རྒྱ་ནག་དབུས་དམག་དོན་ལྷན་ཁང་གི་འགན་འཛིན་གཞོན་པ་ཀྲང་ཡུ་ཤཱ་（zhang youxia) དང་དབུས་དམག་དོན་མཉམ་འབྲེལ་སློབ་སྟོན་ཁང་གི་འགན་འཛིན་ལུའུ་ཀྲིན་ལི་(Liu Zhenli)གཉིས་ལ་ཞིབ་བཤེར་བྱེད་བཞིན་ཡོད་འདུག
ཁ་སང་རྒྱ་ནག་གཞུང་གིས་གནས་ཚུལ་བསྒྲགས་པ་ལྟར་ན། རྒྱ་ནག་གཞུང་གིས་རྒྱ་ནག་དབུས་ཆབ་སྲིད་ལྷན་ཁང་གི་རྒྱུན་ལས་དང་། རྒྱ་ནག་དབུས་དམག་དོན་ལྷན་ཁང་གི་འགན་འཛིན་གཞིན་པ་ཀྲང་ཡུ་ཤཱ་（zhang youxia) དང་། རྒྱ་ནག་དབུས་ཆབ་སྲིད་ལྷན་ཁང་རྒྱུན་ལས་དང་། རྒྱ་ནག་དབུས་དམག་དོན་མཉམ་འབྲེལ་སློབ་སྟོན་ཁང་གི་འགན་འཛིན་ལུའུ་ཀྲིན་ལི་(Liu Zhenli) གཉིས་ཁྲིམས་སྒྲིག་དང་ཚབས་ཆེན་འགལ་བའི་ནག་ཉེས་འོག་ཞིབ་བཤེར་བྱེད་བཞིན་ཡོད་འདུག
དམག་དཔོན་དེ་གཉིས་ཀྱི་གནད་དོན་ལ་རྒྱ་ནག་དབུས་སྲིད་གཞུང་གིས་ཞིབ་འཇུག་བྱས་པ་བརྒྱུད། ཞིབ་བཤེར་བྱ་རྒྱུའི་ཐག་གཅོད་བྱས་ཡོད་སྐོར་བསྒྲགས་འདུག་ལ། བརྒྱུད་ལམ་གྱི་གནས་ཚུལ་ལྟར་ན། རྒྱ་ནག་གཞུང་གིས་རྒྱ་ནག་དམར་ཤོག་ཚོགས་པ་དང་། དམར་ཤོག་གཞུང་ལ་ཡིད་ཆེས་དང་རེ་བ་བརླགས་ཤིང་། ཀྲུང་དབྱང་དམག་ལྷན་གྱི་འགན་འཁུར་ལམ་ལུགས་ལ་གཏོར་བརླག་དང་ཉམས་དམས་ཚབས་ཆེན་བཏང་བ། རྒྱ་ནག་གི་དམག་སྲིད་ལ་གནོད་འཚེ་དང་འཇིགས་སྐུལ་ཚབས་ཆེན་བཟོས་བ། རྒྱ་ནག་དམག་སྲིད་ལྷན་ཁང་གི་སྣང་བརྙན་དང་གཟི་བརྗིད་ལ་གནོད་སྐྱོན་ཚབས་ཆེན་བཏང་བ། དཔོན་དམག་གི་མཐུན་སྒྲིལ་དང་ཡར་རྒྱས་ཀྱི་ཆབ་སྲིད་དང་བསམ་བློའི་རྨང་གཞི་ལ་གཏིང་ཟབ་པའི་ཤུགས་རྐྱེན་ངན་པ་ཐེབས་པ། དམག་དཔུང་གི་ཆབ་སྲིད་འཛུགས་སྐྲུན་དང་། འཐབ་འཛིང་ནུས་པ་བཅས་ལ་གནོད་འཚེ་ཚབས་ཆེན་བཟོས་པ་མ་ཟད།དམར་ཤོག་ཚོགས་པ་དང་། རྒྱལ་ཁབ། དམག་དཔུང་བཅས་ལ་ཤུགས་རྐྱེན་ངན་པ་ཧ་ཅང་ཆེན་པོ་ཐེབས་ཡོད་ལུགས་བསྒྲགས་འདུག
