ཆབ་སྲིད་བཙོན་ཟུར་རྣམ་སྐྱིད་ལགས་ཀྱིས་མཉམ་འབྲེལ་རྒྱལ་ཚོགས་སུ་ཚོར་ཤུགས་ཆེན་པོས་བོད་དོན་གཏམ་བཤད་གནང་།

བོད་ཀྱི་ཆབ་སྲིད་བཙོན་ཟུར་རྣམ་སྐྱིད་ལགས་ཀྱིས་མཉམ་འབྲེལ་རྒྱལ་ཚོགས་ཀྱི་གླེང་སྟེགས་ཐོག་ཁོང་མོ་སྤུན་མཆེད་གཉིས་ལ་རྒྱའི་བཙོན་ཁང་དུ་སྡུག་སྦྱོང་མནར་གཅོད་བཏང་བའི་མྱོང་ཚོར་འགྲེལ་བརྗོད་བྱས་ཏེ་ལོ་རྒྱུས་དེ་ནི་ཁོང་མོ་གཅིག་པུའི་ལོ་རྒྱུས་མིན་པར་རྒྱའི་བཙོན་ཁང་དུ་བཅུག་པའི་བོད་མི་ཡོངས་ཀྱི་ལོ་རྒྱུས་ཡིན་སྐོར་གཏམ་བཤད་གནང་འདུག

ཁ་སང་ཕྱི་ཚེས་ ༡༨ ཉིན་འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་གླེང་སྟེགས་ཐོག བོད་ཀྱི་ཆབ་སྲིད་བཙོན་ཟུར་རྣམ་སྐྱིད་ལགས་ཀྱིས་རྒྱ་ནག་གཞུང་གི་བཙོན་ཁང་དུ་ཁོང་སྤུན་མཆེད་གཉིས་ལ་སྡུག་སྦྱོང་མནར་གཅོད་ཇི་ལྟར་བཏང་བའི་སྐོར་དང་། རྒྱ་ནག་གཞུང་གིས་མུ་མཐུད་དུ་བོད་ནང་གི་བོད་མི་རྣམས་ལ་ཚད་ལས་འདས་པའི་བཙན་གནོན་དང་བཙོན་འཇུག་ཁྲིམས་ཐག་གཅོད་ཀྱིན་ཡོད་པ་སོགས་ཀྱི་ཐད་ཚོར་ཤུགས་ཆེན་པོས་གཏམ་བཤད་གནང་འདུག

ཁོང་མོའི་གཏམ་བཤད་མགོ་འཛུགས་མ་བྱས་པའི་གོང་དུ།  མཉམ་འབྲེལ་རྒྱལ་ཚོགས་ཀྱི་སྡིངས་ཆའི་སྟེང་ཁོང་མོས་༧གོང་ས་རྒྱལ་བ་རིན་པོ་ཆེ་མཆོག་གི་སྐུ་པར་ཆེན་པོ་ཞིག་གནམ་ལ་འཕྱར་ཏེ། ༧རྒྱལ་དབང་བསྟན་འཛིན་རྒྱ་མཚོ་སྐུ་ཚེ་ཁྲི་ལོར་བརྟན་པར་ཤོག ༧རྒྱལ་དབང་བསྟན་འཛིན་རྒྱ་མཚོ་བོད་ལ་ཕེབས་སུ་འཇུག་དགོས། བོད་ལ་རང་དབང་དགོས་ཞེས་སྐད་གསང་མཐོན་པོས་སྐད་འབོད་གནང་བ་དང་བསྟུན། རྒྱབ་ལྗོངས་ཀྱི་བརྙན་རས་ངོས་སུ་ཕྱི་ལོ་ ༢༠༡༥ ལོར་ཁོང་མོ་དང་ནུ་མོ་བསྟན་འཛིན་སྒྲོལ་མ་གཉིས་ཀྱིས་ཞི་བའི་ངོ་རྒོལ་སྐད་འབོད་བྱས་པའི་བརྙན་ཐུང་དེ་གཟིགས་འབུལ་ཞུས་སོང་།

