བོད་རྒྱལ་ལོ་ ༢༡༥༡ ལོར་༧གོང་ས་མཆོག་ལ་ཕུལ་བའི་གཟེངས་རྟགས་དང་མཚན་གནས་རྗེས་འབྲེལ་གྱི་མཛད་འཕྲིན་ཁག

ཕྱི་ལོ་ ༢༠༢༤-༢༠༢༥ ལོའི་༧གོང་ས་ཏཱ་ལའི་བླ་མའི་སློབ་ཡོན་གསལ་བསྒྲགས་བྱས་འདུག

ཕྱི་ལོ་ ༢༠༢༤ ཟླ་ ༣ མགོ་ཙམ་ལ་ཏཱ་ལའི་བླ་མའི་དགའ་ལྡན་ཕོ་བྲང་དགེ་རྩ་ཚོགས་པས། ཕྱི་ལོ་ ༢༠༢༤ དང་ ༢༠༢༥ ལོའི་ཏཱ་ལའི་བླ་མའི་གཙུག་ལག་སློབ་གཉེར་བའི་སློབ་ཡོན་གསལ་བསྒྲགས་གནང་། སློབ་ཡོན་ཁྲོད་ཡུ་རོབ་དང་ཨ་རི། ཨོ་གླིང་། རྒྱ་གར་ཕུད་པའི་ཨེ་ཤ་ཡའི་རྒྱལ་ཁབ་ཏུ་གཙུག་ལག་རབ་འབྱམས་པའི་སློབ་སྦྱོང་བྱེད་མཁན་གྱི་བོད་པའི་སློབ་མ་རྣམས་ནས་ཆ་ཤས་གོ་སྐབས་ལེན་ཆོག་གི་ཡོད་པའི་ཁར། དེ་སྔོན་སློབ་ཡོན་ཐོབ་ཟིན་པ་དག་གིས་ཀྱང་བསྐྱར་དུ་སློབ་ཡོན་ཞུ་ཆོག་གི་ཡོད་པ་དང་། སློབ་ཡོན་སྤྲོད་པའི་སློབ་ཚན་གྱི་ཁོངས་སུ་སྐྱེས་དངོས་ཕྲ་རག་གི་དཔྱད་རིག་(Microbiology) དང་། སྨན་སྦྱོར་རིག་པ་(Pharmacology)། རིམས་ནད་དཔྱད་རིག་(Epidemiology) སོགས་ཚུད་པའི་ཁྲིམས་ལུགས་དང་། ཚོང་དོན་རིག་པ། གློག་ཀླད་ཚན་རིག རྒྱལ་སྤྱིའི་འབྲེལ་ལམ་རིག་པ་སོགས་ཡོད་འདུག་ལ། སློབ་ཡོན་དེ་བརྒྱུད་ནས་ཕྱི་རྒྱལ་ཁག་ཏུ་སློབ་གཉེར་བྱེད་མཁན་གྱི་བོད་པའི་སློབ་མ་རྣམས་ལ་ཤེས་ཡོན་གྱི་ཐད་ནས་རོགས་འདེགས་བྱས་ཏེ། བོད་པའི་སྤྱི་ཚོགས་དང་གོ་ལའི་སྤྱི་ཚོགས་སུ་ནུས་པ་གང་ཡོད་ཀྱིས་ཞབས་འདེགས་ཞུ་རྒྱུའི་དམིགས་འབེན་བཟུང་ཡོད་པ་རེད།

