ནང་བསྟན་དཔེ་ཚོགས་ཀྱི་བར་སྐབས་ཀྱི་དོན་རྐྱེན་ཞིག
རྩོམ་པ་པོ། གངས་དཀར་ལྷ་མོ།
རྩོམ་ཁུངས། བོད་ཀྱི་དུས་བབ།
ཉིས་སྟོང་ཉེར་ལྔ་ལོའི་ཚ་བས་རབ་ཏུ་གདུང་པའི་དབྱར་གཞུང་གི་ཉིན་གཅིག ཁོ་མོ་རང་ཁྱིམ་ནས་ཅུང་ཟད་ཐག་མི་རིང་བའི་མཚོ་ཁར་སྐྱོ་བསངས་ལ་ཕྱིན། ཚ་ཧུར་ཧུར་གྱི་རླུང་བུ་དང་། ཤག་ཤག་ཅེས་དལ་འཇགས་མེད་པའི་རྦ་རླབས་ཀྱི་བརྡབ་སྒྲ་བརྒྱུད་མར་སྒྲོག་པའི་ཨེཊ་ལན་ཊིག་རྒྱ་མཚོ་ཆེན་པོའི་(Atlantic Ocean) ཟུར་ཞིག་ཏེ། ཨིནྡྲ་ནཱི་ལའི་མདངས་དང་ལྡན་ལ་མེ་ལོང་ལྟར་ངོས་སྙོམས་པའི་མཚོ་འགྲམ་དུ་སྐྱེ་བོ་ཐར་ཐོར་ཉི་མ་ལྡེས་ཤིང་། མཚོ་ཁུག་ན་ངུར་པའི་ཚོགས་རྣམས་ཁྱོ་ཤུག་ཆ་རེ་རེའི་བར་ན་ངུར་ཕྲུག་རྣམས་མཉམ་གཤིབ་ཀྱིས་ཕ་མའི་སྲུང་སྐྱོབ་འོག་བློ་བདེ་བག་ཕེབས་ངང་ཙིར་ཙིར་ཟེར་རྒྱུ་བར་བྱེད། ཆུ་སྐྱར་རྣམས་ནི་འདུ་ཚོགས་ལ་མི་དགའ་བས་རང་རང་སོ་སོ་གང་འདོད་དུ་གནམ་ལ་འཕུར་ཙམ་དང་ཆུ་རགས་སྟེང་བབ་ཙམ་བྱེད། ཁོ་མོ་ཡང་ཁོ་ཚོ་དང་ཅུང་ཐག་མི་རིང་བའི་མཚོ་འགྲམ་དུ། ཕ་མཐའ་མི་མངོན་པའི་རྒྱ་མཚོར་ལྟ་ཞིང་ལག་གིས་བྱེ་མ་རླུང་བུར་བསིལ་ཞོར་བསམ་བློ་འདྲ་མིན་བཅོ་བརྒྱད་ཀྱི་དཀྱིལ་འཁོར་དུ་ཚུད།
དུས་ཀྱི་བགྲང་བྱ་འགོག་མེད་མདུན་དུ་འཁོར་བས་ན། གོ་མེད་ཚོར་མེད་ངང་དུ་གཞོན་ནུའི་གནས་སྐབས་ནས་དར་མ་དང་། དར་ཡོལ། ད་ཆ་རྒས་པའི་གནས་སྐབས་ཀྱི་སྒོ་ཁར་འཕུར་བ་བཞིན་དུ་སླེབས། དེའི་རིང་རང་གི་ཁྱིམ་གཞིས་ལྟར་ལྷག་བསམ་རྣམ་པར་དག་པས་ཞབས་ཞུ་བསྒྲུབ་སའི་བོད་ཀྱི་ནང་བསྟན་དཔེ་ཚོགས་ལྟེ་གནས་དེ། གློ་བུར་དུ་་་
མ་མཇལ་རྒྱང་གྲགས་ཆེ་བ།།
ལྷོ་བྲག་སྲས་མཁར་དགུ་ཐོག། །
ཨོ་ལོས་མཇལ་བར་ཕྱིན་པས།།
ཁང་མིག་གཅིག་ལས་མི་འདུག།།
ཅེས་པའི་དཔེ་ལྟ་བུར་སོང་བས་བསམ་པའི་འཆར་སྒོ་ཡོད་ཚད་རྐྱེན་ངན་དེའི་སྟེང་དུ་བབས། ད་བཟོད་སྐྱིད་སྣང་ཡོངས་རྫོགས་ཐོར་ཞིང་རིམ་བཞིན་སྐྱོ་སྣང་ཆེ་བ་ཞིག་ཏུ་གྱུར་བ་ནི། བཞད་བཞིན་པའི་མེ་ཏོག་དེ་ཉིད་སྐད་གཅིག་ལ་སད་ཀྱིས་བཅོམ་པའམ་བྱིའུ་ཕྲུག་ལ་རྡོ་ཕོག་པ་དང་གཉིས་སུ་མ་མཆིས་པས་ཡིད་སློང་སློང་པོར་ཤུགས་རིངས་ནར་ནར་འབྱིན་པར་གྱུར།
འཁོར་བའི་བདེ་སྡུག་པ་ཏྲའི་རི་མོ་ལྟར་འཛིང་བ་ནི་ཆོས་ཉིད་དུ་བསམ་ཀྱང་ཉེ་དུས་གློ་བུར་དུ་བྱུང་བའི་དོན་རྐྱེན་ལ་བསམ་ཚེ་སྐད་གཅིག་ཉིད་ལ་ལུས་སེམས་གྲང་ཤུར་ཤུར་དུ་གྱུར་ཅིང་ལུས་ཀྱི་བ་སྤུ་ཡང་གྱེན་དུ་ཟིང་ངེ་བ་བྱས།
སྲིད་པའི་ཕུན་ཚོགས་ནི་ཡིད་བརྟན་མི་རུང་བ། རྟག་པ་མ་ཡིན་པ། མི་ཚེ་ཞེས་པ་གདོད་མ་ནས་དགའ་སྐྱོ་ཆགས་སྡང་གིས་གྲུབ་པས་སྐྱོ་དོན་ག་ལ་འདུག སྡུག་བསྔལ་བར་མ་བྱེད་ཅིག ད་གཟོད་ཁྱོད་རང་གིས་མི་ཚེའི་གོ་རྟོགས་སད་སོང་ངམ། ཡང་ན་སད་མ་སོང་། ཞེས་རང་གིས་རང་ལ་དྲི་བ་ཞིག་ཀྱང་བཀོན། སླར་ཁོང་དགོད་གཅིག་ཀྱང་འཆོར།
ཡང་བསམ་བློའི་འཁོར་ཕྱོགས་གཅིག་ལ་འཇིག་རྟེན་སྟེང་དུ་གང་ཡང་སྲིད་པ་ཞིག་ཡིན་པས་གནས་ཚུལ་འདི་མ་བྱུང་བའི་ཁུལ་བྱས་ན་སླ་སྙམ་རུང་། དོན་རྐྱེན་འདི་སྐོར་གནས་དང་དུས་གང་དུའང་སྐྱེ་བོའི་ཚོགས་ཀྱིས་གླེང་རྒྱུར་གདོན་མི་ཟ་སྟེ། དེ་ལས་སླད་ཀྱི་མི་ཚེ་གང་པོའི་འགྱོད་པ་སེལ་ཕྱིར་དངོས་བྱུང་གནས་ཚུལ་རྣམས་མཐའ་གསལ་བ་ཞིག་འདིར་ཆེད་དུ་མི་གླེང་ཐབས་མེད་ཀྱི་དུས་ལ་བབ་པ་ཤེས།
ཨ་ཅང་ཅང་། ཀློག་པོ་རྣམས་ཀྱིས་གཏམ་རྒྱུད་འདིའི་གནས་ཚུལ་ཞིབ་ཅིང་ཕྲ་བ་ག་ལ་མཁྱེན། འདིས་ག་རེ་བཤད་ཀྱིན་འདུག་དགོངས་པའི་བློ་དོགས་ཡོང་སྲིད་པས། མཚམས་འདིར་དགོས་པའི་དབང་གིས་ཇི་མ་ཇི་བཞིན་ལེགས་ཉེས་ཀྱི་བྱུང་རིམ་དང་དེ་ལས་ཐོབ་པའི་བསླབ་བྱ་རྣམས་བབ་ཅོལ་གྱི་གཏམ་དང་མ་འདྲེས་པར་མྱོང་བ་རྗེན་བཤད་དང། གོ་བ་དཔེར་མཚོན་གྱིས་ཤོག་དྲིལ་དུ་བྱ་བར་བརྩམས། ཅིས་ན་ངག་ཏུ་གླེང་བ་ལྟར་ཏེ་ཡོངས་སུ་རྫོགས་པ་ནི་རི་མོའི་འདུ་བྱེད་ཀྱིས་ངལ་ཏེ་འགོད་པར་མ་སྤོབས་ཡང། ད་བར་ནང་བསྟན་དཔེ་ཚོགས་ཀྱི་བཟང་ཕྱོགས་ཤ་སྟག་བརྒྱུད་སྒྲོགས་བྱས་ཡོད་པས། ད་ཐེངས་ཞན་ཆའི་ཕྱོགས་བྱུང་ཚུལ་རིགས་པར་བྱ་བའི་སླད་དུ་གནད་བསྡུས་ཤིག་དཔྱོད་ལྡན་ཀློག་པོ་རྣམས་ཀྱི་སྤྱན་ལམ་དུ་ཟོལ་མེད་པར་གསོལ་ན་ཆེས་མི་སྐྱོན་སྙམ་པས་གཟུ་བོར་གནས་པའི་བློས་དཔྱད་པར་འཚལ།
ཀྱེ་མ། དེ་རིང་ཞིང་གཤེགས་དམ་པ་འཇམ་དབྱངས་འཇིན་སི་མིད་(1936-2010) ལགས་སུ་ཤིན་ཏུ་ནས་ངོ་གནོངས་ཤིང་། གང་གིས་བོད་ཀྱི་ཆོས་རིག་ལ་བཅངས་པའི་མཛད་རྗེས་རྣམས་ཕྲེང་བརྒྱུད་དུ་ཡིད་ལ་འཁོར། ཕྲག་པ་གློད་མགོ་བོ་དུད་དེ་གནས་པའི་ཚེ། མཚོ་ཁའི་འགྲམ་གྱི་འཚིག་ཇ་ཁང་ཆུང་ཆུང་དེ་ནས་བསྒྲགས་ཡོང་བའི་གྲགས་ཅན་གླུ་པ་ཇོན་ལེ་ནེན་(John Winston Lennon 1940-1974) གྱིས་གླུ་གཞས། “དམིགས་པ་ཞིག་གནང་དང་། སྟེང་ལ་ལྷ་ཡུལ་མི་འདུག འོག་ལ་དམྱལ་བ་མི་འདུག” ཅེས་པའི་སྒྲ་གདངས་རྒྱ་མཚོའི་རྦ་རླབས་དང་སྡེབས་ཏེ་ཐོས། སྙན་འཇེབས་གླུ་ཡིས་ཡིད་དབང་བཀུག་ཀྱང་། རང་ཉིད་ཀྱི་སྐབས་དེའི་འཚོ་བའི་ངང་ཚུལ་དང་མཐུན་པའི་གཞས་ཚིག་དེས་སེམས་པ་གདུངས་ཏེ་མིག་ཆུའི་ཐིགས་པ་རྡོག་པོ་རེ་རེ་ཟགས་ནས་ནུབ་ཀྱི་རྒྱ་མཚོ་ཆེན་པོ་དང་འདྲེས། ཇི་སྲིད་རྒྱ་མཚོ་ཆེན་པོ་གནས་ཀྱི་བར་དུ་བདག་གི་མིག་ཆུའི་ཐིགས་པ་དེ་ཡང་འཛད་པར་མི་འགྱུར་ངེས།
ཅིས་ན་དཔེ་མཛོད་འདི་དང་ངའི་མི་ཚེ་ཧྲིལ་པོའི་ལོ་རྒྱུས་ཟུང་དུ་འབྲེལ་ཡོད་ལ། དམ་པ་འཇིན་སི་མིད་ལགས་སོགས་ཀྱི་དྲིན་དུ་གཟོ་བའི་བྱ་བ་སྒྲུབ་པར་འོས་པ་གང་ཡིན་པ་ནི་མེས་པོའི་ཤུལ་བཞག་རྣམས་ལོ་རྒྱུས་ཀྱི་གོད་ཆག་ཁྲོད་དུ་གྲ་མ་ཉམས་གྲུ་མ་ཞིག་མེད་ཀྱང་སྙིང་པོའི་གསུང་རབ་ཉམས་པ་སོར་ཆུད་པ་བྱ་ཕྱིར་བསྐོར་མི་ཐུབ་པའི་མཚོ་དང་། བརྒལ་མི་ཐུབ་པའི་ལ་མེད་པས་རང་མི་རིགས་ཀྱི་སྤྱི་ནོར་ལྷག་ལུས་གང་ཡོད་རྣམས་སྲུང་སྐྱོབ་དང་། ཕྱི་རབས་པར་རྡོ་ལག་བརྒྱུད་བྱེད་ཐུབ་རྒྱུར་ངས་རྒྱ་མཚོ་ཆེན་པོའི་མདུན་དུ་སྨོན་ལམ་ཡང་དག་པ་དང་དམ་བཅའ་བཞག་པ་ཡིན།
གཏམ་ཉོག་ཚིག་གི་ལོ་མས་མ་སྒྲིབ་པར་དོན་གྱི་མདོ་ཁ་བཤད་ན། བོད་ཀྱི་ནང་བསྟན་དཔེ་མཛོད་ནི། བོད་ཀྱི་ཤེས་རིག་སྐྱོང་དར་སྤེལ་གསུམ་ལ་བཀའ་དྲིན་ཆེ་བའི་མཁས་དབང་འཇམ་དབྱངས་འཇིན་སི་མིད་མཆོག་གིས་སྤྱི་ལོ་༡༩༩༩ ལོར་གཉེར་གནང་བ་དང་། ནང་བསྟན་སྤྱི་དང་ཁྱད་པར་བོད་ཀྱི་ཆོས་རིག་གི་བང་མཛོད་ཆེན་མོ་ཞིག་ཡིན་ལ། དེའི་ཡིག་མཛོད་ནི་བོད་ཕྱི་ནང་གཉིས་སུ་བཞུགས་པའི་ལྷག་བསམ་རིམ་ཅན་གྲངས་ལས་འདས་པ་ཞིག་གི་ཡིད་ཆེས་དང་རེ་བ། རྔུལ་ཆུ་དང་ཟུངས་ཁྲག །དུས་ཚོད་དང་མི་ཚེ་སོགས་བློས་གཏོང་ཆེན་པོས་བསྐྲུན་པ་ལས་བྱུང་བ་དང་། དེ་ཡང་རང་རེ་ཕྱི་རབས་པ་ལ་བཞག་གནང་བའི་རིན་གྱིས་གཞལ་དུ་མེད་པའི་ཤུལ་བཞག་བླ་ན་མེད་པ་ཞིག་ཡིན།
