བོད་རྒྱལ་ལོ་ ༢༡༥༡ ལོར་༧གོང་ས་མཆོག་ནས་བསྩལ་བའི་གསུང་འཕྲིན་ཁག

ཧྥིན་ལེན་ཌིའི་སྲིད་འཛིན་གསར་པར་འཚམས་འདྲི་མཛད།

ཕྱི་ལོ་ ༢༠༢༤ ཟླ་ ༢ ཚེས་ ༡༤ ཉིན་༧གོང་ས་རྒྱལ་བ་རིན་པོ་ཆེ་མཆོག་ནས་ཧྥིན་ལེན་ཌི་སྲིད་འཛིན་འོས་བསྡུ་ཆེན་མོའི་ཁྲོད་རྒྱལ་ཁ་ཐོབ་པའི་སྐུ་ཞབས་ཨེ་ལེག་ཛེན་ཊིར་(Alexander Stubb) ལགས་ཀྱི་མཚན་ཐོག་ཏུ་འཚམས་འདྲིའི་གསུང་འཕྲིན་ཞིག་སྩལ་ཏེ།  ཁོང་གི་མ་འོངས་པའི་ལས་དོན་ལམ་ལྷོངས་ཡོང་བར་ཐུགས་སྨོན་མཛད་པ་དང་སྦྲགས། འདས་པའི་ལོ་ཟླའི་ནང་ངོས་རང་ཁྱེད་ཀྱི་ཆེས་མཛེས་སྡུག་ལྡན་པའི་ཧྥིན་ལེན་ཌི་རྒྱལ་ཁབ་ཏུ་ཐེངས་འགར་བསྐྱོད་མྱོང་ཡོད་ཅིང་།  ངོས་རང་གིས་བྱམས་སྙིང་རྗེ་གོང་མཐོར་དང་། གཅིག་གྱུར་གྱི་འདུ་ཤེས་ཡར་སྐྱེད། དེ་བཞིན་ཆོས་ལུགས་མཐུན་འབྲེལ་གྱི་སྐོར་བཤད་པར་ཧྥིན་ལེན་ཌི་མི་མང་གིས་དོ་དབྱིངས་ཆེན་པོ་གནང་བར་ཡི་རངས་བསྔགས་བརྗོད་བྱེད་ཀྱི་ཡོད། ཅེས་གསུངས།

ཐའེ་ཝན་གྱི་སྲིད་འཛིན་གསར་པར་འཚམས་འདྲི་མཛད།

ཕྱི་ལོ་ ༢༠༢༤ ཟླ་ ༥ ཚེས་ ༢༡ ཉིན་༧གོང་ས་རྒྱལ་བ་རིན་པོ་ཆེ་མཆོག་ནས་སྲིད་འཛིན་ལེ་ཆིན་ཏི་མཆོག་ལ་འཚམས་འདྲིའི་གསུང་འཕྲིན་བསྩལ་ཏེ། ཐའེ་ཝན་དུ་དམངས་གཙོ་དར་སྤེལ་འགྲོ་མུས་ཡིན་པ་ནི་ཆེས་དགའ་འོས་པ་ཞིག་རེད། ཐའེ་ཝན་གྱི་མི་མང་རྣམས་དམངས་གཙོའི་ལམ་ལུགས་དར་སྤེལ་ཕྱིན་པ་གཅིག་པུས་ཡར་སྐྱེད་ཡོང་བ་ཞིག་གཏན་ནས་མིན་པར། ཐའེ་ཝན་མི་མང་གིས་རང་གི་ཆེས་ཕྱུག་པའི་སྲོལ་རྒྱུན་རྒྱུན་འཛིན་དང་ལྷན་དུ་འཚོ་བ་ལའང་ཡར་རྒྱས་ཆེན་པོ་ཕྱིན་ཡོད་པ་རེད། ཅེས་དང་། ངོས་རང་གིས་སྐུ་ཉིད་ཀྱིས་འབྱུང་འགྱུར་ཐའེ་ཝན་མི་མང་གི་རེ་བ་དང་མངོན་འདོད་བསྒྲུབ་པར་འཕྲད་པའི་དཀའ་ངལ་ཡོངས་རྫོགས་ལ་གདོང་ལེན་གནང་ཐུབ་པའི་སྨོན་འདུན་ཡོད། ཅེས་གསུངས།

འབྲས་ལྗོངས་དང་ཨ་རུ་ན་ཅལ་གྱི་སྤྱི་ཁྱབ་བློན་ཆེན་གཉིས་ལ་འཚམས་འདྲི་མཛད།

ཕྱི་ལོ་ ༢༠༢༤ ཟླ་ ༦ ཚེས་ ༣ ཉིན་༧གོང་ས་རྒྱལ་བ་རིན་པོ་ཆེ་མཆོག་ནས། ཨ་རུ་ན་ཅལ་དང་འབྲས་ལྗོངས་མངའ་སྡེའི་སྤྱི་ཁྱབ་བློན་ཆེན་རྣམ་གཉིས་ཀྱི་མཚན་ཐོག་ཏུ་ཕྱག་ཡིག་ཅིག་བྲིས་ཏེ། སྐུ་ཞབས་པདྨ་མཁའ་འགྲོ་དང་པེ་རེམ་སིན་ཏ་མཱང་གཉིས་ཀྱི་ཆབ་སྲིད་ཚོགས་པར་རྒྱ་གར་གྱི་མངའ་སྡེ་འོས་བསྡུའི་ཁྲོད་རྒྱལ་ཁ་ཐོབ་པར་འཚམས་འདྲི་ཞུ་བཞིན་ཡོད། འདས་པའི་ལོ་ངོ་འདི་དག་གི་རིང་ལ་ཨ་རུ་ན་ཅལ་མངའ་སྡེ་དང་འབྲས་ལྗོངས་གཉིས་ཡར་རྒྱས་གོང་འཕེལ་ཕྱིན་པའི་ཐུགས་ཚོར་བྱུང་བ་དང་། བློན་ཆེན་རྣམ་པ་གཉིས་ནས་མུ་མཐུད་དབུལ་ཕོངས་ཀྱི་གནས་སྟངས་ཡར་རྒྱས་གཏོང་ཐབས་ལ་བརྩོན་འགྲུས་ལྷོད་མེད་གནང་སྟེ། མངའ་སྡེ་སོ་སོའི་མི་མང་གི་རེ་འདོད་སྐོང་རྒྱུར་དཀའ་ངལ་འཕྲད་རིགས་ལ་གདོང་ལེན་ལེགས་འགྲུབ་ཡོང་བར་ཐུགས་སྨོན་བཅས་བསྩལ།

