ཧིན་དྷུའི་བླ་ཆེན་ཞིག་ལ་ཐུགས་གསོའི་གསུང་འཕྲིན་བསྩལ།
ཕྱི་ལོ་ ༢༠༢༤ ཟླ་ ༣ ཚེས་ ༢༦ ཉིན་ཧིན་དྷུའི་ཆོས་དཔོན་སུ་ཝ་མི་སུ་མ་རཱ་ནན་ཌ་ (Swami Smarananda ) མཆོག་དགུང་ལོ་ ༩༤ ཐོག་དགོངས་པ་རྫོགས་པར་བརྟེན། ཟླ་དེའི་ཕྱི་ཚེས་ ༢༧ ཉིན་༧གོང་ས་རྒྱལ་བ་རིན་པོ་ཆེ་མཆོག་ནས་རཱ་མ་ཁི་རི་ན་རྩིས་རིག་དང་ཆོས་སྤེལ་ལྟེ་གནས་ཁང་ (Rama Krishna Math and Ramakrishna Mission) གི་མཚན་ཐོག་ཏུ་ཐུགས་གསོའི་གསུང་འཕྲིན་ཞིག་བསྩལ་ཏེ། སུ་ཝ་མི་སུ་མ་རཱ་ནན་ཌ་མཆོག་གིས་སྐུ་ཚེ་གང་བོ་ཆོས་ལུགས་དང་སྤྱི་ཚོགས་སྲི་ཞུའི་ལས་དོན་གྱི་ཆེད་དུ་ཕུལ་ཡོད་ཅིང་། ཁོང་གིས་སྐྱེས་བོ་མང་དག་ཅིག་གི་ལུས་སེམས་གཉིས་ལ་སུབ་ཐབས་བྲལ་བའི་བག་ཆགས་ཤིག་ཀྱང་བཞག་ཡོད་པ་མ་ཟད། ཁོང་གི་བྱམས་བརྩེ་དང་བློ་གྲོས་ལ་མི་རབས་མང་པོས་ཡིད་སྨོན་བྱ་ངེས་ཡིན། ཞེས་གསུངས།
ཐའེ་ཝན་གྱི་ས་ཡོམ་གོད་ཆག་ལ་ཐུགས་སྨོན་མཛད།
ཕྱི་ལོ་ ༢༠༢༤ ཟླ་ ༤ ཚེས་ ༣ ཉིན་ཐའེ་ཝན་མཚོ་ཁུལ་གྱི་ཧྭ་ལིན་( Hualien) གྲོང་ཁྱེར་སོགས་སུ་ཚད་རིམ་ ༧།༤ ཅན་གྱི་ས་ཡོམ་བརྒྱབ་སྟེ། མི་གྲངས་ ༧ རྐྱེན་འདས་དང་མི་གྲངས་ ༧༣༠ ལ་རྨས་སྐྱོན། སྡོད་ཁང་དང་གཞུང་ལམ་ལ་རྡིབ་སྐྱོན་བྱུང་བ་དང་། དེ་བཞིན་རི་ཉུལ་བ་སོགས་ཀྱི་གོད་ཆག་ཆེན་པོ་བྱུང་བར་བརྟེན། ཟླ་དེའི་ཕྱི་ཚེས་ ༣ ཉིན་༧གོང་ས་རྒྱལ་བ་རིན་པོ་ཆེ་མཆོག་ནས་ཐའེ་ཝན་གྱི་སྲིད་འཛིན་ལྕམ་ཚའེ་ཡེན་ཝིན་མཆོག་གི་མཚན་ཐོག་ཏུ་ཐུགས་གསོའི་གསུང་འཕྲིན་ཞིག་བསྩལ་ཏེ། རང་བྱུང་གོད་ཆག་གི་རྐྱེན་གྱིས་མི་མང་དག་ཅིག་ལ་རྨས་སྐྱོན་ཐེབས་ཡོད་པ་རེད། ངོས་རང་གིས་ལྕམ་སྐུ་མཆོག་གཙོས་རང་བྱུང་གོད་ཆག་གི་སྐྱོ་གར་འདིའི་ཁྲོད་དུ་གནོད་འཚེ་ཐེབས་མཁན་ཡོངས་ལ་ཐུགས་གསོ་ཞུ་ཡི་ཡོད། ངོས་རང་གིས་ཐའེ་ཝན་གཞུང་དང་འབྲེལ་ཡོད་ཚོས་གནོད་འཚེ་ཐེབས་མཁན་རྣམས་ལ་མྱུར་སྐྱོབ་དང་ངལ་སེལ་གྱི་རོགས་འདེགས་གནང་བར་བསྔགས་བརྗོད་ཞུ་ཡི་ཡོད། ཅེས་དང་མཐར་རང་བྱུང་གོད་ཆག་དེའི་ཁྲོད་ནས་རྐྱེན་འདས་དང་རྨས་སྐྱོན་ཐེབས་མཁན་རྣམས་ལ་ཐུགས་སྨོན་བཅས་མཛད།
ཀེ་ར་ལ་མངའ་སྡེའི་མི་མང་ལ་ཐུགས་གསོ་མཛད།
ཕྱི་ལོ་ ༢༠༢༤ ཟླ་ ༧ ཚེས་ ༣༡ ཉིན་༸གོང་ས་རྒྱལ་བ་རིན་པོ་ཆེ་མཆོག་ནས། རྒྱ་གར་གྱི་མངའ་སྡེ་ཀེ་ར་ལའི་སྤྱི་ཁྱབ་བློན་ཆེན་པེ་ན་རཱ་ཡི་ཝི་ཇཱེན་མཆོག་གི་མཚན་ཐོག་ཏུ་ཕྱག་བྲིས་ཤིག་བསྩལ་ཏེ། ཀེ་ར་ལ་མངའ་སྡེའི་ནང་ཆར་དུས་རྐྱེན་གྱིས་ས་རུད་བྱུང་སྟེ་མི་གྲངས་ ༢༨༠ རྐྱེན་འདས་དང་མི་གྲངས་ ༢༠༠ ལྷག་གར་སོང་ཆ་མེད་དུ་གྱུར་ཡོད་པ། དེ་བཞིན་མི་གྲངས་ ༡༥༩༢ ལྷག་མྱུར་སྐྱོབ་བྱེད་ཐུབ་ཡོད་པ་དང་། མི་གྲངས་ ༨༠༠༠ ཙམ་ངལ་སེལ་ས་ཁུལ་ ༨༢ ནང་གནས་སྤོར་བྱེད་དགོས་བྱུང་བ་སོགས་མི་རྒྱུ་གཉིས་ལ་གནོད་འཚེ་ཕོག་པར་ཐུགས་གསོ་མཛད་པའི་ནང་། ངོས་ཀྱིས་ཁྱེད་རྣམ་པར་སེམས་གསོ་ཞུ་རྒྱུ་ཡིན། དེ་བཞིན་རྐྱེན་ངན་གོད་ཆག་འཕྲད་པའི་ནང་མི་གཉེན་ཉེ་དང་ཤུགས་རྐྱེན་ཐེབས་པའི་མི་ཚང་མར་སྨོན་ལམ་ཞུ་རྒྱུ་ཡིན། མངའ་སྡེའི་གཞུང་དང་འབྲེལ་ཡོད་ལས་ཁུངས་ཚང་མས་ཤུགས་རྐྱེན་ཐེབས་པའི་མི་མང་ལ་རོགས་སྐྱོར་དང་གུན་གསབ་ཀྱི་མཐུན་རྐྱེན་སྦྱོར་བཞིན་པ་ཤེས་རྟོགས་བྱུང་བས་ངོས་རང་དགའ་པོ་བྱུང་། ངོས་ནས་ཀེ་ར་ལའི་མི་མང་ལ་རྒྱབ་སྐྱོར་གྱི་རྣམ་འགྱུར་སྟོན་ཆེད་ཏཱ་ལའི་བླ་མ་ཡིད་རྟོན་ཐེབས་རྩ་ཁང་བརྒྱུད་ངལ་སེལ་རོགས་སྐྱོར་དང་མྱུར་སྐྱོབ་ཀྱི་བྱ་བའི་ཐད་ཞལ་འདེབས་ཤིག་རྒྱག་གི་ཡིན། ཞེས་གསུངས།
