བོད་ཁྱིམ་གྱི་སློབ་མ་ཞིག་གིས་སྐྱེས་པ་ཞིག་གིས་ཆགས་སྲེད་དང་འབྲེལ་ནས་བརྙས་བཅོས་བྱས་སོང་ཟེར་བ་བཞིན། དྷ་ས་ས་གནས་མགོ་འཛིན་ལས་ཁུངས་ཀྱིས་ས་གནས་ཉེན་རྟོག་ལས་ཁུངས་སུ་ཞུ་གཏུགས་བྱས་པ་ལྟར་ཉེན་རྟོག་པས་ཞིབ་འཇུག་བྱེད་མུས་ཡིན་འདུག
རྒྱ་གར་གྱི་(The Tribune) གསར་ཁང་གིས་གནས་ཚུལ་སྤེལ་བའི་ཁྲོད། ཕྱི་ཟླ་ ༩ ཚེས་ ༢༣ ཉིན་དྷ་སྟེང་བོད་ཁྱིམ་གྱི་ལོ་རིམ་དྲུག་པའི་བུ་མོ་ཞིག་ལ་སློབ་གྲྭའི་རྐང་སྤོལ་རྩེད་ཐང་གི་ཉེ་འགྲམ་དུ་བཙན་གཡེམ་བྱས་ཡོད་པའི་གནད་དོན་དང་འབྲེལ་ནས། ཉེན་རྟོག་པ་རྣམས་ཀྱིས་དོགས་ཡོད་མི་སྣ་སོགས་སུ་འདྲི་རྩད་བྱས་ཏེ། དངོས་ཡོད་ཀྱི་གནས་ཚུལ་གང་ཡིན་ཐད་ཞིབ་འཇུག་བྱེད་མུས་ཡིན་འདུག
གནད་དོན་དེའི་ཐད་དྷ་སྟེང་བོད་ཁྱིམ་གྱི་འགན་འཛིན་ཚུལ་ཁྲིམས་རྡོ་རྗེ་ལགས་ཀྱིས། དྷ་སྟེང་བོད་ཁྱིམ་གྱི་བུ་མོ་ཆུང་ཆུང་ཞིག་ལ་སྐྱེས་པ་ཞིག་གིས་རྐུབ་ལ་ལག་པ་འཆང་བ་དང་། འོ་བྱས་པ་སོགས་ཀྱི་གནད་དོན་དང་འབྲེལ་ནས། གནད་དོན་དེ་ས་གནས་ཉེན་རྟོག་ཁང་ལ་ཞུ་གཏུགས་ཀྱིས་ཞིབ་འཇུག་བྱེད་མུས་རེད། ང་ཚོས་ཕྲུ་གུ་ཆུང་ཆུང་དེས་གང་བཤད་པར་གཞི་བཞག་པ་ལས། དངོས་ཡོད་ཀྱི་བཙན་གཡེམ་བྱས་ཡོད་པའི་ཁ་གསལ་གྱི་བདེན་དཔང་མེད་ཀྱང་། ཆགས་སྲེད་དང་འབྲེལ་བའི་གནད་དོན་བྱུང་ཡོད་སྲིད་པའི་དོགས་པ་ཡོད་སྟབས། ཉེན་རྟོག་ཁང་ལ་གནད་དོན་དེ་ཞུ་གཏུགས་ཀྱིས་ཞིབ་འཇུག་བྱེད་མུས་ཡིན་པས། ཕྱིས་སུ་ཉེན་རྟོག་པས་ཞིབ་འཇུག་བྱུང་རིམ་བཞིན། དངོས་ཡོད་ཀྱི་གནས་ཚུལ་ག་རེ་བྱུང་ཡོད་མེད་གསལ་པོ་ཆགས་ཀྱི་རེད། ཅེས་བརྗོད་བྱུང་།
ཡང་དྷ་ས་ས་གནས་མགོ་འཛིན་དཀོན་མཆོག་མིག་དམར་ལགས་ཀྱིས། བུ་མོ་དེར་ཆགས་སྲེད་ཀྱི་གནས་ཚུལ་བྱུང་བའི་གནད་དོན་དང་འབྲེལ་ནས། བོད་ཁྱིམ་སྤྱི་ཁྱབ་ཡིག་ཚང་ནས་ཁ་པར་འབྱོར་ནས། ཐད་ཀར་དྷ་ས་ས་གནས་མགོ་འཛིན་སར་བཅར་སོང་། བུ་མོ་ཆུང་ཆུང་ཞིག་གིས། སྐྱེས་པ་ཞིག་གིས་མོ་རང་གི་དོར་མའི་རྒྱབ་ནས་ལག་པ་བསྲིངས་ཏེ་རྐུབ་ལ་ལག་པ་འཆང་བ་དང་། ལྕེ་སྤྲད་དང་ལབ་པའི་གནས་ཚུལ་བྱུང་ཡོད་སྐོར་བཤད་པ་ལས། ང་ཚོར་དངོས་ཡོད་ཀྱི་ཆགས་སྲེད་དང་འབྲེལ་བའི་གནད་དོན་རིགས་བྱུང་ཡོད་པའི་བདེན་དཔང་མེད་ནའང་། ས་གནས་ཉེན་རྟོག་ལས་ཁུངས་སུ་བུ་མོ་ཆུང་ཆུང་དེས་གང་བཤད་པ་བཞིན། གནས་ཚུལ་དེའི་ཐད་ཞིབ་འཇུག་བྱ་རོགས་ཞེས་ཞུ་གཏུགས་བྱས་ཡོད་པ་ལས། ད་བར་དངོས་ཡོད་ཀྱི་བདེན་དཔང་གང་ཡང་མེད་སྐོར་སོགས་བརྗོད་བྱུང་།
རྒྱ་གར་གྱི་གསར་ཁང་ཁག་ཅིག་གི་གནས་ཚུལ་ལྟར་ན། དྷ་སྟེང་བོད་ཁྱིམ་གྱིས་ཞུ་གཏུགས་བྱས་པ་བཞིན། ཉེན་རྟོག་པ་རྣམས་ཀྱིས་མེག་ལོར་གནས་སྡོད་སྐྱེས་པ་ཞིག་ཡིན་པ་ཤེས་རྟོགས་བྱུང་རྗེས། ཉེན་རྟོག་པས་ཆེད་དུ་ཡུལ་དངོས་ཀྱི་གནད་དོན་ཁག་ལ་ཞིབ་འཇུག་གིས་ཐོ་འགོད་བྱས་ཡོད་ཅིང་། ཉིན་དེར་ཉེན་རྟོག་པས་ཕྱི་ལོ་ ༢༠༡༢ ལོར་གཏན་འབེབས་བྱས་པའི་བྱིས་པར་ཆགས་སྲེད་ཀྱི་གནད་དོན་འགོག་ཐབས་ཀྱི་ཁྲིམས་འཆར་དང་འབྲེལ་ནས། གྱོད་དོན་ཐོ་འགོད་དང་ཞིབ་འཇུག་བྱེད་མགོ་བཙུགས་ཡོད་སྐོར་སོགས་གསལ་འདུག