རྒྱ་གར་གྱི་སྲིད་བློན་མུ་དྷི་མཆོག་ལ་འཚམས་འདྲི་མཛད།

ཕྱི་ལོ་ ༢༠༢༤ ཟླ་ ༦ ཚེས་ ༦ ཉིན་༧གོང་ས་རྒྱལ་བ་རིན་པོ་ཆེ་མཆོག་ནས་རྒྱ་གར་གྱི་སྲིད་བློན་མུ་དྷི་མཆོག་དང་ཁོང་གི་སྲིད་དོན་ཚོགས་པར་ཐེངས་གསུམ་བསྟུད་མར་གཞུང་འཛིན་པའི་རྒྱལ་ཁ་ཐོབ་པར་འཚམས་འདྲི་མཛད་པ་དང་བསྟུན། རྒྱ་གར་གྱི་བྱམས་སྐྱོང་དང་གཏོང་ཕོད་ལ་བརྟེན་ནས་བཙན་བྱོལ་དུ་ང་ཚོས་ཞི་བདེ་དང་རང་དབང་ཐོག་རང་ཉིད་ཀྱི་གནའ་བོའི་རིག་གཞུང་སྲུང་སྐྱོབ་བྱེད་ཐུབ་ཡོད། རྒྱ་གར་གྱི་མི་རབས་གསར་པའི་གཅེན་གཅུང་ཁྲོད་དུ། ང་ཚོས་རྒྱ་གར་གྱི་གནའ་བོའི་རིག་གཞུང་གོ་རྟོགས་སྤེལ་བར་གྲུབ་འབྲས་ཆེན་པོ་ཐོབ་ཡོད། ཅེས་དང་། ཁྱེད་ཀྱི་སྲིད་བློན་གྱི་ལས་ཡུན་གསར་པའི་ནང་དུ། སྐུ་ཉིད་ཀྱིས་འབྱུང་འགྱུར་རྒྱ་གར་མི་མང་གི་རེ་བ་དང་མངོན་འདོད་བསྒྲུབ་པར་འཕྲད་པའི་དཀའ་ངལ་ཡོངས་རྫོགས་ལ་གདོང་ལེན་གནང་ཐུབ་པའི་སྨོན་འདུན་ཡོད། ཅེས་ཐུགས་སྨོན་མཛད།

མེག་སི་ཁོའི་བུད་མེད་སྲིད་འཛིན་ཐོག་མར་འཚམས་འདྲི་མཛད།

ཕྱི་ལོ་ ༢༠༢༤ ཟླ་ ༦ ཚེས་ ༡༤ ཉིན་༧གོང་ས་རྒྱལ་བ་རིན་པོ་ཆེ་མཆོག་ནས་མེག་སི་ཁོའི་བུད་མེད་སྲིད་འཛིན་ཐོག་མ་ལྕམ་སྐུ་ཁོ་ལོ་ཌི་ཡ་ཤེན་བྷམ་ (Claudia Sheinbaum) མཆོག་གི་མཚན་ཐོག་ཏུ་འཚམས་འདྲིའི་གསུང་འཕྲིན་ཞིག་བསྩལ་ཏེ།  ངོས་རང་གིས་བུད་མེད་རྣམས་ནི་གཞན་ལ་སྙིང་རྗེ་ཆེ་བ་དང་བརྩེ་འདང་ཟབ་པོ་ཡོད་མཁན་ཞིག་ཏུ་ཡིད་ཆེས་བྱེད་ཀྱི་ཡོད་ལ། ངོས་ཀྱིས་ཀྱང་ཡུམ་ཆེན་མཆོག་གི་དྲུང་ནས་དེ་དག་བསླབས་པ་ཡིན། བུད་མེད་རྣམས་མི་གཞན་གྱི་ན་ཟུག་ལ་སེམས་ཚོར་ཆེ་བ་ཡོད་པར་ཚན་རིག་གི་གྲུབ་དོན་ལས་རྙེད་ཡོད་པས། ངོས་རང་གིས་དུས་ཡུན་རིང་པོ་ནས་བུད་མེད་ཀྱི་མགོ་ཁྲིད་ཀྱི་ནུས་པ་ནི་ཡིད་སྨོན་བྱ་ཡུལ་ཡིན་པར་རྒྱབ་སྐྱོར་བྱེད་ཀྱི་ཡོད། འཛམ་གླིང་གི་མགོ་ཁྲིད་མང་ཆེ་བ་བུད་མེད་ཡིན་ན། འཇིག་རྟེན་འདི་བསམ་ཤེས་དང་། ཞི་བདེ་སྔར་ལས་ལྷག་པ་ཞིག་ཡོང་གི་ཡོད་པའི་ཡིད་ཆེས་བརྟན་པོ་ཡོད། དོན་དངོས་ཐོག་མིའི་རིགས་ཀྱི་ལོ་རྒྱུས་ཁྲོད་འཐབ་མོ་བ་མང་ཆེ་བ་ནི་སྐྱེས་པ་ཡིན་པ་རེད། བུད་མེད་རྣམས་ཀྱིས་མི་གཞན་གྱི་བདེ་སྡུག་སོགས་ཀྱི་ཐད་ལ་སེམས་ཁུར་དང་བརྩེ་འདང་ཆེ་བ་ཡོད་པ་རེད། ཅེས་དང་། ངོས་རང་ཁྱེད་ཀྱི་རྒྱལ་ཁབ་ཏུ་ཕྱིན་སྐབས། ཁྱེད་ཀྱི་མི་མང་གིས་ངོས་ཀྱིས་སེམས་པ་བཟང་པོ་བྱ་རྒྱུ་དང་ཆོས་ལུགས་མཐུན་འབྲེལ་གྱིས་འགྲོ་བ་མི་གཅིག་འགྱུར་གྱི་འདུ་ཤེས་ཀྱིས་མཚོན་པའི་གཞི་རྩའི་འགྲོ་བ་མིའི་རིན་ཐང་གོང་མཐོར་གཏོང་ཐབས་སོགས་ལ་དོ་དབྱིངས་ཆེན་པོ་གནང་བས། ངོས་རང་ལ་སེམས་འགུལ་ཆེན་པོ་ཐེབས་བྱུང་། ཞེས་དང་། ངོས་ཀྱིས་ཁྱེད་ཀྱི་མདུན་དུ་ལྷག་པའི་འགྲན་རྩོད་སོགས་ལས་རྣམ་པར་རྒྱལ་བ་དང་། མེག་སི་ཁོ་མི་མང་གི་རེ་བ་དང་མངོན་འདོད་འགྲུབ་ཐུབ་པའི་སྨོན་འདུན་ཞུ་ཡི་ཡོད། ཅེས་གསུངས།

