བོད་པའི་དགུན་ཚོང་ཁང་ ༡༡ ལ་མེ་སྐྱོན་བྱུང་།

རྒྱ་གར་གྱི་ནུབ་བྷང་གྷལ་མངའ་སྡེའི་ཀོལ་ཀ་ཏ་གྲོང་ཁྱེར་ནང་ཡོད་པའི་བོད་པའི་དགུན་ཚོང་ཁང་ ༡༡ ལ་གློ་བུར་མེ་སྐྱོན་བྱུང་འདུག

ཁ་སང་ཕྱི་ཚེས་ ༨ ཀྱི་ཉིན་རྒྱབ་ཆུ་ཚོད་ ༣ ཙམ་གྱི་སྟེང་དུ། རྒྱ་གར་གྱི་ནུབ་བྷང་གྷལ་མངའ་སྡེའི་ཀོལ་ཀ་ཏ་གྲོང་ཁྱེར་ནང་ཡོད་པའི་ཁྲོམ་རྭ་ཞིག་ལ་གློ་བུར་མེ་སྐྱོན་ཤོར་ཏེ། ཚོང་ཁང་ ༤༠ ལྷག་མེ་ཡིས་འཚིགས་ཡོད་པའི་ཁྲོད་དུ། བཙན་བྱོལ་བོད་མིའི་ཚོང་པ་ཚོགས་པའི་ཁྱབ་ཁོངས་ཀྱི་བོད་པའི་ཚོང་ཁང་ ༡༡ ཚུད་འདུག

དེ་རིང་འདི་གའི་གསར་འགོད་པས་ཁ་པར་བརྒྱུད་བཙན་བྱོལ་བོད་མིའི་ཚོང་པ་ཚོགས་པའི་ཚོགས་གཙོ་བསོད་ནམས་སྟོབས་རྒྱལ་ལགས་སུ་མེ་སྐྱོན་དེའི་སྐོར་དྲིས་པར་ཁོང་གིས། ཀོལ་ཀ་ཏའི་མེ་སྐྱོན་དོན་རྐྱེན་དེ་སྨྱུག་མ་མང་པོ་ཡོད་པའི་ཁྲོམ་རྭའི་རྒྱབ་ཀྱི་ཐང་ཆེན་ཞིག་ཏུ། གནམ་གཤིས་གྲང་མོ་ཡིན་པའི་དབང་གིས་མི་འགས་མེ་སྤར་བའི་རྐྱེན་བྱས་ཏེ་ཁྲོམ་རྭར་མེ་ཤོར་འདུག མེ་སྐྱོན་བྱུང་ཡུལ་ཐོག་མ་དེ་རྒྱ་གར་བའི་ཁྲོམ་ས་རེད། རྒྱ་གར་བའི་ཚོང་ཁང་ ༣༠ ལྷག་ལ་མེ་སྐྱོན་ཤོར་རྗེས་བོད་པའི་ཚོང་ཁང་ ༡༡ ལའང་མེ་ཤོར་འདུག མེ་ཤོར་མ་ཐག་མེ་གསོད་རུ་ཁག་ལ་འབྲེལ་བ་ཞུས་ཡོད་ཀྱང་སྐར་མ་ ༡༣ གྱི་རྗེས་སུ་མ་གཏོགས་འབྱོར་ཐུབ་མི་འདུག ཅེས་བརྗོད་བྱུང་ལ། ས་ཁུལ་དེར་བོད་པའི་ཚོང་ཁང་ཁྱོན་ ༣༠ ཡོད་པ་ལས་ཚོང་ཁང་ ༡༩ མེ་སྐྱོན་གྱི་ཉེན་ཁ་དེ་ལས་གཡོལ་ཐུབ་ཡོད་འདུག