འདས་པའི་མི་ལོ་ཉི་ཤུ་རྩ་ལྔའི་རིང་དཔེ་མཛོད་ཁང་འདིས་འཛམ་གླིང་གོ་ལ་ཧྲིལ་པོར་བོད་ཀྱི་ཆོས་དང་རིག་གནས་ཉམས་པ་སླར་གསོ་དང་མི་ཉམས་རྒྱུན་འཛིན་གྱི་རླབས་ཆེའི་བྱ་བ་བསྒྲུབས་ཡོད། དེ་ནི་མཁས་དབང་འཇིན་སི་མིད་ཀྱི་ཐུགས་བསྐྱེད་དང་། སྐྱེས་བུ་དམ་པ་རྣམས་ཀྱི་ཐུགས་སྨོན་འཕྲིན་ལས་ཀྱི་བྱིན་མཐུ། བོད་ཀྱི་རིག་གཞུང་ལ་ཤ་ཚ་རྒྱབ་སྐྱོར་གནང་མཁན་གྱི་གཏོང་ཕོད་ཕྱག་ཡངས་ཅན་གྱི་སྦྱིན་བདག་ཁག་གི་རྒྱབ་སྐྱོར། དེ་བས་ལྷག་བསམ་ཅན་གྱི་ལས་བྱེད་མང་པོ་ཞིག་གི་རང་ཉིད་ཀྱི་མི་ཚེ་གང་པོར་སྲི་ཞུ་རྣམ་དག་གྲུབ་པའི་འབྲས་བུ་ཞིག་ཡིན་པ་ལས། གློ་བུར་རླུང་འཚུབ་ཀྱིས་དེད་ཡོང་བའི་མི་འགའི་བྱས་རྗེས་ཤིག་ག་ལ་ཡིན་ཏེ་མིན་མོད།
སྤྱི་ཞིང་ལ་སྒེར་གཤོལ་རྨོས་པའི་དཔེ་ལྟར། ཉེ་བའི་ཆར་ཨ་རིའི་རོགས་དངུལ་གློ་བུར་དུ་ཆད་པར་ཁ་གཡར་ནས། འགན་འཛིན་དང་། ཁོ་པ་སྒེར་གྱིས་འདེམས་སྒྲུག་བྱས་པའི་འགན་འཛིན་ལྷན་ཚོགས་རེ་ཟུང་གིས་ས་འོག་དར་ཐག་གི་བྱེད་འབབ་རྐྱེན་ལས་དཔེ་མཛོད་ཀྱི་གྲངས་མཛོད་ཡོད་ཚད་ཨ་རིའི་སློབ་ཆེན་ཞིག་གི་འཛིན་སྐྱོང་འོག་ཏུ་གནས་རྒྱུར་ཐབས་ཇུས་གཏིང་བ་དང། འགན་འཛིན་ལྷན་ཚོགས་ཀྱིས་ཕན་འབྲས་གང་ཡང་མེད་པའི་བསམ་འཆར་བསྡུ་ལེན་ཡིན་སྐད་ཀྱི་དྲ་ཐོག་གི་ཚོགས་འདུ་ཡང་སེ་བསྐོངས། བགྲོ་གླེང་ཚིག་འགའ་ཤས་བྱས་མཚམས་ཚང་མ་མིག་ཧུར་ཧུར་བལྟ་བ་དང་ཤ་ཚ་མདོག་བྱས་རུང་དོན་དངོས་ཐོག་བོད་པ་ཚོའི་བསམ་འཆར་དང་ལེན་བྱེད་རྒྱུ་ལྟ་ཅི། ཚོགས་གཙོ་ལོ་རན་གྱིས་སྐྱ་ཐལ་ཐལ་གྱི་བཞིན་ན། འཛུམ་པ་ལྟར་སྣང་ཡང་མིག་འབྲས་ཟུང་ན་ཕྱོགས་ལྷུང་གི་འོད་སྐྱ་འཆར་བ་དེ་གཡོ་མེད་ཅེ་རེར་བལྟ་བཞིན། འདར་སིག་སིག་གིས་སྐད་གདངས་ང་རོ་འཇམ་པོས། ཁྱེད་རང་ཚོས་ཨ་སྒོར་ས་ཡ་བཅུ་ཐམ་པ་མ་རྩ་འཇོག་ཐུབ་ན་མུ་མཐུད་དེ་དཔེ་མཛོད་རང་སྐྱ་ཐུབ་པར་གནས་ཐུབ་པར་བསམ་གཞིགས་བྱེད་རྒྱུ་དང་། གལ་ཏེ་མ་ཐུབ་ན་ཁྱེད་རང་ཚོ་ཤེས་ཡོན་གྱི་བྱ་གཞག་གཞན་ལ་བཀྲ་ཤིས་བདེ་ལེགས་ཞུ་རྒྱུ་ཡིན་ཞེས་དང། ང་ཚོ་འགན་འཛིན་ལྷན་ཚོགས་ཀྱིས་དཔེ་མཛོད་འདི་ནུབ་ཕྱོགས་གཙུག་ལག་སློབ་ཆེན་ལ་གནས་ཐུབ་པ་ཞིག་བྱས་ན་ཕུགས་ཡུན་བརྟན་པ་དང་ཕན་ཐོགས་ཆེ་བ་ཡོད་ཅེས་མཛེས་མཚོན་དུ་བཤད། དེ་ནི་ཆུ་གཏེར་གྱི་ཚད་སྐྲ་རྩེས་འཇལ་བའམ། ནམ་མཁའི་ཁྱོན་ལ་མཛུབ་མོས་ཚད་གཞལ་བ་ལྟ་བུར་སྣང་བས་ཁྲེལ་དགོད་ཅིག་ཀྱང་འཆོར།
ཚོགས་གཙོའི་རྒྱུན་ལྡན་མིན་པའི་རྣམ་འགྱུར་ཡ་མཚན་ཅན་དེ་ཇི་ལྟར་བྱས་ཀྱང་གཏམ་དཔེར། བ་དེའི་ཉལ་སྟངས་ལ་བལྟས་ན་བེའུ་ལྡེམ་ཀྱོག་ཅིག་སྐྱེ་བར་ཐག་ཆོད་པ་ལྟར། སྐབས་དེར་ཁོ་མོའི་དིམ་པའི་མིག་ཟུང་ནས་ཧ་ཅང་གདུག་རྩུབ་ཀྱི་སྣང་བ་ཞིག་འབྱིན། བོད་མི་རིགས་ཀྱི་གནའ་བོའི་ལུགས་བཟང་གི་རྗེས་སུ་མཐུན་པའི་སྤྱོད་ཚུལ་ཅན་རྣམས་ནི་གང་ཡང་མི་ཤེས་པའི་རྨོངས་པར་རྩིས་ནས་ཚིག་རྩུབ་མོ་མཉན་པར་མི་འོས་པའི་གཏམ་དེ་དག་ཐོས་པ་ན་མདེའུ་བརྒྱ་ཕྲག་མང་པོ་དུས་གཅིག་ཏུ་སྙིང་གི་དཀྱིལ་ལ་ཕོག་པ་ལྟར་ན་ཟུག་ཆེ། ང་ཚོའི་ཚེ་གང་གི་བྱ་གཞག་ལ་དེ་མ་ཉིད་དུ་ཐག་གཅོད་ལས་སླ་པོར་བྱས་པ་ནི་ཇི་འདྲའི་བློ་ལ་མི་གཤོང་བ་ཞིག་མིན་ནམ།
དེ་ནས་ཉིན་གཅིག། གློ་བུར་དུ་ཡིག་མཛོད་ཀྱི་བདག་དབང་ཡོད་ཚད་བྱིའུ་ཁྲས་ཁྱེར་བ་བའམ་བྱ་གླག་གིས་ལུ་གུ་ཁྱེར་བ་བཞིན་ཧ་ཝར་ཊ་སློབ་གྲྭ་ཆེན་མོའི་ནང་ཚན་ཡན་ཅིང་༼པེ་ཅིན་གྱི་མིང་གི་རྣམ་གྲངས་ཤིག།༽ རིག་གཞུང་བསྟི་གནས་གཅིག་དང་མཉམ་ལས་བྱས་ཤིང། དེ་ཡང་དྲ་མཛོད་གཞི་རྐང་མ་སྟོང་ཙམ་ཞིག་གི་རྒྱབ་རྟེན་འོག་ཏུ་གནས་རྒྱུའི་ཐག་གཅོད་བྱས།