དེ་ནས་ཁོང་མོས་གཏམ་བཤད་མགོ་འཛུགས་བྱས་ཏེ། ང་ནི་བོད་ཨ་མདོ་ནས་ཡོང་བའི་འབྲོག་མོ་དཀྱུས་མ་ཞིག་ཡིན། ཕྱི་ལོ་ ༢༠༡༥ ཟླ་ ༡༠ ཚེས་ ༢༡ ཉིན་ང་དང་ངའི་ནུ་མོ་བསྟན་འཛིན་སྒྲོལ་མ་ངེད་གཉིས་ཀྱིས་འཚེ་མེད་ཞི་བའི་ལས་འགུལ་ཞིག་སྤེལ་བ་ཡིན། སྐབས་དེར་ངེད་གཉིས་ལོ་བཅོ་ལྔ་ཡིན་ཡང་། རྒྱ་ནག་གཞུང་གིས་ལག་ལྕགས་བརྒྱབ་ནས་བཙོན་ཁང་དུ་བཅུག་ཐལ། རྒྱ་ནག་གཞུང་གི་ཉེན་རྟོག་པ་དེ་དག་གིས། ངེད་གཉིས་༧གོང་ས་རྒྱལ་རིན་པོ་ཆེ་མཆོག་གི་ཚོགས་པས་མངགས་པ་ཡིན་ནམ་ཟེར་ནས་འགྲམ་ལྕག་གཞུས་ཏེ་གཅར་རྡུང་བྱས་སོང་ལ། ཉིན་ཞག་དྲུག་ལ་གཉིད་ཁུག་ཏུ་མ་བཅུག་པར་གཅར་རྡུང་ཚད་མེད་བཏང་བྱུང་། སྐབས་དེར་གལ་སྲིད་ང་ཤ་ཞིག་ཡིན་ན་ཚོས་སོང་། མར་ཞིག་ཡིན་ན་ཞུ་སོང་ཡོད། དེ་ནས་ལོ་གཅིག་དང་ཕྱེད་ཀ་ལྷག་རིང་ང་དང་བསྟན་འཛིན་སྒྲོལ་མ་བཙོན་ཁང་ཁ་ཁར་བཞག་སྟེ། ལོ་གཅིག་ལྷག་གི་རིང་རྒྱ་ནག་གི་བཙོན་པ་ཚོས་ཕན་ཚུན་སྐད་ཆ་བཤད་ཆོག་ཀྱང་། ངས་བཙོན་པ་གཞན་སུ་ལའང་སྐད་ཆ་བཤད་མི་ཆོག་པར་བཙོན་འཇུག་ནན་མོ་བྱས་སོང་། ཞེས་བརྗོད་འདུག

ཡང་ཁོང་མོས། རྒྱ་ནག་གཞུང་གི་བཙོན་འོག་ནས་སྨན་རྫས་བཏབ་པའི་ཟ་མ་ཧ་ཅང་ཞན་པའི་ཁར། དུས་དང་དུས་ཚོད་མཐུད་ནས་ངལ་རྩོལ་གྱི་ལས་ཀ་བྱེད་དུ་འཇུག་གི་འདུག བཙོན་ཁང་ནང་དུ་བོད་མི་བཙོན་པ་རྣམས་དམིགས་བསལ་གྱིས་ལྟ་ཞིབ་ནན་མོ་དང་མི་རིགས་དབྱེ་འབྱེད་ཀྱི་གཉའ་གནོན་ཤུགས་ཆེན་བྱས་སོང་།  ད་ལྟ་ངས་ཤོད་བཞིན་པ་དེ་ང་གཅིག་པུའི་ལོ་རྒྱུས་མིན། དེ་ནི་རྒྱ་ནག་གཞུང་གི་འོག་ནས་དཀའ་སྡུག་མྱངས་ཟིན་པ་དང་མྱོང་མུས་ཡིན་པའི་བོད་མི་སྟོང་ཕྲག་མང་པོའི་ལོ་རྒྱུས་ཡིན། ཞེས་དང་། རྒྱ་ནག་གིས་བཙོན་འོག་ཏུ་ངལ་རྩོལ་གྱི་ལས་ཀ་བྱེད་དུ་འཇུག་སྐབས། རང་གི་གཟུགས་པོའི་གནས་སྟངས་ཞན་པ་དང་ཟས་བཅུད་ཀྱིས་འདང་གིན་མེད་པའི་གནས་སྟངས་གསལ་པོ་ཤེས་ཀྱི་འདུག་ཀྱང་། ང་ཚོ་འགྲོ་འདུག་གི་རང་དབང་གང་ཡང་མེད་པར་སྡོད་ཐེངས་གཅིག་ལ་ཡར་མར་འགུལ་མི་བཅུག་པར་ཡུན་རིང་ངལ་རྩོལ་ཀྱི་ལས་ཀ་བྱས་བཅུག་སོང་། ཞེས་བརྗོད་འདུག

