བོད་རིགས་ཀརྨ་ལགས་སླར་ཡང་ཨ་རིའི་སིན་སིན་ན་ཊི་གྲོང་ཁྱེར་སྤྱི་ཁྱབ་པར་བདམས་ཐོན་བྱུང་།

ཨ་རིའི་གྲོང་ཁྱེར་སིན་སིན་ན་ཊིའི་སྤྱི་ཁྱབ་པའི་འོས་བསྡུ་དངོས་གཞིའི་ཁྲོད་བོད་རིགས་ཨ་རི་བ་ཨ་ཧྥི་ཊབ་ཀརྨ་སིང་པུ་རི་ཝལ་ལགས་སུ་ཚད་མཐོའི་རྒྱབ་སྐྱོར་འོག་སླར་ཡང་གྲོང་ཁྱེར་དེའི་སྤྱི་ཁྱབ་པར་བདམས་ཐོན་བྱུང་།

དེ་རིང་ཝ་ཞིན་ཊོན་ཆ་འཕྲིན་གྱིས་གནས་ཚུལ་སྤེལ་བ་ལྟར་ན། ཨ་རིའི་ཨོ་ཧ་ཡོ་ (Ohio) མངའ་སྡེའི་ནང་གི་སིན་སིན་ན་ཊི་ (Cincinnati) གྲོང་ཁྱེར་གྱི་སྤྱི་ཁྱབ་པའི་དངོས་གཞིའི་འོས་བསྡུའི་ཁྲོད། བོད་རིགས་ཨ་རི་བ་ཨ་ཧྥི་ཊབ་ཀརྨ་སིང་པུ་རི་ཝལ་ (Aftab Karma Singh Pureval) ལགས་སུ་འོས་གྲངས་ ༥༡༦༩༨ ཐོབ་སྟེ་སླར་ཡང་སིན་སིན་ན་ཊི་གྲོང་ཁྱེར་གྱི་སྤྱི་ཁྱབ་པར་བདམས་ཐོན་བྱུང་ཡོད་འདུག་ལ། ཁོང་གི་ཁ་གཏད་འོས་མི་དང་ཨ་རིའི་སྲིད་འཛིན་གཞོན་པ་ཇའེ་ཌི་ཝན་སིའི་ (J.D. Vance) བུ་སྤུན་ཡིན་པའི་ཁོ་རེ་ཝན་སི་ (Cory Vance) ལགས་སུ་འོས་གྲངས་ ༡༤༣༨༣ ཐོབ་ཡོད་འདུག

ཀརྨ་ལགས་ཀྱིས། ང་ཨ་རིའི་གྲོང་ཁྱེར་ཆེ་ཁག་ཏུ་ཨེ་ཤ་ཡའི་རིགས་རྒྱུད་ཡིན་པའི་ཨ་རིའི་གྲོང་ཁྱེར་གྱི་སྤྱི་ཁྱབ་པ་ཉུང་ཤས་ཤིག་གི་གྲས་ནས་གཅིག་ཡིན་པར་སྤོབས་པ་ཆེན་པོ་ཡོད། ང་དང་པོ་ཡིན་པོ་ཡིན་པར་བློ་འགྱོད་མེད།  འོན་ཀྱང་མཐའ་མ་མ་ཡིན་པར་འབད་བརྩོན་བྱེད་དགོས་ལ། ད་དུང་ལས་ཀ་མང་པོ་ཞིག་བྱེད་དགོས་ཡོད། ཅེས་བརྗོད་འདུག འདི་ལོའི་ཕྱི་ཟླ་ ༥ ནང་སིན་སིན་ན་ཊི་གྲོང་ཁྱེར་སྤྱི་ཁྱབ་པའི་སྔོན་འགྲོའི་འོས་བསྡུའི་སྐབས། ཨ་ཧྥི་ཊབ་ཀརྨ་སིང་པུ་རི་ཝལ་ལགས་སུ་འོས་བསྡུའི་བརྒྱ་ཆ་ ༨༢།༥༣ ཐོབ་ནས་ཚད་མཐོའི་རྒྱལ་ཁ་ཐོབ་ཡོད་ཅིང་། སྐབས་དེར་ཁོང་གི་ཁ་གཏད་འོས་མི་ཁོ་རེ་ཝན་སི་ (Cory Vance) ལགས་སུ་འོས་གྲངས་བརྒྱ་ཆ་ ༡༢།༩༡ དང་། བྷི་རེན་ཧྥི་རན་ཁུ་ (Brian Frank) ལགས་སུ་འོས་གྲངས་བརྒྱ་ཆ་ ༤།༤༥ བཅས་ཐོབ་ཡོད་འདུག