ཡང་རྒྱ་ནག་གཞུང་གིས་ཀྲང་ཡུ་ཤཱ་དང་ལུའུ་ཀྲན་ལི་གཉིས་ལ་ཆད་པ་གཅོད་པ་དང་ཉེས་ཆད་གཅད་རྒྱུ་ནི་སྲིད་དབང་གི་གནས་སྟངས་ལེགས་སྒྲིག་བྱེད་པ་དང་། བསམ་བློའི་དུག་རྒྱུན་དང་སྤྱོད་ཚུལ་ངན་པ་སེལ་བ། རུལ་སུངས་སེལ་བ། ཆབ་སྲིད་ཀྱི་དག་ཐེར་གྱི་གྲུབ་འབྲས་སྲ་བརྟན་དང་གཏིང་ཟབ་ཏུ་གཏོང་བ། མི་མང་དམག་དཔུང་ལ་སྐུལ་འདེད་གཏོང་བ། དམག་དཔུང་སྟོབས་ཆེན་འཛུགས་སྐྲུན་བྱེད་པའི་འཕེལ་རྒྱས་ལ་ནུས་པ་ཆེན་པོ་འདོན་དགོས་ངེས་ཀྱི་དོན་སྙིང་གལ་ཆེན་ལྡན་ཚུལ་སོགས་བསྒྲགས་འདུག
རྒྱ་ནག་དབུས་དམག་དོན་ལྷན་ཁང་གི་འགན་འཛིན་གཞིན་པ་ཀྲང་ཡུ་ཤཱ་（zhang youxia) ནི། ཕྱི་ལོ་ ༡༩༦༨ ལོར་དམག་དཔུང་ནང་ཞུགས་ཏེ། ཕྱི་ལོ་༡༩༧༩ ལོའི་རྒྱ་ནག་དང་ཝེ་ཐི་ནམ་གྱི་དམག་འཁྲུག་དང་། ཕྱི་ལོ་ ༡༩༨༤ ལོའི་ལའོ་ཧྲན་གྱི་དམག་འཁྲུག་ནང་མཉམ་ཞུགས་བྱས་པས་རྒྱ་ནག་གི་ཞབས་ཞུ་དམག་སྤྱི་ཉུང་ཤས་ཤིག་གི་གྲས་སུ་དམག་འཁྲུག་གི་ཉམས་མྱོང་ཡོད་པ་ཞིག་དང་། ཕྱི་ལོ་ ༢༠༠༠ ལོར་ཁོང་དམག་དཔུང་ཨང་༡༣ པའི་དམག་སྤྱིར་གྱུར། ཕྱི་ལོ་༢༠༠༥ ལོར་པེ་ཅིང་དམག་ཁུལ་གྱི་དམག་སྤྱི་གཞོན་པར་གྱུར། ཕྱི་ལོ་༢༠༠༧ ལོར་ཁོང་ཧྲེན་ཡང་དམག་ཁུལ་གྱི་དམག་སྤྱིར་བསྐོ་གཞག་བྱས་པ་དང་། རྒྱ་ནག་དམར་ཤོག་ཚོགས་པའི་དབུས་ལྷན་ཁང་གི་ཚོགས་མིར་གྱུར། ཕྱི་ལོ་ ༢༠༡༡ ལོར་དམག་སྤྱིར་བསྐོ་གཞག་བྱས། ཕྱི་ལོ་༢༠༡༢ ལོར་སྔོན་ཆད་རྒྱ་ནག་མི་དམངས་བཅིངས་འགྲོལ་དམག་གི་སྤྱི་ཁྱབ་གོ་མཚོན་ལས་ཁུངས་ཀྱི་མགོ་ཁྲིད་བྱས་ཡོད་ཅིང་། ཕྱི་ལོན ༢༠༡༦ ལོར་ཀྲུང་དམག་ཨུ་ཡོན་ལྷན་ཁང་གི་གོ་མཚོན་འཕེལ་རྒྱས་སྡེ་ཚན་གྱི་མགོ་ཁྲིད་བྱས། ཕྱི་ལོ་ ༢༠༡༧ ལོར་རྒྱ་ནག་དམར་ཤོག་ཚོགས་པའི་ཆབ་སྲིད་ཅུས་ཀྱི་ཚོགས་མིར་གྱུར་པ་དང་། ཀྲུང་དམག་ཨུ་ཡོན་ལྷན་ཁང་གི་མགོ་གཙོ་གཞོན་པ་ཨང་གཉིས་པར་གྱུར། ༢༠༢༢ ལོར་ཀྲུང་དམག་ཨུ་ཡོན་ལྷན་ཁང་གི་མགོགཙོ་གཞོན་པ་ཨང་དང་པོར་གྱུར།
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།