ལྷ་ཆོས་མི་ཆོས་གང་དང་ཡང་མི་མཐུན་པ་སྟེ། འཇིན་སི་མིད་ལགས་ཀྱིས་དངོས་སུ་བདམས་ཤིང་། དཔེ་མཛོད་ཀྱི་རྨང་གཞི་གདིང་དུས་ནས་ཡོད་པའི་ལོ་མང་ཉམས་མྱོང་དང་སྲི་ཞུ་ལྷག་བསམ་ཟོལ་མེད་ཅན་གྱི་ལས་བྱེད་པ་མང་པོ་ཞིག་བདུན་ཕྲག་གཅིག་གཉིས་ཀྱི་སྔོན་བརྡ་ཙམ་བཏང་ནས་བཙན་པོ་དབང་ཡོད་ཀྱིས་ལས་མཚམས་མ་འཇོག་ཐབས་མེད་ཡིན་ཞེས་འགན་འཛིན་གྱིས་སྤོབས་པ་ཆེ་ཉམས་དང་བཅས་ཏེ་མགྲིན་པ་གཟེངས་སུ་བཏེགས་ནས་བརྡ་སྤྲད།
དེ་ཐོས་མ་ཉིད་དུ་བདག་ཅག་ནི་རྔོན་པ་གཏུམ་པོ་མཐོང་བའི་རི་དྭགས་ཀྱི་ངང་ཚུལ་ལྟར་ཡིད་སྐྱོ་བ་དང་དངངས་པའི་ཚོར་སྣང་ཟུང་དུ་སྦྲེལ་ཞིང་། འདུས་བྱས་ཐམས་ཅད་ཀྱི་མཐའ་ནི་འདི་འདྲ་སྟེ། ཆོས་ཉིད་ལ་ངོས་ལེན་བྱེད་དགོས་ངེས་ཀྱང་། དྲང་བདེན་མིན་པའི་བྱ་ལུགས་དེས་དབང་མེད་དུ་ཡིད་ལ་གདུང་བ་གཟུགས་ཅན་བཞིན་ཏུ་གྱུར་པ་དང་། གློ་བུར་གྱི་བྱུང་རྐྱེན་དེས་བག་མི་ཕེབས་ཤིང་ཧ་ལས་ཧོན་ཐོར་དུ་གྱུར།
ཅིས་ན་དཔེ་མཛོད་ཁང་ལ་ཕྱི་ནང་གི་འགྲོ་གྲོན་མ་དངུལ་གསོག་འཇོག་ཡོད་ལ་བོད་པ་ཚོས་འོས་འགན་དེ་མུ་འཐུད་དེ་ཁྱེར་ཐུབ་ཀྱི་ཡོད་ནའང་། མ་དངུལ་དེས་ཡིག་མཛོད་བརྟན་སྲུང་བྱེད་སྐད་ཀྱིས། དུང་དཀར་གྱི་ཁོག་པ་འབུ་ཡིས་ཁེངས་ཞེས་པ་ལྟར། ལྐོག་ཏུ་བྱ་བ་བརྩམས་ཤིང་མཐར་རང་མཚང་བག་ཚ་བ་མེད་པར་མངོན་སུམ་དུ་བསྟན། དེ་བར་ཉེས་མེད་རྣམས་ཀྱི་མགོ་ལ་ཁོག་མ་གཡོགས་པ་ལྟར་བཞག ད་བཟོད་བདག་ཅག་ནི་ལྐུགས་པས་སི་པན་བཟོས་པ་བཞིན་གྱུར།
རིམ་པར་བསམ་བློ་གཏོང་གིན་དང་གྲོས་དྲིས་ཀྱིན། ཡིག་མཛོད་འདི་སྔར་བཞིན་གནས་རྒྱུར་རིས་མེད་སྐྱེས་ཆེན་ཁག་གིས་བཀའ་སློབ་ལམ་སྟོན་ཁོ་ནར་མི་བརྟེན་མཐུ་མེད་དུ་གྱུར། འཇིན་སི་མིད་ལགས་ཀྱི་ཐུགས་འདྲིས་ཡོད་མེད་ལ་མ་ལྟོས་པའི་སྐྱེས་ཆེན་ཡོངས་ལ་འབོད་བསྐུལ་ཞུས། ཁོང་རྣམ་པས་དུས་ཐོག་ཏུ་ཐུགས་འཚབ་ཆེ་བའི་ལམ་སྟོན་དང་རྒྱབ་གཉེར་གྱི་བཀའ་ཤོག་གསུང་འཕྲིན་ཕྱག་བསྟར་མ་དང་བཅས་པ་གནང་བ་རྣམས་གཅིག་ཏུ་བསྡུས་ནས་རེ་བ་དང་གདེངས་ཚོད་ཟབ་མོས་འགན་འཛིན་ལྷན་ཚོགས་ལ་ལན་གཅིག་ལན་གཉིས་མིན་པར་དཔེ་མཛོད་འདི་བོད་པ་རྣམས་ལ་རྩིས་སྤྲོད་གནང་རྒྱུའི་སྙན་ཞུ་ཕུལ་རུང་ཁོ་པ་ཚོས་གནད་དུ་ཕིག་པའི་ལན་ལྟ་ཅི་སྣང་འཇོག་དང་གུས་ཞབས་ཀྱི་དྲི་མ་དང་བྲལ་བར་རྒྱ་མཚོའི་ནང་རྡོ་གཡུགས་པ་བཞིན་དུ་གར་སོང་ཆ་མེད་དུ་གྱུར།
མཐའ་གཅིག་ཏུ་འགན་འཛིན་ལྷན་ཚོགས་རྣམས་ལ་ཟུར་ཟ་བ་ཡང་མ་ཡིན་ཏེ། ཁོང་རྣམ་པ་ལ་ལས་ནི་བོད་ཀྱི་ཆོས་རིག་ལ་གཙིགས་ཆེར་གཟིགས་ཏེ་བོད་རིག་པའི་སློབ་མ་མང་པོ་ཞིག་གསོ་སྐྱོང་གནང་ནས་དར་སྤེལ་རྒྱུན་འཛིན་བྱས་ཡོད་ལ། ལ་ལས་ནི་བོད་ཀྱི་སྐད་ཡིག་དང་རིག་གཞུང་ལ་སྐུ་ཚེ་གང་པོར་འབད་བརྩོན་གནང་བས་ང་ཚོ་བོད་པ་སྤྱི་ལས་མཁྱེན་རྒྱ་ཆེ་བ་ཡོད་པས་ང་ཚོའི་མི་རིགས་ལ་དྲིན་ཆེ་བར་ཁུམས། ཡིན་ནའང་ཕྱོགས་གཞན་ཞིག་ནས་བཤད་ན་ཁོ་པ་ཚོར་ནང་ཆོས་ཀྱི་དྲི་གཡའ་བྲལ་བ་དང་། ལས་ཀྱི་རྣམ་པར་སྨིན་པ་མི་ཤེས་པ། ཨ་རིའི་ལྟ་བ་རང་ཆས་ལ་ཡོད་པ་བཅས་ལ་བརྟེན་ཉོམ་ཆུང་ལ་ཐུབ་ཚོད་རྐང་བརྐྱང་ལག་བརྐྱང་བཤད་པ་ནི་སྙིགས་དུས་ཀྱི་རང་མཚང་འབའ་ཞིག་ཏུ་ཟད་པས་འཁང་བ་ཙམ་ལས་ཅི།