རྒྱ་གར་གྱི་སྲིད་བློན་ཟུར་པ་ཞིག་སྐུ་གྲོངས་བར་ཐུགས་གསོ་མཛད།
ཕྱི་ལོ་ ༢༠༢༤ ཟླ་ ༡༢ ཚེས་ ༢༦ ཉིན་རྒྱ་གར་གྱི་སྲིད་བློན་ཟུར་པ་སྐུ་ཞབས་མན་མོ་ཧན་སིང་མཆོག་དགུང་གྲངས་ ༩༢ སྟེང་རྒྱ་གར་རྒྱལ་ས་ལྡི་ལི་རུ་སྐུ་གྲོངས་བར་བརྟེན། ཟླ་དེའི་ཕྱི་ཚེས་ ༢༧ ཉིན་༧གོང་ས་རྒྱལ་བ་རིན་པོ་ཆེ་མཆོག་ནས་དམ་པ་ཁོང་གི་སྐུ་ཟླ་གྷི་ཤ་རན་ (Gursharan Kaur) ལགས་ཀྱི་མཚན་ཐོག་ཏུ་ཐུགས་གསོའི་གསུང་འཕྲིན་ཞིག་བསྩལ་ཏེ། ངོས་རང་གིས་ཁྱེད་ཉིད་ལ་སྐྱབས་འཇུག་ཞུ་མུས་ཡིན་ལ། ཁོང་དང་ཁོང་གི་ཤུལ་ལུས་ནང་མི་རྣམས་ཆེས་ཡིད་སེམས་སྨྲེང་བའི་དུས་སྐབས་འདིར་ཐུགས་གསོ་ཞུ་ཡི་ཡོད། ངོས་རང་ཁོང་དང་ནམ་མཇལ་ལ། ངོས་ནས་ཁོང་གི་འགན་ཁུར་དང་ཆེས་བཟང་པའི་སློབ་སྟོན་ལ་ཡིད་སྨོན་སྐྱེས་ཏེ། ཁོང་ཉིད་ནི་ངོས་རང་གི་གཅེན་པོར་ངོས་འཛིན་གནང་གི་ཡོད། ཁྱེད་ཀྱི་སྐུ་ཟླར་གཞན་ལ་ཕན་འདོགས་པའི་སེམས་འདུན་ཤུགས་ཆེན་མཆིས་ཤིང་། ཁོང་གིས་རྒྱ་གར་གྱི་དཔལ་འབྱོར་འཕེལ་རྒྱས་གཙོ་བོར་གྱུར་བའི་རྒྱལ་ཁབ་དར་རྒྱས་སུ་གཏོང་བ་དང་། རྒྱ་གར་མི་དམངས་ཀྱི་འཚོ་བའི་གནས་སྟངས་ཡར་རྒྱས་གཏོང་བར་མཛད་རྗེས་རླབས་ཆེན་བཞག་ཡོད་ལ། ཁོང་ནི་བོད་མི་རྣམས་ལ་ཐུགས་བརྩེ་ཟབ། ཁོང་གིས་ལོ་ངོ་ ༩༢ རིང་ལ་ང་ཚོས་ཡིད་སྨོན་སྐྱེས་དགོས་པའི་དོན་སྙིང་ལྡན་པའི་ལས་དོན་གཉེར་བ་ནི་ཡིད་སྨོན་སྐྱེས་འོས་པ་ཞིག་རེད། ཅེས་གསུངས།
ཨ་རིའི་སྲིད་འཛིན་ཟུར་པ་ཞིག་སྐུ་གྲོངས་བར་ཐུགས་གསོ།
