ཐའེ་ཝན་གྱི་འཇམ་དབྱངས་ཆོས་ཚོགས་དང་འཇམ་དབྱངས་སྒྲུབ་ཁང་གཉིས་ནས་འཕགས་མ་སྒྲོལ་དཀར་འོད་ཟེར་དྲུག་སྦྲགས་ཀྱི་ཆོ་གའི་སྒོ་ནས་༸སྐྱབས་མགོན་ས་སྐྱ་༸གོང་མ་ཁྲི་ཆེན་རྡོ་རྗེ་འཆང་ཆེན་པོ་མཆོག་ལ་བརྟན་བཞུགས་བསྟར་འབུལ་ཞུས།
གནས་མཆོག་རྡོ་རྗེ་གདན་གྱི་ས་སྐྱ་བརྩེ་ཆེན་ཐེག་གསུམ་ཆོས་འཁོར་གླིང་དུ། ཐའེ་ཝན་འཇམ་དབྱངས་ཆོས་ཚོགས་དང་འཇམ་དབྱངས་སྒྲུབ་ཁང་གཉིས་ནས་ཇི་ལྟར་གསོལ་བ་བཏབ་པ་ལྟར།༸སྐྱབས་མགོན་ས་སྐྱ་༸གོང་མ་ཁྲི་ཆེན་རྡོ་རྗེ་འཆང་ཆེན་པོ་མཆོག་ལ་འཕགས་མ་སྒྲོལ་དཀར་འོད་ཟེར་དྲུག་སྦྲགས་ཀྱི་ཆོ་གའི་སྒོ་ནས་བརྟན་བཞུགས་བསྟར་འབུལ་ཞུས།
ས་སྐྱ་༸གོང་མ་ཁྲི་ཆེན་རྡོ་རྗེ་འཆང་ཆེན་པོ་མཆོག་ནས། ད་ལན་ཐའེ་ཝན་འཇམ་དབྱངས་ཆོས་ཚོགས་ཀྱིས་བརྟན་བཞུགས་ཟབ་རྒྱས་གནང་བར་ཐུགས་རྗེ་ཆེ་ཞུ། དམིགས་བཤད་ཞུ་རྒྱུ་གང་ཡང་མི་འདུག ཞལ་འདོན་གྱི་མཚམས་སུ་བླ་མ་སྐྱེས་ཆེན་རང་དབང་ཐོབ་མཁན་རྣམས་ལ་བཞུགས་རོགས་གནང་ཞུས་ཏེ། བླ་མས་ཀྱང་ཞལ་བཞུགས་ཀྱི་ཞལ་བཞེས་གནང་གི་ཡོད་པ་རེད། ང་རང་ནི་མིང་ཙམ་མ་གཏོགས་དོན་ལ་སོ་སོ་སྐྱེས་བུ་ཐ་མལ་བ་རང་རེད། ང་རང་ལ་རང་དབང་གང་ཡང་ཡོད་པ་མ་རེད། རང་དབང་གི་ཐོག་ང་རང་བསྡད་ཀྱི་ཡིན་དང་བསྡད་ཀྱི་མིན་ཞེས་ལབ་ཐུབ་ཀྱི་ཡོད་པ་མ་རེད། ཡིན་ནའང་། ད་ལན་གནས་མཆོག་ཁྱད་པར་ཅན་རྡོ་རྗེ་གདན་དུ་བླ་ཆེན་རྣམ་པ་དབུ་བཞུགས་ཐོག་མཁན་པོ་བླ་སྤྲུལ། དགེ་འདུན་འདུས་ཚོགས། དེ་བཞིན་མི་མང་རྣམས་ཀྱིས་དད་པ་དམ་ཚིག་གཡོ་བ་མེད་པའི་ཐོག་ནས་བརྟན་བཞུགས་ཟབ་རྒྱས་གནང་བ་ཡིན་དུས། དེ་ལ་ཏན་ཏན་ནུས་པ་དང་བྱིན་རླབས། དགེ་མཚན་ཏན་ཏན་ཡོད་ཀྱི་རེད། དེ་འདྲའི་ཐུགས་རྗེ་དང་བྱིན་རླབས་ལ་བརྟེན་ནས་གཙོ་ཆེ་ཤོས་རང་ཅག་གངས་ཅན་པ་ཡོངས་ལ་བཀའ་དྲིན་ཤིན་ཏུ་ཆེ་བ་༧སྤྱི་ནོར་རྒྱལ་བའི་དབང་པོ་དབུ་བཞུགས་ཐོག