ཅིས་ན་དཔེ་མཛོད་དེ་སློབ་ཆེན་གྱི་མིང་འབྲེལ་འོག་དྲ་མཛོད་Archive ཙམ་ཁོ་ན་ཞིག་རྐང་མ་སྟོང་ཙམ་དུ་བཟུང་ནས་འཕྲུལ་ཆས་ལག་རྩལ་ཁོ་ནར་སྐྱབས་བཅོལ་ན། འགྲོ་དོན་སྔར་ལས་ཇེ་ཆུང་དུ་འགྲོ་རྒྱུར་ངེས་པ་སྟེ། མར་ངོའི་ཟླ་བ་ལ་ཆས་པ་བཞིན་དུ་གོང་འཕེལ་གྱི་དཀར་ཆ་བྲི་བ་དང་། རྒྱ་ཆེའི་ཀློག་པ་པོ་ཀུན་གྱིས་སྔར་བཞིན་དུ་མཇལ་བར་དཀའ་བ། མ་འོངས་པར་ཡང་སློབ་ཆེན་དེ་དག་གི་དགེ་སློབ་ལས་གཞན་ལ་ཐེ་ཇུས་རྩ་བ་ནས་མེད་པར་མི་འགྱུར་བའི་ངེས་པའང་གཏན་ནས་མེད། འགན་འཛིན་ལྷན་ཚོགས་ནས་ཧ་ཝར་ཊ་ཡན་ཅིང་གི་ལོ་རྒྱུས་ཤོག་ལྷེ་གཅིག་ནང་ཁུལ་དུ་བཀྲམ་སོང་བ་ནི་ཁོ་པ་ཚོའི་འདོད་དོན་དེའི་ནང་བསྡུས་པ་ཡིན་ཞེས་པ་ལྟ་བུ་ཞིག་མངོན།
དུས་དེ་ཤེད་དུ་འགན་འཛིན་ལྷན་ཚོགས་ཁྲོད་དུ་བོད་མི་གཅིག་རང་ཡོད། ཁོང་ནི་རི་དྭགས་དབུས་སུ་འཛུམ་དྲུག་རྒྱས་པའི་སྟག་ངར་མ་འགྱིང་པ་ཞིག་དང་འདྲ་བར་དཔའ་ཞིང་རྟུལ་ཕོད་པའི་ཁོ་ལག་རྫོགས་པ་ཞིག་ཡོད། ཚོགས་འདུའི་སྐབས་སུ། ཁོང་གིས་དཔེ་མཛོད་ཁང་རང་རྐྱ་ཐུབ་པའི་བདག་དབང་སྲུང་སྐྱོབ་ཆེད། བློ་གཟུ་བོར་གནས་པ། བློ་གྲོས་ཀྱི་འཇུག་པ་ཡངས་པ། བརྟགས་པའི་གཏམ་སྨྲ་བ་སྟེ་བོད་ཀྱི་ཆོས་རིག་སྲུང་བ་ལ་སྙིང་སྟོབས་ཀྱི་གོ་ཆ་བཙན་པའི་མཆེ་སྡེར་བསྒྲད་ཅིང་། བདེན་གཏམ་གསོང་པོའི་ཚིག་གིས་ང་རོ་ལན་མང་པོར་བསྒྲགས་རུང་། ཚོགས་འདུའི་ནང་བོང་བུའི་རྣ་བར་གསེར་ལྡུད་པ་དང་འདྲ་བར་ཕན་འབྲས་གང་ཡང་མ་ཐོན། དེ་འདྲ་ཡིན་ཡང་དུས་རབས་འདི་འདྲའི་ནང་། ཁོང་ལྟ་བུ་ཞུམ་པ་མེད་པའི་སྙིང་སྟོབས་ཀྱིས་རང་གི་རིག་གཞུང་ལ་འགན་ཁྱེར་བ་མཐོང་ཚེ་ཡིད་དགའ་བ་དང་། བདེན་པ་བདེན་ཐུབ་བྱེད་རྒྱུ་ནི་འགྲོ་བ་མི་ཡི་མཆོག་ཏུ་གྱུར་བ་སྣང་བས་ཁོང་ལ་དཀྱེལ་ཆེའི་ཀུན་སྤྱོད་དེ་འདྲ་ལྡན་པར་བདག་ཅག་དགའ་བ་དང་དང་བ་ལྷད་མེད་དུ་སྐྱེས།
ཁོ་པ་ཚོས་འཇིན་སི་མིད་ལགས་ཀྱི་དགོངས་གཞི་འདི་ཡིན་ཞེས་ཁ་ནས་བཤད་ཀྱང། དོན་གྱི་འབྲས་བུ་དབེན་པའི་སྟོང་གླེང་ཁོ་ན་སྟེ། དམ་པ་འཇིན་སི་མིད་ལགས་ཀྱི་ཞལ་སྔ་ནས། ནང་བསྟན་དཔེ་ཚོགས་ལྟེ་གནས་ཀྱི་གསུང་རབ་འདིའི་བདག་པོ་དངོས་ནི་བོད་ཀྱི་ཆོས་དང་རིག་གཞུང་འཛིན་པ་པོ་བོད་པ་རྣམས་ཡིན་གསུངས་ནས། དཔེ་ཆ་རྣམས་བརྒྱ་ཆ་བརྒྱད་བཅུ་ཙམ་དོན་གྱི་བདག་པོ་བོད་པ་རྣམས་ལ་ཕྱིར་སྤྲོད་གནང་ཡོད། མ་ཟད་སྐུ་འདའ་ཁའི་ཞལ་ཆེམས་ནང་དུའང་། ཚེ་གང་གཅེས་ཉར་གནང་བའི་རྩ་ཆེའི་དཔེ་ཆ་རྣམས་ཀྱང་མཁས་དབང་ཨ་ལག་གཟན་དཀར་རིན་པོ་ཆེའི་ཕྱག་ཏུ་འཇོག་གནང་མཛད་པ་ལས། གཞན་དུ་ནུབ་ཕྱོགས་པ་སུ་ཞིག་གིས་ཀྱང་ལག་ཏུ་གཏད་གནང་མེད། དོན་དེ་ལས་དཔེ་མཛོད་ཀྱི་བདག་པོ་སུ་ཡིན་མིན་ཐད་རྩོད་མེད་ས་རིས་ཐང་གསལ་ཡིན་པ་མ་ཟད། འཇིན་སི་མིད་ལགས་ཀྱིས་བོད་ཀྱི་རིག་གཞུང་ལ་གཙིགས་ཆེ་ཇི་ཙམ་གནང་བའང་ལེགས་པར་མཚོན་ཡོད། ༼དམ་པའི་རང་གཤིས་རྨད་དུ་བྱུང་བ་དང་ཁོང་གི་མཛད་རྗེས་རྣམས་ཞིབ་པར་མཁྱེན་འདོད་ན། འཇམ་དབྱངས་འཇིན་སི་མིད་ཀྱི་རྣམ་ཐར་པདྨ་དཀར་པོ། ཞེས་པ་ལ་གཟིགས་གནོངས།༽