མེ་སྐྱོན་དོན་རྐྱེན་དེ་དང་འབྲེལ་ནས་བོད་མིའི་ཚོང་ཚོགས་ཀྱི་ཚོགས་གཙོ་བསོད་ནམས་སྟོབས་རྒྱལ་ལགས་ཀྱིས། ང་ཚོ་ཚོང་ལས་ཚོགས་པའི་ངོས་ནས་ལོ་འཆར་ཅན་དུ་ཁྱབ་ཁོངས་བོད་མི་ཚོང་ལས་པ་རྣམས་ལ་དགུན་ཚོང་རྒྱག་གི་འགྲོ་དུས་གཟབ་ནན་དགོས་པའི་འབོད་སྐུལ་དང་ལམ་སྟོན་ཞུས་དང་ཞུ་མུས་ཡིན། དངུལ་འབོར་ཆེན་ལག་ཏུ་ཉར་ནས་རྗེས་སུ་རྐུན་ལ་ཤོར་གྱི་ཡོད་སྟབས།  ང་ཚོས་དངུལ་དུས་ཐོག་ཏུ་དངུལ་ཁང་དུ་འཇོག་པའམ་ཡང་ན་རྒྱ་གར་གྱི་ཚོང་ཤག་་ལཱ་ལཱར་གཏོང་དགོས་པའི་འབོད་སྐུལ་དང་ལམ་སྟོན་ཞུ་བཞིན་ཡོད་ལ། ཡང་བོད་མི་ཁག་ཅིག་ལ་ཅ་ལག་དབོར་འདྲེན་བྱེད་སྐབས་དངོས་ཟོག་བོར་བརླག་བྱུང་བའི་དཀའ་ངལ་འཕྲད་ཀྱི་ཡོད་པ་དང་། ཁྲོམ་ས་ཁག་ཅིག་ལ་གློག་སྐུད་རྙིང་བ་ཡིན་པའི་རྐྱེན་བྱས་ཏེ་མེ་སྐྱོན་འབྱུང་གི་ཡོད་སྟབས། ལོ་རེ་བཞིན་ཁྲོམ་སའི་གློག་སྐུད་བརྗེ་དགོས་པ་དང་མེ་གསོད་རྔུག་རླངས་འཇོག་དགོས་པ། མཚན་སྲུང་བ་འཇོག་དགོས་པ་སོགས་ཀྱི་ལམ་སྟོན་ཡང་ནས་ཡང་དུ་བྱེད་ཀྱིན་ཡོད་ལ་། ད་ཐེངས་ཡང་བརྒྱུད་ལམ་འདི་བརྒྱུད་ནས་བོད་མི་དགུན་ཚོང་རྒྱག་མཁན་ཚོས་གཟབ་ནན་གནང་རོགས་ཞེས་འབོད་སྐུལ་ཞུ་རྒྱུ་ཡིན། བརྗོད་བྱུང་།

གསར་འགོད་པས་ཐེངས་འདིའི་མེ་སྐྱོན་དོན་རྐྱེན་དེའི་ཁྲོད་བོད་མིའི་ཁྲོམ་རྭར་གྱོང་གུད་ག་ཚོད་ཅིག་ཐེབས་ཡོད་པ་དང་། ཁོང་ཚོའི་དཀའ་ངལ་སེལ་ཐབས་ག་རེ་གནང་འཆར་ཡོད་མེད་དྲིས་པར་ཁོང་གིས། ཁ་སང་མེ་སྐྱོན་བྱུང་རྗེས་ཉེན་རྟོག་པ་སོགས་ཡོང་ཡོད་སྟབས། ད་ལྟ་མེ་སྐྱོན་ཤོར་སའི་ཡུལ་དངོས་སུ་ཞིབ་འཇུག་བྱེད་བཞིན་ཡོད་པའི་དབང་གིས་མི་གཅིག་ཀྱང་གཏོང་གི་མི་འདུག དེར་བརྟེན་ད་རེས་གྱོང་གུད་ག་ཚོད་ཅིག་རག་ཡོད་མེད་བཤད་ཚོད་ཐིག་གི་མི་འདུག ང་ཚོ་ཚོང་ལས་ཚོགས་པའི་ངོས་ནས་གྱོང་གུད་ཐེབས་པ་རྣམས་ལ་རོགས་སྐྱོར་བྱེད་པར་ད་ལྟ་ནས་གྲོས་བསྡུར་བྱེད་བཞིན་ཡོད་ལ། ཡང་གལ་སྲིད་ང་ཚོ་ཚོང་ལས་ཚོགས་པ་དང་ཁྱབ་ཁོངས་ཚང་མའི་ངོས་ནས་རོགས་སྐྱོར་བྱེད་ཐབས་བྲལ་བའི་གནས་སྟངས་ཆགས་ཚེ། ནང་སྲིད་ལས་ཁུངས་བརྒྱུད་བོད་མིའི་སྒྲིག་འཛུགས་ལའང་རོགས་སྐྱོར་ཞུ་དགོས་བྱུང་སྲིད་པ་རེད། འོན་ཀྱང་། ད་ལྟ་གནས་སྟངས་ལ་རྒྱུས་ལོན་མེད་དུས་དམིགས་བསལ་འཆར་གཞི་གང་ཡང་མེད་ཅེས་བརྗོད་བྱུང་།

