རྒྱ་ནག་གཞུང་གིས་ཡང་བསྐྱར་བོད་དཀར་མཛེས་ཁུལ་བྲག་མགོ་རྫོང་འཇང་སྒང་དགོན་པའི་ཉེ་འཁྲིས་ནས་མཆོད་རྟེན་ ༣༠༠ ལྷག་དང་གུ་རུའི་སྐུ་བརྙན་སོགས་བཙན་གྱིས་གཏོར་ཡོད་པ་མ་ཟད་ས་གནས་སུ་དམ་དྲག་ཆེན་པོོ་བྱེད་བཞིན་ཡོད་འདུག
དེ་རིང་བོད་མིའི་སྒྲིག་འཛུགས་ཀྱི་དྲ་ལམ་དུ་གནས་ཚུལ་སྤེལ་བ་ལྟར་ན། འདི་ལོའི་ཕྱི་ཟླ་ ༦ པའི་ནང་རྒྱ་ནག་གཞུང་གིས་གཞུང་གི་ས་ཆའི་ཐོག་འཛུགས་སྐྲུན་བྱས་ཡོད་པར་བསྙད་དེ། བོད་དཀར་མཛེས་ཁུལ་བྲག་མགོ་རྫོང་འཇང་སྒང་དགོན་པའི་ཉེ་འཁྲིས་ལུང་རབ་བཟང་རིར་བོད་བརྒྱུད་ནང་བསྟན་གྱི་མཆོད་རྟེན་འབྲིང་བ་ ༣༠༠ ལྷག་དང་། མཆོད་རྟེན་ཆེ་བ་གསུམ་ཡོད་པ་བཙན་གྱིས་གཏོར་ཏེ་རྩ་མེད་བཏང་ཡོད་པ་མ་ཟད། གནས་ཚུལ་ཕྱི་ལ་མི་ཁྱབ་པའི་ཆེད་དུ་ཁ་སང་དེ་རིང་མཆོད་རྟེན་གཏོར་སར་མི་གཅིག་ཀྱང་གཏོང་གི་མེད་པར་དམ་དྲག་ཆེན་པོ་བྱེད་བཞིན་ཡོད་འདུག
ད་ལྟའི་ཆར་མཆོད་རྟེན་རྣམས་ཀྱི་སྐུ་པར་དང་གཏོར་བཤིག་བཏང་བའི་ཡུལ་དངོས་ཀྱི་པར་རིས་སོགས་མཇལ་རྒྱུ་མི་འདུག་ཀྱང་། ས་གནས་བོད་མི་ཞིག་གིས་དེ་འབྲེལ་གནས་ཚུལ་ཕྱི་ཕྱོགས་སུ་བཏང་བ་ཙམ་གྱིས་རྒྱལ་ཁབ་ཀྱི་གསང་བ་ཕྱིར་བསྒྲགས་བྱས་པའི་ཉེས་མིང་འོག་འཛིན་བཟུང་བྱེད་ཀྱི་ཡོད་སྐོར་འགྲེལ་བརྗོད་གནང་འདུག་ལ། མཆོད་རྟེན་ཡོད་སར་མཁན་པོ་འཇིགས་མེད་ཕུན་ཚོགས་འབྱུང་གནས་མཆོག་གི་སྐུ་འདྲ་གཅིག་དང་། གུ་རུའི་སྐུ་བརྙན་ཞིག་ཡོད་པ་དེའང་གཏོར་སྐྱོན་བཏང་ཡོད་འདུག
ཡང་བོད་མིའི་སྒྲིག་འཛུགས་ཀྱི་གནས་ཚུལ་ལྟར་ན། ཕྱི་ལོ་ ༢༠༢༤ ཟླ་ ༡༢ ཚེས་ ༡ ཉིན་རྒྱལ་ཁབ་ཆོས་ལུགས་ལས་ཁུངས་ཀྱི་བཀའ་རྒྱ་ཨང་ ༢༢ པ་ཟེར་བ་ཞིག་ཁྱབ་བསྒྲགས་བྱས་ཏེ་འཇང་སྒང་དགོན་སྡེ་ཡོངས་སུ་སྔར་ལྷག་དམ་དྲག་ཆེན་པོ་བྱས་ཡོད་པ་དང་། ཕྱི་ལོ་ ༢༠༢༥ ཟླ་ ༡ ཚེས་ ༡ ནས་དགོན་སྡེ་དོ་དམ་སྲོལ་ཡིག་དོན་ཚན་ ༤༣ ཟེར་བ་བཀྲམ་ནས་དགོན་པའི་ལས་དོན་ཡོངས་སུ་རྫོགས་པ་ཆོས་ལུགས་ལས་ཁུངས་ཀྱི་སྟངས་འཛིན་འོག་འགྲོ་དགོས་ཀྱི་ཡོད་པའི་བཀའ་རྒྱ་ཕབ་ཡོད་འདུག
ཕྱི་ལོ་ ༢༠༢༡ ཟླ་ ༡༡ ཚེས་ ༣ ཉིན་བྲག་མགོ་རྫོང་སྲིད་གཞུང་གི་དམར་ཤོག་མགོ་ཁྲིད་ཚོས་བྲག་མགོ་དགོན་པའི་འཛིན་སྐྱོང་འོག་ཡོད་པའི་དགེ་ལྡན་ནང་བསྟན་སློབ་གྲྭར་ཡིག་ཆ་ཚད་ལྡན་མེད་པར་བསྙད་ནས་བཙན་གྱིས་སྒོ་བརྒྱབ་ཡོད་པ་དང་། ལོ་དེའི་ཕྱི་ཟླ་ ༡༢ ནང་ས་གནས་བོད་མི་ཚོས་རྒྱུན་དུ་ཕྱག་སྐོར་ར་དང་། ཁ་འདོན་དགེ་སྒྲུབ་བྱེད་སའི་དགོན་པའི་ཉེ་འདབས་ཀྱི་མ་ཎི་ལག་འཁོར་གྲངས་ ༤༥ དང་། མཐོ་ཚད་སྨིད་༩༩ ལྷག་ཅན་གྱི་ཐུབ་དབང་གི་སྐུ་བརྙན་སོགས་གཏོར་བཤིག་བཏང་ཡོད་པ་མ་ཟད། མ་ཎི་དར་ལྕོག་དང་སྒོ་དར་སོགས་བཙན་གྱིས་ཕབ་བཅུག་ནས་མེར་སྲེག་བཏང་དུ་བཅུག་པ་དང་། བོད་མི་སེར་སྐྱ་མང་པོ་སྔ་གཞུག་ཏུ་འཛིན་བཟུང་བྱས་ཡོད་པ་རེད།
འབྲེལ་ཡོད་གནས་ཚུལ།