རིས་སུ་མ་མཆེད་པའི་བསྟན་འཛིན་གྱི་སྐྱེས་སུ་དམ་ཐམས་ཅད་སྐུ་ཚེའི་ཞབས་པད་བརྟན་ཅིང་། ཐུགས་ཀྱི་བཞེད་དོན་ཐམས་ཅད་འབད་མེད་ལྷུན་གྱི་འགྲུབ་པ་དང་། དེ་དག་གི་བྱིན་རླབས་ལ་བརྟེན་ནས་ང་རང་ད་ལྟ་གཟུགས་པོ་ཧ་ཅང་ཡག་པོ་ཡོད། ཨམ་རྗེ་རྣམས་ཀྱིས་སློབ་སྟོན་ལྟར་དུ་འཕྲོད་བསྟེན་ཧ་ཅང་ཡག་པོ་འགྲོ་བཞིན་ཡོད། ཡིན་ནའང་། ངོས་ཀྱི་སྐེད་པ་དང་རྐང་བ་གཉིས་ནམ་རྒྱུན་བདེ་བོ་མེད་པ་དང་། ཉེ་ཆར་གནམ་གཤིས་སོགས་ཀྱི་རྐྱེན་ལ་བརྟེན་ནས་ཅུང་ཙམ་སྡུག་ཏུ་ཕྱིན་འདུག ཡིན་ནའང་ཐུགས་འཚབ་གནང་དགོས་པ་གང་ཡང་མེད། ཚང་མས་ཐུགས་བདེ་བོ་གནང་རོགས་ཞུ་རྒྱུ་ཡིན། ཐུགས་རྗེའི་བྱིན་རླབས་ལ་བརྟེན་ནས་ང་རང་ཡང་ཡུན་རིང་པོར་འཚོ་ཐུབ་པའི་ཡིད་ཆེས་ཡོད་ལ། ཁྱེད་རྣམས་ཀྱིས་ཐུགས་སྨོན་གནང་བ་དང་བརྟན་བཞུགས་ཀྱི་ཆོ་གའི་ནང་དུ་ཡོད་པ་བཞིན། གང་དེར་བསྟན་པ་རྒྱས་པ་་དང་།། སེམས་ཅན་ཕན་པའི་རྒྱུ་གྱུར་ན།། མི་ལོ་བརྒྱ་ཕྲག་བརྒྱད་ལྷག་སོགས།། གང་འདོད་འཚོ་བ་བླ་མ་དང་།། རྒྱལ་བ་སྲས་དང་བཅས་པའི་བདག།། དབང་ཕྱུག་ལྡན་པར་བྱིན་གྱི་རློབས།། ཞེས་གསུངས་པ་བཞིན། དེ་དེ་བཞིན་ཞུ་རྒྱུ་ཡིན། ཚང་མས་ཐུགས་བདེ་བོ་གནང་རོགས། ཞེས་གསུངས་སོང་།
ཉེ་ལམ་གནས་མཆོག་རྡོ་རྗེ་གདན་གྱི་ས་སྐྱའི་དགུན་ཆོས་ཐོག༧ས་སྐྱ་གོང་མ་ཁྲི་ཆེན་རྡོ་རྗེ་འཆང་མཆོག་ནས་ཐུབ་པ་དམ་ཚིག་གསུམ་བཀོད་ཀྱི་དབང་ཆེན་སྩལ་ཡོད་པ་དང་། དེ་བཞིན་རྒྱ་གར་ལྷོ་ཕྱོགས་ཐེག་མཆོག་རྣམ་གྲོལ་བཤད་སྒྲུབ་དར་རྒྱས་གླིང་དང་། སེ་ར་ཐེག་ཆེན་གླིང་། ས་དགོན་བརྩེ་ཆེན་ཆོས་འཁོར་གླིང་སོགས་སུ་ཕེབས་ཏེ། འཁོན་ལུགས་རྡོ་རྗེ་ཕུར་བའི་གཏོར་དབང་དང་། གྲུབ་ཆེན་ཛེ་ཏ་རི་ནས་བརྒྱུད་པའི་འཇམ་དབྱངས་དམར་སེར་གྱི་རྗེས་གནང་། གྲུབ་ཆེན་ཐང་སྟོང་རྒྱལ་པོ་ནས་བརྒྱུད་པའི་ཚེ་དབང་ལོ་བརྒྱ་མ། རྡོ་རྗེ་ཕུར་བའི་བཀའ་བསྒོ་དང་སངས་རྒྱས་འོད་དཔག་མེད་ཀྱི་འཕོ་བ་སོགས་ཀྱི་མཛད་འཕྲིན་བསྐྱངས་ཡོད་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་པ། སྐལ་བཟང་སྦྱིན་པ།