ལྷོ་ཨ་ཧྥི་རི་ཁའི་སྲིད་འཛིན་གསར་པར་འཚམས་འདྲི་མཛད།

ཕྱི་ལོ་ ༢༠༢༤ ཟླ་ ༦ ཚེས་ ༡༨ ཉིན་༧གོང་ས་རྒྱལ་བ་རིན་པོ་ཆེ་མཆོག་ནས་སྐུ་ཞབས་རཱ་མ་ཕཱོ་ས་ (Cyril Ramaphosa) མཆོག་སླར་ཡང་ལྷོ་ཨ་ཧྥེ་རི་ཁའི་སྲིད་འཛིན་དུ་འདེམས་ཐོན་བྱུང་བར་འཚམས་འདྲི་མཛད། དེ་ཡང་གསུང་འཕྲིན་ནང་ལྷོ་ཨ་ཧྥེ་རི་ཁའི་ནང་མི་རིགས་དབྱེ་འབྱེད་མཚམས་འཇོག་བྱས་པ་ནས་དམངས་གཙོའི་ལམ་ལུགས་བརྟན་པའི་རྒྱལ་ཁབ་ཅིག་ཏུ་གྱུར་ཡོད། ལྷོ་ཨ་ཧྥེ་རི་ཁའི་ནང་སྐད་དང་ཆོས་ལུགས། རིག་གཞུང་སོགས་མི་འདྲ་བའི་མི་རིགས་མང་པོ་ལྷན་གཅིག་ཏུ་ཞི་བདེ་མཉམ་གནས་ཐུབ་ཀྱི་ཡོད་པ་དེས་རྒྱལ་ཁབ་གཞན་དང་མི་རིགས་གཞན་ལ་མིག་དཔེ་གལ་ཆེན་སྟོན་གྱི་ཡོད། ངོས་ནས་ཁྱེད་ཀྱི་དབུ་ཁྲིད་འོག ཨ་ཧྥེ་རི་ཁའི་རྒྱལ་ཁབ་དར་རྒྱས་བྱུང་ཞིང་དམིགས་བསལ་གྱིས་མཐུན་རྐྱེན་ཞན་པའི་རིགས་ཀྱི་འཚོ་བ་ཡར་རྒྱས་གཏོང་ཐུབ་པར་རེ་བ་བྱེད་ཀྱིན་ཡོད། ཅེས་གསུངས།