དུས་རབས་འདིར་ཡ་རབས་དྲ་མའི་སྲོལ་གྱི་ལག་ལེན་ལྟ་ཅི་གོ་བ་ལོན་མཁན་ཧ་ལམ་མེད་པ་ལྟ་བུར་གྱུར་ཟིན་འདུག། ཉམ་ཆུང་ལ་འགྲོ་ཚོད་ཁྱད་གསོད་དང་། ལྷག་པར་ལོ་ངོ་སྟོང་ཕྲག་མང་པོའི་ལོ་རྒྱུས་ལྡན་པའི་བོད་མིའི་རིག་དངོས་ཤུལ་བཞག་མི་བདག་བདག་ཏུ་བཟུང་བ་མཐོང་བས་ན། དེ་དག་བསམ་བློ་འཁོར་བ་ཙམ་གྱིས་རང་ཉིད་དྲང་བདེན་གྱི་དྲི་མས་མ་འགོས་པའི་སྐྱི་གཡའ་བའི་སྤྱི་ཚོགས་ཤིག་གི་ནང་གནས་ཡོད་པ་གཞི་ནས་ཤེས། ཚོགས་གཙོ་དང་འགན་འཛིན་ལྷན་ཚོགས་ཀྱི་འབྲེལ་བ་ནི་རྒྱུན་ལྡན་ཙམ་མ་ཡིན་པར་ནང་ཁུལ་ལྟོ་ཚང་ལྟ་བུ་ཡིན་པས། ང་ཚོར་ཞིབ་དཔྱོད་ལྟ་ཅི་དྲང་ཚུགས་ཀྱི་རྣམ་པ་ཙམ་ཡང་མེད་པས་ང་ཚོའི་འབད་པ་སྟོང་ཟད་དུ་གྱུར་ཅིང་། དྲང་སེམས་བྲལ་བའི་མི་དེ་ཚོས་ཡིན་མིན་ཕྱིན་ཅི་ལོག་པ་དང་ལས་རྒྱུ་འབྲས་ལ་རྡོག་རོལ་གཏོང་བའི་ཚུལ་འདི་ནི། ཡིད་སྐྱོ་བའི་ཟློས་གར་བསྟན་བཅོས་ནང་གི་ལས་ངན་གྱི་འཁྲབ་ཚན་ལེའུ་ཞིག་དང་ཁྱད་པར་གཏན་ནས་མ་མཆིས།
དམ་པ་འཇིན་སི་མིད་ཀྱི་བཀའ་དྲིན་ལྷག་པར་དྲན། དེའི་ཚེ་བསམ་བློར། ཁོ་པ་ཚོས་དབང་ཤེད་ཀྱིས་ཉེས་མེད་ཀྱི་མི་འགའ་ཤས་ལ་ཐུབ་ཚོད་བཤོད་སླ་རུང། བདེན་པ་ནི་ཇི་སྲིད་བར་བདེན་པ་རང་ཡིན་གྱི། གོ་སྐབས་འདི་དང་བསྟུན་ནས་འགྱེལ་ས་དེ་ཀ་ནས་ངེས་པར་དུ་ཡར་ལངས་རྒྱུའི་བསམ་བློའི་གྲ་སྒྲིག་བྱས། བོད་ཀྱི་གཏམ་དཔེར། ཁ་བ་ཉིན་མཚན་བཅོ་བརྒྱད་བབས་ཀྱང་། བྱིའུ་ཅོ་ཀའི་སྐད་ལ་འགྱུར་བ་མེད་པ་ལྟར། གནས་སྐབས་བར་ཆད་དང་ཡིད་མུག་ཉམས་སུ་མྱོང་དགོས་པར་ཐེ་ཚོམ་མ་མཆིས་ཀྱང་། བློ་རིག་བསྒྲིམས་ནས་བོད་ཀྱི་ཆོས་རིག་ཆེད་དུ་རང་འཁྲི་ཁུར་བ་ནི་ཡིད་ལ་བརྣགས་པའི་རེ་བ་རྫོགས་པ་ཡིན་ལ་གལ་ཏེ་མ་འགྲུབ་ནའང་ཕྱིས་འགྱོད་པར་བྱ་བ་གང་ཡང་མེད་སྙམ།
གཞན་དོན་རྒྱ་ཆེན་པོ་ཞིག་ལ་ཁ་གཡར་ནས་ཕུགས་སུ་རང་དོན་ཁོག་བཅུག་བྱེད་མཁན་མི་ཉུང་བ་མིན་པས་དེ་མུར་ཡིན་ལུགས་བསེད་བཀྲོལ་ཀྱི་ཡི་གེ་ཞིག་འཇིན་སི་མིད་ལགས་ཀྱི་ཞལ་ཆེམས་དང་བཅས་པར་འགན་འཛིན་ལྷན་ཚོགས་ལ་བརྒྱུད་བསྐུར་བྱས། དེ་ནས་སླར་དྲ་ཐོག་ཚོགས་འདུ་ཤིག་བསྐོངས། ནམ་རྒྱུན་ཉམ་ཆུང་ངོ་ཚ་ཅན་གྱི་བོད་པ་ཚོས་བསམ་བརྗོད་ལས་འདས་པའི་བསམ་འཆར་རྣམས་ཐོས་རྗེས་ཁོ་པ་ཚོ་སྐྱེངས་ཤིང་གཏམ་ལན་འཇལ་བའི་སྤོབས་པ་དང་བྲལ། འགན་འཛིན་ལྷན་ཚོགས་ཀྱི་ཚོགས་གཙོ་མའི་རིད་ཅིང་དཀར་བའི་ངོ་གདོང་དེ་སྨུག་སིང་སིང་དུ་གྱུར་ནའང། ཕྱི་ཚུལ་དུ་རྣམ་འགྱུར་ཡག་མདོག་བྱས། དེ་ནས་མི་རིང་བར་དཔེ་དཀོན་རྣམས་ཕྱིར་སློག་བྱེད་དགོས་ཁེལ།
ཡིན་རུང་འགན་འཛིན་གྱིས། སྐྱ་ཕྱེད་སྔོ་ཕྱེད་ཀྱི་སྐྲ་ལོ་ཟིང་ཞིང་། སྔོ་མིན་སེར་མིན་གྱི་མིག་ཟུང་གཏད་ནས། འོ། འཇིན་ལགས་ཀྱིས་དཔེ་དཀོན་སྨར་བཤུས་གནང་བའི་དེབ་རྒྱབ་ཤ་ལྗང་ཁུ་རྣམས་ནི་ཝེའི་ལི་ཡིག་གཟུགས་ཡིན། དེ་ནི་ནུབ་ཕྱོགས་པ་ཁོ་ནའི་ཤེས་ཡོན་ཞིབ་འཇུག་ཆེད་དུ་རེད། བྱས་ཙང་དེ་ཁོང་གི་ཞལ་ཆེམས་ནང་ཚུད་མེད་ཅེས་གཏམ་ཆེན་བཏང་ནས་ཕྱིར་སྤྲོད་མ་བྱས། འཇིན་ལགས་ཀྱི་ཞལ་ཆེམས་གཉིས་པ་ཞིག་གཏན་ནས་མེད་ཀྱང་རང་སྣང་གང་དྲན་གྱིས་འགན་འཛིན་ལྷན་ཚོགས་ཀྱིས་འོས་ཤོག་འཕངས་ནས་ཕྱག་དེབ་ལྗང་ཁུ་རྣམས་དང་རིན་གོང་ཆེ་བའི་བོད་རིག་པ་དང་འབྲེལ་བའི་ཕྱག་དེབ་འགའ་རང་དགར་བདག་བཟུང་བྱས། བོད་ཀྱི་ཆོས་དང་རིག་གཞུང་གིས་མི་ཚེ་སྐྱེལ་བའི་ནུབ་ཕྱོགས་པ་ཚོས་འདི་ལྟ་བུའི་ཡིད་རྟོན་མི་རུང་བ་དཀར་ནག་ཕྱིན་ཅི་ལོག་གི་ལས་ཀ་བྱས་ཡོང་བསམ་པ་ཡེ་ནས་མེད། ཚོགས་འདུར་བགྲོ་གླེང་ཇི་ཙམ་བྱས་པ་དེ་ཙམ་གྱིས་ལུས་སེམས་སྐྱུར་མོར་བཏང་། ཇི་ལྟར་ཡང་ཁོ་པ་ཚོས་བྱེད་སྤྱོད་ཇི་ལྟར་བརྩམས་པ་ནི་གྲགས་པ་ངན་པ་གྲིབ་མ་བཞིན་འགྲོགས་རྒྱུ་དང་མཐར་རང་ཉིད་བརླགས་པར་བྱེད་པའི་གཤེད་དུ་གྱུར་བ་མ་ཡིན་ནམ།
