ལོ་དྲུག་གི་རྗེས་སུ་ཨ་རྒྱ་གཉིས་ཀྱི་སྲིད་འཛིན་གྱིས་ཐུག་འཕྲད་གནང་།

ཆབ་སྲིད་དཔྱད་བརྗོད་པས་ཨ་རྒྱ་གཉིས་བར་གྱི་ཚོང་ཟོག་གི་སྒོ་ཁྲལ་དང་། གཏེར་རིགས། ས་ཁམས་ཆབ་སྲིད་ཀྱི་ཐབས་ཇུས་སོགས་དང་འབྲེལ་བའི་དཀའ་རྙོག་དེ་དག་ལས་སླ་བོའི་ཐོག་ནས་ཐག་གཅོད་བྱ་ཐུབ་ཐབས་མེད་སྐོར་བརྗོད་འདུག

ཟླ་འདིའི་ཕྱི་ཚེས་ ༣༡ དང་ཕྱི་ཟླ་ ༡༡ ཚེས་ ༡ ཉིན་གྲངས་གཉིས་རིང་ལྷོ་ཀོ་རི་ཡའི་ཇང་ཅུ་(gyeongju) གྲོང་ཁྱེར་དུ། ཨེ་ཤ་ཡ་དང་ཞི་བདེ་རྒྱ་མཚོའི་ཁུལ་གྱི་དཔལ་འབྱོར་མཉམ་འབྲེལ་གླེང་སྟེགས་ཀྱི་ཚོགས་འདུ་ (Asia Pacific Economic Cooperation Forum) འཚོག་འཆར་ཡོད་པ་བསྟུན། དེ་རིང་ཕྱི་ཚེས་ ༣༠ ཉིན་ལྷོ་ཀོ་རི་ཡའི་བྷུ་སཱན་གྲོང་ཁྱེར་གྱི་གྷམ་ཧེ་རྒྱལ་སྤྱིའི་གནམ་ཐང་དུ། ཨ་རིའི་སྲིད་འཛིན་ཊོམ་ཕུ་མཆོག་དང་རྒྱ་ནག་གི་མགོ་ཁྲིད་ཞི་ཅིན་ཕིན་གཉིས་ཐུག་འཕྲད་བྱས་ཡོད་ཅིང་། དེ་ནི་ལོ་དྲུག་གི་རྗེས་སུ་ཨ་རྒྱ་གཉིས་ཀྱི་སྲིད་འཛིན་གཉིས་ཐུག་འཕྲད་བྱས་པ་ཐེངས་དང་པོ་དེ་ཆགས་ཡོད་འདུག

སྐབས་དེར་ཨ་རིའི་སྲིད་འཛིན་ཊོམ་ཕུ་མཆོག་གིས། ཨ་རྒྱ་གཉིས་བར་གྱི་ཚོང་འབྲེལ་ཡར་རྒྱས་གཏོང་རྒྱུ་ཡིན་པ་མ་ཟད། ཨ་རིས་འཕྲལ་དུ་རྒྱ་ནག་ནང་དུ་སྲན་མ་(soybeans) ཕྱིར་ཚོང་མགོ་འཛུགས་རྒྱུ་ཡིན་པ་དང་། ཉེ་ལམ་ཨ་རི་གཞུང་གིས་རྒྱ་ནག་ལ་ཚོང་ཟོག་ཐོག་སྒོ་ཁྲལ་བརྒྱ་ཆ་ ༥༧ སྤར་ཡོད་པ་དེ་བརྒྱ་ཆ་ ༤༧ ལ་མར་གཅོག་རྒྱུ་ཡིན་པ།  ཨ་རྒྱ་གཉིས་བར་ཕྱིར་གཏོང་བྱེད་དཀའ་བའི་དངོས་ཟོག་སྐྱེལ་འདྲེན་གྱི་ལམ་སྒོ་འབྱེད་རྒྱུ།   ཕྱི་ལོ་ ༢༠༢༦ ལོའི་ཟླ་བཞི་པའི་ནང་ཨ་རི་སྲིད་འཛིན་མཆོག་རྒྱ་ནག་ནང་གཞུང་འབྲེལ་འཚམས་གཟིགས་སུ་འགྲོ་རྒྱུ་ཡིན་པ་དང་། རྒྱ་ནག་གི་མགོ་ཁྲིད་ཞི་ཅིན་ཕིན་ཡང་མི་འགྱངས་བར་ཨ་རིའི་ཧྥི་ལོ་རི་ཌ་དང་། པཱ་ལམ། ཝ་ཤིན་ཌོན་བཅས་ཀྱི་ནང་དུ་འཚམས་གཟིགས་སུ་ཡོང་འཆར་ཡོད་སྐོར་བསྒྲགས་འདུག

