དབྱིན་ཡུལ་ནང་རྒྱ་ནག་གི་གཞུང་ཚབ་ཁང་གསར་རྒྱག་ལ་ངོ་རྒོལ་བྱས་འདུག

དབྱིན་ཡུལ་ནང་རྒྱ་ནག་གི་གཞུང་ཚབ་ཁང་གསར་རྒྱག་ཐད་བོད་པ་དང་། ཡུ་གུར་བ། ལྷོ་སོག ཐའེ་ཝན། རྒྱ་རིགས་དམངས་གཙོ་དོན་གཉེར་བ། ས་གནས་མི་མང་སོགས་ནས་ངོ་རྒོལ་ལས་འགུལ་སྤེལ་འདུག

ཉེ་ལམ་དབྱིན་ཡུལ་གྱི་རྒྱལ་ས་ལོན་ཌོན་གྱི་རོ་ཡལ་མིན་ཌི་ (Royal Mint Court)ས་གནས་སུ་རྒྱ་ནག་གི་གཞུང་ཚབ་ཁང་ཆེན་པོ་ཞིག་གསར་རྒྱག་བྱ་རྒྱུའི་འཆར་གཞིའི་གནད་དོན་ཐད། དབྱིན་ཡུལ་ནང་གནས་སྡོད་བྱེད་མཁན་ཧོང་ཀོང་ཝན་ཁྲི་རྫོང་དཔོན་ཟུར་བ་ཀྲང་ཅ་ལི་ (張嘉莉) གཙོས་ཧོང་ཀོང་སྐྱབས་བཅོལ་བའི་གོ་སྒྲིག་འོག  བོད་པ་དང་། ཡུ་གུར་བ། ལྷོ་སོག ཐའེ་ཝན། རྒྱ་རིགས་དམངས་གཙོ་དོན་གཉེར་བ། འགྲོ་བ་མིའི་ཐོབ་ཐང་འཐབ་རྩོད་པ། ས་གནས་མི་མང་བཅས་ཁྱོན་མི་གྲངས་ ༤༠༠༠ ལྷག་འཛོམས་ཏེ་ངོ་རྒོལ་གྱི་ལས་འགུལ་སྤེལ་ཡོད་འདུག

ལོན་ཌོན་ནང་རྒྱ་གཞུང་གི་གཞུང་ཚབ་གསར་རྒྱག་ཐད་ཐེངས་འདིའི་གོ་སྒྲིག་པ་ཀྲང་ཅ་ལི་ལགས་ཀྱིས། ཕྱི་ལོ་ ༢༠༢༢ ཟླ་ ༡༢ པའི་ནང་ཌོ་ཝར་ཧམ་ལེ་ཌི་གྲོང་སྡེའི་ལྷན་ཚོགས་(Tower Hamlets Council) ཀྱིས་དབྱིན་ཇིའི་རྒྱལ་ས་ལོན་ཌོན་དུ་རྒྱ་ནག་གཞུང་ཚབ་ཁང་གསར་རྒྱག་དེས་བདེ་འཇགས་དང་། རིག་གཞུང་། ཆབ་སྲིད་བཅས་ཀྱི་ཐད་ལ་སེམས་འཚབ་ཡོད་པའི་རྐྱེན་གྱིས་ཕྱིར་འཐེན་བྱས་ཡོད།  ཡིན་ནའང་། ཕྱི་ལོ་ ༢༠༢༤ ཟླ་ ༡༠ པའི་ནང་དབྱིན་ཡུལ་གྱི་ཕྱི་འབྲེལ་དྲུང་ཆེ་ཌི་ཝི་ཌི་ལམ་མེ་(David Lammy) རྒྱ་ནག་ནང་འཚམས་གཟིགས་སུ་ཕྱིན་རྗེས་སུ་དབྱིན་ཇིའི་གཞུང་གིས་སྔོན་གྱི་ཐག་གཅོད་དེ་བསྐྱར་ཞིབ་བྱ་རྒྱུ་བྱས་པ་རེད། དེ་ནི་ས་གནས་ཀྱི་མི་མང་གི་དམངས་གཙོའི་ཐོབ་ཐང་རྡོག་རོལ་གཏོང་གི་ཡོད། ཅེས་དང་། དེ་ནི་དབྱིན་ཇིའི་མི་མང་གི་རིན་ཐང་ཆེ་བའི་དམངས་གཙོ་ལམ་ལུགས་ལ་བརྩི་བཀུར་བྱེད་ཀྱི་མེད་པ་རེད། རང་ཉིད་ཧོང་ཀོང་གི་རྫོང་དཔོན་ཟུར་བ་ཞིག་བྱས་མྱོང་ཡོད་པའི་ཆ་ནས་དམངས་གཙོའི་ལམ་ལུགས་ཐོག་ནས་མི་མང་གི་བསམ་ཚུལ་ལ་ཉན་རྒྱུ་གལ་ཆེན་པོ་རེད། ཧོང་ཀོང་མི་མང་གི་འཐབ་རྩོད་ཐེངས་མང་པོར་ཕམ་ཁ་བྱུང་ཡང་། ང་ཚོ་ད་དུང་སེམས་ཤུགས་ཆག་གི་མེད། དབྱིན་ཡུལ་ནང་གི་ང་ཚོའི་འཐབ་རྩོད་པ་རྣམས་ཕམ་ཁ་བྱུང་འདོད་མེད། ཅེས་བརྗོད་འདུག