གཏམ་བརྒྱ་བཤད་ཀྱི་སྙིང་པོ་དོན་དང་། ཞོ་བརྒྱ་དཀྲོགས་ཀྱི་སྙིང་པོ་མར་ཟེར་བ་ལྟར། བོད་པ་རང་ཉིད་ལ་དབང་བའི་ཤུལ་བཞག་རྒྱུ་དངོས་རྣམས་བོད་པ་རང་གིས་རྩིས་ལེན་ངེས་པར་དུ་བྱེད་ཐུབ་པ་བྱེད་རྒྱུར་ཡིད་བཅས། ནུབ་ཕྱོགས་ཤེས་ཡོན་ཅན་གྱི་རྒྱལ་ཁབ་འདིར་དྲང་ཚུགས་དང་བཏང་སྙོམས་བྱེད་མཁན་གྱི་མི་བཟང་གཅིག་ཀྱང་མེད་པ་ག་ལ་སྲིད། གཞན་ཡང་བོད་ཀྱི་ཆོས་དང་རིག་གཞུང་ནི་བོད་པ་རང་ཉིད་ཀྱིས་དུས་རབས་ཀྱི་ཆབ་སྲིད་དང་དཔལ་འབྱོར་སོགས་རྐྱེན་ངན་གང་གི་སྐབས་སུ་ཡང་ལོ་ངོ་སྟོང་ཕྲག་དུ་མའི་རིང་བགྲོད་ལམ་སྲུང་སྐྱོབ་བྱས་ཡོད་ན། ད་ལྟ་ཡར་རྒྱས་འགྲོ་བཞིན་པའི་དུས་རབས་འདིར་སྔར་བཞིན་ང་ཚོ་རྗེས་འཇུག་རྣམས་ཀྱིས་དམ་པ་གོང་མ་རྣམས་ཀྱིས་ཕེབས་པའི་བགྲོད་ལམ་དེར་སྔ་བསྟུད་མཇུག་སྐྱོང་མི་ཐུབ་པ་ཞིག་ག་ལ་ཡོད་སྙམ་པ་སྙིང་ལ་བཅགས་པས་སྙིང་སྟོབས་ཀྱི་སྒུལ་ཤུགས་ཀྱང་ཆེར་བསྐྱེད།
ལས་རོགས་རྣམས་ནི་གཅེན་གཅུང་ལྟ་བུའི་མཛའ་བཤེས་ཀྱིས་བཅིངས་པའི་ཐོག་གཅིག་བློ་གཅིག་བསྟན་གྱིས་ཁ་བརྡ་བྱེད་པ་སོགས་སྐབས་འདིར་མེད་དུ་མི་རུང་བའི་ར་མདའ་བཟང་པོར་གྱུར་བ་དང་། དཔེ་མཛོད་འདི་ཉིད་བོད་པ་རང་ཉིད་ཀྱིས་སྲུང་སྐྱོབ་ཆེད་དུ་རང་རང་འཁོས་བསྟུན་གྱི་ཐབས་ཤེས་སྣ་མང་འཚོལ་བཞིན་པའི་སྐབས་དེར། འུ་ཅག་བོད་མིའི་ཉི་ཟླ་སྐར་གསུམ་ལྟ་བུའི་སྐྱེས་ཆེན་༧རྒྱལ་དབང་ཀརྨ་པ་ཨོ་རྒྱན་འཕྲིན་ལས་རྡོ་རྗེའི་ཞབས་ཀྱི་ཞལ་སྔ་ནས་དང་། ཨ་ལག་གཟན་དཀར་རིན་པོ་ཆེའི་ཞལ་སྔ་ནས་དང། སྐྱབས་རྗེ་མཁས་དབང་ཟམ་གདོང་རིན་པོ་ཆེའི་ཞལ་སྔ་ནས་ཀྱིས་དབུས་སྐྱེས་ཆེན་ནམ་མཁའི་སྐར་ཚོགས་ལྟ་བུས་གཟིགས་བསྐྱངས་བླ་ན་མེད་པ་ཐོབ་པ་ནི་བསོད་ནམས་ཀྱི་དཔལ་དང་རྒྱབ་རྟེན་ཧ་ཅང་ཆེ་བར་སྙེམས།
༧རྒྱལ་དབང་ཀརྨ་པ་ཨོ་རྒྱན་འཕྲིན་ལས་རྡོ་རྗེའི་ཞབས་ཀྱི་ཞལ་སྔ་ནས། བོད་ཀྱི་ནང་བསྟན་དཔེ་ཚོགས་འདི་རང་རྐྱ་ཐུབ་པར་གནས་པ་དང་དེ་ཡང་བོད་པ་རང་ཉིད་ཀྱིས་འཛིན་སྐྱོང་བྱེད་ཐུབ་རྒྱུར་འབད་བརྩོན་བྱེད་དགོས། ཞེས་ལན་གཅིག་མིན་པར་བཀའ་སློབ་སྤྱི་བོའི་རྒྱན་དུ་སྩལ་ཞིང་། དེར་མཐུན་རྐྱེན་གང་ཐུབ་སྦྱོར་རྒྱུར་ཞལ་བཞེས་ཟབ་མོའི་བཀའ་དྲིན་གྱིས་བསྐྱངས་པ་ནི་སྐོམ་པར་བདུད་རྩི་བྲན་པ་བཞིན་དུ་སྤྲོ་བ་འཕེལ། དེ་བཞིན་དུ་རིས་སུ་མ་ཆད་པའི་སྐྱེས་ཆེན་དམ་པ་དུ་མས་བཀའ་སློབ་བཟང་པོ་ཡང་ནས་ཡང་དུ་སྤྱི་བོའི་རྒྱན་དུ་ཕེབས་པ་ནི། རྒྱུགས་ཆུ་དྲག་པོའི་ནང་དུ་ལྷུང་བའི་ཉམ་ཐག་གི་སྲོག་ཆགས་གང་ཞིག་སྲོག་སྐྱབས་སྡོང་དུམ་ཕྲད་ནས་འཆི་བའི་འཇིགས་པ་ལས་ཐར་བ་དང་འདྲ་བར་རབ་ཏུ་དགའ་བའི་ཚད་མར་གྱུར།
ལྷག་པར་སྐྱབས་རྗེ་ཟམ་གདོང་རིན་པོ་ཆེའི་ཞལ་སྔ་ནས། འཇིན་སི་མིད་ཀྱི་བཀའ་དྲིན་ནི་ང་ཚོ་བོད་པ་ཚོས་གསོལ་ཚར་ཐབས་མེད་ལ། དཔེ་མཛོད་འདི་ངེས་པར་དུ་བོད་ཀྱི་ཆོས་དང་རིག་གཞུང་ཆེད་དུ་མི་ཉམས་རྒྱུན་འཛིན་བྱེད་དགོས་ངེས་ཡིན། འཇིན་སི་མིད་ཀྱི་དྲན་རྟེན་དཔེ་མཛོད། ཅེས་པ་ཞིག་འཛུགས་རྒྱུར་མིང་གདགས་པར་མཛད་ཅིང་བཀའ་སློབ་རྨད་དུ་བྱུང་བ་སྩལ་ནས་མངོན་པར་དབུགས་དབྱུང་། ལས་འགན་ཡོངས་རྫོགས་བོད་པ་རང་ཉིད་ཀྱིས་འཁྱེར་དགོས་པའི་བཀའི་ཅོད་པན་སྤྱི་བོར་ལྷུང་བས་ནི་བསྐལ་བ་བཟང་སྟེ་བསྟན་པ་དང་འགྲོ་བའི་ཕན་བདེ་སྒྲུབ་པར་རྔོ་ཐོགས་ན་དཀའ་བ་ཇི་ཙམ་འཕྲད་ཀྱང་ཇི་སྲིད་འཚོའི་བར་དྭངས་གཙང་ལྷད་མེད་ཀྱིས་འདི་ཙམ་གྱི་བྱ་བའི་ཁུར་ངེས་པར་བཟོད་བསམ་པའི་སྙིང་སྟོབས་བསྐྱེད་པ་དང། གང་ལྟར་ཡང་མཚོ་ལ་བསྐམ་རྒྱུ་དང་རྡོ་ལ་རུལ་རྒྱུ་ཡོད་ཀྱང་མི་རིགས་ལ་ལྷག་བསམ་རྣམ་པར་དག་པས་སྲི་ཞུ་སྒྲུབ་པའི་བསམ་པ་ནི་ཤི་ཡང་རྡོ་ལ་རི་མོ་བཞིན་གྱུར་ངེས་ཡིན་པར་ཐེ་ཚོམ་ཅི།
