས་ཏེ་དབྱིན་སྐད་ཐོག་ tibet ཞེས་པར་ xizang དུ་བསྒྱུར་བའི་ཐབས་ཤེས་ངན་པ་གཏོང་བཞིན་ཡོད་ཅིང་། རྒྱ་ནག་གཞུང་འབྲེལ་གྱི་ཚགས་པར་ཁག་མང་པོར་དེ་ལྟར་བྱེད་བཞིན་ཡོད་པའི་རྒྱབ་ལྗོངས་དང་། ལོ་རྒྱུས་ཀྱི་གནས་སྟངས། ད་ལྟའི་ཆར་བོད་ནང་རྒྱ་ནག་གིས་བཙན་འཛུལ་བྱས་ཏེ་དཀའ་ངལ་འཕྲད་བཞིན་ཡོད་པ་ལྟར། རྒྱ་གར། ཤྲི་ལིང་ག ཨ་ཧྥི་རི་ཁ་སོགས་སུ་མི་སེར་སྤེལ་ཡུལ་ལམ་ལུགས་ཐོག་མིང་བསྒྱུར་ག་འདྲ་བྱེད་ཡོད་པའི་རྒྱབ་ལྗོངས་དང་། ལོ་རྒྱུས་ནག་གསུབ་བཏང་པའི་གདོང་ལེན་བྱེད་ཕྱོགས། ཉེ་ལམ་ཧྥ་རན་སི་དང་དབྱིན་ཡུལ་གྱི་འགྲེམས་སྟོན་ཁང་ལ་ལས་འགུལ་སྤེལ་གྲུབ་འབྲས་སོགས་ཐོག་སྤྱི་ཡོངས་ནས་བགྲོ་གླེང་ཡག་པོ་བྱུང་སོང་། རྒྱ་ནག་གི་ཐབས་ཇུས་དེ་ང་ཚོས་ཤེས་ཀྱི་ཡོད་པ་རེད། ཕྱོགས་གཅིག་ནས་རྒྱ་ནག་གིས་བོད་དུ་བཙན་འཛུལ་བྱས་ཏེ་ལོ་ ༧༠ འཁོར་བཞིན་ཡོད། དེ་སྔ་རྒྱ་ནག་གིས་དབྱིན་ཡིག་ཐོག་ China’s Tibet ཞེས་པ་བྲིས་ཡོད་ཀྱང་། དབྱིན་ཡིག་ཐོག་ China Xizang ཞེས་བསྒྱུར་བ་འཁྱོག་བཤད་ཀྱི་དྲིལ་བསྒྲགས་ཡིན་ཡང་། ཕྱོགས་གཞན་ཞིག་ནས་བལྟས་ན་རྒྱ་ནག་གིས་བོད་དུ་བཙན་འཛུལ་བྱས་ཏེ་ལོ་ ༧༠ འཁོར་བཞིན་ཡོད་ཀྱང་། ད་དུང་རྒྱ་ནག་གཞུང་ལ་གདེང་ཚོད་མེད་པར་བོད་དེ་རྒྱ་ནག་གི་ཆ་ཤས་ཡིན་པར་དྲིལ་སྒྲོག་ཤུགས་ཆེན་བྱེད་བཞིན་ཡོད་པར་བདེན་པ་མེད་པ་བསྟན་ཡོད། ཕྱི་རྒྱལ་གྱི་བོད་མི་ཚོ་བདེན་པ་ར་སྤྲོད་བྱེད་མཁན་ཆགས་ཡོད་དུས། གསར་ཁང་དང་འགྲེམས་སྟོན་ཁང་སོགས་ལ་བོད་མི་ཡོད་དོ་ཅོག་གིས་གདོང་ལེན་བྱེད་དགོས་པ་ངོས་འཛིན་ཐོབ་པའི་ཐོག་ནས་བགྲོ་གླེང་བྱུང་། ཞེས་འགྲེལ་བརྗོད་གནང་བྱུང་།
དེ་བཞིན་བགྲོ་གླེང་བ་རྣམས་ཀྱིས་ཐུན་མོང་ཐོག་དོན་ཚན་བཞི་ཅན་གྱི་བསྒྲགས་གཏམ་ཞིག་སྤེལ་བའི་ནང་།བོད་ལ་ཤིས་ཙང་དང་། ཀྲུང་གོའི་ནུབ་ཕྱོགས། ཀྲུང་གོའི་བོད། ཅེས་པའི་ཐ་སྙད་བེད་སྤྱོད་གཏོང་རྒྱུར་དགག་བྱ་བྱེད་དགོས་པ་དང་། འཛམ་གླིང་ས་ཁྲའི་སྟེང་དུ་བོད་ཀྱི་མཚོན་དོན་ངེས་པར་དུ་མ་ནོར་བར་འགོད་དགོས། བོད་ཀྱི་ཆོས་དང་རིག་གཞུང་རྒྱ་ནག་ཅན་དུ་བསྒྱུར་ཐབས་མཚམས་འཇོག་དགོས། བོད་རྒྱ་བསྒྱུར་གྱི་རྒྱ་ནག་གི་སྲིད་བྱུས་ལ་རྒྱལ་སྤྱིའི་རང་བཞིན་ཅན་གྱི་གོ་རྟོགས་དང་ངོ་རྒོལ་གྱི་ལས་འགུལ་སྤེལ་དགོས་པ་བཅས་འཁོད་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་པ། པདྨ་མཚོ།