རྒྱ་གར་སྲིད་འཛིན་གྱི་འཁྲུངས་སྐར་ལ་འཚམས་འདྲི་མཛད།

ཕྱི་ལོ་ ༢༠༢༤ ཟླ་ ༦ ཚེས་ ༢༠ ཉིན་བཞུགས་སྒར་༧རྒྱལ་བའི་ཕོ་བྲང་ནས་༧གོང་ས་རྒྱལ་བ་རིན་པོ་ཆེ་མཆོག་ནས་རྒྱ་གར་གྱི་སྲིད་འཛིན་ལྕམ་སྐུ་ཤྲི་མ་ཏི་མཆོག་དགུང་གྲངས་ ༦༦ ལ་ཕེབས་པའི་འཁྲུངས་སྐར་ལ་འཚམས་འདྲི་མཛད་པའི་ནང་། རྒྱ་གར་ནི་གནའ་བོའི་དུས་ནས་བྱམས་དང་སྙིང་རྗེའི་དཔལ་ཡོན་ཕུན་སུམ་ཚོགས་པའི་རྒྱལ་ཁབ་ཅིག་དང་། འཛམ་གླིང་གི་དམངས་གཙོའི་རྒྱལ་ཁབ་ཆེ་ཤོས་དེ་ཡིན་ཞིང་། ཁྱེད་ལ་འཛམ་གླིང་འདིར་ཞི་བདེ་དང་བདེ་སྐྱིད་བསྐྲུན་པར་ནུས་པ་ཧ་ཅང་ཆེན་པོ་ཞིག་མཆིས་ཤིང་། ངོས་རང་འཛམ་གླིང་ནང་རྒྱ་གར་གྱི་སྟོབས་ཤུགས་དང་སྣེ་འཁྲིད་ཀྱི་ནུས་པ་ལ་ཡིད་སྨོན་སྐྱེས་ཀྱི་ཡོད། ཅེས་དང་། བོད་མི་ཚོས་རྒྱ་གར་ནི་འཕགས་པའི་ཡུལ་ཏེ་ནང་ཆོས་ཀྱི་འབྱུང་ཁུངས་སུ་ངོས་འཛིན་བྱེད་ཀྱི་ཡོད་སྟབས། ངོས་རང་གིས་ཐུགས་བསྐྱེད་དམ་བཅའ་གཅིག་ནི་ནང་སེམས་ཀྱི་ཞི་བདེ་གོང་མཐོར་དང་། ཁོང་ཁྲོ་སོགས་ཀྱི་གཉེན་པོར་གྱུར་བའི་རྒྱ་གར་གྱི་ལོ་རྒྱུས་རང་བཞིན་ལྡན་པའི་གནའ་བོའི་སེམས་དང་སྲོག་གི་ཐད་ལ་གོ་རྟོགས་གང་ཐུབ་སྤེལ་རྒྱུ་དེ་ཡིན། ཞེས་གསུངས། མཇུག་ཏུ་ཁོང་མོས་དབུ་འཁྲིད་པའི་བྱ་གཞག་ཐམས་ཅད་ལམ་ལྷོངས་དང་སྐུ་གཟུགས་བདེ་ཐང་ཡོང་བའི་ཐུགས་སྨོན་མཛད།

ནཱ་ལནྡྲའི་གཙུག་ལག་སློབ་གཉེར་ཁང་དབུ་འབྱེད་གནང་བར་འཚམས་འདྲི་མཛད།

ཕྱི་ལོ་ ༢༠༢༤ ཟླ་ ༦ ཚེས་ ༢༤ ཉིན་༧གོང་ས་རྒྱལ་བ་རིན་པོ་ཆེ་མཆོག་ནས། རྒྱ་གར་གྱི་སྲིད་བློན་མུ་དྷི་མཆོག་ལ་འཚམས་འཕྲིན་བསྩལ་ཏེ།  རྒྱ་གར་གྱི་གནའ་བོའི་ཤེས་རིག་གི་ཞིང་ས་སྟེ། རྒྱ་གར་མངའ་སྡེ་བྷེ་ཧར་ནང་གི་གནས་ཆེན་རྒྱལ་པོའི་ཁབ་ཏུ་དཔལ་ནཱ་ལནྡྲའི་གཙུག་ལག་སློབ་གཉེར་ཁང་གསར་རྒྱག་ལེགས་གྲུབ་ཀྱིས་དབུ་འབྱེད་གནང་ཐུབ་པར་འཚམས་འདྲི་མཛད་ཅིང་། རྒྱ་གར་གྱི་གནའ་བོའི་ཤེས་རིག་ལ་དོ་སྣང་བྱེད་མཁན་གཞོན་སྐྱེས་རྒྱ་གར་ཕྱི་ནང་གཉིས་སུ་ཇེ་མང་དུ་འགྲོ་བཞིན་པ་དེར་ངོས་རང་སེམས་འགུལ་སྐྱེ་གི་འདུག གནའ་བོའི་ཤེས་རིག་དེ་དག་ལ་འཛམ་བུ་གླིང་འདི་སྙིང་རྗེ་ལྡན་པ་ཞིག་ཏུ་སྐྲུན་ཐུབ་པའི་ནུས་པ་ཡོད། ངོས་ནས་གནའ་བོའི་རྒྱ་གར་གྱི་ཤེས་རིག་ལ་དོ་སྣང་དང་གོ་རྟོགས་སྤེལ་རྒྱུར་དམ་བཅས་པ་བཞིན། ལོ་རྒྱུས་ཀྱི་གནས་ཆེན་དེར་ནཱ་ལནྡྲའི་གཙུག་ལག་སློབ་གཉེར་ཁང་གསར་པ་ཞིག་འཛུགས་སྐྲུན་གནང་བ་ནི་ངོ་མཚར་སྐྱེ་འོས་པ་ཞིག་ཡིན་པ་དང་། གཙུག་ལག་སློབ་གཉེར་ཁང་དེ་ཉིད་དར་ཞིང་རྒྱས་པའི་སྨོན་འདུན་ཞུ་རྒྱུ་ཡིན། ཞེས་གསུངས།