ཨ་ཧྥ་ཊབ་ཀརྨ་སིང་པུ་རི་ཝལ་ལགས་ཐོག་མར་ཕྱི་ལོ་ ༢༠༢༡ ལོར་སིན་སིན་ན་ཊི་གྲོང་ཁྱེར་གྱི་སྤྱི་ཁྱབ་པའི་འོས་མི་ལངས་ཏེ། ལོ་དེའི་ཟླ་ ༡༡ ཚེས་ ༣ ཉིན་དངོས་གཞིའི་ཁྲོད་རྒྱལ་ཁ་ཐོབ་ཅིང་། ཁོང་གིས་བོད་རིགས་ཨ་རི་བ་ཞིག་ཐེངས་དང་པོར་ཨ་རིའི་གྲོང་ཁྱེར་ཆེ་གྲས་ཤིག་གི་སྤྱི་ཁྱབ་པར་འོས་འདེམས་བྱུང་བའི་ཟིན་ཐོ་བཀོད་ཡོད། ཨ་ཧྥ་ཊབ་ཀརྨ་སིང་པུ་རི་ཝལ་ལགས་ཀྱིས་དེ་སྔ་ཨ་རིའི་ཨོ་ཧ་ཡོ་མངའ་སྡེའི་ཧ་མིལ་ཊོན་ (Hamilton County) རྫོང་ཁྲིམས་ཁང་གི་ཁྲིམས་དྲུང་ཆེན་མོའི་ལས་འཁུར་ཞུས་མྱོང་འདུག་ལ། དེ་ནི་ས་གནས་སུ་ལོ་ངོ་ ༡༠༠ ལྷག་གི་རིང་ཨ་རིའི་དམངས་གཙོ་ཚོགས་པའི་ཚོགས་མི་ཞིག་ཁྲིམས་དྲུང་ཆེན་མོར་བསླེབས་པ་ཐོག་མ་དེ་ཆགས། དེ་བཞིན་ཕྱི་ལོ་ ༢༠༡༨ ལོར་ཁོང་ཨ་རིའི་གྲོས་ཚོགས་འོག་མའི་འཐུས་མིར་ལངས་ཏེ་བོད་མི་ཨ་རི་བ་ཞིག་ཨ་རིའི་གྲོས་ཚོགས་འཐུས་མིར་ལངས་བ་ཐེངས་དང་པོ་ཆགས་ཡོད་པ་དང་། འོས་བསྡུའི་དྲིལ་བསྒྲགས་སྐབས་ཁོང་གིས་རང་ཉིད་ཀྱི་ཕ་མའི་མི་རིགས་ལ་བརྟེན་ནས། རང་ཉིད་བོད་མི་ཨ་རི་བ་དང་རྒྱ་གར་ཨ་རི་བ་ཞིག་ཡིན་པར་སྤོབས་པ་བྱེད་ཀྱི་ཡོད་སྐོར་སོགས་བརྗོད་འདུག

ཕྱི་ལོ་ ༢༠༢༢ ཟླ་ ༡༢ པའི་ནང་སིན་སིན་ན་ཊི་གྲོང་ཁྱེར་སྤྱི་ཁྱབ་པ་ཨ་ཧྥི་ཊབ་ཀརྨ་སིང་པུ་རི་ཝལ་ལགས་ཀྱིས་སྣེ་འཁྲིད་དེ་གྲོང་ཁྱེར་དེའི་གནད་ཡོད་མི་སྣ་ཁག་ཅིག་བཞུགས་སྒར་དྷ་རམ་ས་ལར་ཆེད་དུ་ཕེབས་ནས། ༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་ཁ་ཞུས་པ་དང་བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱི་མཛད་གཙོ་རྣམ་པར་ཐུག་འཕྲད་དང་བོད་མིའི་སྒྲིག་འཛུགས་ཀྱི་ལྷན་ཁང་ཁག་དང་དེའི་གཡས་གཡོན་བོད་མིའི་ཚོགས་སྡེ་ཁག་ཏུ་གཟིགས་སྐོར་ལ་ཕེབས་ཡོད།

ད་ལྟ་རང་ལོ་ ༤༣  ཡིན་པའི་ཀརྨ་ལགས་ཀྱི་ཨ་མས་རྒྱ་གར་ལྷོ་ཕྱོགས་མེ་སོར་དུ་སློབ་སྦྱོང་བྱས་ཏེ། ཕྱིས་སུ་ལྡི་ལི་མཐོ་སློབ་ནང་སློབ་སྦྱོང་བྱེད་བཞིན་པའི་སྐབས་སུ། རྒྱ་གར་གྱི་པན་ཇབ་མི་རིགས་ཡིན་པའི་བྷི་རིག་ཨ་རྗེ་ཐི་སིང་ (Brig Ajit Singh) ཞུ་བ་དང་ཐུག་ནས་གཉེན་སྒྲིག་བྱས། ཕྱིས་སུ་ཨ་རིར་གནས་སྤོར་བྱས་ཏེ་ཕྱི་ལོ་ ༡༩༨༢ ལོའི་ཟླ་ ༩ བའི་ནང་ཀརྨ་ལགས་ཨོ་ཧ་ཡོའི་ཞེ་ནི་ཡ་ (Xenia) གྲོང་ཁྱེར་དུ་སྐྱེས་ཡོད་པ་དང་། ཁོང་གིས་ཁྲིམས་ལུགས་རིག་པར་སློབ་སྦྱོང་བྱས་ཡོད། ཕྱི་ལོ་ ༡༩༩༤ ལོར་ཁོང་དགུང་གྲངས་ ༡༣ སྟེང་བོད་ཀྱི་རྒྱལ་ས་ལྷ་སར་ཕྱིན། ཕྱི་ལོ་ ༢༠༡༨ ལོར་ཁོང་གིས་ཝི་ཊི་ནེ་(Dr. Whitney June Whitis) ལགས་དང་གཉེན་སྒྲིག་བྱས་ཏེ། ཕྱི་ལོ་ ༢༠༢༡ ལོར་ཁོང་གཉིས་ལ་བུ་ཆུང་བྷོ་དྷི་ (Bodhi) ཞེས་པ་ཞིག་སྐྱེས་ཡོད།

གསར་འགོད་པ། སྐལ་བཟང་སྦྱིན་པ།