སངས་རྒྱས་ཀྱི་ཕྱག་གི་རིང་བསྲེལ་སྤྱན་འབུལ།

ཕྱི་ཟླ་ ༤ ཚེས་ ༤ ཉིན་སེངྒ་ལའི་ནང་པའི་བླ་ཆེན་ (Waskaduwa Mahindawamsa Nayaka Thero) མཆོག་གིས་སེངྒ་ལ་ནས་་སངས་རྒྱས་ཀྱི་ཕྱག་གི་རིང་བསྲེལ་ཞིག་བཞུགས་སྒར་དུ་བསྣམས་ཕེབས་ཤིང་། བཞུགས་སྒར་ཁུལ་གྱི་སེར་སྐྱ་མི་མང་གིས་དགའ་དད་སྤྲོ་གསུམ་གྱི་ངང་ནས་གྷ་གྷལ་གནམ་ཐང་ནས་བཞུགས་སྒར་རྒྱལ་བའི་ཕོ་བྲང་བར་ཕེབས་བསུའི་སྣེ་ལེན་ཞུས། སྐབས་དེར་༧གོང་ས་རྒྱལ་བ་རིན་པོ་ཆེ་མཆོག་སྐུ་དངོས་སུ་ཕོ་བྲང་གི་སྒོ་འགྲམ་དུ་ཕེབས་ཏེ། སངས་རྒྱས་ཀྱི་རིང་བསྲེལ་ཕོ་བྲང་དུ་གདན་འདྲེན་ཞུས་གནང་མཚམས།  སེངྒ་ལའི་ནང་པའི་བླ་ཆེན་ (Waskaduwa Mahindawamsa Nayaka Thero) མཆོག་གིས་སྐུ་དངོས་སུ་༧གོང་ས་མཆོག་ནས་འཛམ་གླིང་སྤྱིའི་བདེ་རྩ་དང་ལྷག་དོན་སངས་རྒྱས་ཀྱི་བསྟན་པར་མཛད་འཕྲིན་བསམ་གྱི་མི་ཁྱབ་པ་བསྐྱངས་པར་བཀའ་དྲིན་རྗེས་དྲན་མཚོན་སླད་ཤྲི་ལངྒའི་རཱ་ཇཱ་གུ་རུ་ཤྲཱི་སུ་བྷུ་ཏི་མཧཱ་བི་ཧཱ་ར་ཡའི་དགོན་པའི་(the Raja Guru Shri Subuti Mahavihara Monastery of Sri Lanka)རྟེན་གྱི་གཙོ་བོ་སེར་སྐྱའི་གྲོང་ནས་རྙེད་པའི་སྟོན་པ་ཐུབ་པའི་དབང་པོའི་ཕྱག་གི་རིང་བསྲེལ་དེ་༧གོང་ས་རྒྱལ་བ་རིན་པོ་ཆེ་མཆོག་ལ་ཐུགས་དམ་གྱི་རྟེན་དུ་འབུལ་ལམ་ཞུས།

རྒྱ་གར་གྱི་སྲིད་བློན་ཟུར་པའི་གཟེངས་རྟགས་འབུལ་ལམ།

ཕྱི་ཟླ་ ༥ ཚེས་ ༨ ཉིན་བཞུགས་སྒར་རྒྱལ་བའི་ཕོ་བྲང་དུ། རྒྱ་གར་གྱི་སྲིད་བློན་ཟུར་པ་ནཱ་རཱ་སིམ་ཧ་ (Narasimha) དམ་པ་མཆོག་གི་དགེ་རྩ་ཚོགས་པའི་ཚོགས་མི་ཁག་ཅིག་གིས། ༸གོང་ས་རྒྱལ་བ་རིན་པོ་ཆེ་མཆོག་གིས་འཛམ་གླིང་གི་ཞི་བདེའི་རང་གཟུགས་མཚོན་གྱི་ཡོད་པའི་མཛད་འཕྲིན་ལ་ཆེ་བསྟོད་ངོས་འཛིན་མཚོན་སླད། རྒྱ་གར་གྱི་སྲིད་བློན་ཟུར་པ་ནཱ་རཱ་སིམ་ཧ་དམ་པ་མཆོག་གི་རྗེས་དྲན་གཟེངས་རྟགས་ (Narasimha Rao Memorial Award) ཞེས་པ་དེ་འབུལ་ལམ་ཞུས། སྐབས་དེར་༧མགོན་པོ་གང་ཉིད་མཆོག་གིས། དཀའ་ངལ་ཚང་མའི་རྐྱེན་རྩ་ནི་གཞན་ལ་སྐྱོན་འཛུགས་བྱ་རྒྱུ་མ་ཡིན་པར། རང་ཉིད་ཀྱི་མ་རིག་པའི་བློ་ལ་བརྟེན་ནས་བྱུང་གི་ཡོད་པའི་བཀའ་སློབ་བསྩལ།