ཕྱི་ལོ་ ༢༠༢༤ ཟླ་ ༡༢ ཚེས་ ༢༩ ཉིན་ཨ་རིའི་སྲིད་འཛིན་ཟུར་པ་ཇིམ་མེ་ཁར་ཊར་ (Jimmy Carter) མཆོག་དགུང་གྲངས་ ༡༠༠ ཐོག་སྐུ་གྲོངས་ཡོད་པར་བརྟེན། ཟླ་དེའི་ཕྱི་ཚེས་ ༣༠ ཉིན་༧གོང་ས་རྒྱལ་བ་རིན་པོ་ཆེ་མཆོག་ནས་དམ་པ་ཁོང་གི་བུ་ཅིབ་ཁར་ཊར་ (Chip Carter) ལགས་ཀྱི་མཚན་ཐོག་ཏུ་ཐུགས་གསོའི་གསུང་འཕྲིན་ཞིག་བསྩལ་ཏེ། སྲིད་འཛིན་ཟུར་པ་ཁར་ཊར་མཆོག་གིས་དབུལ་ཕོངས་དང་ཉམ་ཐག་རྣམས་ལ་རོགས་སྐྱོར་གནང་བ་མ་ཟད། འཛམ་གླིང་སྟེང་འབྱུང་བཞིན་པའི་རྩོད་རྙོག་ལ་ཞི་བའི་ལམ་ནས་གདོང་ལེན་བྱེད་པ་དང་། དམངས་གཙོ་དང་འགྲོ་བ་མིའི་ཐོབ་ཐང་གོང་འཕེལ་གཏོང་བར་ལོ་རབས་མང་པོའི་རིང་ངལ་དུབ་མེད་པར་འབད་བརྩོན་གནང་བ་སོགས་མི་ཚེ་དོན་དང་ལྡན་པ་བསྐྱལ་ཡོད། ཁོང་གིས་ལོ་ངོ་མང་པོའི་རིང་གཞན་དོན་བསྒྲུབས་བཞུགས་པ་དེས། ང་ཚོ་ཚང་མར་གཞན་དོན་བསྒྲུབས་པའི་ཐོག་ནས་མི་ཚེ་བསྐྱལ་རྒྱུའི་མིག་དཔེ་བཟང་པོ་བསྟན་ཡོད། ཕྱི་ལོ་ ༢༠༠༢ ལོར་ནོ་སྦེལ་གཟེངས་རྟགས་ཚོགས་ཆུང་གིས་ཁོང་གིས་འགྲོ་བ་མིའི་བདེ་དོན་ཆེད་དུ་ཕུལ་བའི་མཛད་རྗེས་ལ་ངོས་འཛིན་གནང་བའི་ཐོག་ནས་ཁོང་ལ་ནོ་སྦེལ་ཞེ་བདེའི་གཟེངས་རྟགས་ཕུལ་ཡོད་པ་རེད། ཅེས་དང་། ངོས་རང་དང་། ང་ཚོ་བོད་མི་ཡོངས་ནས་སྲིད་འཛིན་ཁར་ཊར་མཆོག་གིས་བོད་ནང་གི་གནས་སྟངས་ཐད་བློ་འཚབ་དང་། ཐུགས་ཁུར་ཆེ་བཞེས་ཀྱིས་བོད་མི་རྣམས་ཀྱི་དཀའ་ངལ་སེལ་ཐབས་གནང་བར་ཐུགས་རྗེ་ཆེ་ཞུ་རྒྱུ་ཡིན། ཞེས་གསུངས།
བོད་ནང་ས་ཡོམ་གྱི་གོད་ཆག་བྱུང་བར་ཐུགས་གསོ་མཛད།
ཕྱི་ལོ་ ༢༠༢༥ ཟླ་ ༡ ཚེས་ ༧ ཉིན་གྱི་ཞོགས་པར་བོད་དིང་རི་རྫོང་དང་། ངམ་རིང་རྫོང་། ལྷ་རྩེ་རྫོང་། ས་སྐྱ་རྫོང་ཁོངས་སུ་ས་ཡོམ་ཤུགས་ཚད་ ༧།༡ ཙམ་ཞིག་བརྒྱབ་སྟེ། ཉུང་མཐར་མི་གྲངས་ ༡༣༤ ཙམ་རྐྱེན་འདས་བྱུང་བ་སོགས་མི་རྒྱུ་གཉིས་ལ་གནོད་འཚེ་ཆེན་པོ་ཐེབས་ཡོད་པར་བརྟེན། ཉིན་དེར་༧གོང་ས་རྒྱལ་བ་རིན་པོ་མཆོག་ནས་ཐུགས་གསོའི་གསུང་འཕྲིན་ཞིག་བསྩལ་བའི་ནང་། ད་ནངས་སྔ་དྲོར་དིང་རི་གཙོས་ས་གནས་ཁག་ཅིག་ཏུ་ས་འགུལ་བྱུང་བ་ལ་བརྟེན་ནས་ཤི་རྨས་དང་ཁང་ཁྱིམ་ལ་གཏོར་བཤིག་ཚབས་ཆེར་ཐེབས་པའི་གནས་ཚུལ་ཐོས་ཏེ་བློ་ཕམ་ཆེན་པོ་བྱུང་། རྐྱེན་འདས་སུ་སོང་བ་རྣམས་ལ་བསྔོ་སྨོན་དང་། རྨས་སྐྱོན་བྱུང་བ་རྣམས་གང་མྱུར་དྲག་སྐྱེད་ཡོང་བའི་སྨོན་འདུན་ཡོད། ཅེས་དང་། ཕྱི་ཚེས་ ༩ ཉིན་བྱེས་ཀྱི་ཆོས་སྡེ་བཀྲ་ཤིས་ལྷུན་པོ་ནས་མཆོད་འབུལ་སྨོན་ལམ་གནང་སྐབས། ཆོས་དད་མེད་མཁན་ཞིག་ལ་ལས་ངན་འཁོར་སྐབས་སེམས་ཕམ་ནས་སྡོད་པ་མ་གཏོགས་བྱ་རྒྱུ་མེད། ང་ཚོ་ཆོས་དད་ཡོད་མཁན་ཚོར་ལས་ངན་སྨིན་ཡོང་སྐབས་དེ་སྔོན་ཆད་ཀྱི་སྡིག་པ་དག་པ་དང་། ཕྱིན་ཆད་དགེ་བའི་བློ་གོང་ནས་གོང་དུ་འཕེལ་བའི་མཐུན་པའི་རྐྱེན་ཆགས་རྒྱུ་འདུག དཔེར་ན། རྐྱེན་ངན་མང་པོ་ཞིག་ཡོང་སྐབས་རྐྱེན་ངན་དེ་དག་རྒྱུ་མཚན་དུ་བྱས་ནས་སོ་སོའི་ངོས་ནས་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་གཟབ་གཟབ་བྱས་ཏེ་སྒོམ་པ་ཡོང་གི་འདུག དེར་བརྟེན། བོད་དུ་ས་ཡོམ་གྱི་རྐྱེན་གྱིས་རྐྱེན་ངན་མང་པོ་ཞིག་ཡོང་སྐབས་རྐྱེན་ངན་འདི་དག་བྱང་ཆུབ་ལམ་དུ་བསྒྱུར་རྒྱུ་སོ་སོའི་ལག་པར་ཡོད་པ་རེད་ལ། དེ་ལ་བསམ་བློ་བཏང་བ་ཡིན་ན་འབྲས་བུ་ངན་པ་ཞིག་སྨིན་ཡང་། དེའི་རྐྱེན་བྱས་ཏེ་དགེ་བའི་བློ་སྐྱེས་པ་དང་། སེམས་ཤུགས་བསྐྱེད་པ་ལ་ཕན་ཐོགས་ཡོང་བ་ཞིག་རེད། ངོས་རང་ལ་ཆ་བཞག་ན་བོད་ལ་ས་ཡོམ་བརྒྱབ་ནས་རྐྱེན་མང་པོ་འཕྲད་པའི་པར་མཐོང་སྐབས་དེས་བྱང་ཆུབ་ཀྱི་སེམས་སྒོམ་རྒྱུ་དང་། སྟོང་ཉིད་སྒོམ་རྒྱུ། དེ་བཞིན་འཕགས་པ་སྤྱན་རས་གཟིགས་ལ་གསོལ་བ་འདེབས་པའི་སེམས་ཤུགས་གོང་ནས་གོང་དུ་འཕེལ་བར་ཕན་ཐོགས་འདུག ཅེས་གསུངས།
༧སྐུའི་གཅེན་པོ་རྒྱལ་ལོ་དོན་གྲུབ་མཆོག་ལ་ཐུགས་སྨོན་མཛད།
