ཆོ་འཕྲུལ་དུས་ཆེན་དང་བསྟུན་ཨ་རིའི་ནེའུ་ཡོག་ཏུ་༧གོང་ས་རྒྱལ་བ་རིན་པོ་ཆེ་མཆོག་ཕྱི་ལུགས་ལྟར་དགུང་གྲངས་དགུ་བཅུར་ཕེབས་པའི་སྐུའི་འཁྲུངས་སྐར་སྲུང་གཙི་ཞུས།
༧གོང་ས་རྒྱལ་བ་རིན་པོ་ཆེ་མཆོག་གི་གོ་སྟོན་སྲུང་གཙིའི་མཛད་སྒོ་འཚོགས། ཨ་རིའི་ཆོ་འཕྲུལ་སྨོན་ལམ་གྱི་ངོ་དེབ་ཐད་གཏོང་ནས་བླངས། ༢༠༢༥།༣།༡༦
ཟླ་འདིའི་ཕྱི་ཚེས་ ༡༦ ཉིན་ཏེ་ཆོ་འཕྲུལ་སྨོན་ལམ་དུས་ཆེན་དང་བསྟུན། ཨ་རིའི་ཆོ་འཕྲུལ་སྨོན་ལམ་ཆེན་མོ་དང་བྱང་ཨ་རིའི་སྐུ་ཚབ་དོན་གཅོད་ལས་ཁུངས་ཀྱི་གོ་སྒྲིག་འོག ༧གོང་ས་རྒྱལ་བ་རིན་པོ་ཆེ་མཆོག་ཕྱི་ལུགས་ལྟར་དགུང་གྲངས་དགུ་བཅུར་ཕེབས་པའི་བཀའ་དྲིན་རྗེས་དྲན་དང་འབྲེལ་བའི་སྐུའི་གོ་སྟོན་གྱི་མཛད་སྒོ་ཞིག་འཚོགས་ཡོད་ཅིང་། མཛད་སྒོའི་ཐོག་ཤར་བྱང་ཆོས་རྗེ་རིན་པོ་ཆེ་མཆོག་རྣམ་གཉིས་ཀྱིས་དབུས་པའི་རྒྱལ་སྤྱིའི་དགེ་ལྡན་ལྷན་ཚོགས་ཀྱི་ངེས་སྟོན་པ་སྒོ་མང་མཁན་ཟུར་བློ་བཟང་རྒྱལ་མཚན་རིན་པོ་ཆེ། བྱང་ཨ་རིའི་སྐུ་ཚབ་དོན་གཅོད་རྣམ་རྒྱལ་མཆོག་གྲུབ་ལགས་དང་། གོ་སྟོན་ཚོགས་ཆུང་གི་ཚོགས་གཙོ་ལྡོང་ཡར་ཀླུང་ཚང་འཇམ་དབྱངས་རྒྱ་མཚོ་ལགས། དགའ་ལྡན་ཕོ་བྲང་གི་དྲུང་ཆེ་བློ་བཟང་སྦྱིན་པ་ལགས་སོགས་ཀྱིས་དབུས། མི་མང་གཅིག་སྟོང་ལྷག་གིས་མཉམ་ཞུགས་གནང་ཡོད་འདུག
མཛད་སྒོའི་ཐོག་༧རྒྱལ་དབང་ཀརྨ་པ་ཨོ་རྒྱན་འཕྲིན་ལས་རྡོ་རྗེ་མཆོག ས་སྐྱ་༧གོང་མ་བདག་ཁྲི་རིན་པོ་ཆེ་མཆོག སྨན་རི་ཁྲི་འཛིན་ ༣༤ པ་ལུང་རྟོགས་ཟླ་བ་དར་རྒྱས་རིན་པོ་ཆེ་མཆོག སྔ་འགྱུར་རྙིང་མའི་དབུ་འཛིན་ཞི་ཆེན་རབ་འབྱམས་རིན་པོ་ཆེ་མཆོག ༧སྐྱབས་རྗེ་བཀའ་བློན་ཁྲི་ཟུར་ཟམ་གདོང་རིན་པོ་ཆེ་མཆོག བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་སོགས་བཅས་ཀྱིས་བརྙན་ལམ་ནས། ༧གོང་ས་རྒྱལ་བ་རིན་པོ་ཆེ་མཆོག་གི་ཨ་རིའི་ཁུལ་དུ་གོ་སྟོན་སྲུང་གཙིའི་མཛད་སྒོ་དང་འབྲེལ་བའི་ཤིས་ཚིག་གཟིགས་འབུལ་ཞུས་པའི་ནང་། སླད་མར་ཡང་༧མགོན་པོ་གང་ཉིད་ཀྱི་སྐུ་ཚེ་ཡུན་རིང་བརྟན་ཞིང་མཛད་འཕྲིན་གོ་ལར་རྒྱས་པའི་སྨོན་ལམ་སོགས་བཏབ་འདུག
ཡང་མཛད་སྒོའི་ཐོག་ཨ་རིའི་གོ་སྟོན་གོ་སྒྲིག་ཚོགས་ཆུང་གི་ཚོགས་གཙོ་ལྡོང་ཡར་ཀླུང་ཚང་འཇམ་དབྱངས་རྒྱ་མཚོ་ལགས་ཀྱིས། ད་ལན་ཨ་རིར་སྲུང་གཙི་བྱས་པའི་༧གོང་ས་རྒྱལ་བ་རིན་པོ་ཆེ་མཆོག་གི་གོ་སྟོན་གྱི་མཛད་སྒོ་འདི་ནི། མི་ལོ་གཉིས་ཙམ་གྱི་གོང་ནས་ཨ་རི་ཆོ་འཕྲུལ་སྨོན་ལམ་ཆེན་མོའི་དྲུང་ཆེ་བློ་བཟང་རྡོ་རྗེ་ལགས་བཞུགས་སྒར་དུ་ཆེད་བཅར་གྱིས། ༧གོང་ས་རྒྱལ་བ་རིན་པོ་ཆེ་མཆོག་གི་གསེར་ཞལ་མཇལ་ནས་ལས་དོན་རྣམས་སྙན་སྒྲོན་ཞུས་པར་ཐུགས་ཧ་ཅང་དགྱེས་ཚོར་ཆེན་པོ་གནང་བ་དང་། ཞབས་པུས་སྨན་བཅོས་འཕྲོད་སྦྱོར་ཆེད་ཨ་རིར་ཆིབས་བསྒྱུར་སྐྱོང་སྐབས་ཀྱང་། བདག་ཅག་ཨ་རི་ཆོ་འཕྲུལ་སྨོན་ལམ་ཚོགས་པས་བརྟན་བཞུགས་བསྟར་འབུལ་ཞུ་རྒྱུ་ཞལ་བཞེས་སྐལ་བཟང་ཐོབ། ཅེས་དང་། དེ་རིང་གི་མཛད་སྒོ་འདི་ནི་༧རྒྱལ་བའི་གོ་སྟོན་སྲུང་གཙི་ཡི་མཛད་སྒོ་སྔ་ཤོས་ཤིག་ཆག་གི་ཡོད་པར་བརྟེན། རིས་མེད་བསྟན་བདག་བླ་ཆེན་རྣམ་པས་ཤིས་ཚིག་བརྙན་ཐུང་དང་། གདན་ས་གྲྭ་ཚང་ཁག་གི་མཁན་རིན་པོ་ཆེ་རྣམ་པ་དང་། བླ་སྤྲུལ་དགེ་བའི་གཤེས་གཉེན་རྣམས་ཀྱིས་མཛད་པའི་བསྟོད་རྩོམ། དེ་བཞིན་བདག་ཅག་རྣམས་ལ་བསོད་ནམས་གསོག་པའི་གོ་སྐབས་སུ་སྐུ་ཡི་གོ་སྟོན་རྟེན་འབྲེལ་ཞུ་ཆེད་གཟེངས་བསྟོད་གསེར་གྱི་རྟགས་མ་དང་རྟེན་འབྲེལ་གྱི་ཤིས་ཚིག ༧གོང་ས་རྒྱལ་བ་རིན་པོ་ཆ་ེམཆོག་གི་ཐུགས་བསྐྱེད་དམ་བཅའ་ཆེན་མོ་བཞི་ཡི་བཀའ་ཆེམས་གཟེངས་བསྟོད་འབུལ་རྟེན། ས་གནས་སོ་སོས་གོ་སྟོན་རྟེན་འབྲེལ་སླད་གླུ་དང་གར་གྱི་མཆོད་པ་དབུལ་རྒྱུ་སོགས། ཕྱོགས་ཡོངས་ནས་༧གོང་ས་རྒྱལ་བ་རིན་པོ་ཆེ་མཆོག་གི་གོ་སྟོན་མཛད་སྒོ་འདི་བཞིན་དོན་སྙིང་དང་ལྡན་པ་ཞིག་འབད་བརྩོན་ཞུ་བཞིན་ཡོད། ཅེས་བརྗོད་འདུག