དེ་བཞིན་རྒྱ་ནག་གི་མགོ་ཁྲིད་ཞི་ཅིན་ཕིན་གྱིས། རྒྱལ་ཁབ་གཉིས་ཀྱི་དཔལ་འབྱོར་ཚོང་དོན་ཚོགས་པས་གྲོས་མོལ་བྱས་པ་བརྒྱུད་ཕྱོགས་གཉིས་ཀྱིས་གནད་དོན་ཁག་ཅིག་ཐག་གཅོད་བྱ་རྒྱུར་མོས་མཐུན་བྱུང་ཡོད་པས། དེ་རིང་ང་ཚོའི་ཐུག་འཕྲད་འདི་ལའང་དགོས་ངེས་ཀྱི་ཆ་རྐྱེན་བསྐྲུན་ཡོད།   རྒྱ་ནག་དང་ཨ་རི་རྒྱལ་ཁབ་གཉིས་ཀྱི་གནས་སྟངས་མི་འདྲ་བས། མི་མཐུན་སའི་ཕྱོགས་འགའ་ཤས་ཡོད་པ་ནི་གཡོལ་ཐབས་མེད་པ་ཞིག་རེད། དེ་བཞིན་འཛམ་གླིང་གི་དཔལ་འབྱོར་སྟོབས་ཤུགས་ཆེ་ཤོས་ཀྱི་རྒྱལ་ཁབ་གཉིས་ཡིན་པའི་ཆ་ནས། མཚམས་རེར་འགལ་ཟླ་ཅུང་ཙམ་རེ་འབྱུང་སྲིད་པ་དེའང་རྒྱུན་ལྡན་ཞིག་རེད། དཀའ་ཁག་དང་འགྲན་སློང་གི་མདུན་དུ་ང་དང་སྲིད་འཛིན་ཊོམ་ཕུ་གཉིས་སྣེ་ཁྲིད་བྱེད་མཁན་ཡིན་པས། ཨ་རྒྱ་གཉིས་བར་གྱི་འབྲེལ་ལམ་བརྟན་བརླིང་ཡོང་བ་བྱ་དགོས་ཚུལ་བསྒྲགས་འདུག

ཨ་རྒྱ་གཉིས་ཀྱི་སྲིད་འཛིན་གྱིས་ཐུག་འཕྲད་སྐོར་ལ་ཧོང་ཀོང་གཙུག་ལག་སློབ་གཉེར་ཁང་གི་འབུམ་རམས་པ་ཨ་ལེ་ཇེན་ཌི་རོ་རེ་ཡེ་སི་( Alejandro Reyes) ལགས་ཀྱིས། ཨ་རིའི་དམིགས་ཡུལ་ནི་རྒྱ་ནག་ཐོག་འཛིན་པའི་རྣམ་འགྱུར་ནན་པོས་གྲུབ་འབྲས་ཐོན་ཡོད་པ་མཚོན་ཐབས་བྱ་རྒྱུ་དེ་ཡིན།  སྲིད་འཛིན་ཊོམ་གྱིས་ཚོང་འབྲེལ་གྲོས་མཐུན་ལ་མིང་རྟགས་བཀོད་པ་དེས། མ་ལེ་ཤི་ཡ། ཁམ་བྷོ་ཌི་ཡ། ཉི་ཧོང་བཅས་ཀྱི་ཚོང་དོན་ཁྲོམ་ར་དང་རྒྱལ་ཁབ་ཀྱི་བདེ་འཇགས་མཉམ་ལས་དང་འབྲེལ་བ་ཡོད་པ་རེད། རྒྱ་ནག་གི་དམིགས་ཡུལ་ནི་ནུབ་ཕྱོགས་རྒྱལ་ཁབ་ཁག་གི་གནོན་ཤུགས་ལས་གཡོལ་རྒྱུ་དང་རྒྱ་ནག་ནང་ལོགས་སུ་བརྟན་བརླིང་ཡོང་བའི་ཆེད་དུ་རེད། འོན་ཀྱང་ཨ་རྒྱ་གཉིས་བར་གྱི་ཚོང་ཟོག་གི་སྒོ་ཁྲལ་དང་། གཏེར་རིགས། ས་ཁམས་ཆབ་སྲིད་ཀྱི་ཐབས་ཇུས་སོགས་དང་འབྲེལ་བའི་དཀའ་རྙོག་དེ་དག་ལས་སླ་བོའི་ཐོག་ནས་ཐག་གཅོད་བྱ་ཐུབ་ཀྱི་མ་རེད། ཅེས་བརྗོད་འདུག