བོད་ཀྱི་ཆབ་སྲིད་གནས་བབ་དང་འབྲེལ་བའི་དཔེ་དེབ་དབུ་འབྱེད་མཛད།

ཕྱི་ཟླ་ ༥ ཚེས་ ༢༡ ཉིན་བཞུགས་སྒར་རྒྱལ་བའི་ཕོ་བྲང་དུ་༧གོང་ས་རྒྱལ་བ་རིན་པོ་ཆེ་མཆོག་གིས་རྒྱ་དཀར་ནག་དང་བོད། རང་སྲིད་རང་སྐྱོང་གི་འཚོལ་སྙེག་ཅེས་པའི་དཔེ་དེབ་ཅིག་དབུ་འབྱེད་བཀའ་དྲིན་བསྐྱངས་གནང་ཡོད་ཅིང་། དེབ་དེའི་ནང་བོད་མི་ཚོས་རང་སྲིད་རང་སྐྱོང་གི་ཆེད་དུ་འཐབ་རྩོད་བྱས་པའི་འབྱུང་ཁུངས་དང་།  རང་སྲིད་རང་སྐྱོང་ངམ་རང་བཙན་གྱི་ཆེད་དུ་ཞི་བའི་ལས་འགུལ་སྤེལ་བའི་རིམ་པ་སྣ་ཚོགས་གླེང་ཡོད་པ་མ་ཟད།  རྩོམ་པ་པོ་རྒྱ་གར་གྱི་སི་རེ་ན་རཱ་ཡ་ནཱ་(Sree Narayana) མཐོ་སློབ་ཀྱི་འབུམ་རམས་པའི་སློབ་དཔོན་ཆེན་མོ་གཞོན་པ་ལྕམ་ར་ཀེའུ་ (Rakhee Viswambharan) ལགས་ཀྱིས་བོད་དོན་ཞི་བའི་ལམ་ནས་ཐག་གཅོད་བྱས་ན་རྒྱ་གར་དང་རྒྱ་ནག་དབར་གྱི་ས་མཚམས་ཀྱི་གནད་དོན་ཡང་ཐག་གཅོད་ཐུབ་རྒྱུ་ཡིན་པའི་རྒྱུ་མཚན་བཀོད་ཡོད་འདུག