འཁྲུངས་སྐར་དུས་ཆེན་ལ་གསུང་འཕྲིན་བསྩལ།

ཕྱི་ལོ་ ༢༠༢༤ ཟླ་ ༧ ཚེས་ ༦ ཉིན་ཨ་རིའི་ནེའུ་ཡོག་གྲོང་ཁྱེར་གྱི་བཞུགས་གནས་མགྲོན་ཁང་ནས་༧གོང་ས་རྒྱལ་བ་རིན་པོ་ཆེ་མཆོག་ཕྱི་ལུགས་ཀྱི་དགུང་གྲངས་ ༨༩ ལ་ཕེབས་པའི་འཁྲུངས་སྐར་གསུང་འཕྲིན་བསྩལ་བའི་ནང་། དེ་རིང་ངོས་ཀྱི་སྐྱེས་སྐར་དུས་ཆེན་ལ་གཞིས་བྱེས་མི་མང་མང་པོ་ཞིག་གིས་རྟེན་འབྲེལ་ཞུ་བཞིན་ཡོད་པ་རེད། སྤྲོ་སེམས་འཁོལ་ནས་བསྡད་ཡོད་པ་རེད། དུས་ཚོད་འདིར་གཞིས་བྱེས་བོད་མི་སྡེར་གཏོགས་ཧི་མ་ལ་ཡའི་རི་རྒྱུད་སོགས་ཚང་མས་ངོས་ཀྱི་སྐྱེས་སྐར་ལ་སྨོན་ལམ་རྒྱག་གི་ཡོད་པ་ལ་ཐུགས་རྗེ་ཆེ་ཞུ་རྒྱུ་ཡིན། ངོས་རང་ལོ་དགུ་བཅུ་ཡས་མས་ལ་སླེབས་ཡོད། ད་ལྟ་གཟུགས་པོ་མ་བདེ་བ་གང་ཡང་མི་འདུག རྐང་པ་ཕྲན་བུ་མ་བདེ་བ་ཞིག་འདུག་མ་གཏོགས་གཞན་གཟུགས་པོ་བདེ་ཐག་ཆོད་རེད། གང་ལྟར་གཞིས་བྱེས་བོད་མི་ཚང་མས་ངོས་ཀྱི་སྐྱེས་སྐར་དུས་ཆེན་ཐོག་ལ་སྨོན་ལམ་རྒྱག་པ་སོགས་བྱེད་ཀྱི་ཡོད་པར་ཐུགས་རྗེ་ཆེ་ཞུ་རྒྱུ་ཡིན། གང་ལྟར་ངོས་རང་མདོ་སྨད་ཀྱི་ས་ཆ་ནས་སྐྱེས་པའི་མི་ཞིག་ལ་༧རྒྱལ་དབང་གི་མིང་ཐོགས་ནས་གཞིས་ལ་བསྡད་པའི་རིང་དུ་ཧུར་ཐག་བྱས་པ་ཡིན་ལ། ལྷག་པར་ང་ཚོ་བཙན་བྱོལ་བྱས་ཏེ་བསྡད་པའི་རིང་ལ་གང་ཡོང་ཅི་ཡོང་ཧུར་ཐག་བྱས་པ་ཡིན། དེའི་ཚོད་ཀྱིས་ཕན་ཐོགས་ཀྱང་རྒྱ་ཆེན་པོ་ཡོད་པ་ལྟ་བུ་འདུག འཛམ་གླིང་འདིར་དོ་སྣང་ཆེ་རུ་ཆེ་རུ་འགྲོ་བཞིན་འདུག་པས་ངོས་ཀྱིས་བོད་བསྟན་སྲིད་ཀྱི་དོན་དག་ཕྲན་བུ་འགྲུབ་ཡོད་བསམ་པ་དྲན་གྱི་འདུག ཅེས་གསུངས།

དབྱིན་ཇིའི་སྲིད་བློན་གསར་པར་འཚམས་འདྲི་མཛད།

ཕྱི་ལོ་ ༢༠༢༤ ཟླ་ ༧ ཚེས་ ༦ ཉིན་༧གོང་ས་རྒྱལ་རིན་པོ་ཆེ་མཆོག་ནས། དབྱིན་ཇིའི་སྲིད་བློན་གསར་པ་སི་ཊར་མཱེར་ (Keir Starmer) མཆོག་གི་ངལ་རྩོལ་ཆབ་སྲིད་ཚོགས་པར་དབྱིན་ཇིའི་རྒྱལ་ཡོངས་ཀྱི་འོས་བསྡུ་ཆེན་མོའི་རྒྱལ་ཁ་ཐོབ་སྟེ་ཁོང་སྲིད་བློན་དུ་བསྐོ་བཞག་བྱུང་བར་འཚམས་འདྲི་མཛད་ཡོད་ཅིང་།   དེང་སྐབས་འཛམ་གླིང་ཐོག་དཀའ་རྙོག་མང་པོ་ཞིག་ལ་གདོང་ལེན་གནང་དགོས་པ་ཆགས་ཡོད།  དབྱིན་ཡུལ་ངོས་ནས་གཅིག་ལ་གཅིག་རྟེན་ཤུགས་ཆེ་རུ་འགྲོ་བའི་འཛམ་གླིང་འདིའི་ནང་ཞི་བདེ་དང་བརྟན་ལྷིང་ཐོག་ཞབས་འདེགས་རླབས་ཆེན་བསྒྲུབ་ཐུབ་པར་ཡིད་ཆེས་ཡོད།  ངོས་རང་དབྱིན་ཡུལ་ནང་ཐེངས་འགའ་ཕྱིན་སྐབས་དབྱིན་ཡུལ་མི་མང་གིས་ངོས་ཀྱི་གཞི་རྩའི་མིའི་བྱམས་བརྩེའི་རིན་ཐང་དང་ཆོས་ལུགས་ཕན་ཚུན་བར་འཆམ་མཐུན་གྱི་ལས་དོན་དེར་དོ་སྣང་ཤུགས་ཆེན་གནང་བར་ཡིད་སྨོན་བྱེད་ཀྱི་ཡོད། ཅེས་གསུངས།