འདི་ལོའི་ལོ་མགོར་ཨ་རིས་རྒྱ་ནག་གི་ཚོང་ཟོག་ཐོག་སྒོ་ཁྲལ་བརྒྱ་ཆ་༢༠ བཀལ་ཡོད་པ་དང་། འདི་ལོའི་ཕྱི་ཟླ་བཞི་པའི་ནང་བསྐྱར་དུ་ཚོང་ཟོག་ཐོག་སྒོ་ཁྲལ་བརྒྱ་ཆ་ ༣༤ བཀལ་ཡོད་པ་མ་ཟད།  ཨ་རིའི་སྲིད་འཛིན་ཊོམ་ཕུ་ཡིས་རྒྱ་ནག་གིས་རྒྱལ་ཁབ་གཉིས་བར་གྱི་ཚོང་འབྲེལ་ཐོག་སྒྲིག་གཞི་ལག་བསྟར་མ་བྱས་ཚེ། རྒྱ་ནག་ལ་ཚོང་ཟོག་ཐོག་སྒོ་ཁྲལ་བརྒྱ་ཆ་༥༠ བསྐྱར་དུ་སྤར་རྒྱུ་ཡིན་པའི་ཉེན་བརྡ་ཡང་བཏང་ཡོད་འདུག འདི་ལོའི་ཕྱི་ཟླ་ ༥ པའི་ནང་ཨ་རྒྱ་གཉིས་བར་ཉིན་གྲངས་ ༩༠ རིང་ཚོང་ཟོག་སྒོ་ཁྲལ་སྤར་མཚམས་འཇོག་དགོས་པའི་གྲོས་མཐུན་ཞིག་བཞག་ཡོད་ཀྱང་། དེའི་རྗེས་སུ་རྒྱལ་ཁབ་གཉིས་བར་རྩོད་རྙོག་མང་པོ་ཞིག་བྱུང་ཡོད་པའི་ཁྲོད། ཨ་རིའི་སྲིད་འཛིན་ཊོམ་ཕུས་རྒྱ་ནག་གིས་གྲོས་མཐུན་དེར་རྩིས་མེད་རྡོག་རོལ་བཏང་བའི་སྐྱོན་འཛུགས་བྱས་ཡོད་པ་དང་། རྒྱ་ནག་གིས་ཨ་རིའི་སྐྱོན་འཛུགས་དེར་ངོས་ལེན་བྱས་མེད་ཁར། ཨ་རིས་གྲོས་མཐུན་དེར་ཁྱད་གསོད་ཚབས་ཆེན་གཏོང་མགོ་བཙུགས་ཡོད་པའི་སྐྱོན་འཛུགས་བྱས་ཡོད་པ་རེད།

ཉེ་ལམ་ཨ་རིའི་སྲིད་འཛིན་ཊོམ་ཕུ་མཆོག་ཨ་ཤེ་ཡ་རྒྱལ་ཁབ་ཁག་ཏུ་འཚམས་གཟིགས་གནང་ཡོད་པ་དང་། ཟླ་འདིའི་ཕྱི་ཚེས་༢༨ ཉིན་ཨ་རིའི་སྲིད་འཛིན་ཊོམ་ཕུ་མཆོག་གིས་ཉི་ཧོང་གི་བུད་མེད་སྲིད་བློན་ཐོག་མ་ལྕམ་སྐུ་ས་ནའེ་ཊ་ཀའེ་ཆི་ (Sanae Takaichi)མཆོག་ལ་མཇལ་འཕྲད་གནང་ཡོད་ཅིང་། སྐབས་དེར་ཉི་ཧོང་གི་སྲིད་བློན་མཆོག་གིས་ཉི་ཧོང་དང་ཨ་རི་གཉིས་འཆམ་མཐུན་རྒྱལ་ཁབ་ཏུ་མངོན་འགྱུར་བྱུང་འདོད་ཡོད་པ་དང་། ཐེངས་འདིའི་ཐུག་འཕྲད་ནི་རྒྱལ་ཁབ་གཉིས་བར་གྱི་གལ་གནད་ཆེ་བའི་ལས་དོན་ཞིག་ཡིན་སྐོར་གསུངས་ཡོད་འདུག

གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། པདྨ་མཚོ།