༧གོང་ས་ཏཱ་ལའི་བླ་མའི་གོ་ལའི་འཆར་སྣང་གི་ལྷན་ཚོགས་ཐེངས་བཞི་པ་ཚོགས།

ཕྱི་ལོ་ ༢༠༢༤ ཟླ་ ༦ ཚེས་ ༡༣ ནས་ ༡༧  བར་ཉིན་གྲངས་ལྔའི་རིང་ཨ་རིར་རྟེན་གཞི་བྱས་ཡོད་པའི་སེང་གེའི་གད་རྒྱངས་ (lion’s roar) ཚོགས་པ་དང་ཨ་རིའི་བོད་ཁང་གཉིས་ཀྱི་གོ་སྒྲིག་འོག་དྲ་ལམ་བརྒྱུད། ཕྱི་ལོ་ ༢༠༢༤ ལོའི་༧གོང་ས་ཏཱ་ལའི་བླ་མའི་གོ་ལའི་འཆར་སྣང་གི་ལྷན་ཚོགས་ཞེས་པ་སྐོང་ཚོགས་གནང་ཡོད་ཅིང་། ལྷན་ཚོགས་ཀྱི་ཐོག་ཏུ་༧གོང་ས་མཆོག་གི་དགོངས་བཞེད་མཐར་ཐུག་གི་བདེ་སྐྱིད་འཚོལ་སྟངས། སེམས་ཁམས་དང་སྒོམ་སྒྲུབ་སྐོར། འཛམ་གླིང་ཞི་བདེའི་སྐོར། བྱམས་པ་དང་སྙིང་རྗེའི་སྐོར། གནའ་བོའི་རིག་གཞུང་དང་སེམས་ཁམས་འཕྲོད་བསྟེན་སྐོར་བཅས་ཀྱི་བརྗོད་གཞིའི་ཐོག་བགྲོ་གླེང་གནང་། ལྷན་ཚོགས་དེར་མཉམ་ཞུགས་གནང་མཁན་གྱི་ཁྲོད་དུ་ཝེ་སི་ལེ་ཡཱན་གཙུག་ལག་སློབ་གླིང་ (Wesleyan University) གི་ཆོས་ལུགས་སྡེ་ཚན་གྱི་སློབ་དཔོན་ཟུར་པ་ཇཱན་ཝེ་ལི་སི་(Jan Willins) ལགས་དང་། འཛི་སྒར་ཀོང་སྤྲུལ་རིན་པོ་ཆེ། ཨ་རིའི་བོད་ཁང་གི་ཚོགས་གཙོ་ཟུར་པ་རོ་བྷེར་ཌི་ཐུར་མཱན་ (Robert  Thurman)ལགས།  སེམས་ཁམས་རིག་པ་བ་དང་རྩོམ་པ་པོ་ཕི་ལཱར་ཇེན་ནེ་སི་ (Pilar Jennings) ལགས། བོད་ཀྱི་གསོ་བ་རིག་པའི་སློབ་གཉེར་ཁང་གི་སྨན་པ་ཉི་ཟླ་ལྕེ་ནག་ཚང་བཅས་དགེ་བཤེས་མ་དང་། ཉམས་ཞིབ་པ། རྩོམ་པ་པོ་གྲགས་ཅན། ཉམས་ལེན་པ་སོགས་མང་པོ་ཞིག་མཉམ་ཞུགས་གནང་ཡོད་འདུག

དགུང་གྲངས་ ༨༩ ལ་ཕེབས་པའི་སྐུའི་འཁྲུངས་སྲུང་གཙི།

ཕྱི་ཟླ་ ༧ ཚེས་ ༦ ཉིན་བཞུགས་སྒར་དྷ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ། ༧གོང་ས་རྒྱལ་བ་རིན་པོ་ཆེ་མཆོག་ཕྱི་ལུགས་ཀྱི་དགུང་གྲངས་ ༨༩ ལ་ཕེབས་པའི་གཞུང་འབྲེལ་འཁྲུངས་སྐར་སྲུང་གཙི་གནང་། མཛད་སྒོའི་ཐོག་སྐུ་མགྲོན་གཙོ་བོ་འབྲས་ལྗོངས་སྤྱི་ཁྱབ་བློན་ཆེན་པྲེམ་སིངྒ་ཏ་མང་ (Prem Singh Tamang) མཆོག་དང་། དམིགས་བསལ་སྐུ་མགྲོན་རྒྱ་གར་བྱང་ཤར་མངའ་སྡེ་ཨ་རུ་ན་ཅལ་ཁུལ་གྱི་གྲོས་ཚོགས་འོག་མའི་འཐུས་མི་སྐུ་ཞབས་ཏ་པིར་གྷའོ་ (Tapir Gao) ལགས་གཉིས་ཀྱི་དབུས་པའི་སྐུ་མགྲོན་དུ་འབྲས་ལྗོངས་མངའ་སྡེའི་གྲོས་ཚོགས་ཀྱི་ཚོགས་གཙོ་ནོར་བུ་གཤེར་པ་ལགས། ཁེ་ན་ཌ་ཨེན་ཊེ་རིའོ་མངའ་སྡེའི་ས་གནས་གྲོས་ཚོགས་ཀྱི་ཚོགས་གཞོན་བུ་འཁྲིད་དཀར་པོ་ཆེ་ལགས། འབྲས་ལྗོངས་མངའ་སྡེའི་བློན་ཆེན་རྣམ་རྒྱལ་ལེབ་ཆ་ལགས། འབྲས་ལྗོངས་མངའ་སྡེའི་གྲོས་ཚོགས་འཐུས་མི་སྐུ་ཞབས་ཨི་རུང་ལེབ་ཆ་ལགས། འབྲས་ལྗོངས་མངའ་སྡེའི་གྲོས་ཚོགས་འཐུས་མི་སན་ཇི་ཏི་ (Sanjeet Kharel) ལགས། སུད་སི་ (Oetwill am See) གྲོང་སྡེའི་སྤྱི་ཁྱབ་པ་གངས་གཞོན་ཚང་རྣམ་རྒྱལ་ལགས། དེ་བཞིན་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གི་དབུས་མཛད་གཙོ་རྣམ་པ་དང་སྲི་ཞུ་ལས་བྱེད། དྷ་ས་ཁུལ་གྱི་སེར་སྐྱ་མི་མང་དང་སློབ་ཕྲུག་སོགས་འཛོམས་ཡོད་ལ། ཕྱི་ཟླ་ ༧ ཚེས་ ༥ ཉིན་བོད་མིའི་སྒྲིག་འཛུགས་ཀྱིས་བོད་གཞིས་བྱེས་ལྷ་མི་ཡོངས་ཀྱི་ཚབ་ཞུས་ཏེ་༧གོང་ས་རྒྱལ་བ་རིན་པོ་ཆེ་མཆོག་ཕྱི་ལུགས་ལྟར་དགུང་ལོ་ ༩༠ ཕེབས་པའི་༧སྐུའི་གོ་སྟོན་སྲུང་གཙི་དང་ཕྱི་ལོ་ ༢༠༢༥  ཟླ ༧ ནས་ལོ་འཁོར་གཅིག་རིང་བྱམས་བརྩེའི་ལོ་ཞེས་སྲུང་གཙི་ཞུ་རྒྱུའི་གསར་འགོད་གསལ་བསྒྲགས་གནང་ཡོད།