བྱང་ཨ་རིའི་སྐུ་ཚབ་དོན་གཅོད་རྣམ་རྒྱལ་མཆོག་གྲུབ་ལགས་ཀྱིས། ད་ལན་གོ་སྟོན་གྱི་མཛད་སྒོ་སྲུང་གཙི་བྱེད་དོན་གཙོ་བོ་ནི་༧གོང་ས་རྒྱལ་བ་རིན་པོ་ཆེ་མཆོག་གི་བཀའ་དྲིན་རྗེས་དྲན་གྱི་སླད་དུ་ཡིན་ལ། དེ་བཞིན་དབུས་བོད་མིའི་སྒྲིག་འཛུགས་ཀྱིས་འདི་ལོའི་ཕྱི་ཟླ ༦ པ་ནས་མགོ་བཙུགས་ཏེ་ལོ་རྗེས་མའི་ཕྱི་ཟླ་ ༧ ཚེས་ ༥ བར་ལོ་འཁོར་མོར་བྱམས་བརྩེའི་ལོར་སྲུང་གཙི་བྱེད་ཀྱི་ཡོད་པ་རེད། ཅེས་དང་། ད་ལན་༧གོང་ས་རྒྱལ་བ་རིན་པོ་ཆེ་མཆོག་གི་འཁྲུངས་སྐར་དང་སྟབས་བསྟུན་ནས། རྒྱལ་སྤྱིའི་མི་མང་ལ་༧གོང་ས་རྒྱལ་བ་རིན་པོ་ཆེ་མཆོག་གི་དགོངས་བཞེད་དང་ཐུགས་བསྐྱེད་དམ་བཅའ་བཞི་འདི་ང་ཚོ་བོད་པ་ཙམ་མིན་པར། ད་ལྟའི་འཛམ་བུ་གླིང་གི་ནང་དུ་དཀའ་ངལ་མང་པོ་ཞིག་འཕྲད་མུས་ཡིན་པ་དེ་དག་མིས་བཟོས་པའི་དཀའ་ངལ་ཡིན་པ་དང་། མིའི་ནང་སེམས་ཀྱི་ཀུན་སྤྱོད་ཀྱི་ཐད་ནས་འཕོངས་ཀྱི་ཡོད་དུས། གོ་སྐབས་དེ་བརྒྱུད་ནས་འཛམ་གླིང་མི་མང་རྣམས་ལ་༧གོང་ས་རྒྱལ་བ་རིན་པོ་ཆེ་མཆོག་གི་དགོངས་བཞེད་གང་མང་མང་ཁྱབ་སྤེལ་བྱ་རྒྱུའི་ལས་གཞི་ཞིག་བརྩམས་ཡོད་སྟབས། ངས་གོ་སྐབས་འདི་བརྒྱུད་ནས་རྣམ་པ་ཚང་མས་ལས་གཞི་དེའི་ཁོངས་སུ་མཉམ་ཞུགས་དང་རྒྱབ་སྐྱོར་གནང་རྒྱུར་འབོད་སྐུལ་ཞུ་རྒྱུ་ཡིན། ཞེས་གསུངས་འདུག
དེའི་རྗེས་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་བསྟན་ཆོས་རྒྱ་མཚོ་ལགས་དང་། རྒྱལ་སྤྱིའི་དགེ་ལྡན་ལྷན་ཚོགས་ཀྱི་ངེས་སྟོན་པ་སྒོ་མང་མཁན་ཟུར་བློ་བཟང་རྒྱལ་མཚན་རིན་པོ་ཆེ་མཆོག ཤར་བྱང་ཆོས་རྗེ་རིན་པོ་ཆེ་མཆོག་རྣམ་གཉིས་དང་། དགའ་ལྡན་ཕོ་བྲང་གི་དྲུང་ཆེ་བློ་བཟང་སྦྱིན་པ་ལགས་སོགས་ཀྱིས་བཀའ་སློབ་དང་མི་མང་གིས་གཞས་སྣ་སོགས་གཟིགས་འབུལ་ཞུས་འདུག
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