དེ་ཡི་ཕྱིར་དཔེ་མཛོད་འདི་འཇིན་སི་མིད་ལགས་ཀྱི་ཐུགས་བསྐྱེད་ཇི་བཞིན་གནས་ཐུབ་པར་གཞི་རྩའི་དམིགས་ཡུལ་རྒྱུན་བསྐྱངས་རྒྱུ་དང་། ཤེས་ལྡན་མི་སྣ་སྐྱེད་སྲིང་། དཔེ་རྒྱུན་དཀོན་རིགས་འཚོལ་བསྡུ། ཞིབ་འཇུག་གི་རིན་ཐང་གོང་མཐོར་བཏང་ནས་ཡིག་མཛོད་སྔར་བས་རྒྱ་སྐྱེད་གཏོང་བ་སོགས་སྤྱི་ལ་ཕན་པའི་བྱ་གཞག་མདོར་ན་བྱ་བ་བྱས་ཟིན་པ་ལས་ད་དུང་བྱ་རྒྱུ་མང་བ་ལྷག་ཡོད་པ་རྣམས་མཇུག་སྐྱོང་རྒྱུ། ལྷག་པར་འཇིག་ལ་ཉེ་བའི་མཚམས་སུ་སླེབས་པའི་བོད་མི་རིགས་ཀྱི་སྐད་ཡིག་ཆེད་དུ་དམིགས་བསལ་ཤེས་ཡོན་གྱི་བསྟི་གནས་ཤིག་ཏུ་བསྒྱུར་ནས་ཕུལ་བྱུང་གི་ནང་ཆོས་བོན་དང་བཅས་པའི་རིག་གཞུང་འཛིན་སྐྱོང་སྤེལ་གསུམ་ཇི་སྲིད་འཁོར་བ་མ་སྟོང་གི་བར་དེ་སྲིད་གནས་ཐུབ་པའི་ཆེད་དུ་དམིགས་ཡོད།
མདོར་ན་འདི་ལྟ་བུའི་བྱ་གཞག་བསྒྲུབས་པ་ནི། ང་ཚོར་མཚོན་ན་ཧ་ཅང་ལྕི་དྲགས་པའི་འགན་ཁུར་ཞིག་ཡིན་ནའང་གང་ལྟར་བསླུ་མེད་མཆོག་གསུམ་ལ་བློ་ཕུག་གཏད་ནས་ལས་འབྲས་དང་རྟེན་འབྲེལ་བསླུ་མེད་ཀྱི་བསམ་པའི་སྒོས་བཟང་པོ་ལ་འབད་པས་སྨོན་པ་ཇི་བཞིན་འགྲུབ་པར་ཡིད་ཆེས་ཡོད།
དེ་ནི་མི་རིགས་ལ་བཅངས་པའི་ལ་རྒྱ་དང་། བོད་བརྒྱུད་ནང་བསྟན་ཡོངས་ལ་ལེགས་སྐྱེས་ཕུལ་བའི་དོན་སྙིང་ལྡན་པའི་མི་ཚེ་ཞིག་ཡིན་པ་ལགས་ན་ཕྱོགས་བཅུར་བཞུགས་པའི་རང་སྡེའི་རིགས་རྣམས་ཀྱིས་མཐུན་གྱུར་འཕྱར་བ་གྲུ་འདེགས་ཅིས་ཀྱང་འཚལ་ཞེས་འབོད་བསྐུལ་དང་དུས་ནམ་ཡང་མི་གཡེལ་བའི་སྡོང་གྲོགས་མཛད་པར་མཁྱེན་མཁྱེན་ཞེས་གསོལ་བ་ལགས།
མཇུག་ཏུ། ལོ་རྒྱུས་འདིའི་ཐོག་མཐའ་བར་གསུམ་དུ་དཔེ་མཛོད་ཀྱི་སྔ་ཕྱིའི་བྱུང་བ་དངོས་དང་ཞར་བྱུང་འཕྲོས་དོན་རྣམས་འཆད་པ་མ་གཏོགས་ལས་ཀྱི་སྣེ་མོ་བ་ཚོར་ཁོང་འཁྲུག་པའི་ངན་སྨྲས་དང་ཕོག་ཐུག་འཆོར་བའི་རིགས་མ་བྱུང་བར་གཟབ་ཁུལ་ལགས་ཀྱང་ཚིག་འགའ་ཐལ་ཆ་བྱུང་ན་བདག་གི་ཀུན་སློང་གཙང་མ་ལ་འཁྱོགས་བཤད་མི་གནང་བར་བཟོད་པར་གསོལ་ལོ།
དེ་འདྲ་ཞིག་ལ་མགོ་བོ་དགྱེ་ནས་བལྟ་སྐབས། རྒྱ་མཚོ་ཆེན་པོར་གསེར་མདོག་གི་ཉི་འོད་འཕྲོས་ཤིང་། ལྷག་རླུང་ཤུར་ཤུར་དུ་ལྡང་། མཚོ་བྱ་རྣམས་ག་ལེར་ཚང་མལ་དུ་ལོག་ཟིན། གཡས་གཡོན་གྱི་ཆུ་རྐྱལ་བ་རྣམས་མཐོང་སར་མི་འདུག།ཟོར་བ་དང་འདྲ་བའི་ཚེས་བརྒྱད་ཆུ་ཤེལ་དབང་པོ་གསལ་ལ་མི་གསལ་ཞིག་ཁོ་མོའི་སྐྱོ་གྲོགས་སུ་ལྷགས་པ་དང་འདྲ་བར་མཁའ་ལ་འཆར་འདུག ངས་མཆི་ཞགས་འཁོར་བའི་མིག་གཉིས་པོས་མཐའ་མི་མངོན་པའི་རྒྱ་མཚོ་ཆེན་པོར་རྒྱང་ལྟ་ཞིག་བྱས། རབ་རབ་ཞིག་མཐོང་། སེམས་ཁོང་གི་སྐད་ཆ་ཞུས་ན་ཞུས་ཚོད་མི་འདུག ཁ་སྐོམ་གྲོད་ཁོག་ཡང་ལྟོགས། དེ་ལས་ནང་ལ་ལོག་ན་དགའ་བསམ་གྱིན་མཚོ་ཁ་ནས་བྲལ། མཐར་ཇི་བྱུང་ཁྱེད་རྣམས་ལ་མུ་འཐུད་དེ་གླེང་ཆོག
བདག་ཅག་གིས་ལྷག་པའི་བསམ་པ་རྨ་མེད་པས་ཇི་ལྟར་བརྩམས་པའི་དམ་བཅའ་རྣམས་དཔྱིས་ཕྱིན་པར་འགྲུབ་པར་གྱུར་ཅིག་གུ །།