ཁོང་མོས་མུ་མཐུད། བཙོན་ཁང་དུ་རྒྱ་ནག་གཞུང་གི་རྩ་ཁྲིམས་དང་བཅའ་ཁྲིམས་སོགས་ཚུད་པའི་དམར་ཤོག་གི་ཆབ་སྲིད་སློབ་གསོའི་ཡིག་རིགས་སྣ་ཚོགས་བཙན་གྱིས་བློར་འཛིན་བྱེད་དུ་བཅུག་པ་དང་། བཙོན་ཁང་གི་མགོ་ཁྲིད་ཚོས་རྒྱལ་ཁབ་ཁ་བྲལ་བ་རེད་ཟེར་ནས་སྡང་སེམས་ཀྱི་མིག་ཟུང་བགྲད་ཀྱི་ཡོད་པ་མ་ཟད། རྣམ་འགྱུར་མི་ལེགས་ལུགས་སོགས་བཤད་ནས་གཅར་རྡུང་ཚད་མེད་བཏང་བའི་སྐོར་དང་། ཕྱི་ལོ་ ༢༠༡༨ ཟླ་ ༡༠ ཚེས་ ༢༡ ཉིན་བཙོན་འཇུག་དུས་ཡུན་ཚང་ནས་ཀློད་གྲོལ་གཏོང་སྐབས། རྔ་བ་རྫོང་གི་ཉེན་རྟོག་པ་སོགས་ཡོང་ནས། རྗེས་ཕྱོགས་མི་རིགས་ཁ་བྲལ་ཟེར་བ་ཞིག་གི་ལས་འགུལ་སྤེལ་མི་ཉན་པའི་འཇིགས་སྐུལ་དང་། དངོས་ཤུགས་བརྒྱུད་གསུམ་ནས་སོ་ཉུལ་དང་ལྟ་རྟོག་བྱས་རྐྱེན་ལུས་སེམས་གཉིས་ལ་དཀའ་ངལ་མང་དག་ཅིག་འཕྲད་ཡོད་སྐོར་སོགས་བརྗོད་འདུག

ཟླ་འདིའི་ཕྱི་ཚེས་ ༡༠ ནས་ ༡༤ བར་ཉིན་གྲངས་ལྔའི་རིང་སུད་སི་ཇི་ནི་ཝ་གྲོང་ཁྱེར་དུ་རྣམ་སྐྱིད་ལགས་ཀྱིས་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་དང་། རང་ཉིད་ལ་རྒྱའི་བཙོན་ཁང་དུ་སྡུག་སྦྱོང་མནར་གཅོད་བཏང་བའི་བརྒྱུད་རིམ་སོགས་ངོ་སྤྲོད་དང་། སུད་སིར་ཡོད་པའི་རྒྱལ་ཁབ་དག་གི་གནད་ཡོད་མི་སྣ་དང་། རྒྱལ་ཚོགས་ཀྱི་ཆེས་མཐོའི་མི་སྣ་སོགས་ལ་བོད་དོན་དང་འབྲེལ་བའི་ཞུ་གཏུག་གི་ལས་འགུལ་སྤེལ་གྱི་ཡོད་འདུག

ཆབ་སྲིད་བཙོན་ཟུར་རྣམ་སྐྱིད་ལགས་ནི་བོད་རྔ་བ་རྫོང་གཅའ་རོ་ཡུལ་ཚོའི་པདྨ་ལྷ་ཐང་གི་འབྲོག་ཁྱིམ་ཕལ་བ་ཞིག་ཏུ་སྐྱེས་ཤིང་། ཕྱི་ལོ་ ༢༠༡༥ ཟླ་ ༡༠ ཚེས་ ༢༡ ཉིན་རྔ་བ་རྫོང་གི་དཔའ་བོའི་ཁྲོམ་གཞུང་དུ་ཁོང་མོ་སྤུན་གཉིས་ཀྱིས་ངོ་རྒོལ་སྐད་འབོད་བྱས་རྐྱེན།  རྒྱ་ནག་གཞུང་གིས་རྒྱལ་ཁབ་ཁ་བྲལ་གྱི་ཉེས་མིང་གཡོགས་ནས་ལོ་གསུམ་གྱི་བཙོན་འཇུག་ཁྲིམས་ཐག་བཅད། ཕྱི་ལོ་ ༢༠༡༨ ཟླ་ ༡༠ ཚེས་ ༢༡ ཉིན་བཙོན་འཇུག་དུས་ཡུན་ཚང་ནས་ཀློད་གྲོལ་བཏང་།  ཕྱི་ལོ་ ༢༠༢༣ ཟླ་ ༥ ཚེས་ ༢༧ ཉིན་ཁོང་མོའི་གཉེན་འབྲེལ་ཚེ་རིང་སྐྱིད་དང་ལྷན་དུ་བལ་ཡུལ་སྣེ་ལེན་ཁང་དུ་འབྱོར་ཡོད་པ་དང་། ལོ་དེའི་ཕྱི་ཟླ་ ༦ ཚེས་ ༢༨ ཉིན་བཞུགས་སྒར་དྷ་རམ་ས་ལའི་དབུས་སྣེ་ལེན་ཁང་དུ་བསླེབས། ད་ལྟ་ཁོང་གཉིས་ཀྱིས་ཤེས་རབ་དགའ་ཚལ་སློབ་གླིང་དུ་སློབ་གཉེར་གནང་བཞིན་ཡོད་པ་རེད།

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།