རྒྱལ་སྤྱིའི་བོད་དང་བཙན་གནོན་འོག་གི་གྲངས་ཉུང་མི་རིགས་མཐུན་ཚོགས་ཀྱི་ཚོགས་གཙོ་ཚེ་རིང་པ་སངས་ལགས་ཀྱིས། ལོ་ལྔའི་སྔོན་ལ་རྒྱ་ནག་གཞུང་གི་འཆར་གཞི་འདི་ཐོག་མར་ཐོན་སྐབས་ང་ཚོ་མཉམ་དུ་འཛོམས་ཏེ་ངོ་རྒོལ་བྱས་ཡོད། བོད་པ་དང་། ཡུ་གུར་བ། ཧོང་ཀོང། རྒྱ་རིགས་དམངས་གཙོ་དོན་གཉེར་བ། ས་གནས་ཡུལ་མི། གྲོས་ཚོགས་འཐུས་མི་སོགས་ཀྱིས་ང་ཚོར་རྒྱབ་སྐྱོར་བྱེད་བཞིན་ཡོད། ང་ཚོ་མཉམ་འབྲེལ་གྱི་ཐོག་ནས་སྲང་ལམ་འདི་རུ་འཛོམས་པས་གྲོས་ཚོགས་འཐུས་མི་རྣམས་ལ་བརྡ་ལན་སྤྲད་ཡོད། ཅེས་དང་།  འདི་ནི་ཡོ་རོབ་ནང་གི་རྒྱ་ནག་དམར་ཤོག་ཚོགས་པའི་ཕྱི་འབྲེལ་ལས་ཁུངས་ཆེ་ཤོས་དེ་ཆགས་རྒྱུ་ཡིན་ལ། དབྱིན་ཇིའི་རང་དབང་དང་སྙིང་སྟོབས་ཀྱི་མཚོན་རྟགས་ལྟ་བུ་ཡིན་པའི་ལོ་རྒྱུས་རང་བཞིན་ལྡན་པའི་ལོན་ཌོན་གྱི་མཐོ་རིམ་ལས་ཁུངས་དང་ཐག་ཉེ་སར་ཡོད་པས། ཧ་ཅང་འཇིགས་སྣང་ཆེ་བའི་ཚོགས་སྡེ་ཞིག་ཏུ་འགྱུར་རྒྱུ་རེད། དེ་ནི་ཕྱི་འབྲེལ་གྱི་རྟེན་གཞི་ཞིག་ཆགས་རྒྱུ་མིན་པར་རྒྱལ་ཁབ་མང་པོའི་གནོན་ཤུགས་ཀྱི་ཉེན་ཁ་རུ་འགྱུར་རྒྱུ་རེད།ཅེས་བརྗོད་འདུག

