འདི་ལོར་ཡུ་རོབ་རྒྱལ་ཁབ་ཁག་གི་ནང་གནས་སྡོད་བོད་མི་རྣམས་ནི་ཌར་ལན་ཌིའི་གྲོང་ཁྱེར་ཧེག་ཏུ་འཛོམས་ཏེ་བོད་མིའི་རང་དབང་སྒེར་ལངས་ཐེངས་ ༦༦ པ་གཞི་རྒྱ་ཆེན་པོའི་ཐོག་ནས་སྲུང་གཙི་གནང་རྒྱུ་ཡིན་འདུག
ལོ་ལྟར་འཛམ་གླིང་ཡུལ་ལུང་གང་སར་ཡོད་པའི་བོད་མི་རྣམས་གཙོ་བོར་གྱུར་བའི་བོད་དོན་རྒྱབ་སྐྱོར་བ་རྣམས་ཀྱིས་བོད་མིའི་རང་དབང་སྒེར་ལངས་གསུམ་བཅུའི་དུས་དྲན་སྲུང་གཙི་ཞུ་སྲོལ་ཡོད་པ་ལྟར། འདི་ལོར་ཡུ་རོབ་བོད་རིགས་སྤྱི་མཐུན་ཚོགས་པ་དང་ཡུ་རོབ་ཁུལ་གྱི་རྒྱལ་སྤྱིའི་བོད་དོན་ལས་འགུལ་ཁང་ཐུན་མོང་གི་གོ་སྒྲིག་འོག ནི་ཌར་ལན་ཌིའི་གྲོང་ཁྱེར་ཧེག་ (Hague) ཏུ་ཡུ་རོབ་བོད་མིའི་གསུམ་བཅུའི་དུས་དྲན་གཞི་རྒྱ་ཆེན་པོའི་ཐོག་ནས་སྲུང་གཙི་གནང་རྒྱུ་ཡིན་འདུག
ཡུ་རོབ་བོད་མིའི་རང་དབང་སྒེར་ལངས་ཐེངས་ ༦༦ པའི་སྟེང་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་དང་། རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་ལྷན་ཚོགས་ཀྱི་ཚོགས་གཙོ་དང་ཨ་རིའི་གློག་བརྙན་འཁྲབ་སྟོན་པ་གྲགས་ཅན་རི་ཆར་ཌི་གྷེར་ (Richard Gere)ལགས། བོད་མིའི་རང་དབང་འཐབ་རྩོད་ལ་རྒྱབ་སྐྱོར་གནང་མཁན་ཨ་རིའི་སིལ་སྤོལ་རྩེད་འགྲན་པ་ཟུར་པ་ཨ་ནི་སི་ (Enes Freedom) ལགས་བཅས་ཕེབས་འཆར་ཡོད་འདུག་ལ། བོད་དོན་རྒྱབ་སྐྱོར་བ་སྐུ་ཞབས་རི་ཆར་ཌི་གྷེར་ལགས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་དགུང་གྲངས་ ༩༠ ལ་ཕེབས་པའི་རྒྱལ་སྤྱིའི་ལས་འགུལ་ཡང་སྐབས་དེར་དབུ་འཛུགས་གནང་འཆར་ཡོད་འདུག
དེ་འབྲེལ་རྒྱལ་སྤྱིའི་བོད་དོན་ལས་འགུལ་ཁང་གིས་གསར་འགོད་གསལ་བསྒྲགས་ཤིག་སྤེལ་བའི་ནང་། འདས་པའི་ལོ་ངོ་ ༦༠ ལྷག་གི་རིང་བོད་ནང་དང་བཙན་བྱོལ་དུ་ཡོད་པའི་བོད་མི་རྣམས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་ནས་ཞི་བའི་ལམ་ནས་བོད་དོན་འཐབ་རྩོད་བྱེད་དགོས་པའི་བཀའ་སློབ་སྩལ་བ་ལྟར། བོད་མི་རྣམས་ཀྱིས་ཞི་བའི་ལམ་ནས་བོད་དོན་འཐབ་རྩོད་བྱས་དང་བྱེད་མུས་རེད། རྒྱ་ནག་གཞུང་གིས་བོད་མིའི་ངོ་བོ་དང་། རིག་གཞུང་རྩ་མེད་གཏོང་སླད་རྒྱ་སྒྱུར་སློབ་གསོ་སྤྲོད་པ་སོགས་སྲིད་ཇུས་འདྲ་མིན་ལག་བསྟར་བྱེད་བཞིན་ཡོད་ཀྱང་། ད་བར་བོད་ཀྱི་རིག་གཞུང་དང་སྐད་ཡིག་སོགས་མི་ཉམས་རྒྱུན་འཛིན་དང་གསོན་པོར་གནས་ཐུབ་པ་བྱུང་ཡོད། བོད་དོན་འཐབ་རྩོད་ནི་དྲང་བདེན་གྱི་འཐབ་རྩོད་ཅིག་ཡིན་པ་དང་། བོད་དོན་འཐབ་རྩོད་ལ་རོགས་རམ་བྱས་ཚེ། ཨེ་ཤ་ཡའི་རྒྱལ་ཁབ་ཀྱི་དཀའ་ངལ་དེ་དག་ཆུང་དུ་གཏོང་ཐུབ་པ་དང་། འཛམ་གླིང་ཡོངས་ལ་ཞི་བདེ་དང་བདེ་འཇགས་དར་སྤེལ་གཏོང་རྒྱུར་ཕན་ཐོགས་འབྱུང་གི་རེད་ཅེས་གསལ་འདུག
འདི་ལོའི་ཡུ་རོབ་བོད་མིའི་གསུམ་བཅུའི་དུས་དྲན་ཉིན་གྱི་སྔ་དྲོའི་ཆུ་ཚོད་ ༡༠།༣༠ ནས་གྲོང་ཁྱེར་ཧེག་ནས་རྒྱ་ནག་གཞུང་ཚང་ཁང་བར་གོམ་བགྲོད་བྱས་ཏེ། རྒྱ་ནག་གཞུང་གིས་བོད་མིའི་འགྲོ་བ་མིའི་ཐོབ་ཐང་ལ་བརྩི་བཀུར་བྱེད་དགོས་པའི་འབོད་སྐུལ་གནང་རྒྱུ་དང་། ཉིན་དེའི་ཕྱི་དྲོའི་ཆུ་ཚོད་ ༣ པའི་སྟེང་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་ལྷན་ཚོགས་ཀྱི་ཚོགས་གཙོ་སྐུ་ཞབས་རི་ཆར་ཌི་གྷེར་ལགས་སོགས་ཀྱིས་བོད་དོན་གཏམ་བཤད་གནང་རྒྱུ་ཡིན་འདུག
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། པདྨ་མཚོ།