༧གོང་ས་ཏཱ་ལའི་བླ་མའི་མཚན་གནས་རྗེས་འབྲེལ་གྱི་དམིགས་བསལ་ས་མིག་གསར་འཛུགས།

ཕྱི་ཟླ་ ༨ ཚེས་ ༢༠ ཉིན་རྒྱ་གར་པན་ཇབ་གཙུག་ལག་སློབ་གཉེར་ཁང་གི་གྷན་དྷི་དང་ཞི་བདེའི་ཞིབ་འཇུག་ཚན་པའི་ནང་དུ་༧གོང་ས་ཏཱ་ལའི་བླ་མའི་མཚན་གནས་རྗེས་འབྲེལ་གྱི་དམིགས་བསལ་ས་མིག་ཤིག་གསར་འཛུགས་བྱས་ཡོད་པ་དང་། དེ་ནི་༧གོང་ས་ཏཱ་ལའི་བླ་མའི་གོ་ལ་གཅིག་གྱུར་གྱི་འགན་འཁུར་ཐེབས་རྩ་ཁང་ (His Holiness Dalai Lama’s foundation For Universal Responsibility) དང་རྒྱ་གར་གྱི་པན་ཇབ་གཙུག་ལག་སློབ་གཉེར་ཁང་གཉིས་བར་གྲོས་མཐུན་ཡིག་ཆར་མཚན་རྟགས་བསྐྱོན་པ་བརྟེན་ནས་བྱུང་བ་ཞིག་ཡིན་ཞིང་།  པན་ཇབ་གཙུག་ལག་སློབ་གཉེར་ཁང་གིས་༧གོང་ས་རྒྱལ་བ་རིན་པོ་ཆེ་མཆོག་གཙོ་བོར་གྱུར་བའི་ནང་བསྟན་མཁས་པ་རྣམས་མགྲོན་འབོད་བྱས་ཏེ། ནང་པའི་ལྟ་གྲུབ་དང་བོད་ཡིག པ་ལིའི་ནང་པའི་གཞུང་། དཀའ་ངལ་འཕྲད་པའི་སྐབས་ནང་ཆོས་ཀྱི་ཐོག་ནས་གདོང་ལེན་ཇི་ལྟར་བྱེད་དགོས་པ། ནང་པའི་སྒྱུ་རྩལ་དང་བཟོ་རིག་གོང་འཕེལ་གཏོང་བར་དམིགས་པ་ཞིག་ཡིན་འདུག