ཕྱི་ལོ་ ༢༠༢༥ ཟླ་ ༢ ཚེས་ ༨ ཉིན་གྱི་ཕྱི་དྲོའི་ཆུ་ཚོད་ ༥ ཡོལ་དུ། སྐུའི་གཅེན་པོ་ཁྲི་ཟུར་རྒྱལ་ལོ་དོན་གྲུབ་མཆོག་ཀ་ལིམ་སྦུང་གི་སྟག་འཚེར་གཞིས་ཀ་རུ་སྐུ་གཤེགས་ཡོད་པར་བརྟེན། ཟླ་དེའི་ཕྱི་ཚེས་ ༩ ཉིན་དགའ་ལྡན་ཕོ་བྲང་གི་གོ་སྒྲིག་འོག རྒྱ་གར་ལྷོ་ཕྱོགས་ཀྱི་ཆོས་སྡེ་ཆེན་པོ་བཀྲ་ཤིས་ལྷུན་པོ་དགོན་དུ། ༧གོང་ས་རྒྱལ་བ་རིན་པོ་ཆེ་མཆོག་དབུ་བཞུགས་ཐོག་དམ་པ་ཁོང་ལ་འདས་མཆོད་འཚོགས་ཡོད་པ་དང་། སྐབས་དེར་༧མགོན་པོ་གང་ཉིད་ཀྱིས། ངོས་ཀྱི་གཅེན་པོ་རྒྱལ་ལོ་དོན་གྲུབ་འདས་གྲོངས་སུ་ཕྱིན་པ་རེད། དེའི་འདས་མཆོད་དུ་འདིར་ཚོགས་བཞུགས་ཀྱི་དགེ་འདུན་པ་ཚོར་བསྙེན་བཀུར་བྱས་ནས་དམིགས་ཡུལ་གཙོ་བོ་དེ། ངོས་ཀྱི་གཅེན་པོ་རྒྱལ་ལོ་དོན་གྲུབ་ཀྱིས་ཧུར་ཐག་འབད་ཐག་ཧ་ཅང་ཡག་པོ་བྱས་པ་རེད། སྙིང་རྗེ། ཧ་ལས་པའི་སེམས་ཤུགས་དང་སྙིང་སྟོབས་ཆེན་པོ་རེད། དེ་རིང་འདིར་འདས་མཆོད་བསྙེན་བཀུར་བྱས་ཏེ་ངོས་ཀྱི་གཅེན་པོ་རྒྱལ་ལོ་དོན་གྲུབ་རིམ་བཞིན་སྐྱེ་གནས་བཟང་པོ་ཞིག་དང་། བོད་རིགས་རང་དུ་སྐྱེ་བ་དང་། དེའི་ནང་ནས་བོད་ཀྱི་བསྟན་པ་ཆབ་སྲིད་ལ་ཞབས་འདེགས་སྒྲུབ་མཁན་ཞིག་རྒྱུན་མཐུད་ནས་ཡོང་ཐུབ་པར་ཁོང་རང་གིས་སྨོན་ལམ་བརྒྱབ་ཡོད་པ་རེད་ལ། འདོད་པ་དེ་ཡོད་པ་རེད། ངོས་ནས་ཀྱང་སྨོན་ལམ་དེ་རྒྱག་གི་ཡོད། ཁོང་ལ་ཚེ་རབས་མང་པོར་༸རྒྱལ་བ་རིིན་པོ་ཆེའི་འཁྲིས་ལ་བསྡད་དེ་ཞབས་འདེགས་སྒྲུབ་པའི་སྨོན་ལམ་དང་སེམས་ཤུགས་ཡོད་པ་རེད། དེར་བརྟེན། དེ་ལྟ་བུའི་སྨོན་ལམ་སྟོབས་ཆེན་པོ་དེ་འགྲུབ་པར་ཚང་མས་སྐྱབས་འཇུག་གནང་རོགས་ཞུ་རྒྱུ་ཡིན། ཞེས་བཀའ་སློབ་བསྩལ།
གསར་འགོད་པ་སྐལ་བཟང་སྦྱིན་པས་ཕྱོགས་སྒྲིག་བྱས།