བསོད་ནམས་སྟོབས་རྒྱལ་ལགས་ཀྱིས་གསུངས་པ་ལྟར་ན། ཕྱི་ལོ་ ༡༩༥༩ ལོར་བོད་མི་རྣམས་རྒྱ་གར་ནང་སྐྱབས་བཅོལ་དུ་འབྱོར་བ་དང་ལམ་བཟོ་སོགས་བྱས་ནས་བསྡད་ཡོད་པ་དང་རིམ་བཞིན་བོད་མི་གཞོན་སྐྱེས་ཁག་ཅིག་གིས་ཧིན་རྡུའི་སྐད་ཤེས་པ་ལ་བརྟེན་ནས་རང་ཉིད་ཀྱིས་ལག་བཟོས་དངོས་ཟོག་བཙོང་མགོ་བཙུགས་པ་དང་། ཕྱི་ལོ་ ༡༩༧༣ ཙམ་ནས་ལུ་དི་ཡ་ན་ནས་རྒྱ་གར་གྱི་ཚོང་ཤག་དང་འབྲེལ་འདྲིས་ཀྱིས་སུད་ཚོང་བརྒྱབ་ཡོད་ཅིང་།  དེ་ནས་བོད་མི་ཚོང་ལས་པ་རྣམས་ཁ་འཐོར་དུ་གནས་ཡོད་པར་བརྟེན་གཅིག་གྱུར་བཟོ་གལ་ཆེ་བའི་གནད་འགག་གཟིགས་ནས་བཀའ་ཤག་སྐབས་བཅུ་བའི་ལམ་སྟོན་ལྟར།དཔལ་འབྱོར་ལས་ཁུངས་ཀྱི་གོ་སྒྲིག་འོག་ཕྱི་ལོ་ ༢༠༠༦ ལོར་རྒྱ་གར་གྱི་རྒྱལ་ས་ལྡི་ལི་རུ་ཚོགས་ཆེན་འཚོགས་ཏེ། བཙན་བྱོལ་བོད་མིའི་ཚོང་ལས་ཚོགས་པའི་སྒྲིག་འཛུགས་དབུ་བརྙེས་ཡོད་པ་དང་། ད་ལྟ་ཚོང་ལས་ཚོགས་པ་འདིའི་ཁྱབ་ཁོངས་སུ་རྒྱ་གར་གྱི་མངའ་སྡེ་ ༢༡ ནང་གནས་པའི་བོད་མིའི་ཚོང་ལས་ཚོགས་པ་ ༢༣༥ དང་ཚོགས་མི་གྲངས་ལྔ་སྟོང་ལྷག་ཡོད་པ་རེད།

གསར་འགོད་པ། སྐལ་བཟང་སྦྱིན་པ།