ཡུ་རོབ་གྲོས་ཚོགས་དང་ལྷན་ཚོགས་ཀྱི་ཚོགས་གཙོ་གཉིས་ལ་འཚམས་འདྲི་མཛད།

ཕྱི་ལོ་ ༢༠༢༤ ཟླ་ ༧ ཚེས་ ༢༢ ཉིན་ཨ་རིའི་གྲོང་ཁྱེར་ནེའུ་ཡོག་ཏུ། ༧གོང་ས་རྒྱལ་བ་རིན་པོ་ཆེ་མཆོག་ནས་ལྕམ་རོ་བྷར་ཊ་མེཊ་སོ་ལ་ (Roberta Metsola) མཆོག་དང་ལྕམ་ཨུར་སུ་ལ་ཝོན་དེར་ལེ་ཡེན་ (Ursula von der Leyen) མཆོག་གཉིས་ཡུ་རོབ་གྲོས་ཚོགས་ཀྱི་ཚོགས་གཙོ་དང་ཡུ་རོབ་ལྷན་ཚོགས་ཀྱི་ཚོགས་གཙོར་བསྐྱར་དུ་འོས་འདེམས་བྱུང་བར་འཚམས་འདྲིའི་གསུང་འཕྲིན་བསྩལ་ཏེ། འདས་པའི་ལོ་ངོ་དྲུག་ཅུ་ལྷག་གི་རིང་ཡུ་རོབ་མཉམ་འབྲེལ་གྱི་དགོངས་པས་ཚོགས་མི་རྒྱལ་ཁབ་ཁག་དང་ས་ཁུལ་དེའི་ནང་ཞི་བདེ་སྲུང་སྐྱོབ་བྱས་ཡོད་པར་བརྟེན། ༧མགོན་པོ་གང་ཉིད་མཆོག་གིས་ཡུ་རོབ་མཉམ་འབྲེལ་མཐུན་ཚོགས་ཀྱི་དགོངས་པ་ལ་བསྔགས་བརྗོད་མཛད་པ་དང་བསྟུན། འཛམ་གླིང་དམག་ཆེན་གཉིས་པའི་རྗེས་སུ་བྱུང་བའི་འབྲེལ་ལམ་བསྐྱར་གསོ་དང་མཉམ་ལས་ཀྱི་དགོངས་པའི་ཐོག་ནས་ཡུ་རོབ་མཉམ་འབྲེལ་མཐུན་ཚོགས་ཀྱིས་རྒྱལ་ཁབ་སོ་སོའི་ས་གནས་ཀྱི་ཁེ་ཕན་ལས་སྤྱིའི་བདེ་དོན་གལ་ཆེ་བར་བརྩིས་ཡོད་པ་མ་ཟད། དེས་འཛམ་གླིང་ནང་ཕན་ཚུན་གཅིག་རྟེན་ཇེ་ཆེར་འགྲོ་བཞིན་པ་དང་དཀའ་ངལ་ཅན་དུ་གྱུར་སྐབས་ཤེས་རབ་དང་བསམ་བློ་སྨིན་པའི་རྣམ་པ་མཚོན་གྱི་ཡོད། ཅེས་གསུངས།

རྒྱ་གར་སྲིད་བློན་མུ་དྷི་མཆོག་གི་འཁྲུངས་སྐར་ལ་འཚམས་འདྲི་མཛད།

ཕྱི་ལོ་ ༢༠༢༤ ཟླ་ ༩ ཚེས་ ༡༧ ཉིན་༧གོང་ས་རྒྱལ་བ་རིན་པོ་ཆེ་མཆོག་ནས་རྒྱ་གར་གྱི་སྲིད་བློན་མུ་དྷི་མཆོག་དགུང་གྲངས་ ༧༤ ཕེབས་པའི་འཁྲུངས་སྐར་ལ་འཚམས་འཕྲིན་བསྩལ་ཡོད་པ་དང་། འཚམས་འཕྲིན་ནང་རྒྱ་གར་གྱི་འཚེ་མེད་ཞི་བ་དང་སྙིང་རྗེའི་སྲོལ་རྒྱུན་གྱིས་འཛམ་གླིང་ཡོངས་ལ་མིག་དཔེ་བསྟན་ཡོད། དེ་བཞིན་རྒྱ་གར་ནི་ནུས་པ་ལྡན་པའི་དམངས་གཙོའི་རྒྱལ་ཁབ་སྟོབས་ཆེན་ཞིག་ཡིན་པ་དང་། རྒྱལ་སྤྱིའི་སྟེང་ཤུགས་རྐྱེན་ཆེན་པོ་ཡོད་པར་བརྟེན། རྒྱ་གར་གྱིས་ཕན་ཚུན་གཅིག་ལ་གཅིག་རྟེན་དུ་གྱུར་བའི་འཛམ་གླིང་ནང་ཞི་བདེ་དང་གྲོས་མོལ་ཡོང་བར་ཞབས་འདེགས་སྒྲུབ་པའི་ནུས་པ་གལ་ཆེན་ཡོད།  དེ་བཞིན་ངོས་ཀྱིས་གོ་སྐབས་འདི་བརྒྱུད་ནས་ལོ་ངོ་དྲུག་ཅུ་རེ་ལྔའི་རིང་རྒྱ་གར་གཞུང་དམངས་གཉིས་ཀྱིས་ངོས་དང་བཙན་བྱོལ་བོད་མི་རྣམས་ལ་མཐུན་འགྱུར་རོགས་རམ་གནང་བར་བཀའ་དྲིན་ཆེ་ཞུ་རྒྱུ་ཡིན། ཞེས་གསལ་འདུག