དེ་བཞིན་སྐབས་དེར་དབྱིན་ཡུལ་གུ་ཡངས་མང་གཙོ་ཆབ་སྲིད་ཚོགས་པའི་འཐུས་མི་ཡིན་པེ་རེ་ཌི་ (Ying Perrett )ལགས་དང་། དབྱིན་ཡུལ་ནང་གནས་སྡོད་ཧོང་ཀོང་རྫོང་དཔོན་ཟུར་བ་ཅིན་ཅཝན་(劉珈汶)། ཀྲོ་ཧན་ལིན(鍾翰林)  ཏུའུ་ཅ་ལོན་(杜嘉倫)། རོལ་མོ་བ་བྷོ་གྷེ་ཝོ་གྷི་(Dr K Boogie Woogie)།  ཐའེ་ཝན་གྱི་ལས་འགུལ་བ་ལི་ཞོན་ཡིས(李宣儀) སོགས་ཀྱིས་རྒྱ་གཞུང་གི་གཞུང་ཚབ་ཁང་གསར་རྒྱག་ཐད་སྐྱོན་བརྗོད་ཀྱི་གཏམ་བཤད་གནང་ཡོད་འདུག ཐེངས་འདིའི་ངོ་རྒོལ་གྱི་ལས་འགུལ་ནང་མཉམ་ཞུགས་གནང་མཁན་དབྱིན་ཡུལ་རྙིང་ཞེན་ཆབ་སྲིད་ཚོགས་པའི་མགོ་ཁྲིད་ཟུར་པ་ཨི་ཡན་ཌོ་ཀེན་སི་མི་ཐི་ ( Iain Duncan Smith) ལགས་ཀྱིས་ཐེངས་འདིའི་གནད་དོན་གང་མགྱོགས་ཐག་གཅོད་བྱ་དགོས་སྐོར་སོགས་ཀྱི་སྙན་ཞུ་བཏང་ཡོད་འདུག

ཕྱི་ལོ་ ༢༠༡༨ ལོར་དབྱིན་ཡུལ་གྱི་རྒྱལ་ས་ལོ་ཌོན་དུ་རྒྱ་ནག་གཞུང་གིས་རོ་ཡུལ་མན་ཌི་ས་གནས་སུ་ས་ཆ་ཞིག་ཉོས་ཏེ། རྗེས་སུ་རྒྱ་ནག་གཞུང་གིས་གཞུང་ཚབ་ཁང་ཆེན་པོ་ཞིག་འཛུགས་སྐྲུན་བྱ་འཆར་ཡོད་ཀྱང་། ཕྱི་ལོ་༢༠༢༢ ཟླ ་༡༢ ནང་ས་གནས་གཞུང་ནས་ཆོག་མཆན་ཐེངས་གཉིས་བཀག་ཡོད་ཅིང་། དབྱིན་ཡུལ་ནང་རྒྱ་ནག་གཞུང་གིས་གཞུང་ཚབ་གསར་རྒྱག་གི་ལས་གཞིའི་ཐད་མི་མང་ཁྲོད་གླེང་སློང་ཆེན་པོ་བྱས་ཡོད་པ་མ་ཟད། བོད་པ་དང་། ཡུ་གུར། ཧོང་ཀོང་བ། དམངས་གཙོ་དོན་གཉེར་བ་སོགས་ཀྱིས་ཐེངས་མང་པོར་ངོ་རྒོལ་བྱས་ཡོད་འདུག

གསར་འགོད་པ།  བྱམས་པ་ཚེ་རིང་། རྩོམ་སྒྲིག་བྱེད་མཁན། སྐལ་བཟང་སྦྱིན་པ།