དེ་རིང་ཕྱི་དྲོའི་ཆུ་ཚོད་བདུན་པ་མ་ཟིན་ཙམ་ལ་རྒྱ་གར་གྱི་རྒྱལ་ས་ལྡི་ལི་རུ་རླངས་འཁོར་འགས་གཏོར་གྱི་དོན་རྐྱེན་བྱུང་སྟེ་མི་བརྒྱད་རྐྱེན་འདས་དང་མི་ ༢༠ ལྷག་ལ་རྨས་སྐྱོན་ཕོག་ཡོད་འདུག
དེ་རིང་རྒྱ་གར་གྱི་རྒྱལ་ས་ལྡི་ལིའི་རྒྱལ་ཁང་དམར་པོའི་ཉེ་འགྲམ་དུ་རླངས་འཁོར་འགས་གཏོར་གྱི་དོན་རྐྱེན་ཞིག་བྱུང་སྟེ་མི་བརྒྱད་རྐྱེན་འདས་དང་མི་གྲངས་ ༢༠ ལྷག་ལ་རྨས་སྐྱོན་ཐེབས་པའི་གནས་ཚུལ་བྱུང་། ད་ལྟ་རྒྱལ་ས་ལྡི་ལིའི་ས་གནས་ཉེན་རྟོག་པས་རྨས་སྐྱོན་ཕོག་པའི་མི་རྣམས་སྨན་ཁང་དུ་མྱུར་སྐྱོབ་ཀྱིས་སྨན་བཅོས་བྱེད་མུས་ཡིན་པ་དང་། འགས་གཏོར་དོན་རྐྱེན་གྱི་རྒྱབ་ལྗོངས་སོགས་ལ་ཞིབ་འཇུག་བྱེད་བཞིན་ཡོད་སྐོར་བརྗོད་པ་ལས། དོན་རྐྱེན་གྱི་འབྱུང་ཁུངས་དངོས་གང་ཡིན་ཤེས་རྟོགས་ཐུབ་ཀྱི་མེད་སྐོར་རོའུ་ཊར་གསར་ཁང་གིས་བརྗོད་འདུག
རྒྱ་གར་གྱི་སྲིད་བློན་མུ་དྷི་མཆོག་གིས། གཏོར་རྒོལ་དོན་རྐྱེན་དེའི་ཁྲོད་རྐྱེན་འདས་སུ་ཕྱིན་པའི་ནང་མི་ཚོར་གདུང་སེམས་མཉམ་སྐྱེད་དང་རྨས་སྐྱོན་ཕོག་པའི་མི་རྣམས་མགྱོགས་མྱུར་དྲག་སྐྱེད་ཡོང་བའི་རེ་སྨོན་ཞུས་འདུག་ལ། རྒྱ་གར་གྱི་ནང་སྲིད་བློན་ཆེན་ཨ་མི་ཐི་ལགས་གཙོས་ལྡི་ལིའི་གསར་བའི་གནད་ཡོད་མི་སྣ་ཁག་ཅིག་དང་འབྲེལ་ཡོད་ཞིབ་འཇུག་ལས་ཁུངས་སོགས་ཀྱི་མི་སྣ་ཚོ་དོན་རྐྱེན་བྱུང་ཡུལ་དངོས་སུ་ཕྱིན་ནས་མི་མང་ལ་གདུང་སེམས་མཉམ་སྐྱེད་དང་ཡུལ་དངོས་སུ་ཞིབ་འཇུག་བྱེད་མུས་ཡིན་འདུག
ཐེངས་འདིའི་དོན་རྐྱེན་བྱུང་ཡུལ་ནི་རྒྱལ་ས་ལྡི་ལི་རྙིང་བའི་ཉེ་འཁྲིད་སུ་ཡོད་པའི་མོའོ་གྷལ་ (Mughal) རྒྱལ་ཁང་གི་འགྲམ་དུ་ཆགས་ཀྱི་ཡོད་པ་དང་། རླངས་འཁོར་ཞིག་གློ་བུར་འགས་འཐོར་བྱུང་བ་དང་ལྷན་དུ་རླངས་འཁོར་གཞན་དྲུག་ལ་མེ་སྐྱོན་བྱུང་ཡོད་འདུག་ལ། མི་རྣམས་འཇིགས་སྐྲག་དང་བཅས་བྲོས་བཞིན་པའི་བརྙན་རིས་སོགས་སྤྱི་ཚོགས་བརྒྱུད་ལམ་ཁག་ཏུ་འཐོན་མུས་རེད་འདུག ད་ལྟ་མི་གྲངས་ས་ཡ་ ༣༠ འདུས་པའི་རྒྱལ་ས་ལྡི་ལིར་འགས་གཏོར་དོན་རྐྱེན་བྱུང་བ་ལ་བརྟེན་ནས། ལྡི་ལིའི་ཁྱིམ་མཚེས་མངའ་སྡེ་ཨུ་ཊར་དང་མི་འབོར་མང་སའི་རྒྱ་གར་གྱི་གྲོང་ཁྱེར་མོམ་བྷེ་སོགས་སུ་བདེ་འཇགས་ཐད་དོགས་ཟོན་བྱེད་དགོས་པའི་བཀོད་ཁྱབ་བཏང་ཡོད་འདུག
མོའོ་གྷལ་རྒྱལ་ཁང་ནི་ལོ་འཆར་ཅན་རྒྱ་གར་གྱི་སྲིད་བློན་རིམ་པས་རྒྱ་གར་རང་བཙན་ཉིན་མོའི་གསུང་བཤད་གནང་ཡུལ་ཡིན་པ་དང་། ཕྱི་ལོ་ ༡༩༨༠ དང་ ༡༩༩༠ ཙམ་ནས་རྒྱལ་ས་ལྡི་ལི་ནི་དྲག་རྒོལ་བྱེད་ཡུལ་གྱི་དམིགས་འབེན་ཞིག་ཏུ་གྱུར་ཡོད་ཅིང་། ཕྱི་ལོ་ ༢༠༡༡ ལོར་རྒྱལ་ས་ལྡི་ལིའི་ཆེས་མཐོའི་ཁྲིམས་ཁང་གི་མདུན་དུ་འགས་གཏོར་དོན་རྐྱེན་བྱུང་སྟེ་མི་བཅུ་གཅིག་རྐྱེན་འདས་དང་མི་ ༦༡ ལྷག་ལ་རྨས་སྐྱོན་བཟོས་ཡོད་ལ། དེ་ནི་ཆེས་ཉེ་བའི་ལྡི་ལི་རུ་དྲག་རྒོལ་བྱས་པའི་དོན་རྐྱེན་ཡིན་པ་དང་དྲག་རྒོལ་དོན་རྐྱེན་དེ་དག་གི་རྒྱབ་ཏུ་པ་ཀི་སི་ཐན་དུ་ཡོད་པའི་ཁ་ཆེ་དྲག་དམག་ཡོད་པར་ཡིད་ཆེས་བྱེད་ཀྱི་ཡོད་འདུག