ཨ་རིའི་སྲིད་འཛིན་ཟུར་པའི་འཁྲུངས་སྐར་ལ་འཚམས་འདྲི་མཛད།

ཕྱི་ལོ་ ༢༠༢༤ ཟླ་ ༡༠ ཚེས་ ༢ ཉིན་༧གོང་ས་རྒྱལ་བ་རིན་པོ་ཆེ་མཆོག་ནས་ཨ་རིའི་སྲིད་འཛིན་ཟུར་པ་སྐུ་ཞབས་ཇིམ་མི་ཁར་ཊར་ (Jimmy Carter) མཆོག་དགུང་གྲངས་ ༡༠༠ ཕེབས་པའི་འཁྲུངས་སྐར་ལ་འཚམས་འདྲི་མཛད་པའི་ནང་། ངོས་རང་གིས་ཁྱེད་ཀྱིས་ནང་མི་དང་ལྷན་སྤྲོ་སྣང་ལྡན་པའི་ཐོག་ནས་སྐྱེས་སྐར་སྲུང་གཙི་བྱེད་ཐུབ་པའི་རེ་བ་ཡོད། ཁྱེད་ཀྱི་སྐུ་ཚེའི་བཞུད་ལམ་ནི་ཆེས་དོན་སྙིང་ལྡན་པ་ཞིག་ཡིན་པའི་ཁར། ཁྱེད་ཀྱིས་ཤེས་གསལ་བཞིན་ངོས་རང་གིས་དུས་ཡུན་རིང་པོ་ནས་ཁྱེད་ཀྱི་རླབས་ཆེན་གྱི་མཛད་རྗེས་ལ་ཡིད་སྨོན་བྱེད་ཀྱི་ཡོད་ལ།  རླབས་ཆེན་མཛད་རྗེས་དེ་དག་མུ་མཐུད་དུ་རྒྱུན་འཁྱོངས་མུས་ཡིན་པ་ནི་ཡིད་དུ་འོང་བ་ཞིག་རེད། དེ་བཞིན་ཁྱེད་ཀྱིས་གཞན་དོན་གྱི་སླད་དུ་ཐུགས་ཁུར་བྱེད་མུས་ཡིན་པ་ནི་ང་ཚོས་ཆེས་ཡིད་སྨོན་བྱ་དགོས་པ་ཞིག་ཡིན་པས། ངོས་རང་གིས་སྙིང་དབུས་ནས་ཁྱེད་ལ་ཐུགས་རྗེ་ཆེ་ཞུ་ན་འདོད། ཅེས་གསུངས།

ཉི་ཧོང་གི་སྲིད་བློན་གསར་པར་འཚམས་འདྲི་མཛད།

ཕྱི་ལོ་ ༢༠༢༤ ཟླ་ ༡༠ ཚེས་ ༢ ཉིན་༧གོང་ས་རྒྱལ་བ་རིན་པོ་ཆེ་མཆོག་ནས་ཉི་ཧོང་གི་སྲིད་བློན་ཐེངས་ ༦༥ པ་ཤི་གྷེ་རུ་ཨི་ཤི་བྷ་ (Shigeru Ishiba) མཆོག་ལ་འཚམས་འདྲིའི་གསུང་འཕྲིན་བསྩལ་བའི་ནང་། འདས་པའི་ལོ་ངོ་མང་པོའི་ནང་ངོས་རང་ཉི་ཧོང་དུ་ཡང་ཡང་འགྲོ་རྒྱུའི་གོ་སྐབས་བྱུང་ཡོད་པ་མ་ཟད། ངོས་ནས་འགྲོ་བ་མིའི་གཞི་རྩའི་རིན་ཐང་སྙིང་རྗེ་དང་ཆོས་ལུགས་མཐུན་སྒྲིལ་གོང་འཕེལ་གཏོང་བར་འབད་བརྩོན་དང་། རྡུལ་ཕྲན་མཚོན་ཆ་ཚུད་པའི་གོ་མཚོན་མེད་པའི་འཛམ་གླིང་ཞི་བདེ་བསྐྲུན་ཐབས་ཐད་ལ་རྒྱལ་ཁབ་འདིའི་མི་མང་རྣམས་ཀྱིས་དོ་སྣང་དང་སྤྲོ་སེམས་བསྟན་པར་རྗེས་སུ་ཡི་རངས་ཡོད། ཁྱེད་ཀྱིས་ཉི་ཧོང་མི་མང་གི་རེ་བ་དང་མངོན་འདོད་ལྟར་ལས་དོན་མཐའ་དག་བསྒྲུབ་ཐུབ་རྒྱུ་དང་ཞི་བདེ་ལྡན་པའི་འཛམ་གླིང་ཞིག་བསྐྲུན་རྒྱུའི་རེ་བ་ཡོད་ཅེས་གསུངས།