རྒྱ་གར་གྱིས་༧གོང་ས་མཆོག་ལ་སྲུང་བྱའི་རིམ་པ་མཐོ་ཤོས་གསུམ་པ་དེ་ཕུལ།

ཕྱི་ལོ་ ༢༠༢༥ ཟླ་ ༢ ཚེས་ ༡༣ ཉིན་རྒྱ་གར་དབུས་ནང་སྲིད་ལས་ཁུངས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་ལ་རྒྱ་གར་ནང་གི་སྲུང་བྱ་རིམ་པ་གསུམ་པ་(Z)ཅན་དེ་ཕུལ་ནས། རྒྱ་གར་དབུས་གཞུང་གིས་ཆེད་དུ་༧མགོན་པོ་གང་ཉིད་ཀྱི་སྐུ་ཕྱྭ་དང་འགོག་སྲུང་གི་ལས་དོན་ཚད་མཐོ་གཉེར་རྒྱུ་ཡིན་ཞིང་།  རྒྱ་གར་གཞུང་གི་ཆེས་ཚད་མཐོའི་སྐུ་སྲུང་(SPG) ནི་སྐོར་སྲུང་བ་ ༥༠༠༠ ལྡན་པའི་ཚད་མཐོའི་དམིགས་བསལ་སྲུང་སྐྱོབ་རུ་ཁག་ཅན་ཞིག་དང་། ཚད་མཐོའི་སྐོར་སྲུང་གཉིས་པར་ (Z+) སྐོར་སྲུང་བ་ ༥༥།  དེ་བཞིན་༧གོང་ས་རྒྱལ་བ་རིན་པོ་ཆེ་མཆོག་ལ་ཕུལ་བའི་རིམ་པ་གསུམ་པའི་ (Z) སྲུང་བྱ་ལ་སྐོར་སྲུང་བ་ ༣༠  ཅན་བཅས་ཡོད་འདུག

སྨྲ་བརྗོད་བྲལ་བ་རྣམས་ཀྱི་འབོད་སྒྲ་ཞེས་པའི་ཕྱག་དེབ་འགྲེམས་སྤེལ་གྱི་གསལ་བསྒྲགས།

ཕྱི་ལོ་ ༢༠༢༥ ཟླ་ ༡ ཚེས་ ༢༤ ཉིན་དགའ་ལྡན་ཕོ་བྲང་གི་དྲ་ཐོག་ཏུ། ཕྱི་ཟླ་ ༣ ཚེས་ ༡༡ ནས་བཟུང་ཨ་རིའི་མི་ལིམ་མོར་རོ་(William Morrow) དཔེ་སྐྲུན་ཁང་དང་དབྱིན་ཡུལ་གྱི་ཧར་པར་དངོས་སྒྲུང་དཔེ་སྐྲུན་ཁང་( HarperNonFiction) གཉིས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་གིས་མཛད་པའི་སྨྲ་བརྗོད་བྲལ་བ་རྣམས་ཀྱི་འབོད་སྒྲ་ (Voice for the Voiceless)། མི་ལོ་བདུན་ཅུ་ལྷག་རིང་ངོས་ཀྱི་ཡུལ་དང་མི་མང་གི་ཆེད་རྒྱ་ནག་དང་འཐབ་རྩོད་ཅེས་པའི་ཕྱག་དེབ་དེ་འགྲེམས་སྤེལ་བྱ་རྒྱུ་ཡིན་པའི་གསལ་བསྒྲགས་སྤེལ། དཔེ་དེབ་དེ་ཡུ་རོབ་ཀྱི་རྒྱལ་ཁབ་ཧྥ་རན་སི་དང་། འཇར་མན། ཨི་ཊ་ལི། ཧོ་ལེན་དང་། ཁེ་ན་ཊ་སོགས་སུ་འགྲེམས་སྤེལ་བྱ་རྒྱུ་ཡིན་འདུག

གསར་འགོད་པ་སྐལ་བཟང་སྦྱིན་པས་ཕྱོགས་སྒྲིག་བྱས།