ནོ་སྦེལ་ཞི་བདེ་གཟེངས་རྟགས་ཐོབ་པར་འཚམས་འདྲི་མཛད།

ཕྱི་ལོ་ ༢༠༢༤ ཟླ་ ༡༠ ཚེས་ ༡༢ ཉིན་༧གོང་ས་རྒྱལ་བ་རིན་པོ་ཆེ་མཆོག་ནས། ཕྱི་ལོ་ ༢༠༢༤ ལོའི་ནོ་སྦེལ་ཞི་བདེ་གཟེངས་རྟགས་དེ་ཉི་ཧོང་གི་ནི་ཧོན་ཧེ་ཌན་ཡོ་ (Nihon Hidankyo)  ཚོགས་པར་ཐོབ་པར་འཚམས་འདྲི་མཛད་པའི་ནང་།  དེ་སྔ་ངོས་རང་ཉི་ཧོང་དུ་ཕྱིན་སྐབས་ཁྱེད་ཚོ་ཁག་ཅིག་དང་ཐུག་རྒྱུའི་གོ་སྐབས་བྱུང། ངོས་ཀྱིས་ཁྱེད་རྣམ་པའི་ཕྱག་ལས་ལ་ཡི་རངས་བསྔགས་བརྗོད་ཞུ་ཡི་ཡོད། ནོར་ཝེའི་ནོ་སྦེལ་གཟེངས་རྟགས་ཚོགས་ཆུང་གི་ངོས་ནས་འདི་ལོའི་ནོ་སྦེལ་ཞི་བདེ་གཟེངས་རྟགས་དེ་ནི་ཧོན་ཧེ་ཌན་ཡོ་ཚོགས་པས་རྡུལ་ཕྲན་མཚོན་ཆ་མེད་པའི་འཛམ་གླིང་བསྐྲུན་ཐབས་དང་། རྡུལ་ཕྲན་མཚོན་ཆ་ནམ་ཡང་བེད་སྤྱོད་བྱ་མི་ཉན་པ་ར་སྤྲོད་བྱེད་ཆེད་སྐུ་ལས་ཧུར་ཐག་བསྐྱོན་པར་ཆེ་མཐོང་གིས་ ༢༠༢༤ ལོའི་ནོ་སྦེལ་ཞི་བདེ་གཟེངས་རྟགས་དེ་ནི་ཧོན་ཧེ་ཌན་ཡོ་ཚོགས་པར་ཕུལ་བར་བསྔགས་བརྗོད་ཞུ་ཡི་ཡོད། ཅེས་གསུངས།

ཇཱ་མུ་ཀ་ཤི་མུར་གྱི་སྤྱི་ཁྱབ་བློན་ཆེན་ལ་འཚམས་འདྲི་མཛད།

ཕྱི་ལོ་ ༢༠༢༤ ཟླ་ ༡༠ ཚེས་ ༡༦ ཉིན་༧གོང་ས་རྒྱལ་བ་རིན་པོ་ཆེ་མཆོག་ནས་རྒྱ་གར་གྱི་ཇཱ་མུ་ཀ་ཤི་མུར་དབུས་འཛིན་སྐྱོང་མངའ་ཁུལ་གྱི་སྤྱི་ཁྱབ་བློན་ཆེན་ཨོ་མཱར་ཨབ་དྷུལ་ལཱ་ཧ་ (Omar Abdullah ) མཆོག་ལ་འཚམས་འདྲིའི་གསུང་འཕྲིན་བསྩལ་བའི་ནང་། ངོས་ཀྱིས་སྐུ་ཞབས་ཤེ་ཁ་ཨབ་བྷུལ་ཧ་ནས་རྩིས་པའི་ཁྱེད་ཀྱི་མི་རབས་གསུམ་གྱི་ཁྱིམ་རྒྱུད་སྐོར་ཧ་ཅང་གསལ་བོ་ངོ་ཤེས་ཀྱི་ཡོད་པ་མ་ཟད། ངོས་ཀྱིས་ང་ཚོའི་གྲོགས་པོའི་མཛའ་འབྲེལ་ཧ་ཅང་གཙིགས་ཆེན་དུ་འཛིན་གྱི་ཡོད། ཅེས་དང་། སྐུ་ཞབས་ཨོ་མཱར་ཨབ་དྷུལ་ལཱ་ཧ་ལགས་ཀྱིས་མ་འོངས་གདོང་ལེན་གནང་དགོས་ཀྱི་རིགས་དང་གོ་སྐབས་སོགས་དམ་འཛིན་གྱིས་ཇཱ་མུ་ཀ་ཤི་མུར་གྱི་མི་མང་གི་མངོན་འདོད་ལེགས་འགྲུབ་ཡོང་བའི་ཐུགས་སྨོན་མཛད།

ཊོམ་ཕུ་མཆོག་ལ་ཨ་རིའི་སྲིད་འཛིན་གྱི་རྒྱལ་ཁ་ཐེངས་གཉིས་པ་ཐོབ་པར་འཚམས་འདྲི་མཛད།

ཕྱི་ལོ་ ༢༠༢༤ ཟླ་ ༡༡ ཚེས་ ༧ ཉིན་༧གོང་ས་རྒྱལ་བ་རིན་པོ་ཆེ་མཆོག་ནས་ཨ་རིའི་སྲིད་འཛིན་གྱི་འོས་བསྡུའི་ཁྲོད་ཌོ་ནལ་ཊོ་ཕུ་མཆོག་ལ་རྒྱལ་ཁ་ཐེངས་གཉིས་པ་ཐོབ་པར་འཚམས་འདྲིའི་གསུང་འཕྲིན་བསྩལ་ཏེ།  ཨ་རི་ནི་དམངས་གཙོ་དང་རང་དབང་། ཁྲིམས་ཀྱི་དབང་བསྒྱུར་གྱི་མཚོན་དོན་དུ་བརྩི་བཞིན་ཡོད་ལ། འཛམ་གླིང་ཡོངས་ཀྱིས་ཨ་རིའི་དམངས་གཙོའི་མཐོང་སྣང་དང་དབུ་ཁྲིད་ལ་རེ་བ་ཆེན་པོ་བཅོལ་ཡོད། འཛམ་གླིང་གི་ས་ཕྱོགས་གང་སར་འཁྲུག་ཆ་དོད་པོ་ཆགས་པའི་དུས་སྐབས་འདིར། ཁྱེད་ཀྱིས་ཞི་བདེ་དང་བརྟན་ལྷིང་ལ་དབུ་ཁྲིད་བྱེད་པའི་རེ་བ་ཡོད། ཅེས་གསུངས།

གསར་འགོད་པ་སྐལ་བཟང་སྦྱིན་པས་ཕྱོགས་སྒྲིག་བྱས།